Month: October 2018

Баянзүрх дүүргийн наймдугаар хороонд өрхийн амьжиргааг дээшлүүлэх, өрхийн эдийн засгийн даван туулах чадавхыг нэмэгдүүлэх зорилготой ‘’Төгсөлтийн аргачлал-600’’ төсөл хэрэгжиж эхэлсэн билээ. Тус төслийг ‘’Дэлхийн зөн-Монгол’’ олон улсын байгууллагын санхүүжилтээр дүүргийн наймдугаар хороотой хамтран хэрэгжүүлж байгаа бөгөөд эхний ээлжид тус хорооны нутаг дэвсгэрт үйл ажиллагаа явуулж буй төрийн болон хувийн хэвшлийн 30 гаруй байгууллагын удирдлагууд хамтран хэлэлцүүлэг хийсэн.

Түүнчлэн энэ үеэр олон улсын байгууллагын сайн туршлагыг судлах, халамж хүртэгч иргэнийг өрхийн бизнес эрхлэгч, цаашлаад жижиг дунд үйлдвэрлэгч болгох замаар иргэдийн ядуурлыг бууруулах мөн өрхийн эдийн засгийг хэрхэн нэмэгдүүлэх зэрэг сэдвээр ярилцаж, харилцан санал зөвшилцсөн юм. Тус уулзалтаар наймдугаар хорооны нутаг дэвсгэрт үйл ажиллагаа явуулж буй аж ахуй нэгж, байгууллагууд төслийн өрхүүдэд дэмжлэг үзүүлэн цаашид хамтран ажиллахаар болж, төлөвлөгөө боловсруулсан аж.

Нэгдсэн Үндэсний Байгууллагын Бүсийн хөгжлийн төв Ази, Номхон далайн бүсийн орнуудын Засгийн газар хоорондын “Байгаль орчинд ээлтэй тогтвортой тээвэр” олон улсын чуулга уулзалтыг 2005 оноос хойш Азийн бүсийн орнуудад зохион байгуулж ирсэн. ASEAN+4 (Хятад, Япон, Бүгд Найрамдах Солонгос Улс, Монгол) гишүүн орнууд, Зүүн, Өмнөд Азийн орнууд, Зүүн Тимор, Исламийн Бүгд Найрамдах Иран Улс, Оросын Холбооны Улс болон Азийн нийт 25 улсыг чуулга уулзалтад оролцуулж, тэднийг боломж, нөөцөө ашиглан тулгамдсан асуудлаа хэрхэн шийдвэрлэх арга зам, бодлого, төслүүдээ хэлэлцэх, мэдлэг, туршлагаа хуваалцах, харилцаа, хамтын ажиллагаагаа өргөжүүлэх индэр нь болдог энэхүү уулзалт болох гэж байна.

Энэхүү чуулга уулзалт нь хүн амын хурдацтай өсөлт, зохион байгуулалтгүй хотжилт, хангалтгүй дэд бүтэц, нөөц, хот, орон нутаг дахь үндсэн үйлчилгээнүүдээс шалтгаалан хотуудад тулгарч буй нийгэм, эдийн засаг, байгалийн сорилтуудыг даван туулах оновчтой арга зам, бодлого, зорилтуудыг хэрхэн үр дүнтэй хэрэгжүүлэх чиглэлд гол анхаарлаа хандуулдаг онцлогтой.

Энэ удаагийн форумыг Улаанбаатар хотноо Барилга, хот байгуулалтын яам, Зам тээврийн хөгжлийн яам, Байгаль орчин, аялал жуулчлалын яам, Нийслэлийн Засаг даргын Тамгын газар хамтран “Тогтвортой хот төлөвлөлт, хот байгуулалтад тээврийн гүйцэтгэх үүрэг” сэдвийн дор зохион байгуулах гэж байна.

Энэ удаагийн олон улсын форумд Азийн бүсийн 24 орны 142 төлөөлөгчид оролцоно гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Говь-Алтай аймгийн Нутгийн зөвлөлөөс санаачилж дөрөвдэх жилдээ хэрэгжүүлж буй “Ногоон Алтайдаа сайхан амьдарцгаая” хөтөлбөрийн хүрээнд энэ жил 4500 мод нэмж тарив.

Есдүгээр сарын 29-нд болсон мод тарих үйлсэд аймгийн ЗДТГ, “Солонго” хороолол, “Шүтээний өндөрлөг”, “Хүүхэд залуучуудын парк”, Нэгдсэн эмнэлгийн дэргэдэх “Миний тоонот” цэцэрлэг, хоёрдугаар цэцэрлэгийн алба хаагчид идэвх санаачилгатай оролцлоо.

Нутгийн зөвлөлийнхөн орон нутгийн ард иргэдтэйгээ хамтран дөрвөн жилийн хугацаанд нийт 25 мянган мод тарьж, Алтай хотод цэвэр агаар, тав тухтай орчин бүрдүүлэхэд хувь нэмэр оруулж байгаа бөгөөд дээрх хөтөлбөрийг Говь-Алтай аймгийн удирдлага, ЗДТГ, Есөнбулаг сумын ЗДТГ, БОАЖГ, Алтай хотын Тохижилт үйлчилгээний газрын Ногоон байгууламжийн албаныхан хамтран хэрэгжүүлж байгаа юм.

Энэ жилийн хоёрдугаар ээлжийн цэрэг татлага энэ сарын 19-21-ний өдрүүдэд явагдана. Зарлан дуудах мэдэгдэл хүргүүлж эхэлсэн бөгөөд цэргийн зарлан дуудах мэдэгдэл авсан иргэд цэргийн үүрэгтний үнэмлэх, эрүүл мэндийн даатгалын дэвтэр, цахим үнэмлэх, хэрэв оюутан бол холбогдох материалаа бүрдүүлж дүүргийн цэрэг татлагын байранд очих ёстой юм байна.

Харин цэргийн бүртгэлийн журам зөрчсөн, зарлан дуудах мэдэгдэл авсан боловч тогтоосон хугацаанд заасан газарт хүндэтгэн үзэх шалтгаангүйгээр ирээгүй, дайчилгааны сургууль, цугларалт. Мөн цэрэг татлагаас зайлсхийсэн цэргийн үүрэгтэн, цэргийн насны иргэнийг дүүргийн Засаг даргын Тамгын газрын батлан хамгаалах асуудал эрхэлсэн нэгжийн дарга 25-125 нэгжтэй тэнцэх хэмжээний төгрөгөөр торгодог юм.

“Аман хуур” киноны Дарь авгай, “Өнөр бүл” киноны үйлдвэрийн даргын эхнэр гээд монголын ард түмний хайр хүндэтгэлийг хүлээсэн олон сайхан дүрийн эзэн МУГЖ М.Бадамгарав гуайн 100 насны ой ирэх жил тохиох гэж байна. Энэхүү ойг тохиолдуулан түүний үр хүүхэд, ач зээ нар нь Үндэсний цэцэрлэгт хүрээлэнд дурсгалын хөшөөг нь босгохоор болж, иргэдээс хандив цуглуулж эхэлжээ.

Уг хөшөөг босгох зардлыг улс гаргах боломжгүй гэсэн тул монголын киноны давтагдашгүй дүрүүдийг харж сэтгэл баясан бахдан хүндэлдэг эрхэм үзэгч Та бүхэнд хандаж байна. Энэхүү хөшөөг босгох үйлст ганц нь ганцдахгүй хувь нэмрээ оруулахыг уриалж байна.

Та бүхний оролцоо тусыг бид олон түмэнд танилцуулах болно.
Хандив хүлээж авах данс: Голомт банк, дансны дугаар: 3155111170″ гэжээ.