Month: September 2018

Цаг уурын байгууллагын ирүүлсэн мэдээллээр өнөөдөр буюу 28-нд баруун болон зүүн аймгуудын нутгийн зүүн хэсэг, говийн аймгуудын нутгийн хойд хэсэг, төвийн аймгуудын зарим газраар, 29-нд говь болон зүүн аймгуудын нутгийн зарим газраар, 30-нд баруун аймгуудын нутгийн зүүн хэсэг, төвийн аймгуудын нутгийн зарим газраар, хур тунадас, нойтон цас орж, цасан шуурга шуурна.

Монгол Улсыг 2019 оны нэг дүгээр сарын 31-нээс хоёрдугаар сарын 3-ны өдрүүдэд Швейцарийн Холбооны Улсын Цюрих хотноо болох олон улсын аялал жуулчлалын “FESPO” үзэсгэлэнд анх удаа зочин орноор оролцуулах болсноо зохион байгуулагч тал өнөөдөр мэдэгджээ.

Энэ талаар ШХУ-ын www.travelnews.ch аялал жуулчлалын мэдээний цахим хуудаст “Монгол Улс 2019 онд зочин орноор оролцох болсон нь FESPO-гийн хувьд сайхан мэдээ боллоо” гэх мэдээ 2018 оны 9 дүгээр сарын 27-ны өдөр гарчээ. “Сүүлийн арван жилийн хугацаанд Ази тивээс зочин орон оролцоогүй бөгөөд Монголыг зочин орноор оролцуулснаар Чингис Хааны эзэнт гүрний тухай илүү ихийг мэдэхийг олзуурхаж, тэсэн ядан хүлээж байна гэж тус үзэсгэлэнг зохион байгуулагч Стефан Амстад хэллээ” гэж мэдэгджээ. Түүнчлэн, “Монголчууд дэлхийн талыг эзэлж байсан түүхтэй. Нүүдэлчид хүн, байгалийн амин холбоог үе дамжуулан үлдээж, хөөмий, уртын дуугаараа амьдралын гүн ухаан, ард түмний онцлогийг илэрхийлж ирсэн” хэмээн онцолсон байна.

Цюрих хотноо зохиогддог Швейцарийн аялал жуулчлалын хамгийн том “FESPO” үзэсгэлэнд 600 гаруй оролцогч оролцож, 63000 хүн үзэж сонирхдог аж. Швейцар, Өмнөд Герман, Хойд Итали, Австри зэрэг зах зээлийг хамардаг тул бүс нутагтаа томоохонд тооцогддог үзэсгэлэн юм. 2017 онд Коста Рика, 2018 онд Румын Улс зочин орноор оролцож байжээ.

Нийслэлийн Иргэдийн Төлөөлөгчдийн хурлын ээлжит XYIII хуралдаан эхэллээ. Хуралдаанаар НИТХ-ын Тэргүүлэгчдийн 2018 оны 5 дугаар сарын 213-ны өдрийн “Улаанбаатар хотын авто замын хөдлөлгөөний ачааллыг бууруулах зарим арга хэмжээний тухай” 70 дугаар тогтоолын хэрэгжилтийн талаар нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү танилцуулж байна. Мөн “Иргэдийн амьдрах орчны аюулгүй байдлыг хангах чиглэлээр авах зарим арга хэмжээний тухай” 119 дүгээр тогтоолын хэрэгжилтийн талаархи мэдээллийг нийслэлийн Засаг дарга бөгөөд Улаанбаатар хотын Захирагч С.Батболд танилцуулна.

Нийслэл дүүргийн хэмжээнд “Хүүхдийн хөгжил хамгааллыг сайжруулах үндэсний хөтөлбөр”-ийг хэрэгжүүлэх ажлын хүрээнд явагдсан үйл ажиллагааг танилцуулах хэлэлцүүлэг Хүүхэд залуучуудын сургалт хүмүүжлийн тусгай цогцолборын хүүхдийн төвийн байранд явагдлаа. Энэхүү ажиллагаанд НИТХ- ын дарга С. Амарсайхан, хурлын ажлын албаны дарга Б.Батбямба, НИТХ-н тэргүүлэгч, Д.Мөнхжаргал, НИХ-ын төлөөлөгч Ц.Одонтунгалаг, М.Эрдэнэтуяа, Нийслэлийн засаг даргын орлогч Д.Энхтөр, НЗДТГ-НБХ, НХГБГ-ын дарга, нэгжийн удирдлагууд оролцож хүүхдийн байдлын талаар сонсож ялангуяа төрөөс зайлшгүй анхаарах шаардлагатай зорилтот бүлгийн хүүхдүүдийн асуудлыг онцгойлон анхаарч ажиллахаа илэрхийллээ.

Нийслэл болон дүүргүүдийн Гэр бүл, хүүхэд залуучуудын хэлтсийн дарга нар ажлаа тайлагнахын зэрэгцээ Гэр бүлийн хувилбарт үйлчилгээний стандартад шилжин орсон шинэлэг загварын бүтээлч ажлыг хамт олноороо санаачлан хэрэгжүүлж эхэлж байгаа тухайгаа Хүүхэд залуучуудын сургалт хүмүүжлийн тусгай цогцолборын дарга Б.Лхамсүрэн танилцуулж хүүхдүүдийн сурч амьдарч байгаа өрөө тасалгааг оролцогчдод үзүүлж санал сэтгэгдлийг сонслоо.

Төв, орон нутгийн Онцгой байдлын байгууллагын эмч-сэтгэлзүйчдийн гамшгийн аюул, ослын үед нэрвэгдэгчдэд эмнэлгийн анхны тусламжийг цаг алдалгүй үзүүлэх, алба хаагчдад эрүүл мэндийн боловсрол олгох, өвчлөлөөс урьдчилан сэргийлэх ажлыг зохион байгуулах мэдлэг, ур чадвар, дадлага туршлагыг дээшлүүлэх зорилгоор “Гамшгийн үеийн эмнэлгийн яаралтай тусламж” сэдэвт сургалтыг энэ сарын 24-27-ны өдрүүдэд Давтан сургалт, сэргээн заслын төвд зохион байгууллаа.

Монгол Улс, БНХАУ-ын хооронд чөлөөт худалдааны хэлэлцээр байгуулах боломжийг судлах хоёр талын хамтарсан судалгааны багийн анхдугаар уулзалт 2018 оны 9 дүгээр сарын 26-27-ны өдрүүдэд Улаанбаатар хотноо болов.

Уулзалтад Монгол Улсын Гадаад харилцааны яамны Гадаад худалдаа, эдийн засгийн хамтын ажиллагааны газрын дэд захирал Т.Батцэцэг, БНХАУ-ын Худалдааны яамны Олон улсын худалдаа, эдийн засгийн харилцааны газрын дэд захирал Лян Хун нар хоёр талын төлөөлөгчдийг тэргүүлж оролцов.

Уулзалтын үеэр талууд өөрийн улсын чөлөөт худалдааны хэлэлцээр байгуулж буй туршлагын талаар мэдээлэл хийж, хоёр талын хамтарсан судалгааны ажлын ерөнхий хүрээний талаар санал солилцов.

Уулзалтын төгсгөлд “Монгол Улс, БНХАУ-ын хооронд чөлөөт худалдааны хэлэлцээр байгуулах боломжийг судлах хамтарсан судалгааны ажлын даалгавар” болон хамтарсан судалгааны багийн анхдугаар уулзалтын тэмдэглэлд гарын үсэг зурав.

МСНЭ-ийн санаачилгаар орон нутагт бүсчилсэн хэлбэрээр хэрэгжүүлж байгаа “Эгшиглэнт үзэг-2018” төвийн бүсийн урлаг, спортын наадам Хөвсгөл аймгийн Мөрөн хотод боллоо. Аймгийн ЗДТГ, Хөвсгөл аймаг дахь салбар зөвлөлтэй хамтран зохион байгуулсан наадамд Дархан, Орхон, Сэлэнгэ, Хөвсгөл аймгийн 80 гаруй сэтгүүлч, хэвлэл мэдээллийн ажилтнууд урлаг спортоор өрсөлдсөнөөс Орхон аймгийн баг тэргүүлж шилжин явах цомын эзэд болов.

Урлагийн наадамд сэтгүүлчид мэндчилгээ, хамтлагийн дуу, уран уншлага, гоцлол дуу, язгуур урлаг, харилцаа дуу, хамтлагийн бүжиг долоон төрлөөр, спортын наадамд гар бөмбөг, шатар, сагсан бөмбөг, ширээний теннис зэрэг төрлөөр өрсөлджээ.

Хоёр жилд нэг удаа болох урлаг спортын наадам өрсөлдөөнтэй, сонирхолтой боллоо. Идэвхтэй оролцсон сэтгүүлч, уран бүтээлчиддээ болон хамтран зохион байгуулсан Хөвсгөл аймгийн ЗДТГ-ын хамт олонд талархал илэрхийлье” гэж Хөвсгөл аймаг дахь МСНЭ-ийн салбар зөвлөлийн дарга Д.Гангаа хэлэв.