Month: September 2018

Өнөөдөр Төр захиргааны Хангарди ордны хурлын зааланд Газар эзэмших эрхийн нээлттэй дуудлага худалдаа болов. Тус дуудлага худалдаагаар Баянзүрх, Хан-Уул, Сонгинохайрхан, Налайх, Багахангай зэрэг таван дүүрэгт үйлдвэрлэл үйлчилгээ, аж ахуй, орон сууц, амины орон сууц, аялал жуулчлал, зочид буудлын зориулалтаар 27 байршлын 87.8 га газрыг дуудлагаар худалдахаар зарлагдсанаас гурван байршлын 4.37 га газрыг худалдлаа. Дуудлага худалдаагаар:

Хан-Уул дүүргийн 10 дугаар хороо, Чингис хаан олон улсын нисэх онгоцны буудлын баруун урд талд амины орон сууцны хотхон барих зориулалттай 2.23 га газрыг иргэн н.Мөнхбат 258,064,901 сая төгрөгөөр,

Хан-Уул дүүргийн 10 дугаар хороо, Чингис хаан олон улсын нисэх онгоцны буудлын баруун урд талд конторын барилгын зориулалттай 1.14 га газрыг иргэн н.Болорцэцэг 147,573,728 сая төгрөгөөр,

Хан-Уул дүүргийн 10 дугаар хороо, Төв аймаг чиглэлийн авто замын дагуу үйлчилгээний зориулалттай 1 га газрыг иргэн н.Болорцэцэг 168,228,702 сая төгрөгөөр тус тус худалдан авав.

Харин Хан-Уул дүүргийн 10 дугаар хороо, Морингийн гэр хорооллын урд талд орон сууцны зориулалттай 4 га газрыг худалдаж авах санал ирсэн боловч оролцогчид дуудлага худалдааны анхны үнийг өсгөөгүй учраас цуцлагдсан байна.

УИХ-ын гишүүн, Засгийн газрын гишүүн, Сангийн сайд Ч.Хүрэлбаатар Монгол Улсын Засгийн газрын хуралдаанаар хэлэлцэн дэмжсэн “Монгол Улсын 2019 оны төсвийн тухай” хуулийн төслийг өргөн барилаа.

Монгол Улсын 2019 оны төсвийн төсөлд нэгдсэн төсвийн тэнцвэржүүлсэн орлогыг 9 их наяд 676.5 тэрбум төгрөг буюу ДНБ-ий 27.4 хувь, нийт зарлагыг 11 их наяд 589.8 тэрбум төгрөг буюу ДНБ-ий 32.8 хувь, төсвийн тэнцвэржүүлсэн тэнцлийг -1 их наяд 913.3 тэрбум төгрөг буюу ДНБ-ий -5.4 хувь байхаар тооцсон байна. Ирэх онд Засгийн газар эдийн засгийг тогтвортой өсөлтөөр хангаж, төсвийн үр ашгийг дээшлүүлэхэд чиглэсэн “Цахим, ил тод, үр ашигтай” төсвийн бодлогыг авч хэрэгжүүлэхээр төлөвлөж байгаа юм байна.

Засгийн газар Хүний хөгжил сангаас дамжин ирсэн 1 их наяд 71.9 тэрбум төгрөгийн өрийг барагдуулж, улмаар Ирээдүйн өв санд 2019 онд 553.1 тэрбум төгрөг, цаашид жил бүр 1.0 их наяд гаруй төгрөгийг хуримтлуулахаар тооцжээ. Ингэснээр Монгол Улс анх удаа байгалийн баялгийн орлогоосоо хуримтлал үүсгэж, ирээдүй хойч үедээ өвлүүлэх зорилтыг эхлүүлэх ажээ.

Энэ сарын 26-ны өдөр Захиргааны Хэргийн Давж Заалдах Шатны Шүүх хурал болж, Дархан аварга Б.Бат-Эрдэнийг МҮБХ-г төлөөлөх эрхгүй, тэргүүн биш гэж үзэж анхан шатны шүүхийн шийдвэрийг хүчингүй болгож шийдвэрлэсэн байна. Үүнтэй холбогдуулан МҮБХ-ноос албан ёсоор мэдэгдэл гаргажээ. Уг мэдэгдлийг бүрэн эхээр нь хүргэж байна.

2018 онд улсын хэмжээнд 367.3 мянган га-д үр тариа, үүнээс 343.1 мянган га-д буудай, 13 мянган га-д төмс, 8.3 мянган га-д хүнсний ногоо, 69.8 мянган га-д тосны ургамал, 38.8 мянган га-д тэжээлийн ургамал, нийтдээ 497.2 мянган га-д тариалалт хийсэн. Хөрсний угтвар чийг, цаг агаарын төлөв байдалтай уялдуулан улаанбуудайн тариалалтыг тавдугаар сарын 5-28-ны хооронд зохион байгуулсан. Тариалалтын чанарыг соёололтоор хүлээн авах ажилд 13 аймгийн 86 сумын 1265 аж ахуйн нэгж, иргэний 365.2 мянган га улаанбуудайн талбай хамрагдаж, нийт тариалсан талбайн 74.3 хувь нь соёололтоор онц, сайн үнэлгээтэй авсан юм.

Энэ жилийн хувьд тавдугаар сар бүхэлдээ хур тундас багатай, 6 дугаар сар гарсаар Хөвсгөл, Булган, Увс, Төв, Архангай, Өвөрхангай аймгийн зарим бүс нутгаар хур тунадас орж, таримлын өсөлт хөгжилтөд эерэгээр нөлөөлсөн бол тариалангийн гол бүс нутаг болох Сэлэнгэ, Дархан-Уул болон Дорнод, Хэнтий, Сүхбаатар аймгийн нутгаар долдугаар сарын 5-ныг хүртэл гандуу байсан.

2018 оны ургацын урьдчилсан балансаар 450.3 мянган тонн үр тариа, үүнээс 425.8 мянган тонн буудай, 151 мянган тонн төмс, 95.1 мянган тонн хүнсний ногоо, 30.1 мянган тонн тосны ургамал, 86.3 мянган тонн малын тэжээлийн ургамал тус тус хураан авахаар тогтоосон юм. Энэ нь улаанбуудай, төмсний дотоодын хэрэгцээгээ бүрэн хангахуйц үзүүлэлт.

Намрын ургац хураалтаас өмнө Хүнс, хөдөө аж ахуй, хөнгөн үйлдвэрийн яам, Дархан-Уул аймгийн ургамал, газар тариалангийн хүрээлэнтэй хамтран ургац хураалтын технологийн зөвлөмжийг боловсруулж, тариаланчид, тариалан бүхий аж ахуйн нэгжид хүргүүлсэн. Мөн Ус, цаг уур, орчны шинжилгээний хүрээлэнгээс өдөр тутам цаг агаарын мэдээ хүлээн авч, орон нутагт сэрэмжлүүлэг мэдээллийг тухай бүрд хүргүүлж байгаа юм.

Есдүгээр сарын 25-ны байдлаар 26 мянган га-г ангилан хадаж, нийтдээ 51.5 мянган га-гаас 73.9 мянган тонн үр тариа, 8.9 мянган га-гаас 116.9 мянган тонн төмс, 5.5 мянган га-гаас 61.6 мянган тонн хүнсний ногоо тус тус хураан аваад байна. Ингэснээр үр тарианы хураалт 15.1 хувь, төмс, хүнсний ногооны хураалт 66.2-68.9 хувийн явцтай, ургац хураалтын ажил жигдэрсэн гэж Ургацын штабаас мэдээллээ.

Есдүгээр сарын дундуур орсон хур тунадас, нойтон цас, ойрын өдрүүдэд цаг агаар сэрүүсэх төлөвтэй байгаагаас шалтгаалан ургац хураалтын ажил тодорхой хугацаагаар хойшилж болзошгүй бөгөөд үр тариа налсан байдалтай байна. Энэ үед комбайндаа нэмэлтээр иш өргөгч суурилуулах, нэг талаас нь сөргүүлж хураах зэрэг налсан тариаг хурааж авах хэд хэдэн арга бий.

Үүссэн нөхцөл байдалтай уялдуулан Хүнс, хөдөө аж ахуй, хөнгөн үйлдвэрийн сайд, Улсын ургацын комиссын дарга Б.Батзориг орон нутгийн удирдлагуудад чиглэл өгөөд байна. Аймаг бүрт гарсан Ургацын штаб ургац хураалтын явцын талаар Улсын ургацын комисст мэдээ хүргүүлж байгааг хэвлэл мэдээлэл, олон нийтийн хэрэгслээр түгээж, ургацаа богино хугацаанд хураан авахаар шуурхай ажиллаж байна.

Хүнс, хөдөө аж ахуй, хөнгөн үйлдвэрийн яамны харьяа Тариалан эрхлэлтийг дэмжих сангаас тариалан эрхлэгчдэд шатахуун, иш өргөгч, үтрэмийн техник тоног төхөөрөмжийг хөнгөлөлттэй нөхцөлөөр олгож байгаа бөгөөд тус санд үтрэм дээр чийгтэй буудайг яаралтай татан авч, хатаах, стандартын шаардлага хангуулах зориулалттай элеватор 24 цаг тасралтгүй ажиллаж байна. Мөн Сэлэнгэ аймгийн Хөтөл дэх салбарт үр тариа хатаалгын тоног төхөөрөмжийг шинээр оруулж ирсэн. Тиймээс ургацыг аль болох богино хугацаанд хаягдал багатай хурааж авах техникийн боломж бүрдсэн гэж хэлж болно хэмээн ХХААХҮЯ-наас мэдээллээ.

Гадаад Улсад суралцах хүсэлтэй оюутан залууст зөвлөгөө, мэдээлэл өгөх зорилгоор 2019-2020 оны хичээлийн жилд зарлагдсан Засгийн газрын тэтгэлэгт хөтөлбөрүүдийг хүргэж байна.

МҮБХ-ны тэргүүлэгчид 2018 оны есдүгээр сарын 25-нд хуралдсан ээлжит хурлаараа допингийн төрлийн хориотой бодис хэрэглэсэн нь тогтоогдсон бөхчүүдэд хариуцлага тооцох, допингоос сэргийлэх, допингтой холбоотой бусад зөрчлүүдийг хэрхэн арилгах талаар дахин хэлэлцэж “Монгол үндэсний бөхийн барилдааны болон барилдааны бус үед допингийн шинжилгээ хийлгэх, допингийн эсрэг дүрэм зөрчсөн бөхөд хариуцлага тооцох журам”-д нэмэлт өөрчлөлт оруулан шинэчлэн баталлаа. Нэмэлт өөрчлөлтөөр:

Допинг хэрэглэсэн нь тогтоогдоод шийтгэл оноосон байхад барилдсан тохиолдолд уг бөхийн шийтгэлийг хугацааг хамгийн сүүлд барилдсан хугацаанаас эхлэн дахин тооцно.
Допинг хэрэглэсэн нь тогтоогдсон бөхийг барилдуулсан аймаг, сумын наадмыг хүчингүйд тооцож, тухайн наадамд цол авсан бөхчүүдийг эрэмбэнд оруулахгүй.
Шинжилгээ өгөхөөс татгалзсан тохиолдолд Дэлхийн допингийн эсрэг дүрмийн дагуу допинг хэрэглэсэнд тооцож, улс, аймаг, сумын наадам болон бусад аль ч хэлбэрийн барилдаанд барилдах эрхийг мөн 2 жилээр хасна.

Монголын үндэсний бөхийн холбооны Тэргүүлэгчид хуралдаж, дараах асуудлуудыг хэлэлцэн шийдвэрлэлээ. Үүнд:

1. а) Аймаг цэргийн цолтой бөхчүүдийн 2018 оны амжилтын эрэмбийг хуучин эрэмбэлж ирсэн журмаараа эрэмбэлэх бөгөөд 2019 оны наадмаас хойш аймгийн цолтой бөхчүүдийн улсын наадамд 3, 4 давсан амжилтыг тооцохгүй байхаар шийдвэрлэлээ. 2018 оноос өмнө цол авсан бөхчүүд хуучин эрэмбээрээ эрэмбэлэгдэн барилдана.
б/ Эрэмбэ зөрчиж оноолт хийсэн Завхан, Дархан-Уул, Хөвсгөл, допинг хэрэглэж эрх нь түдгэлзсэн бөхчүүдийг барилдуулсан Налайх, Говь-Алтай, Говь-Сүмбэр, аймгийн баяр наадмын албан ёсны мэдээллээ МҮБХ-нд ирүүлээгүй Баянхонгор, Хэнтий аймгуудын 2018 оны наадмаар шөвгөрсөн бөхчүүдийг АЦЦБөхчүүдийн эрэмбэнд оруулахгүй, өөрөөр хэлбэл хуучин цол эрэмбээр нь барилдуулна.

2. БСШУСЯам, Засгийн газрын хэрэгжүүлэгч агентлаг Биеийн тамир спортын газар, МҮОХ-ны дэргэдэх Допингийн эсрэг үндэсний төв хамтран “Допингийн эсрэг үндэсний хяналт-1” төслийн хүрээнд авсан явцын шинжилгээнд 2018 оны нэгдүгээр сарын 28-ний өдөр хамрагдсан а.а Т.Пүрэвсүрэн, 2018 оны хоёрдугаар сарын 15-ны өдөр хамрагдсан а.х.а Д.Цэвэлсодном нараас хориотой бодис илэрсэн тул Биеийн тамир спортын тухай Монгол улсын хуулийн 21.1, “Монгол үндэсний бөхийн барилдааны болон барилдааны бус үед допингийн шинжилгээ хийлгэх, допингийн эсрэг дүрэм зөрчсөн бөхөд хариуцлага тооцох журам”-ын 4.1 дүгээр заалтыг тус тус үндэслэн Т.Пүрэвсүрэнгийн улс, аймаг, сумын наадам болон бусад аль ч хэлбэрийн барилдаанд барилдах эрхийг 2018 оны 06-р сарын 04-нөөс 2020 оны 06-р сарын 04 хүртэл, Д.Цэвэлсодномын улс, аймаг, сумын наадам болон бусад аль ч хэлбэрийн барилдаанд барилдах эрхийг 2018 оны зургаадугаар сарын 28-наас 2020 оны зургаадугаар сарын 28 хүртэл тус тус 2 жилээр хасах шийдвэр гаргалаа.

3. Нэр бүхий бөхчүүдээс ирсэн Говь-Алтай аймгийн 2014 оны баяр наадам, Багануур дүүргийн 2015 оны баяр наадмыг хүчинтэйд тооцуулах хүсэлтийг хэлэлцээд дээрх аймаг, дүүргийн 2014, 2015 оны наадмууд Баяр наадмын тухай болон бусад хэд хэдэн хуулиудтай зөрчилдөж байгаа учир тухайн наадамд барилдаж шөвгөрсөн бөхчүүдийн эрэмбийг дээшлүүлэх боломжгүй гэж шийдвэрлэлээ.

4. Дэвжээдийн багш, дасгалжуулагч, бөхчүүдийн төлөөлөл “Бөхийн барилдааныг тасалдуулахгүй байх, барилдааны хуваарь, сахилга бат, жудгийн талаар” тодорхой санал дэвшүүлснийг хэлэлцээд Тэргүүлэгчид аймаг цэргийн цолтой бөхчүүдтэй 2018 оны аравдугаар сарын эхний 10 хоногт уулзалт зохион байгуулж, санал хүсэлтийг нь сонсохоор товлолоо.