Month: September 2018

Нийслэлийн Өргөө амаржих газар, Амгалан амаржих газар, Баянзүрх дүүргийн нэгдсэн эмнэлэг, Хан-Уул дүүргийн нэгдүгээр амбулатори, Эх хүүхдийн эрүүл мэндийн үндэсний төв, Халдварт судлалын үндэсний төвийн гадна зам талбайн тохижилтын ажлыг 2018 онд иж бүрэн хийж ашиглалтад хүлээлгэн өгсөн.

Улаанбаатар хотын Захирагчийн ажлын албанаас эмнэлгийн байгууллагуудын гадна зам талбайг ийнхүү иж бүрэн тохижуулах ажлыг 2016 оны намраас эхлүүлсэн. Улмаар 2016 онд Шастины нэрэмжит Улсын гуравдугаар эмнэлэг, 2017 онд Гэмтэл согог судлалын үндэсний төв, Сонгинохайрхан дүүргийн эрүүл мэндийн нэгдэл, Хавдар судлалын үндэсний төвийн гадна зам талбайг иж бүрэн тохижуулан ашиглалтад хүлээлгэн өгсөн юм.

Эмнэлгийн байгууллагын гадна зам талбайн авто зогсоол, гэрэлтүүлэг, явган зам, ногоон байгууламж, ойн төгөл бүхий амралтын орчин, яаралтай түргэн тусламжийн автомашин, нисдэг тэрэгний стандартын зогсоолуудыг бий болгож байгаа юм. Мөн эмнэлэг орчим хөдөлгөөний зохион байгуулалтыг шийдвэрлэн орц гарцыг нэмэгдүүлж, иргэд түгжрэлгүй, аюулгүй, эрүүл орчинд эмнэлгийн үйлчилгээ авах, үйлчлүүлэх орчин нөхцлийг бүрдүүлж чадсан.

2019 онд Налайх, Багануур, Багахангай дүүргийн нэгдсэн эмнэлэг, Улсын төв нэгдүгээр эмнэлэг, Шүүхийн шинжилгээний үндэсний төв, Сэтгэц судлалын үндэсний төвийн гадна зам талбайг иж бүрэн тохижуулахаар төлөвлөн ажлын зураг төслийг боловсруулж байгаа аж.

Уламжлалт “ICT-Expo-2018” 12 дахь удаагийн үзэсгэлэн маргааш буюу есдүгээр сарын 30-нд Мишээл экспо төвд нээгдэх бөгөөд гурван өдрийн турш үргэлжлэх уг үзэсгэлэнг Харилцаа холбоо, мэдээллийн технологи /ХХМТ/-ийн газраас “Дижитал хөгжилд хамтдаа” уриан дор зохион байгуулна.

Үзэсгэлэнд төрийн болон хувийн хэвшлийн байгууллагууд оролцож, техник технологийн дэвшил, шинэ бүтээгдэхүүн, үйлчилгээгээ олон түмэнд нээлттэй танилцуулна. Мөн үзэсгэлэнгийн үеэр мэдээлэл технологийн салбарын хөгжлийн чиг хандлага, нийгэмд үзүүлж буй үр нөлөөллийн талаар тодорхой сэдвийн хүрээнд форум зохион байгуулахаар төлөвлөжээ.

Тухайлбал, “Digital finance” буюу цахим санхүү /10-р сарын 01/, “Digital Content” цахим контент /10-р сарын 01/, “Digital future” цахим ирээдүй /10-р сарын 02/ Дижитал хэрэглэгч- Эрүүл мэнд /10-р сарын 02/ гэсэн сэдвүүдээр болно. Энэхүү үзэсгэлэнгийн үеэр МУБИС-иас “Мишээл экспо” төвийн чиглэлд автобус үнэ төлбөргүй үйлчлэх юм.

Улсын эмнэлгүүдийн хэмжээнд анх удаа “Эрүүл мэндийг дэмжих төв”-ийг Такамацү Норд ротари клуб, Нарлаг Улаанбаатар ротари клубтай хамтран 80 мянган ам.долларын санхүүжилтээр байгууллаа. Тус төвийг нээснээр урьдчилан сэргийлэх үзлэг зохион байгуулах, эрүүл мэндийн цогц үнэлгээ хийхийн зэрэгцээ идэвхитэй хөдөлгөөн, хооллолт, эрүүл мэндийн зан үйлийн зөвлөгөө, мэдээлэл өгнө. Мөн “Гүзээгүй төрийн албан хаагч” хөтөлбөрийг хэрэгжүүлж, бодисын солилцооны хам шинжийг оношлох замаар халдварт бус өвчнүүдийг эрт хугацаанд нь урьдчилан сэргийлэх боломжтой болж байна.

Мэргэжил, сургалт үйлдвэрлэлийн төв /МСҮТ/-д 2018-2019 оны хичээлийн жилд 35.8 мянган суралцагчид суралцаж байгаа нь өмнөх оноос 4.3 мянгаар буурсан байна.

2017-2018 оны хичээлийн жилд мэргэжлийн сургалт, үйлдвэрлэл (МСҮТ)-ийн 83 төв үйл ажиллагаа явуулж байгаагийн 50 нь төрийн өмчийн, 33 нь хувийн өмчийн сургууль байна. Нийт МСҮТ-ийн 49 нь бие даасан, 19 нь коллежийн, зургаа нь дээд сургуулийн, ес нь их сургуулийн харьяа байна.

Дашрамд дуулгахад, 2019 оны төсвийн төслийг баасан гаригт өргөн барихдаа МСҮТ-ийн оюутнуудад сар бүр 100 мянган төгрөг олгохоор тусгажээ. Өмнө нь оюутан бүрт 70 мянган төгрөг олгож байсныг зогсоосон юм.

Нийслэлийн ИТХ-ын ээлжит 18 дугаар хурал боллоо. Хуралдаанаар дөрвөн асуудал хэлэлцэхээр төлөвлөсөн байсан. Хуралдааны эхэнд Нийслэлийн ИТХ-ын Тэргүүлэгчдийн хурлаас баталсан 70 болон 119 дүгээр тогтоолын хэрэгжилтийн талаар хэлэлцлээ. Улаанбаатар хотын замын хөдөлгөөний ачааллыг бууруулахаар гаргасан 70 дугаар тогтоолын хэрэгжилтийн явцыг нийслэлийн Засаг даргын орлогч П.Баярхүү танилцуулав.

Улаанбаатарын замын хөдөлгөөнд өдөрт 300 мянга жолооч оролцдог. Түүний олонх нь Бага тойруу орчмоор явдаг аж. Тиймээс орц, гарц нээж, сэтэлгээ зам олныг байгуулж буй. Ингэснээр томоохон уулзваруудын хөдөлгөөний ачаалал багасах тооцоотой. Мөн иргэдийг нийтийн тээврээр зорчуулах арга хэмжээ хэрэгжүүлж буйг нийслэлийн Засаг даргын орлогч П.Баярхүү онцоллоо. 2017, 2018 онд нийтийн тээврийн 11 шинэ чиглэл нээжээ. Мөн ид ачааллын үеэр автобусны тоог нэмж байгаа гэнэ.

Түүнчлэн сургуулийн автобусны тоог олшруулж, замын хөдөлгөөний ачааллын мэдээллийг цахимаар мэдээлэх гээд олон арга хэмжээ авч байгааг дурьдав. “Улаанбаатар хотын авто замын хөдөлгөөний ачааллыг бууруулах зарим арга хэмжээний тухай” 70 дугаар тогтоолыг хэрэгжүүлэх ажлын хэсгийнхэн зүгээс авто зогсоолын тоог олшруулж, амралтын өдрүүдэд иргэдэд үнэ төлбөргүй ашиглуулах болжээ. Мөн зарим авто замын урсгалыг нэг чигт оруулж, өргөтгөсөн байна. Цаашид ийм олон арга хэмжээ явуулахаар төлөвлөжээ. Хяналтын камер суурилуулах зэрэг олон ажлыг хийхээр төлөвлөжээ. Удахгүй төмөр болон авто замын огтлолцлыг салгахаар нүхэн гарц зургааг барих юм байна. Зураг төсөл нь гарсан бөгөөд ирэх хавар ажил эхлүүлэхээр болжээ . Томоохон уулзваруудад шар дөрвөлжин тэмдэглэгээ хийж, түгээлтийн автомашиныг хөдөлгөөний ид ачааллын бус цагаар хөдөлгөөнд оролцдог болгох шийдвэрийг гаргаж, хэрэгжүүлж ажиллахаар болсон тухай нийслэлийн Засаг даргын орлогч П.Баярхүү мэдээллээ.

Хуралдааны хэлэлцэх асуудлын дарааллын дагуу “Иргэдийн амьдрах орчны аюулгүй байдлыг хангах чиглэлээр авах зарим арга хэмжээний тухай” 119 дүгээр тогтоолын хэрэгжилтийн талаар Улаанбаатар хотын ерөнхий менежер Т.Гантөмөр танилцууллаа.

Иргэдийн амьдрах орчны аюулгүй байдлыг хангах чиглэлээр авах зарим арга хэмжээний хүрээнд Нийслэлийн холбогдох албаныхан хамтран цахим тоглоомын газар, саун массажны газар, уушийн газар, ТҮЦ гээд нийслэлд үйл ажиллагаа буй бүх байгууллагыг шалгажээ. Улмаар илэрсэн зөрчлүүдийг арилгуулж, нийтийн хэв журмыг сахиулжээ. Мөн архидалт, түүнээс үүдэлтэй гэмт хэргийн гаралтыг багасахаар хяналт, шалгалтаа үргэлжлүүлсээр байгааг хэллээ.

Иргэдийг үер усны аюулаас урьдчилан сэргийлэх зорилгоор завьт болон морьт эргүүл зуны турш ажиллуулжээ. Мөн хүүхдийг гэмт хэрэгт өртөхөөс сэргийлж, эцэг, эхийнх нь нэрийг бичсэн бугуйвч зүүлгэжээ. Нийслэлийн Засаг дарга захирамж гаргаж, ажлын хэсэг байгуулан сургууль, цэцэрлэгийн орчныг шалгажээ. Улмаар арван сургуульд эрсдэлтэй нөхцөл үүссэн байдлыг тогтоож, илэрсэн зөрчлийг арилгуулсан талаар хотын ерөнхий менежер Т.Гантөмөр танилцуулгадаа дурьдлаа. Нийслэлийн Засаг дарга захирамж гарган, сургууль цэцэрлэгийн дээвэр дээрх үүрэн холбооны операторуудын антенныг буулгах, цахилгаан хангамжийн аюулгүй байдлыг хангуулж, хамгаалалтын зурвас чөлөөлүүлж эхлээд байгаа аж. Өнөөдрийн байдлаар цахилгаан, эрчим хүний хамгаалалтын зурваст 4000 гаруй айл суурьшсан байгаа гэнэ. Иргэдийн эрүүл, аюулгүй орчинд амьдрах нөхцөл бүрдүүлэхээр гэрэлтүүлэг, камер суурилуулах гээд өмнөх бүх ажлаа үргэлжлүүлэхийн зэрэгцээ шинээр цөөнгүй арга хэмжээг хэрэгжүүлэхээр төлөвлөжээ.

НИТХ-ын Тэргүүлэгчдийн 119 дүгээр тогтоолтой холбогдуулан нийслэлийн ИТХ-ын Тэргүүлэгчдийн нарийн бичгийн дарга Б.Батбямба дүүргүүдийн удирдлага ямар ажил хийснийг танилцууллаа. Багахангай дүүргийнхэн үер далан, шуудуу барьсан бол Баянзүрх дүүргийн удирдлага “Шарилжгүй Улаанбаатар” аян өрнүүлж, бусад тохижилтын ажил хийжээ. Харин Баянгол дүүргийнхэн оршин суугчдаа хөршийн хяналтад нэгдэж, гэмт хэргээс урьдчилан сэргийлэх аян өрнүүлсэн аж. Налайх дүүргийнхэн суурьшлын бүсэд үйл ажиллагаа явуулж байсан төмрийн үйлдвэрийг нүүлгэж, гудамжуудаа тохижуулжээ. Харин Чингэлтэй дүүргийнхэн ШТС болон нийтийн байрнуудыг шалгаж эхэлсэн байна. Нийслэлийн ИТХ-ын Тэргүүлэгчдийн нарийн бичгийн дарга Б.Батбямба “Тогтоолын хэрэгжилтийг хангуулах ажил зарим дүүрэгт удаашралтай байгаа. Тиймээс хэрэгжилтийг хангуулах чиглэлээр нарийвчилсан төлөвлөгөө гаргах шаардлагатай байна” гэдгийг онцоллоо.

Есдүгээр сарын 28-нд ихэнх нутгаар, 29-нд нутгийн зүүн хэсгээр хур тунадас, нойтон цас орж, цасан шуурга шуурч, эрс сэрүүсэхийг онцгойлон анхааруулж байна.

Иймд зам даваа хаагдах, халтиргаа гулгаа үүсэх зэрэг хүндрэлтэй нөхцөл байдал үүсч болзошгүй тул иргэд, тээвэрчид та бүхэн онцын шаардлагагүй тохиолдолд орон нутагт зорчихгүй байх, зорчих тохиолдолд тээврийн хэрэгслийн бүрэн бүтэн байдлыг хангаж, баталгаатай тээврийн хэрэгсэл сонгож, анхаарал болгоомжтой зорчихыг анхааруулж байна.