Month: September 2018

Хичээлийн эхний өдөр нийслэл хотын хэмжээнд Замын цагдаагийн алба нийт 346 дуудлага хүлээн авснаас зам тээврийн ослын шинжтэй 242 дуудлага мэдээлэл хүлээн авч шалгав. Бүртгэгдсэн нийт ослын улмаас нийслэлд 2, орон нутагт 1 хүний амь нас хохирч, 10 хүн хөнгөн, хүндэвтэр гэмтэж бэртсэнээс 4 нь бага насны хүүхэд байв.

Хүүхэд өртсөн зам тээврийн ослын судалгаанаас үзэхэд явган зорчигч хэлбэрээр замын хөдөлгөөнд оролцсон бөгөөд 3 хүүхэд гарцгүй газраар зам хөндлөн гарч байсан бол 1 нь насанд хүрээгүй эгчийн хамт хөдөлгөөнд оролцож байх үедээ осолд өртжээ.

Тухайлбал ХУД-ийн нутаг Наадамчдын зам Буянт ухаа-2 хорооллын урд замд T.Pruis маркийн автомашины жолооч явган зорчигч 3 настай У-г мөргөж гэмтээсэн бөгөөд У нь тухайн үед 9 настай эгчийн хамт замын хөдөлгөөнд оролцож байсан.

ЧД-т “Чингэлтэйн эцсийн зам”-д марк, улсын дугаар нь тодорхойгүй автомашин явган зорчигч 30-35 насны эрэгтэйг мөргөж амь насыг нь хохироосон хэрэг тус тус бүртгэгдсэнийг Замын цагдаагийн газраас шалгаж байна. Дээрх ослын шалтгаан нөхцлөөс үзэхэд эцэг эх асран хамгаалагчид хүүхэддээ зөв үлгэр дуурайлал үзүүлж өөрсдөө замын хөдөлгөөний дүрэм зөрчихгүй байх, 10 хүртлэх насны хүүхдийг бие даан замын хөдөлгөөнд оролцуулахгүй байх, жолооч нар сургууль орчим болон гэр, орон сууцны хорооллын дундах замаар зорчихдоо хурдаа сааруулах зайлшгүй шаардлагатайг анхааруулав.

Баян-Өлгий аймгийн ихэнх сумдын нутгаар өнөөдөр нойтон цас орж байна. Аймгийн Ус, цаг уур, орчны шинжилгээний төвөөс өгсөн мэдээллээр Өлгий, Буянт сумдын нутгаар 0,7 мм хур тунадас буужээ.

Мөн Алтай, Бугат, Дэлүүн, Баяннуур, Ногооннуур, Улаанхус, Сагсай, Цэнгэл сумдын нутгаар цас орсон мэдээтэй байна.

Агаарын температурын хувьд өнөөдрөөс бүх нутгаар хүйтрэх бөгөөд энэ сарын наймны өдрийг хүртэл шөнөдөө 3 хэм хүйтнээс 2 хэм дулаан, өдөртөө 10-15 хэм дулаан байх ажээ.

Олон улсад жил бүр ахлах ангийн сурагчдын дунд Мэдээлэл зүй буюу компьютерт суурилсан, програмчлалын олимпиад зохион байгуулагддаг. Алгоритмын бодлого бодож өрсөлддөг энэ тэмцээн Япон улсын Ибараки мужийн Цукуба хотод өнгөрсөн Ням гаригт нээлтээ хийгээд байна.

1989 онд Болгар улсад анх удаа зохион байгуулагдаж түүнээс хойш жил бүр зохион байгуулагдсаар иржээ. 30 дахь удаагийн энэ олимпиадыг Япон улс анх удаа зохион байгуулж байна. Улс болгоны багт хамгийн олондоо дөрвөн сурагч оролцох боломжтой. Япон улсын хувьд энэ жил багийн 4 гишүүний бүрэлдэхүүнтэйгээр оролцож байна. Өнгөрсөн 2017 онд Япон улсын баг тамирчид 3 алтан медаль авч байсан байна. Тэмцээн нь хоёр өдөр үргэлжлэх ба өдөр болгон 5 цагт 3 бодлого бодож өрсөлддөг.

Бодлого бүр зуун оноотой ба нийт бүтэн оноо нь 600 оноо болдог. Энэ олимпиадад манай улсаас жил бүр сурагчдаа илгээдэг. 2018 оны тэмцээнд манай улсын дөрвөн сурагч оролцож байна. Манай улсын хувьд 2005 болон 2006 онуудад хоёр удаа хүрэл медаль хүртэж байсан байна.

Баянзүрх дүүргийн хэмжээнд байгалийн голомтот болон мал амьтнаас хүнд дамждаг гоц халдварт өвчнөөс урьдчилан сэргийлэх сэргийлэх ажлыг дүүргийн Засаг даргын захирамжийн дагуу зохион байгуулж байгаа билээ. Тухайлбал дүүргийн Гэмт хэргээс урьдчилан сэргийлэх ажлыг зохицуулах салбар зөвлөл, дүүрэг дэх Замын цагдаагийн хэлтэс, Онцгой байдлын хэлтэс, Мэргэжлийн хяналтын хэлтэс болон дүүрэг дэх Цагдаагийн хэлтсүүд хамтран хүн мал амьтны гоц халдварт тарваган тахал өвчнөөс урьдчилан сэргийлэх ажлыг дүүргийн хэмжээнд амжилттай зохион байгуулж байгаа юм.

Ажлын хэсгийн бүрэлдэхүүн өнөөдөр орон нутгаас нийслэлийг чиглэн ирдэг Улиастайн зам, Хонхор мөн Баянзүрхийн товчоо орчмоор замын хөдөлгөөнд оролцож буй жолооч болон тээврийн хэрэгсэлд шалгалт хийж, тарваган тахал өвчнөөс урьдчилан сэргийлэх мэдээллийг өгч хяналт тавин ажиллаж байна.

Түүнчлэн дүүрэг дэх Замын цагдаагийн хэлтсийн албан хаагчид зам тээврийн ослоос урьдчилан сэргийлэх ажлын хүрээнд замын хөдөлгөөнд оролцож буй жолооч нарт гэнэтийн аваар ослоос урьдчилан сэргийлэх анхааруулга, сэрэмжлүүлгийг өгч ажиллав хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Газар тариаланг хөгжүүлэх, тариаланчдаа дэмжих хэрэглэгчдийн хүнсний ногооны хэрэглээний 50-аас доошгүй хувийг орон нутагтаа тариалах бодлогоор Өмнөговь аймгийн Засаг даргын Тамгын газар, Хүнс хөдөө аж ахуйн газар нь Хөдөө аж ахуйн их сургууль, Солонгосын Гёнсанбуг аймагтай 2 дахь жилдээ газар тариалангийн чиглэлээр хамтран ажиллаж байна.

Өмнөговь аймаг дахь Ногоон хэрэм төслийн 2-р ойн зурваст ХҮЛЭМЖИЙН ЦОГЦОЛБОР АЖ АХУЙГ “Говийн оюу хөгжлийг дэмжих сан”-ийн хөрөнгө оруулалтаар байгуулж өвлийн 2 ширхэг, зуны 5 ширхэг хүлэмжинд нийт 2700 мкв талбайд 13 төрлийн хүнсний ногоо, 6 төрлийн үр үржүүлгийн тариалалтыг хийж өнөөдөр ургацын баяраа хийлээ.

Өнөөдөр ажил эрхлээгүй байгаа багш нар, ажил хаялт зарлаж буй багш нарын оронд ажиллах хүсэлтэй байна гэдгээ мэдэгдэж хэвлэлийн бага хурал хийлээ.

Тэд ярихдаа “Шинэ хичээлийн жил эхлэхтэй зэрэгцэн багш нар ажил хаялт зарлаж, нийгэмд эмх замбараагүй байдал үүсгээд байна. Багш нар ёс зүйгүй үйлдэл гаргаж байгаад шүүмжлэлтэй хандаж байна. Багшийн цалин бага гэдгийг мэддэг ч энэ мэргэжилд дурлаад сонгосон, хүүхдийн төлөө ажилладаг багш нар ингэж болохгүй.

Багш нар есдүгээр сарын 1-нд нээлт хийж, хүүхдүүдийг догдлуулчихаад ажил хаяж байгаа нь цаагуураа өөр учиртай байх. Багш нар цалингаа голоод ажил хаяж байгаа бол бид оронд нь багшлахыг хүсч байна. Багшлах эрхээ авсан, аваагүй, багшлах хүсэлтэй иргэдэд зориулан фэйсбүүкт групп нээсэн, одоогоор 240 гаруй хүн нэгдээд байна” гэлээ.

Ажилгүй байгаа багш нарын төлөөлөл Н.Лхагваа: “Би бага ангийн багш мэргэжилтэй. Би боловсролын салбарт 10 гаруй жил ажиллаж байгаад 2014 оноос хүүхдээ хараад гэртээ сууж байгаа. Багш нар 600 мянган төгрөгийн цалин авдаг. Багшлах чин хүсэлтэй ч улсын сургуульд ажилд ороход хүндрэлтэй байдаг. Багшлах эрхийн шалгалтад ороод ганц, хоёр оноо дутуугаас шалтгаалаад ажилд орж чадахгүй байгаа биднийг ажлын байраар хангаач ээ” хэмээн сургуулиудын удирдлагуудад хандаж хэлэв.