Month: September 2018

1990 онд ердөө 2.7 сая ам.доллараар хэмжигдэж байсан Монгол, БНСУ-ын хоёр талын худалдааны эргэлт 2017 онд 200 сая ам.долларт хүрч нэмэгдсэн байна.

Энэ талаар МҮХАҮТ-ын Ерөнхийлөгч Б.Лхагважав БНСУ-ын Тэгү хотын ХАҮТ-ын төлөөлөгчдийг хүлээн авч уулзах үеэр мэдэгдлээ. Б.Лхагважав МҮХАҮТ-ын үйл ажиллагааны талаар болон Монгол Улсын эдийн засаг, бизнесийн орчны талаар төлөөлөгчдөд танилцуулах үеэр, Монгол, Япон улсын хооронд байгуулаад 2 жил болж буй Эдийн засгийн түншлэлийн хэлэлцээр амжилттай хэрэгжиж байгааг дурдаад, Монгол Улс, Өмнөд Солонгосын чөлөөт худалдааны хэлэлцээрт МҮХАҮТ голлох үүрэгтэй ажиллаж байна гэв.

Тэрээр, “Монгол Улс болон БНСУ нь хоёр талын Эдийн засгийн түншлэлийн гэрээ байгуулах асуудлаар 2016 оноос хийж эхэлсэн хэлэлцээр нь чөлөөт худалдааны хэлэлцээртэй адил төстэй бөгөөд үүнийг байгуулснаар аж үйлдвэр болон хөрөнгө оруулалтын салбарын хамтын ажиллагаа улам бүр бэхжих боломжтой юм. Өнөөдрийн байдлаар хоёр орны чөлөөт худалдааны хэлэлцээр судалгааны түвшинд байгаа юм. 1990 онд ердөө 2.7 сая ам.доллараар хэмжигдэж байсан хоёр талын худалдааны эргэлт 2017 онд 200 сая ам.долларт хүрч нэмэгдээд байна” гэв. БНСУ-ын Тэгү хотын ХАҮТ-ын бизнесийг дэмжих газрын захирал До Сүн Ук Танхимынхаа талаар танилцуулж, тус хотын төлөөлөгчид Монголын аж ахуйн нэгж, компаниудтай хамтран ажиллах, харилцаа холбоогоо сайжруулахад МҮХАҮТ-ын зүгээс анхаарч, дэмжиж ажиллахыг хүслээ. БНСУ-ын Тэгү хотын ХАҮТ нь 1906 онд байгуулагдсан 100-н жилийн түүхтэй байгууллага юм байна.

Баян-Өлгий аймгийн Мэргэжлийн хяналтын газраас тус аймгийн Эрүүл мэндийн газар, музей, номын сан болон “Мөнхийн тун” ЭХНБ-ын салбар, “Сандитис” шүдний эмнэлэгтэй хамтран “Жаннур” асрамжийн дотуур байранд “Хүүхдийн эрүүл мэнд, хоол хүнсний аюулгүй байдал” сайн үйлсийн өдөрлөг аяныг зохион байгуулав. Өдөрлөгийн үеэр амны хөндийн эрүүл мэнд, охидын эрүүл мэнд, хүнсний аюулгүй байдал, хаяг шошгоны талаар сургалт явуулж, эмч нар хүүхдүүдэд шүдний үзлэг хийж, зөвлөгөө өгч, аймгийн Номын сангаас 45 уншлагын карт нээж, аймгийн Музей үзүүллээ.

Төрийн өмчит компаниуд 2018 оны эхний хагас жилийн байдлаар 4.2 их наяд төгрөгийн борлуулалтын орлоготой, 762 тэрбум төгрөгийн цэвэр ашигтай ажиллажээ. Уг тоон үзүүлэлтүүдийг өнгөрсөн оны мөн үетэй харьцуулахад, орлого 807 тэрбум төгрөгөөр, цэвэр ашиг 292 тэрбум төгрөгөөр өссөн үзүүлэлт аж.

Төрийн өмчит болон төрийн оролцоотой хуулийн этгээдүүдийн борлуулалтын орлого 2016 оны хоёрдугаар улиралд 2.08 их наяд байсан бол 2017 оны хоёрдугаар улиралд 3.4 их төгрөгт хүрч өссөн байдаг. Улмаар 2018 оны эхний хагас жилийн урьдчилсан дүнгээр борлуулалтын орлого нь 4.2 их төгрөгт хүрсэн тоон үзүүлэлттэй гарчээ.

Улсын төсөвт төвлөрүүлсэн татвар хураамжийн тухайд, 2015 онд 1.05 их наяд, 2016 онд 1.02 их наяд, 2017 онд 1.7 их наяд төгрөгийг төвлөрүүлсэн байна. Харьцуулалтаар 2016 оны татварын төвлөрүүлэлт 2017 онд 730 тэрбум төгрөгөөр өссөн дүнтэй гарчээ.

Түүнчлэн төрийн өмчит компаниудын зардал 2018 оны эхний хагас жилд 430 тэрбум төгрөгөөр буурсан байна. Төрийн өмчит болон төрийн өмчийн оролцоотой компаниуд 2018 оны эхний хагас жилийн байдлаар 37.3 тэрбум төгрөгийн төрийн өмчийн ногдол ашиг улсын төсөвт төвлөрүүлсэн нь өмнөх оны мөн үеийн гүйцэтгэлтэй харьцуулахад зургаа дахин нэмэгдсэн үзүүлэлт аж.

Чингэлтэй дүүргийн нутаг 15,17 дугаар хорооны нутаг дэвсгэрт 2018 он гарсаар эхний хагас жилд нийт 52 зам тээврийн осол бүртгэгдсэн нь нийт ослын 3,5 хувийг эзэлж байна. Иймд тус дүүргийн Замын цагдаагийн хэлтэс, Гэмт хэргээс урьдчилан сэргийлэх ажлыг зохицуулах салбар зөвлөл хамтран дээрх хорооны нутаг Хайлааст, Чингэлтэйн замуудад нийт 5 ширхэг цацруулагч бүхий сэрэмжлүүлэг самбаруудыг байршууллаа. Цаашид тус хэлтсээс зам тээврийн осол, хэргээс урьдчилан сэргийлэх, хөдөлгөөнд оролцогчдын сахилга, соёл, анхаарал болгоомжыг дээшлүүлэх зорилгоор олон ажил, арга хэмжээг зохион байгуулахаар төлөвлөж байна.

Эмээлт шалган нэвтрүүлэх товчоонд үүрэг гүйцэтгэж байсан Сонгинохайрхан дүүрэг дэх Мэргэжлийн хяналтын хэлтсийн мал эмнэлгийн хяналтын улсын байцаагч тус товчоогоор наймдугаар сарын 31-ны оройн 22.00 цагийн орчимд Архангай аймгийн Чулуут сумаас тээвэрлэгдэн ирсэн арьстай 2 ширхэг тарвага тээвэрлэж явсан зөрчлийг илрүүлэн Зооноз өвчин судлалын үндэсний төвд хүлээлгэн өгсөн байна.

Мөн тус товчоогоор есдүгээр сарын 1-ний өдрийн 11.05 цагт “ISTANA” маркийн тээврийн хэрэгсэлтэй иргэн Н-г арьстай 3 ширхэг тарвага, иргэн Б-г арьстай 2 ширхэг тарвага тээвэрлэж явсан зөрчлийг илрүүлэн Зооноз өвчин судлалын үндэсний төвд хүлээлгэн өгчээ.

Эмээлт шалган нэвтрүүлэх товчоогоор энэ сарын 3-ны өдрийн 15.25 цагт “NISSAN HINO” маркийн тээврийн хэрэгсэлтэй иргэн Б-г арьстай 20 ширхэг тарвага тээвэрлэж явсан зөрчлийг илрүүлэн Зооноз өвчин судлалын үндэсний төвд хүлээлгэн өгсөн байна.

Нийгмийн эрүүл мэндийн ноцтой байдал, өвөлжилтийн бэлэн байдлыг хангах талаар цахим хурлыг зохион байгууллаа. Хуралд ЭМЯ-ны ЭТГ-ын дарга М.Баттүвшин, ОНХТШУХ-ийн дарга Д.Нарангэрэл, 21 аймгийн ЭМГ-ын гамшиг, яаралтай тусламжийн асуудал хариуцсан мэргэжилтэн, халдвар судлагч, статистикч эмч нар оролцлоо.

Энэ хурлаар дээрх холбогдох мэргэжилтнүүдэд:

• Эрүүл мэндийн байгууллагын гамшгаас хамгаалах төлөвлөгөө боловсруулахад анхаарах асуудал
• Шадар сайдын 2017 оны 08, Эрүүл мэндийн сайдын 2017 оны 508 дугаар тушаалын хэрэгжилт, томуу томуу төст өвчний бэлэн байдлыг хангах нь
• Өвөлжилтийн бэлэн байдлыг хангахад анхаарах асуудлаар мэдээлэл солилцов.

Жил бүрийн наймдугаар сарыг “Эрүүл мэндийн ажилтны нийгмийн хамгааллыг дэмжих сар” болгон зарлаж, энэ хүрээнд тодорхой ажлууд зохион байгуулдаг. Тэгвэл өнөөдөр ЭМЯ-ны харьяа Эрүүл мэндийн хөгжлийн төвөөс “Эрүүл мэндийн салбар дахь сул ажлын байрны мэдээллийг сурталчлах” өдөрлөгийг зохион байгууллаа. Ингэсэнээр эмнэлгийн мэргэжилтнүүд сул ажлын байр, үндсэн төрөлжсөн мэргэшлийн сургалтын элсэлт төгсөлт, мэргэжлийн зэрэг, мэргэжлийн үйл ажиллагаа эрхлэх зөвшөөрлийн талаар мэдээллээр хангагдаж нөгөө талаар эрүүл мэндийн салбар дахь сул ажлын байр нөхөгдөх боломж бүрдэх юм.

Уг арга хэмжээнд хот хөдөөгийн нийт 30 гаруй байгууллагаас 280 шахам сул ажлын байрны мэдээлэл ирлээ. Үүнээс УХТЭ, УГТЭ, ЭХЭМҮТ, ГССҮТ, ЦССҮТ, Хүүхдийн төв сувилал зэрэг 17 эрүүл мэндийн байгууллага сул ажлын байрны мэдээллээ танилцууллаа.
Мөн энэ үеэр ЭМХТөвийн Хүний нөөцийн бодлого зохицуулалтын албаны бусад үйл ажиллагааг олон нийтэд танилцуулав.

Үүнд:

Үндсэн төрөлжсөн мэргэшлийн сургалтын элсэлт төгсөлт, мэргэжлийн зэрэгтэй холбоотой мэдээлэл

Мэргэжлийн үйл ажиллагаа эрхлэх зөвшөөрлийн шалгалт болоод багц цагаар сунгах тухай мэдээлэл
Төвийн үйл ажиллагаатай холбоотой сэтгэл ханамжийн судалгаа

Цаашид мэргэжлээрээ ажиллах хүсэлтэй эмч мэргэжилтнүүдийн мэдээллийг бүртгэж нэгдсэн сан үүсгэж ажиллалаа.