Month: August 2018

Нийслэлийн Засаг даргын орлогч П.Баярхүү Улаанбаатар хотод хийгдэж буй дэд бүтэц, инженерийн шугам сүлжээ, боловсролын салбарын бүтээн байгуулалтын ажлын явцтай танилцав.

Улаанбаатар хотын гэр хорооллыг хөгжүүлэх хөрөнгө оруулалтыг дэмжих төсөл хөтөлбөрийн хүрээнд хийгдэж буй Баянхошуу дэд төвд баригдах 240 ортой хүүхдийн цэцэрлэг, Бизнес инкубатор мэргэжил сургалт үйлдвэрлэлийн төвийн барилгын явцтай танилцлаа. Засаг даргын орлогч П.Баярхүү гүйцэтгэгч компаниудын төлөөлөлд ажлын явцыг түргэвчилж, заасан хугацаа болох 240 ортой хүүхдийн цэцэрлэгийг ирэх сарын 15-нд, мэргэжил сургалт үйлдвэрлэлийн төвийн барилгыг 30-ны өдөр хүлээлгэн өгөхийг үүрэг болгов.

Мөн Баянхошуу дэд төвийн үерийн хамгаалалтын барилга байгууламжийн ажлын явцтай танилцсан юм. Тус ажлын гүйцэтгэл одоогоор 80 хувьтай байна. Тендерийн хугацаанд ажил бүрэн амжиж дуусна гэдгийг гүйцэтгэгч “Хангилцаг” ХХК-ийн ерөнхий менежер хэллээ. Нийслэлийн Засаг даргын орлогч П.Баярхүү үерийн хамгаалалтын шатны модон тавцанг найдвартай бат бөх материалаар сольж хийх заавар өгөв. Үүний дараа Улаанбаатар хотын Тасганы овоон дээрх усан сангаас гурав, дөрөвдүгээр хорооллын усан сан, баруун дүүргийн насос станц хүртэлх 8070 метр урттай ф600мм-ын цэвэр ус дамжуулах гол шугамын барилга угсралтын ажилтай танилцаж нийслэлийн зүгээс газар чөлөөлөлтийн ажил дээр туслахаа илэрхийллээ.

С.ОЮУНЖАРГАЛ

Нийслэлийн Засаг даргын зөвлөлийн ээлжит хуралдаан өнөөдөр боллоо.

Хурлаар үерийн улмаас үүссэн нөхцөл байдлын үед авч хэрэгжүүлсэн арга хэмжээ, цаашид анхаарч ажиллах асуудлуудын талаар Улаанбаатар хотын Захирагчийн ажлын албаны Инженерийн байгууламжийн хэлтсийн дарга Т.Хэрлэн мэдээлэл хийлээ.

Өнгөрсөн сард усархаг аадар бороо орсны улмаас Баянзүрх, Налайх, Сүхбаатар, Чингэлтэй, Хан-Уул дүүргийн нутаг дэвсгэрт иргэд усанд боогдсон, айл өрхүүдийн гэр, хашаа байшин, авто зам, орон сууцны орц, зоорийн давхар, автомашины зогсоол усанд автсан, хөрсний ус нэвчсэн зэрэг хүндрэлтэй нөхцөл байдал үүссэн.

Иргэд, ААН-ээс үер, усны нийт 257 удаагийн дуудлага иржээ. Холбогдох байгууллагууд хамтран аврах, хор уршгийг арилгах ажиллагааг зохион байгуулж, 187 иргэнийг авран хамгаалсан байна. Мөн ус ихээр тогтдог 10 байршилд ус зайлуулах шугам сүлжээг хийх, 50 байршилд үерийн далан, сувгийн цэвэрлэгээ хийсэн байна. Мөн үерийн хамгаалалтын барилга, байгууламж дээр журам зөрчиж контеэнер байршуулсан иргэн, ААН-д албан шаардлага өгч, 10 контейнер албадан нүүлгэж, дөрвөн зориулалтын бус явган гүүрийг буулгажээ.

“Болзошгүй үерийн аюулаас урьдчилан сургийлэх зорилгоор эрсдэлтэй бүсэд суурьшсан 592 өрхөд яаралтай нүүх тухай хугацаатай албан шаардлага мэдэгдлийг өгсөн. Таван айл, нэг ААН-ийг албадан нүүлгэсэн.

Цаашид үер, усны хор уршгийг арилгахад нэн шаардлагатай байгаа багаж хэрэгсэл, тоног төхөөрөмжийн зардлыг шийдвэрлэх, үерийн эрсдэлтэй бүсэд зөвшөөрөлтэй болон зөвшөөрөлгүй суурьшсан айл өрх, ААн-ийг албадан нүүлгэх, Авто зам, замын байгууламжийн үерт эвдэрсэн хэсгүүдийн судалгааг гаргах, ус зайлуулах барилга байгууламж шинээр бий болгож, өргөтгөх, дүүргүүд гамшгаас хамгаалах алба, мэргэжлийн ангаийг удирдлага, зохицуулалтаар хангах, Үерийн дараа ариутгал, халдваргүйжүүлэлтийг тогтмол хийж байх хэрэгтэй байна” хэмээн УБЗАА-ны Инженерийн байгууламжийн хэлтсийн дарга Т.Хэрлэн онцлов.

Нийслэлийн Засаг дарга бөгөөд Улаанбаатар хотын Захирагч С.Батболд “Бид төсөв мөнгөний болоцооноосоо хамааран жил бүр нийслэл дэх үерийн далан сувгуудыг шинэчлэн засварлаж байгаа. Үүнийг дахин илүү хөрөнгө зарцуулж, засварлан шинэчлэх асуудлыг ярина. 1960-аад оны үед баригдсан Туул голын дагуу үерийн даланг шинэчлэх асуудлыг зайлшгүй яригдаж байна. Энэ даланг шинэчлэх зураг, төслийг яаралтай гаргах хэрэгтэй. Мөн Туул голын хамгаалалтын зурвасыг маш сайн баримтлах хэрэгтэй. Холбогдох яамтай ярилцаад, Туул гол дагуу олгогдсон газруудын эрхийг цуцалж, дахин барилга бариулахгүй байх тал дээр онцгой анхаарал хандуулж ажиллах шаардлагатай” хэмээв.

Мөн ирэх жилийн нийслэлийн төсөвт ус соруулах шинэ техник, тоног төхөөрөмжийн зардлыг тусгаж өгнө гэдгийг онцлов.

Өнөөдрийн байдлаар Хангай нуруунаас эх авдаг Богд, Онги, Сэлэнгэ, Орхон голын дунд хэсэг болон Хөвсгөл нуураас эхтэй Эг голын усны түвшин өмнөх өдрөөс 10-40 см, Орхон гол үерийн аюултай түвшинг 25 см давсан байна.

Мөн Хүдэр, Онон, Хэрлэн /Мөнгөморьт сум/ , Ховд, Хархираа, Чигж гол болон Орхон голын эхээр үерийн түвшинг 5-35 см, Байдраг-Баянбүрд харуул орчимд үерийн аюултай түвшинг 25 см даван хүчтэй үерлэж байна.

Маргааш Сэлэнгэ мөрөн Хялгант баг орчимд усны түвшин 10-25 см нэмэгдэнэ. Иймд дээр дурдсан голууд болон гол мөрний дагуу суурьшиж, нутаглаж буй малчид, тариаланчид, аж ахуйн нэгж байгууллага, ард иргэд, аялал зугаалгаар яваа хүмүүс үерийн аюулаас болгоомжилж сонор сэрэмжтэй байхыг онцгойлон анхааруулж байна.

Хүн өдөрт найман цагаас илүү хугацаагаар унтах нь оюун санаанд хор хөнөөл учруулаад зогсохгүй цус харвалт, зүрх судасны өвчнөөр нас барах магадлалыг хоёр дахин нэмэгдүүлдэг байна. Их Британийн Килийн их сургуулийн эрдэмтэд ийм дүгнэлтэд хүрсэн талаар “Science Alert” сэтгүүлд мэдээлснийг “РИА Новости” агентлаг уламжлав.

Мэргэжилтнүүд нийтдээ гурван сая гаруй хүнийг оролцуулан 74 судалгаа хийсэн байна. Арван цаг унтсан хүнийг долоон цаг унтсан хүнтэй харьцуулахад нас барах магадлал 30 хувиар илүү байжээ. Тодруулбал, харвалтын улмаас нас барах эрсдэл 56 хувиар, зүрх судасны өвчлөлийн улмаас нас барах магадлал 49 хувиар тус тус өссөн байна.

Бага унтах нь хүний биеийн эрүүл мэндтэй шууд холбоотой бөгөөд зүрхний өвчнөөр өвчлөх эрсдэлийг 44 хувиар нэмэгдүүлдэг ажээ. Өмнө нь АНУ-ын Альберт Эйнштэйний нэрэмжит Анагаах ухааны коллежийн эрдэмтэд унтах цагаа зөв зохицуулж, сайтар амрах нь ажлын бүтээмжийг ихээхэн нэмэгдүүлж, хөгжилтэй, эрүүл чийрэг байлгадаг талаар тайлбарласан байна.

Шөнө сайн унтаж амрахад дэр чухал аж. АНУ-ын Үндэсний сангийн мэргэжилтнүүд хэрвээ тухтай, бөх гэгч унтаж амрахыг хүсвэл хөл дороо дэр ивэхийг зөвлөсөн байна.

Сонгино-Хайрхан дүүргийн 12 дугаар хороо Сонсголонгийн 289.4 у/м төмөрбетон гүүрийг шинээр барих төслийн ажил 24.17 хувийн гүйцэтгэлтэйгээр үргэлжилж байна.

Өнөөдрийн байдлаар гүүрийн нийт завсрын тулгуурын 12 худган суурийн их биеийн цутгалтын ажил бүрэн хийгдсэн. Захын 1 дүгээр тулгуур, завсрын 2-7 дугаар тулгуурууд бүрэн цутгагджээ. Завсрын 8 дугаар тулгуурын усны бетон цутгах ажил хийгдсэн бөгөөд энэ нь нийт худган суурийн ажлын 90 хувийг эзэлж байгаа юм.

Мөн 175 ширхэг дугуй цохигч хийгдэхээс 35 ширхгийг цутгаж бэлдсэн байна.

Нийслэлийн хэмжээнд 2018 оны 07 дугаар сарын 17-ны өдрөөс эхлэн орсон усархаг аадар борооны улмаас дүүргийн 8-н хорооны нутаг дэвсгэрт үер буусан. Үүнтэй холбогдуулан дүүргийн Онцгой комиссоос үерт автсан нийтийн эзэмшлийн гудамж талбай болон айл өрхүүдийн нүхэн жорлонг ариутгаж халдваргүйжүүлэх ажлыг өнгөрсөн долоо хоногт эхлүүлсэн билээ.

Тухайлбал өнөөдөр дүүргийн Тохижилт нийтийн аж ахуйн хэлтэс болон ‘’Баяндэмбэрэл’’ ХХК ариутгал халдваргүйжүүлэлтийг 27 дугаар хороонд хийж байгаа юм. Ариутгал, халдваргүйжүүлэлтийг “Hi-Cop” бодисоор, айл өрхийн нүхэн жорлонг Хлорын шохойгоор ариутгал хийж нян бактери, вирусийг устгаж байгаа бөгөөд тус хорооны хувьд ариутгал, халдваргүйжүүлэлт хийх нэн шаардлагатай 775 өрхийн 543.000 м.кв талбай байгаа аж хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Цахим сүлжээгээр “Улсын эмнэлгүүдээр явж, хүмүүсийн хараа хяналт сул байгааг далимдуулан хулгай хийдэг эмэгтэйн талаар таньж мэдэх хүн байвал мэдээлэл өгнө үү” хэмээн нэгэн иргэн хүсчээ. Тэрбээр хулгайч эмэгтэйд өөрийн утсаа алдсан бөгөөд бусдад анхааруулга болгох үүднээс энэхүү сэрэмжлүүлгийг өгч байна.

Тус хэрэг энэ сарын 03-нд өдөр Баянгол дүүргийн долоодугаар төв эмнэлэг буюу Хүүхдийн эмнэлэгт гарчээ. Гомдолтой байгаа тус хүний хүүхдийнх нь бие муу, сахиад сандарч зовж байхад зурган дээр гарч буй эмэгтэй сувилагчийн дүрд хувиран тусламж үзүүлэх гэж байгаа мэт ойлгуулан гар утсыг нь авч, хулгайлан зугтаасан.

Хохирсон эмэгтэй “Эмнэлгийн камерын бичлэг албан ёсны баталгаатай. Мөн цагдаад гомдол гарган өгсөн байгаа тул бусдад анхааруулж, сэрэмжлүүлэг болгох үүднээс энэхүү зураг, бичлэгийг олон нийтэд дэлгэж байна. Энэ хүүхнийг таньж мэдэх хүн байвал БГД-ийн цагдаагийн нэгдүгээр хэлтэст яаралтай мэдэгдэнэ үү” хэмээжээ.

З.МӨНХСУВД

Хүчтэй бороо орсны улмаас Өмнөговь аймгийн Гурвантэс сумаас Ноён сумын хооронд, газраар татсан шилэн кабелийн шугам тасарчээ. Үүний улмаас Гурван тэс, Сэрвээ, Шивээ хүрэнгийн үүрэн холбоо, интернетийн сүлжээ доголджээ. Тухайлбал, Шивээхүрэн дэх Гаалийн газрын дотоод сүлжээ болон банкууд, уурхайнууд, бусад байгууллагууд сүлжээгүй болсон байна. Одоогоор тус газар модем ашиглаж байгаа тул интернет бүрдүүлэлт хэвийн хийгдэж байгаа юм. Сүлжээ тасрахаас өмнө гаалийн бүрдүүлэлтээ хийсэн машинууд хилээр гарч байгаа аж.

Байгалийн онц ноцтой үзэгдлийн улмаас гэмтсэн 10 км шилэн кабелийн сүлжээг холбоход орчны нөхцөл байдал хүндрэлтэй байсан байна.инженер техникийн ажилтнууд гэмтсэн шилэн кабелийн сүлжээг дахин холбож, үйлчилгээг хэвийн горимд оруулахаар шуурхай ажиллаж байгаа талаар Гаалийн ерөнхий газраас мэдээлэв. Энэ талаар “Мобиком” компанийн Олон нийттэй харилцах албанаас тодруулахад “Шилэн кабель тасарсан хэсэг нь хад асга, чулуу ихтэй. Үерийн ус 2 метр орчим өндөртэй орсон бөгөөд зарим газарт хөрс хууларснаас шилэн кабель олон газар сэтэрсэн байсан. Манай инженер техникийн хүмүүс дөрвөн өдөр ажиллаж байна.Маргаашдаа багтан бүрэн сэргээж, хэвийн ажиллагаанд оруулах төлөвлөгөөтэй байна”гэв.

Б.ОЮУНЖАРГАЛ