Month: July 2018

Дэлхийн банк, Олон улсын санхүүгийн корпорацийн дэмжлэгтэйгээр 2018 оны долдугаар сарын 02-04-ний өдрүүдэд Лаос улсад зохион байгуулагдсан хөдлөх эд хөрөнгийн барьцааны мэдэгдлийг бүртгэх байгууллагын үйл ажиллагаатай танилцах ажил хэргийн уулзалтад Улсын бүртгэлийн ерөнхий газрын Эд хөрөнгийн эрхийн бүртгэлийн газрын улсын ахлах бүртгэгч Ө.Өнөрлхам, мэргэжилтэн Г.Мөнхтамга, Мэдээллийн технологийн газрын ахлах мэргэжилтэн Д.Бадамханд нар оролцлоо.

Уг уулзалтын хүрээнд Лаос Улсын Сангийн яамны Улсын хөрөнгийг удирдах газар, түүний харьяа Хөдлөх эд хөрөнгийн барьцааны мэдэгдлийн бүртгэлийн нэгж, бүртгэлийн системийн хэрэглэгч банкны төлөөлөл болох “BCEL” банк, “LS HORIZON” хуулийн фирмийн төлөөлөлтэй уулзаж, хөдлөх эд хөрөнгийн барьцааны бүртгэл болон хууль эрх зүйн орчны талаар мэдээлэл солилцож, харилцан туршлага судлав.

Бүгд Найрамдах Ардчилсан Лаос Ард Улсад Хөдлөх эд хөрөнгийн барьцааны тухай хууль 2015 онд батлагдсанаар хөдлөх эд хөрөнгийн барьцааны мэдэгдлийг бүртгэж эхэлжээ.

Лаос улс нь хөдлөх эд хөрөнгийн барьцааны мэдэгдлийг бүртгэх харилцааг хөгжүүлэх, тогтворжуулах ажлын хүрээнд сүүлийн үеийн дэвшилтэт технологи, тоног төхөөрөмжийг ашиглах, бүртгэлийн цахим системийн найдвартай, аюулгүй ажиллагааг хангах, албан хаагчдын мэдлэг, чадварыг сайжруулах, хямд зардлаар хэрэглэгчдэд чанартай үйлчилгээ үзүүлэх, систем хэрэглэгчдэд шаардлагатай мэдээллийг хүргэх, сургалт сурталчилгааны ажлын цар хүрээг нэмэгдүүлэхэд анхаарч ажиллаж байгаа талаар танилцуулав.

Дээрх уулзалтад оролцсон албан хаагчид 07 дугаар сарын 24-ний өдөр Эд хөрөнгийн эрхийн улсын бүртгэлийн газар болон Мэдээллийн технологийн газрын албан хаагчдад зориулсан сургалт зохион байгуулж, Лаос улсын хөдлөх эд хөрөнгийн бүртгэлийн ажиллагаа, бүртгэлийн цахим системийн талаар мэдээлэл хүргэж, хэрэгжүүлэх боломжтой туршлагын талаар санал солилцлоо.

Цаашид дотоод болон гадаад сургалт, уулзалтын талаарх мэдээллийг байгууллагын салбар, нэгжийн албан хаагчиддаа хүргэхэд анхаарч ажиллахаар болов

ОХУ-ын Красноярск мужийн шувуу үржүүлгийн “Заря” компани 2018 онд тахианы 37 сая ширхэг өндгийг Монголд экспортлохоор төлөвлөжээ. Тодруулбал, тус мужийн Мэргэжлийн хяналтын байгууллагын мэдээллээр үүнээс зургаан сая 30 мянгыг нь нийлүүлээд байгаа бөгөөд энэ сард тус байгууллага 907,2 мянган ширхэг өндгийг хянаж, шалгаад Монголд нийлүүлэх зөвшөөрөл олгосон байна. Красноярск муж нь тахианы өндөгнөөс гадна улаан буудайг манай оронд нийлүүлдэг аж.

Дашрамд дуулгахад, Өндөг, шувуу, гахайн мах үйлдвэрлэгчид гахай, тахианы тэжээлийг гаднаас авахад гаалийн татвар өндөр, импортын бүтээгдэхүүний үнэ хямд тул хэрэглэгчид дотоодын бүтээгдэхүүнээс илүү гаднаас оруулж ирж буй өндөг, махыг илүүтэй авч хэрэглэдэг байна.

Нийгмийн даатгалын байгууллагаас даатгуулагчийн илүү төлсөн шимтгэлийг буцаан олгож эхэллээ. Үндсэн ажлаасаа гадна давхар ажил хөдөлмөр эрхэлж, нийгмийн даатгалын шимтгэл төлсөн даатгуулагчийн сарын хөдөлмөрийн хөлс, түүнтэй адилтгах орлого нь тухайн үед мөрдөгдөж буй шимтгэл ногдуулах хөдөлмөрийн хөлсний дээд хэмжээнээс хэтэрсэн тохиолдолд илүү төлөгдсөн шимтгэлийг буцаан олгодог байна.

Нийгмийн даатгалын ерөнхий газраас ажил олгогчийн нийгмийн даатгалын шимтгэл төлөлтийн тайлан, даатгуулагчийн шимтгэл төлсөн тооцооны хуудас, өгөгдлийн сангийн мэдээлэлд тулгуурлан илүү төлсөн шимтгэлээ буцаан авах эрх бүхий даатгуулагчийн нэрсийн нэгдсэн жагсаалтыг гаргасан байна. Энэ жилийн тухайд давхардсан тоогоор 28407 даатгуулагчид 2.3 тэрбум төгрөгийг буцаан олгох юм байна.

Даатгуулагч нь илүү төлсөн шимтгэлээ авахын тулд үндсэн ажлынхаа харьяа нийгмийн даатгалын хэлтэст хандах бөгөөд ингэхдээ баталгаажсан нийгмийн даатгалын дэвтэр, үндсэн ажлаас гадуур гүйцэтгэсэн ажил, үйлчилгээний орлогоос төлсөн шимтгэлийг бүртгэх дэвтэр, иргэний үнэмлэх, даатгуулагчийн нэр дээр нээсэн банкны харилцах дансны тодорхойлолт зэргийг бүрдүүлнэ.

Нийгмийн даатгалын байгууллага нь даатгуулагчийн хүсэлтийг хүлээн авч, илүү төлсөн шимтгэлийн тооцооллыг хийсний дараа банкин дахь харилцах данс руу нь шилжүүлэх юм байна.

Үер усны аюул, ослоос урьдчилан сэргийлэх ажлыг эрчимжүүлэх, мэргэжлийн ангиуд болон албан хаагчдын бэлтгэл, бэлэн байдлын үзлэг шалгалтыг хийх Нийслэлийн Онцгой байдлын газрын ажлын хэсэг өнөөдөр Баянзүрх дүүрэгт ажиллалаа.

Нийслэлийн Онцгой байдлын газрын дэд дарга Б.Мягмардоржийн ахалсан тус ажлын хэсэг дүүргийн хэмжээнд цагийн байдал зарлаж мэргэжлийн ангийн албан хаагчид болон үерийн үед шаардлагатай техник, тоног төхөөрөмжийн бэлэн байдлыг шалган, ариутгал халдваргүйжүүлэлт хийх ажлыг яаж зохион байгуулж байгаа болон хэрхэн хүний гоц халдварт өвчин дэгдэхээс урьдчилан сэргийлж байгаад шалгалт хийж үнэлэлт, дүгнэлт өгсөн юм.

Цагийн байдлын дагуу дүүргийн Онцгой комисс хуралдаж үер усны аюул, ослын үед иргэдийг нүүлгэн шилжүүлэх 10 техник хэрэгсэл, мэргэжлийн ангийн 80 албан хаагчийг ажлын хэсгийн заасан хугацаанд бэлэн байлгасан юм. Түүнчлэн айл өрхийн хашаанд тогтсон усыг соруулах 4 мотопомп, эмнэлэгийн тусламж үзүүлэх 3 автомашин, ариутгал халдваргүйжүүлэлт хийх мэргэжлийн байгууллагууд болон бусад эмч, мэргэжлийн албан хаагчдыг цаг тухайд нь бэлэн байлгаснаар ‘’Бүрэн хангалттай’’ үнэлэгдлээ хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Монголын улсын иргэн ОХУ-ын автозамын боомт Хиагтаар 140 килограмм алим, тарвасыг Монгол руу нэвтрүүлэх гэж байгаад саатуулагджээ. Автомашины тээшинд тээвэрлэж явсан уг жимс гарал үүслийн гэрчилгээгүй байсан тул хураан авч ОХУ-ын холбогдох газарт нь буцаан шилжүүлсэн байна. Зөрчил гаргасан Монголын иргэнд захиргааны хариуцлага хүлээлгэх аж.

Монгол улсаас ОХУ руу мах, сүү, сүүн бүтээгдэхүүн, амьд амьтдыг тээвэрлэх, зөөвөрлөхийг өнгөрөгч оны нэгдүгээр сарын 12-ноос эхлэн түр хориглоод байгааг Эрхүү муж, Буриадын БНУ-ын Мэргэжлийн хяналтын газар анхааруулж байгаа. Хойд хөрш рүү аялж байгаа иргэд хориглосон бүтээгдэхүүнийг хил нэвтрүүлэх гэсэн үйлдлийг удаа дараа гаргаж байгааг анхааруулсан байна.

Монгол, Орос, Хятад улсын хоорондын “Цайны зам” хөтөлбөрийн хүрээнд маргааш Улаанбаатарт 400 жуулчин ирэх юм. Эхний ээлжийн 400 жуулчныг дагалдан БНХАУ-ын улсын аялал жуулчлалын компанийн удирдлагууд болон 20 орчим телевиз, сонин, сайтын сурвалжлагч нар ирэх аж. Эхний аялал амжилттай зохион байгуулагдсан тохиолдолд цаашид жилийн дөрвөн улирлын турш сар бүр 400 жуулчин нийслэлээр аялах юм байна.

Хятадын жуулчид 11:00 цагт Д.Сүхбаатарын талбайд Нийслэлийн аялал жуулчлалын газрын албаны хүмүүстэй уулзаж, дурсгалын зураг авахуулах юм.

Хүнс, хөдөө аж ахуй, хөнгөн үйлдвэрийн дэд сайд Ж.Сауле БНХАУ-ын Зах зээлийн хяналтын ерөнхий газрын дэд сайд Цинь Ижиг хүлээн авч уулзлаа.

Уулзалтын эхэнд, ХХААХҮ-ийн дэд сайд Ж.Сауле БНХАУ-ын Зах зээлийн хяналтын ерөнхий газрын дэд сайд Цинь Ижид хандан, хоёр орны харилцаа хамтын ажиллагааг өргөжүүлэн хөгжүүлэхэд хувь нэмрээ оруулж байгаад нь талархал илэрхийлэв. Тэрбээр, БНХАУ-ын Зах зээлийн хяналтын ерөнхий газрыг 2018 оны 4 дүгээр сард шинээр эмхлэн байгуулсан явдалд баяр хүргээд, мал аж ахуй, хүнс, газар тариалан, жижиг, дунд үйлдвэр, хоршооны салбарын өнөөгийн байдал, баримталж буй бодлого, авч хэрэгжүүлж буй арга хэмжээнийхээ талаар танилцууллаа.

Уулзалтад Монголын талыг төлөөлж, ХХААХҮЯ-ны Төрийн нарийн бичгийн дарга Д.Энхбат, Мал эмнэлгийн ерөнхий газрын дарга Д.Түмэндэмбэрэл, ХХААХҮЯ-ны Жижиг, дунд үйлдвэр, хоршооны бодлогын хэрэгжилтийг зохицуулах газрын дарга Я.Эрдэнэсайхан, Хүнсний үйлдвэрийн бодлогын хэрэгжилтийг зохицуулах газрын дарга Т.Гантогтох, Жижиг, дунд үйлдвэрийг хөгжүүлэх сангийн захирал С.Төгсбилэг нар оролцсон юм. БНХАУ-ын талаас, Хятадын гэрчилгээ, магадлан итгэмжлэлийн удирдлагын газрын дэд дарга Лиу Вейжүн, Хэмжилзүйн газрын дэд дарга Дү Юүэжүн, Гадаад хамтын ажиллагааны газрын дэд дарга Ма Вэншиү нарын албаны хүмүүс байлцав.

БНХАУ-ын Зах зээлийн хяналтын ерөнхий газрын дэд сайд Цинь Ижи

БНХАУ-ын Зах зээлийн хяналтын газар (State Administration for Market Regulation) нь гадаад, дотоодын аж ахуйн нэгжүүдийг бүртгэж, итгэмжлэл-баталгаажуулалт олгох, аж үйлдвэр, хүнсний бараа бүтээгдэхүүний чанарын хяналт, Монополын эсрэг зохицуулалтыг хэрэгжүүлдэг Засгийн газрын тохируулагч агентлаг. Тус газрын Дэд сайд Цинь Ижи 2018 оны 7 дугаар сарын 25-28-ны өдрүүдэд Монгол Улсад анх удаа айлчилж байна.

Айлчлалын хүрээнд хүнсний болон мах үйлдвэрлэгч аж ахуйн нэгжүүдэд БНХАУ руу бүтээгдэхүүнээ экспортлох эрх олгох, стандарчилал, хэмжилзүй, итгэмжлэл-баталгаажуулалт зэрэг чиглэлээр санал солилцох, хамтын ажиллагаагаа өргөжүүлэх боломж эрэлхийлж байгаа юм. Мөн талууд 2018 оны 4 дүгээр сард Бичил, жижиг, дунд үйлдвэрлэлийн салбарт хамтран ажиллах тухай санамж бичиг байгуулсан бөгөөд уг санамж бичгийн дагуу хэрэгжүүлэх үйл ажиллагааны төлөвлөгөөгөө өнөөдөр харилцан тохиролцохоор уулзаж байгаа нь энэ.

ХХААХҮ-ийн дэд сайд Ж.Сауле

Энэ ч үүднээс Дэд сайд Ж.Сауле хамтарч ажиллах тодорхой саналуудаа илэрхийлэв. Тухайлбал, хөдөө аж ахуйн гаралтай органик хүнсний бүтээгдэхүүний экспортыг нэмэгдүүлэхэд дэмжлэг үзүүлэх, БНХАУ руу зөвхөн адууны мах экспортлоод зогсохгүй үхэр, хонь, ямааны махны экспортлох хүсэлтэй байгаа тул түр хоригийг цуцлахыг хүссэн. Мөн Монгол Улсаас БНХАУ-д буудайн гурил, хөх тарианы гурил экспортлох саналыг холбогдох газарт уламжилж өгөх, Чанарын хяналт, шалгалт хорио цээрийн асуудал хариуцсан газартай Дэд сайдын түвшний ажлын хэсгийн уулзалтыг ойрын хугацаанд хийх хүсэлтэй байгаагаа хэллээ. Түүнчлэн хивэг үйлдвэрлэж буй аж ахуйн нэгжийн үйл ажиллагаанд хянан магадлагаа хийх, хүнсний аюулгүй байдал хангасан бүтээгдэхүүнийг дотоод, гадаадын зах зээлд нийлүүлэх тал дээр хамтарч ажиллах санал тавилаа.

ХХААХҮЯ-ны Төрийн нарийн бичгийн дарга Д.Энхбат, Мал эмнэлгийн ерөнхий газрын дарга Д.Түмэндэмбэрэл

ХХААХҮЯ-ны Төрийн нарийн бичгийн дарга Д.Энхбат: “Монгол Улсын нийт ажиллах хүчний 72 хувь ажиллаж, ДНБ-ий 17,3 хувийг үйлдвэрлэдэг жижиг, дунд үйлдвэр хөгжиж байж, улс орны хөгжинө. Энэ ч утгаараа жижиг, дунд үйлдвэрийг санхүүгээр дэмжих зорилгоор 2009 онд Монгол Улсын Засгийн газраас Жижиг, дунд үйлдвэрийг хөгжүүлэх сан байгуулан ажиллаж байна. Тус сан улсын төсөв, Засгийн газрын бонд, Хөгжлийн банкны эх үүсвэрээр санхүүждэг боловч батлагдсан төсөв нь хүрэлцдэггүйгээс олон аж ахуйн нэгжийн төслийг дэмжих боломжгүй байдаг” гэв. Тиймээс тэрбээр Жижиг, дунд үйлдвэрийг хөгжүүлэх сангийн үйл ажиллагааг дэмжих, хөрөнгө оруулахыг хүслээ.

Мөн Мал эмнэлгийн ерөнхий газрын дарга Д.Түмэндэмбэрэл мал эмнэлгийн салбарын үйлчилгээг шинэ шатанд гаргахад шаардлагатай техник, тоног төхөөрөмжийн дэмжлэг үзүүлэх, малын эмч бэлтгэх, мэргэшүүлэх тал дээр хамтарч ажиллах хэрэгтэй байгааг нэмж хэллээ.

ХХААХҮЯ-ны Жижиг, дунд үйлдвэр, хоршооны бодлогын хэрэгжилтийг зохицуулах газрын дарга Я.Эрдэнэсайхан ЖДҮ эрхлэгчдийн бараа бүтээгдэхүүнийг борлуулалтаар дэмжих, экспортыг нэмэгдүүлэх чиглэлээр Монгол Улсад төсөл, хөтөлбөр хэрэгжүүлэх, ЖДҮ-ийн зориулалттай тоног төхөөрөмжийг санхүүгийн түрээс, бусад санхүүгийн хөнгөлөлттэй нөхцөлөөр худалдан авах боломж олгох, бизнес эрхлэгчдэд зориулсан богино, дунд, урт хугацааны сургалтад хамруулах, үзэсгэлэн худалдаа зохион байгуулах зэргээр өөрийн эрхлэх асуудлын хүрээнд хэд хэдэн санал тавьсан.

БНХАУ-ын Зах зээлийн хяналтын ерөнхий газрын дэд сайд Цинь Ижи эдгээр тодорхой саналыг хамтран ажиллах төлөвлөгөөндөө тусгах боломжтой эсэхийг сайтар судлан үзээд, ойрын хугацаанд хариу өгөн, зарим саналыг холбогдох газарт нь уламжлах болно гэдгээ мэдэгдлээ.