Month: July 2018

Өнөөдөр ЭМЯ-наас баяр наадмын үеэр эрүүл мэндийн байгууллагуудын бэлэн байдал, эрүүл мэндийн эрсдэлгүй баяр, наадмыг тэмдэглэх талаар мэдээлэл хийлээ.

Баяр наадмын үеэр Эрүүл мэндийн яамны 11-323002, Нийслэлийн эрүүл мэндийн газрын 11-320981 дугаарын утсаар, иргэдээс мэдээлэл хүлээн авч, 24 цагийн турш хариуцлагатай жижүүр ажиллаж холбогдох арга хэмжээг авч, шийдвэрлэж ажиллана.Түүнчлэн 2018 оны 7 дугаар сарын 11-нээс 7 дугаар сарын 16-ны өдрийн 10-14 цагийн хооронд Шүд, эрүү, нүүрний төв, дүүргийн Эрүүл мэндийн төвийн шүд, дотор, мэс засал, гэмтлийн кабинет, өрхийн эрүүл мэндийн төвүүд ажиллах юм.

Баяр наадмаа эрүүл мэндийн эрсдэлгүй тэмдэглэн өнгөрүүлэх, ялангуяа хоолны хордлого, осол гэмтэл, үер усны аюул, наршилтаас сэргийлэх цуврал зөвлөмжүүдийг хэрэгжүүлж баярлахыг ЭМЯ-наас анхааруулж байна.

Сүүлийн үед галзуу өвчний сэжигтэй чоно, үнэг, мануул зэрэг зэрлэг амьтдад хазуулж ноцуулах тохиолдол Сэлэнгэ, Говь-Алтай, Өмнөговь аймгуудад гарч байгаа учраас малчид, хөдөө орон нутагт амарч байгаа иргэдийг ой, хээрээр ганц нэгээрээ явахгүй байх, хүүхдийг хараа хяналтгүй орхихгүй, эцэг эх, асран хамгаалагчдыг анхаарал болгоомжтой байхыг сэрэмжлүүллээ.

Тулгар төр байгуулагдсаны 2227, Их Монгол Улсын 812, Ардын хувьсгалын 97 жилийн ой, үндэсний их баяр наадмын хүчит бөхийн барилдаанд барилдах бөхчүүдийн бүртгэл өчигдөр Спортын төв ордонд эхэлсэн. Наадамд барилдах бөхчүүд өөрийн биеэр ирж, зургаа шинээр авахуулан, бүртгэлийг баталгаажуулах юм. Одоогийн байдлаар нийт 200 гаруй бөхчүүд ирж бүртгүүлсэн байна. Бүртгэл өнөөдөр өндөрлөнө.

Монгол Улсын Ерөнхий сайд У.Хүрэлсүхийн ахалдаг Олимпийн наадамд бэлтгэх үндэсний хороо хуралдан хорооны дүрэм болон энэ оны ажлын төлөвлөгөөгөө баталлаа.

Олимпод бэлтгэж байгаа спортын холбоод болон тамирчдын бэлтгэл сургуулилттай танилцан дүнг 12 дугаар сард багтаан танилцуулахыг хорооны орлогч, БСШУС-ын сайд Ц.Цогзолмаад даалгав.

Мөн “Токио-2020” олимпийн наадамд оролцох Буудлагын шигшээ багийн тамирчдын бэлтгэл, сургуулилтад шаардагдах сум, Булган аймгийн Хангал сум дахь “Олимпийн бэлтгэлийн бааз”, “Буянт-Ухаа” спортын цогцолбор, бусад барилга, тоног төхөөрөмж, хэрэглэл, зардал төсвийг судлан, шаардлагатай арга хэмжээ авахыг даалгав.

Олимпийн наадмын эрх авах тэмцээнүүдэд оролцох шигшээ багийнханд онгоц, галт тэрэгний тийз, ачаа тээврийн үнийн хөнгөлөлт үзүүлэхийг хорооны гишүүн, “МИАТ” компанийн захирал болон “УБТЗ” нийгэмлэгийн даргад зөвлөмж болголоо.

Шигшээ багийн тамирчдын тэмцээн, бэлтгэлд шаардагдах хэрэглэл материалыг хилээр оруулахад НӨАТ-аас чөлөөлөх зэрэг асуудлыг хэлэлцэн холбогдох хуулийн хүрээнд шийдвэрлүүлэхээр болов.

Манай улсын Үндэсний шигшээ багийн тамирчид “Токио-2020” олимп болон паралимпийн наадамд Бээжин, Лондонд үзүүлсэн амжилтаа бататгаж, зургаагаас доошгүй медаль, түүний дотор алтан медаль авах зорилт тавьж байна.

Баг тамирчид 10 гаруй төрөлд 35-50 эрх авахаар олон улсын тэмцээнд оролцон оноо цуглуулж байна Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Монголчууд өнөөдөр Төрийн далбааны өдрийг 10 дахь жилдээ тэмдэглэх гэж байна.

Монгол төрийн бэлгэ тэмдэг болсон Төрийн далбаандаа хүндэтгэлтэй хандах, түүхт ёс, түүхэн уламжлалаа нандигнан өвлөх, үндэсний эв нэгдлийг бэхжүүлэх зорилгоор төрийн далбааны өдөртэй болох хуулийг нэр бүхий гишүүд 2008 онд санаачлан батлуулсан. Ингэснээр Төрийн далбааны өдрийг жил бүрийн долоодугаар сарын 10-нд, улсын баяр наадмын өмнөх өдөр тэмдэглэж байхаар хуульчилж, 2009 оноос эхлэн тэмдэглэдэг болсон билээ.

Энэ өдрийн хүрээнд цэргийн ёслолын жагсаал өнөөдөр 10:00 цагт Сүхбаатарын талбайд болно. Ёслолын жагсаалд Зэвсэгт хүчин, цагдаа, хилийн цэрэг, онцгой байдал, шүүхийн шийдвэр гүйцэтгэх албаны цэргийн алба хаагчид оролцох юм байна.

Эмнэлгүүдийн тохижилтын ажил ямар шатандаа явж байгаа талаар Эрүүл мэндийн сайд Д.Сарангэрэл, Улаанбаатар хотын ерөнхий менежер Т.Гантөмөр нар газар дээр нь очиж танилцлаа.

Эмнэлэгт үйлчлүүлэхээр ирсэн иргэд, үйлчлүүлэгчийн ар гэрийнхэн хүссэн газраа машин байрлуулах, суух сандал зэрэг дутагдалтай. Мөн эмнэлгүүдийн орц гарцны хүрэлцээ муу байдгаас түгжрэл үүсэх, түргэн тусламжийн автомашин орох зогсоолгүй, хөгжлийн бэрхшээлтэй иргэдэд зориулсан зам байхгүй гэхчлэн асуудал их. Энэ байдлыг арилгах үүднээс эмнэлгүүдийн гаднах талбайг засах, тохижуулах ажил хийж байгаа юм.

Энэ жил ЭХЭМҮТ, Баянзүрх дүүргийн нэгдсэн эмнэлэг, ХӨСҮТ, Өргөө, Хүрээ амаржих газар зэрэг нийт зургаан эмнэлгийн гадна талбайг иж бүрэн тохижуулж байгаа бөгөөд зарим нэг эмнэлгийн тохижилтын ажил энэ сард бүрэн дуусах юм. Тухайлбал Монгол Улсдаа эх, хүүхдэд төрөлжсөн эмнэлгийн тусламж үйлчилгээ үзүүлдэг ЭХЭМҮТ-ийн гадна талбайд 1,3 тэрбум төгрөгийн хөрөнгө оруулалтын ажил хийж байна.
Энэхүү ажлын хүрээнд нийт 15.900 м.кв талбайд тохижилтын ажил явагдаж байгаа бөгөөд 5900м.кв талбайг шинээр тохижуулан, 2500 м.кв ногоон байгууламжийг байгуулж, 2260 м.кв явган хүний зам, 108 автомашины зогсоол, нисдэг тэрэгний зогсоолыг байгуулж байна.
2017 онд Улаанбаатар хотын Захирагчийн ажлын албанаас П.Н.Шастины нэрэмжит Улсын Гуравдугаар эмнэлэг, ГССҮТ, ХСҮТ, Сонгинохайрхан дүүргийн эрүүл мэндийн нэгдлийн гадна тохижилтын ажлыг хийж, зам талбайг нэмэгдүүлж усан оргилуур, ногоон байгууламж, гэрэлтүүлэг зэргийг цогцоор нь хийж гүйцэтгэсэн юм.

Үндэсний их баяр наадмын Хурдан морины салбар хорооноос өнөөдөр мэдээлэл хийлээ.

Хурдан морины салбар хорооны орлогч дарга хурандаа Ж.Болдбаатар “Монгол Улсын Үндэсний их баяр наадмын тухай хуулийн дагуу салбар хороо байгуулагдаж ажилладаг.

Манай хороо 30 хүний бүрэлдэхүүнтэй ажиллаж байна. Хурдан морины салбар хороо Хүй долоон худагт долоодугаар сарын 9-ний өдрөөс эхлэн ажиллана. Энэ хугацаанд 2,500-3,000 төрийн албан хаагч хурдан морь уралдуулах үйл ажиллагааг зохион байгуулдаг. Энэ жил Монгол телевиз, ETV, TV9 телевиз хурдан морины уралдааныг шууд дамжуулна“гэв.

Хурдан морины уралдааны хуваарь:

• Долоодугаар сарын 10-нд Хязаалан /17 км/, Шүдлэн /14 км/
• Долоодугаар сарын 11-нд Азарга /23 км/, Их нас /25 км/
• Долоодугаар сарын 12-ны өдөр соёолон /23 км/, даага /12 км/
• Долоодугаар сарын 13-нд шинэ монгол адуу /эрлийз/ буюу гурван насны морьдын уралдаан болно.

Хүй 7 худагт зохион байгуулах арга хэмжээ:

• Долоодугаар сарын 10-нд Холч морьдын уралдааныг зохион байгуулна.
• Долоодугаар сарын 10-12-ны өдөр Морийг гарааны зурхай руу явсан үед “Морьтон Монгол” үзүүлбэр үзүүлнэ.
• Долоодугаар сарын 12-нд 08:30-09:30 цагт Шүхрийн буулт хийнэ.
• Долоодугаар сарын 13-нд Жороо морьдын уралдаан болно.

БҮХ УРАЛДААНЧ ХҮҮХДИЙГ ХУРУУНЫ ХЭЭГЭЭР БҮРТГЭНЭ

Гэр бүл, хүүхэд, залуучуудын газрын Хууль эрх зүй, хамтын ажиллагааны газрын дарга А.Энхбаатар “Өнгөрсөн жил уралдаанч хүүхдүүдийг хурууны хээгээр бүртгэж туршсан. Энэ жил Үндэсний их баяр наадам болон 21 аймгийн хэмжээнд энэ бүртгэлийн системийг нэвтрүүлнэ.

Хүүхдийн бичиг баримтаар бүртгүүлдэг, насанд хүрээгүй хүүхэд уралдуулдаг байдлыг таслан зогсоох юм. Түүнчлэн, хэн нэгэн этгээд хүүхдийн эрх зөрчсөн тохиолдолд хариуцлага хүлээх этгээдийг тодорхой болгоно.

Тиймээс энэ жилийн Үндэсний их баяр наадмаар хэд хэдэн зарчмыг мөрдүүлнэ.

1. Бүх уралдаанч хүүхдийг хурууны хээгээр бүртгэж, бүгдэд нь цахим карт олгоно
2. Бүх аймгийн хэмжээнд уралдаанч хүүхдүүдийн эцэг эхийн зөвшөөрлийг заавал бичгээр шаардана
3. Уралдаанч хүүхдийн даатгалын хураамжийг 100,000, нөхөн олговрын хэмжээг 20 сая төгрөг байхаар тогтсон. Даваа гарагаас эхлэн даатгалын компаниудын нэр тодорхой болно” гэв.