Month: June 2018

Сэлэнгэ аймгийн Засаг даргын А/168 тоот “Хууль бус алт олборлолтын үйл ажиллагааг таслан зогсоох, албадан буулгах тухай” захирамж, 05 тоот албан даалгавар, хамтарсан аяны хүрээнд тус аймгийн Мэргэжлийн хяналтын газар, Байгаль орчин аялал жуулчлалын газар, Цагдаагийн газрын хамтарсан ажлын хэсэг Ерөө сум Бугант тосгоны нутаг, “Хэрээн гол” “Хавчирганы Ам”, “Их Алт” гэх газарт хууль бусаар ашигт малтмал олборлож байсан болон олборлохоор бэлтгэсэн иргэд, нөхөрлөлүүдийн үйл ажилллагааг таслан зогсоож албадан буулган, техник тоног төхөөрөмжийг хураав.

Мөн хууль бус үйл ажиллагаандаа ашиглаж байсан, нууж далдалсан, экскаватор, тоног төхөөрөмжийг илрүүлэн албадан буулгаж, талбай чөлөөлүүлөх арга хэмжээ авчээ.

НИТХ-ын Тэргүүлэгчдийн хуралдаанд СБД-ийн 10,11,12-р хорооны нутаг дэвсгэрт байрлах төвлөрсөн барилгын материалын зах, худалдааны төвийг үе шаттайгаар нүүлгэн шилжүүлэх ажлын хэсгийн ахлагч Ч.Гантулга ажлын явцын тайлангаа танилцуулж, асуудал шийдвэрлүүлэх хүсэлт гаргалаа. Өнгөрсөн хугацаанд энэхүү ажлыг зохион байгуулах талаар санал, дүгнэлт судалгаа, төлөвлөгөө боловсруулах ажлын хэсгээс 12 удаагийн хуралдаан, 3 удаагийн ажил байдалтай танилцах уулзалт, 5 удаагийн 100 айлын барилгын материалын хулалдаа эрхлэгчдийн төлөөлөлтэй хийсэн уулзалт, бусад холбогдох арга хэмжэг зохион байгуулсан гэлээ. Үр дүнд нь нийслэлийн төвд орших барилгын материалын худалдааны зах, төвийн үйл ажиллагааг холбогдох хууль, тогтоомжийн хүрээнд цэгцлэх, стандарт шаардлагыг мөрдүүлж ажиллах, гар дээрээс болон гадуурх худалдааны цэгүүдийн үйл ажиллагааг зогсоох, агаар, хөрсний бохирдол үүсгэж байгаа үйлдвэрүүдийг нүүлгэн шилжүүлэх зайлшгүй шаардлагатай гэсэн дүгнэлт гарчээ.

Хууль тогтоомж зөрчин үйл ажиллагаагаа явуулж байгаа үйлдвэрүүдийг шилжүүлэн байршуулах талаар СХД, БЗД, СБД, ЧД, Налайх дүүргийн Засаг дарга нарыг 2018 оны 5-р сарын 25-ны өдрийн ажлын хэсгийн хуралдаанд урьж оролцуулан санал авсан байна. Энэ үеэр Налайх дүүргийн Засаг даргаас бусад дүүргийн Засаг дарга нар хүлээн авах газар байхгүй тухайгаа илэрхийлжээ. Тиймээс Налайхын барилгын материал үйлдвэр технологийн паркаас өөр газар барилгын материалын үйлдвэрүүдийг хүлээн авах боломжгүй болоод байгаа юм. Тиймээс барилгын материалын үйлдвэрүүдийг нүүлгэх шилжүүлэх НБМҮТП-ийн дэд бүтцийг сайжруулах ажлын хүрээнд Налайх-Чойрын чиглэлийн төв замтай холбох, 100 айлын уулзвараас 32-ын тойрог хүртэл автозамыг шинээр засаж сайжруулах, өргөтгөлийн ажлыг хийх мөнгөн хөрөнгийг шийдвэрлүүлэх хүсэлтэй байгаагаа Тэргүүлэгчдэд танилцуулав.

НИТХ-ын Тэргүүлэгчид энэ асуудлыг дэмжиж, 7-р сарын 3-ны дотор Нийслэлийн засаг дарга бөгөөд Улаанбаатар хотын захирагч С.Батболдыг тус мөнгөн хөрөнгийг хэрхэн шийдвэрлэх тухай саналаа танилцуулахыг даалгалаа.

С.Амарсайхан: Аудитын газрын дүгнэлт тааруу байгаа нь мэргэжлийн ур чадвар сул, хариуцлагагүй байгааг харуулж байна

Хуралдаанаар 2017 оны нийслэл, дүүргийн санхүүгийн тайлан аудитын дүнг Нийслэлийн аудитын газрын дарга, тэргүүлэх аудитор С.Энхбаатар танилцуулав. Өнгөрсөн онд нийт 209 санхүүгийн тайланд санал дүгнэлт хийжээ. Үүний 145 нь зөрчилгүй, 60 хязгаарлалттай санал дүгнэлт байсан бол 4-т нь санал дүгнэлт өгөхөөс татгалзсан гэсэн хариу гарчээ. Энэ нь хязгаарлалттай болон санал дүгнэлт өгөхөөс татгалзах үнэлгээ авсан санхүүгийн тайлангийн тоо 2.5 дахин, нийт тайланд эзлэх хувийн жин нь 22.2 пунктээр нэмэгдсэн байна.

Нийслэлийн төсвийн ерөнхий захирагчийн нэгдсэн тайлангаас харахад нийт зөрчлийн дүн 88.0 тэрбум, санхүүгийн тайланд залруулагдсан 58.0 тэрбум, залруулагдаагүй 29.4 тэрбум төгрөгийн алдагдал гарчээ. Нийт улсын төсвийн байгууллагуудаас “санхүүгийн тайлангийн үлдэгдэл тооллогын бүртгэлээс зөрүүтэй, тооцоо нийлж актаар баталгаажуулаагүй, өглөгийг шийдвэргүйгээр бүртгэлээс хассан, харъяаллын бус хүмүүст санхүүгийн дэмжлэг олгосон, олгосон дэмжлэг, зээлийн эхгэн төлөлтийн хугацаа хэтэрсэн” гэх мэт зөрчлүүд илэрсэн байна.

Цаашдаа Нийслэлийн аудитын газар нь хууль тогтоомжийг боловсронгуй болгох, дээд байгууллага, төсвийн захирагчид болон санхүүгийн албан тушаалтан, гүйцэтгэх ажилтан нарыг чадавхижуулах зорилт тавин ажиллаж байгаагаа хэллээ.

НИТХ-ын дарга С.Амарсайхан “Аудитын газрын дүгнэлт тааруу байгаа нь мэргэжлийн ур чадвар сул, хариуцлага дорой, чавдар сул байна гэдгийг харуулж байна. Тийм учраас энэ чиглэл дээр холбогдох байгууллагууд шаардлагатай арга хэмжээг нийслэлийн төрийн сангийн хэлтэст хүргүүлэх хэрэгтэй. Ингэснээр ирэх онд нийслэлийн харъяа шат шатны байгууллагуудын санхүүгийн сахилга батыг онцгой дээшлүүлнэ. Энэ санхүүгийн асуудал үнэхээр задгай явж байгаа. Тиймээс санхүүгийн алдаа дутагдал гарахаас урьчдчилан сэргийлэх, төсвийн хөрөнгийг хэмнэх, шаардлагтай бол зарим зүйлийг хуулийн хүрээнд өөрчлөх ажлыг зохион байгуул” гэж үүрэгдэв.

Хурлын төгсгөлд НИТХ-ын төлөөлөгч, хурал дахь АН-ын бүлгийн дарга Ц.Баатархүү “Тэргүүлэгчдийн хуралдаанд нэмэлт өөрчлөлт оруулах тухай” асуудал өргөн барьж Тэргүүлэгчид дэмжсэнээр хурал өндөрлөлөө.

Нийслэлийн ОБЕГ энэ сарын 26-ны 15:28 цагт Хан-Уул дүүргийн 11 дүгээр хороонд Туул голын усанд 10 настай эмэгтэй хүүхэд живсэн тухай дуудлага хүлээн авсан байна. Дуудлагын дагуу 15:30 цагт Нийслэлийн аврах ангийн зургаан алба хаагч эрлийн ажлыг эхлүүлсэн юм.

Алба хаагчид Зайсангийн гүүрнээс 11 дүгээр хорооны Сонсголонгийн гүүр хүртэл найман км-т 10 удаа эрэн хайх ажиллагааг явуулжээ. Гэвч эрлийн ажил үр дүнд хүрээгүй тул 21:00 цагт түр зогсоосон байна. Харин өнөөдөр өглөөний 06:00 цагт эрэн хайх ажиллагааг дахин эхлүүлснээр 09.00 цагийн үед яармагийн гүүр орчмоос охины цогцосыг олжээ.

З.Сувд

Ерөнхий сайдын ивээл дор “Тогтвортой хөгжлийн зорилго:Жендэр ба Хөгжил” олон улсын багахурал өнөөдөр эхэллээ.Хурлын гол зорилго нь энэ сэдвийн хүрээнд ололт амжилт, туршлагаа солилцох боломжийг бүрдүүлэх аж. Мөн 2030 он хүртэлх Тогтвортой хөгжлийн хөтөлбөрийн жендэрийн тэгш байдлыг хангахад чиглэжээ. Канад, Япон, БНСУ, АНУ, Австрали зэрэг орнуудын Монгол Улсад суугаа Элчин сайдын яам, олон улсын, хөгжлийн хамтын ажиллагааны байгууллагын төлөөлөл, иргэний нийгэм, ТББ-ын төлөөллүүдуг хуралд оролцлоо.

Бага хурлын үеэр “Зохистой хөдөлмөр эрхлэлт, хүртээмжтэй эдийн засгийн өсөлтийг дэмжих жендэрийн түншлэл, хамтын ажиллагаа”, “Амьдралын чанарыг дээшлүүлэхэд жендэрийн шалгуур үзүүлэлтийг үндэсний болон олон улсын түвшинд ашиглах боломж, арга зам”, “Уур амьсгалын өөрчлөлтөд дасан зохицох, эрсдэлийг бууруулах, хөдөөгийн охид эмэгтэйчүүдийн аж байдлыг сайжруулах чиглэлээрх олон улсын түншлэл хамтын ажиллагаа” гэсэн салбар хуралдаан хийх юм. Сэдэвчилсэн хуралдаанууд нь олон улсын түвшинд хамтран ажиллах арга замыг тодорхойлоход чиглэж байна.

ХНХ-ын сайд С.Чинзориг “Манай улс 2002 онд Жендерийн тэгш байдлыг хангах Үндэсний хөтөлбөр, 2011 онд Жендерийн эрх тэгш байдлыг хангах тухай хуулийг батлан гаргаж хэрэгжүүлж байна.Засгийн газар 2016-2020 оны үйл ажиллагааны хөтөлбөртөө “Жендерийн тэгш байдлыг хангаж, шийдвэр гаргах түвшинд эмэгтэйчүүдийн оролцоог нэмэгдүүлэх”-ээр тусгаж жендерийн тэгш байдлыг хангах эрхзүй, бодлогын орчинг бий болгосноор манай улс жендерийн асуудлаар ахиц дэвшил гаргасан Ази тивийн цөөн орны тоонд зүй ёсоор орж байна” гэв.

Жендэрийн үндэсний хороо 13 салбар яамд, аймаг нийслэлд 31, нийт жендерийн 44 салбар хороодыг байгуулан ажиллаж байгаа нь жендэрийн тэгш байдлыг жендерийн тэгш байдыгхангах тогтолцоог нутаг дэвсгэр, төрийн болон засаг захиргааны зохион байгуулалтдаа нийцүүлэн хөгжүүлж буй орны нэг болжээ.

Түүнчлэн хурлаас тогтвортой хөгжлийгдэмжихэд чиглэсэн олон улсын түншлэл хамтын ажиллагааг хөгжүүлэх талаар “Улаанбаатар тунхаглал”-ыг дэвшүүлэхээр төлөвлөж байгаа ажээ.

Э.ЯНЖМАА

“Дефакто” институт улс төрийн намуудын дотоод ардчиллыг судалжээ. Монгол Улсын Дээд шүүхэд бүртгэлтэй 28 намаас зургаан нам нь уг судалгаанд хамрагдаж, хагас ардчилалтай гэсэн дүгнэлт гарчээ. Бусад 22 нам нь судалгаанд оролцохоос татгалзаж, дахин холбогдоогүй байна.Судалгаанд МАН, МАХН, ХҮН, ИЗНН, ЭОН, АН хамрагджээ.

Эдийн засагч Д.Жаргалсайхан “Ардчилсан орны намуудын санхүүжилт хамгийн ил тод байх ёстой. Сонгуулийн дараа бүх мэдээллийг аудитаар шалгуулан, СЕХ олон нийтэд мэдээлэх хуультай. Энэ хууль биелэгдэхгүй байна. Тиймээс бид намууд хаанаас санхүүждэгийг мэдэхээр зорьж байгаа” гэв.

Манай улс төрийн намууд авилгад хамгийн их автсан байгууллагуудаас хоёрт жагссаныг Азийн сангаас мэдээлсэн байна. Намууд санхүүжилтээ ил тод зарладаггүй учир шийдвэр гаргах албан тушаалуудыг худалдаж байна гэж үзжээ.

Намын дотоод ардчиллыг намаас нэр дэвших, дарга сонгох, дотоод бодлого, мөрийн хөтөлбөрийг боловсруулахад намын жирийн гишүүдийн оролцоо ямар байгаагаар нь тодорхойлжээ. “Дефакто” институтийн ахлах судлаач А.Бат-Оргил“Намын дотоод ардчилал, өрсөлдөөн, оролцоо зэрэг нь хэлбэр төдий байна. Намынхаа талаар мэдээлэл хомс, улсын төсвөөс хэдэн төгрөг авдгийг мэддэггүй гишүүд байна. Судалгаанаас гарсан үр дүн намын жирийн гишүүд болон иргэдийн улс төрийн боловсролд нэмэр оруулна” гэлээ.

Гишүүдийн утасны дугаар олдохгүй байх, намууд албан ёсны цахим хуудасгүй байх зэрэг хүндрэлүүд учирсан байна.

Жил бүр энэ судалгаа хийгдэхээр болжээ.

Э.АНХМАА

Монголын үндэсний олон нийтийн телевиз “Монгол бөх-Монгол наадам” нэвтрүүлэг бэлтгэж байна. Энэхүү 120 минутын нэвтрүүлэг ирэх Ням гараг буюу долдугаар сарын 01-ний 17.00 цагаас орон даяар цацагдах аж. Тус нэвтрүүлэг бөхийн холбооны эргэн тойронд болж байгаа үйл явдлын талаар дархан аваргууд болон холбооны тэргүүн, дэд тэргүүн, бөх сонирхогч нарыг оролцуулж, эвлэрүүлэх зорилготой юм байна. Нэвтрүүлэгт дархан аварга, УИХ-ын гишүүн А.Сүхбат оролцохгүй гэдгээ мэдэгджээ.

Мөн УИХ-ын гишүүн Б.Бат-Эрдэнэ хэлэхдээ “Наадмын өмнө болж байгаа энэхүү нэвтрүүлгийн бодлогыг дэмжиж байна. Үндэсний баяр наадмын бөхийн асуудлаар ярилцах гэж байна” гэсэн бол Х.Баянмөнх “Цаг үеэ олсон нэвтрүүлгийг хийж байгаад талархаж байна. Монголчуудын наадмаа хийчихээд дараа жилийн наадмыг хүлээдэг. Наадмаас наадмын хооронд ярих зүйлтэй байдаг. Бөхчүүдийн талаар жилийн турш ярьдаг. Өнөөдөр хэлэлцүүлэгт оролцох болсонд баяртай байна” хэмээн ярьжээ.

Дашрамд дуулгахад, Дархан аварга Х.Баянмөнх өчигдөр Авилгатай тэмцэх газарт бөхчүүдийн допингийн холбоотой асуудлаар тайлбар өгсөн. Мөн түүний хувьд өнөөдөр бэлтгэх нэвтрүүлгийн өмнө Үндэсний бөхийн холбооны тэргүүн Л.Чинбат гэдгийг баталж, тамга тэмдэгтэйгээ хүрэлцэн ирсэн гэх мэдээлэл гараад байна.