Month: June 2018

БСШУС-ын сайдын нэрэмжит инновацийн тэтгэлэг хүртсэн залуу эрдэмтэд өнөөдөр батламжаа гардан авлаа.Эрдмийн зэрэг хамгаалсан залуу докторуудын цаашдын судалгааны ажлыг чанаржуулах, тэднийг богино хугацаанд дадлагажуулахад чиглэсэн туршилт, зохион бүтээх үйл ажиллагааг дэмжих зорилгоор 2010 оноос эхлэн докторын дараах судалгаанд БСШУС-ын сайдын нэрэмжит инновацийн тэтгэлэг олгож эхэлсэн юм. Одоогоор энэхүү тэтгэлгийг 86 залуу доктор хүртээд байна. Энэ жил БСШУС-ын сайдын нэрэмжит тэтгэлэгт ирүүлсэн 47 төслөөс журмын дагуу сонгон шалгаруулалт хийж эрдэм шинжилгээ, судалгааны ажлын үр дүнг үйлдвэрлэл, үйлчилгээнд нэвтрүүлж, инновацийн шинэ бүтээгдэхүүн, үйлчилгээ бий болгох 10 төслийг шалгарууллаа. Тэтгэлэгт хамрагдахаар шалгарсан 10 залуу докторт тус бүр 10 сая төгрөгийн тэтгэлэг олгох юм.

Инновацийн тэтгэлэг авах болзол хангасан залуу эрдэмтдэд батламжийг нь гардуулах үеэрээ БСШУС-ын сайд Ц.Цогзолмаа “Монгол Улсын дэд боловсролын хүртээмжийг дээшлүүлэх, ахисан түвшний мэргэжилтэн бэлтгэх нь нэн чухал. Улс орны хөгжлийг шинжлэх ухааны судалгаагүйгээр төсөөлөх аргагүй. Тэтгэлэг авч байгаа залуу эрдэмтэд маань олон улсын түвшинд хүрсэн судалгааны үр дүнг гаргахын төлөө ажиллаарай” хэмээн онцлов. Залуу эрдэмтдийг төлөөлж үг хэлсэн ШУА-ийн Хими, хиимийн технологийн хүрээлэнгийн эрдэм шинжилгээний ажилтан Б.Нарандалай “Шинжлэх ухааны шинэ ололт амжилтыг байнга дэмждэг БСШУСЯ-ны удирдлага, хамт олонд баярлалаа. Сайдын нэрэмжит энэхүү тэтгэлэг залуу судлаачид бидний урам зоригийг сэргээж, дараа дараагийн судалгааны ажилд маш том дэмжлэг болдог” хэмээн сэтгэгдлээ илэрхийллээ.

БСШУС-ын сайдын нэрэмжит инновацийн тэтгэлэг хүртсэн залуу эрдэмтэд:

Нагаанбуугийн Маралмаа “Байгаль орчноо танин мэдэх угсаатны зүйн нэгдсэн мэдээллийн сан үүсгэх судалгаа” ШУА-ийн Түүх, археологийн хүрээлэн

Дашзэвэгийн Эрдэнэчимэг “Хачигт энцефалит болон япон энцефалит өвчнийг ялган оношлох фермент холбоот эсрэг биеийн урвалын цомог бэлтгэн нийлүүлэх нь” ХААИС-ийн Мал эмнэлэгийн хүрээлэн

Игорийн Хатанбаатар “Криптоспоридиозыг оношлох рекомбинант бэлдмэл бэлтгэн үйлдвэрлэлд нэвтрүүлэх” ХААИС-ийн Мал эмнэлэгийн хүрээлэн

Лхамжавын Жамбалжамц “Мөндөр ба аадар борооны үүлний симуляцийн судалгаа” МУИС

Түмэндэлгэрийн Атарсайхан “Хөх далан хальс жимсээр хүнсний бүтээгдэхүүнүйлдвэрлэх” ХААИС-ийн Ургамал газар тариалангийн хүрээлэн

Буджавын Ууганбаяр “Орон нутгийн стратеги, хөгжлийн загвар боловсруулах нь” ШУТИС, ХШУС

Зоригтын Бадамхатан “Хожуу цэрдийн үеийн эвэрт үлэг гүрвэл Рготосегаторs аndrewsi-ийн мөчний элементүүдийн гистологийн харьцуулсан судалгаа” ШУА-ийн Палеонтологи, геологийн хүрээлэн

Лувсандорж Байгалмаа “Стрептокиназа фермент нийлэгжүүлэгч streptоссиз sрр-ийн омог гарган авах микробиологи, технологийн судалгаа” ШУА-ийн Ерөнхий ба сорилын биологийн хүрээлэн

Бямба-Очирын Нарандалай “Химийн аргаар сайжруулсан идэвхжүүлсэн нүүрсэн шингээгч материал гарган авч, хөнгөн үйлдвэрийн хаягдал уснаас будагч бодис салгах” ШУА-ийн Хими, химийн технологийнхүрээлэн

Ядамын Рэнчинванжил “Малчдын ахуйн хэрэглээний энергийн хэмнэлттэй төхөөрөмжийн судалгаа, туршилт үйлдвэрлэл” ШУТИС, МТС

Оюутан болох гэж буй залуустаа улсын их дээд сургуулиудын босго оноо болон төлбөрийн талаар танилцуулъя.

МОНГОЛ УЛСЫН ИХ СУРГУУЛЬ

Босго оноо 560. Элсэлтийн бүртгэл http://burtgel.num.edu.mn хаягаар 6-сарын 22-ны өдрийн 09:00 цагт нээгдэж 7-р сарын 2-ны өдрийн 12:00 цаг хүртэл явагдана. Элсэлтийн бүртгэлийг улс орон даяар зөвхөн цахим хэлбэрээр явагдана.

САНХҮҮ ЭДИЙН ЗАСГИЙН ИХ СУРГУУЛЬ

Элсэлтийн бүртгэлийг орон даяар 2018 оны 06 дугаар сарын 20-ний өдрийн 09:00 цагаас 07 дугаар сарын 02-ний өдрийн 18:00 цаг хүртэл http://admission.ufe.edu.mn/ хаягаар бүртгэнэ. Элсэхийг хүсэгч нь өөрийн сурлага, авьяас чадвар, туршлага, хувийн зан чанар, хэрхэн суралцахаа илэрхийлсэн эсээ бичиж элсэлтийн комисст цахим хэлбэрээр 2018 оны 07 дугаар сарын 02-ний өдрийн 18:00 цагаар өмнө ирүүлсэн байна.

АНАГААХЫН ШИНЖХЛЭХ УХААНЫ ИХ СУРГУУЛЬ

АШУҮИС-д элсэхийг хүсэгчид нь Элсэлтийн ерөнхий шалгалтын хичээл тус бүрд 480-аас дээш, тус сургуулийн Сувилахуйн сургуульд элсэхийг хүсэгчид нь хичээл тус бүрд 400-аас дээш тус тус оноо авсан тохиолдолд бүртгүүлэх болзол хангасан байх ёстой. Элсэлтийн бүртгэлийг Улаанбаатар хотод цахим хэлбэрээр АШУҮИС-ийн элсэлтийн http://burtgel.mnums.edu.mn/ бүртгэлийн хаягаар явуулна.

МОНГОЛ УЛСЫН БОЛОВСРОЛЫН ИХ СУРГУУЛЬ

Улаанбаатар хотоос элсэгчдийг 2018 оны 07 дугаар сарын 01-04-ний хооронд МУБИС-ийн элсэлтийн http://burtgel.surgalt.mn/ вебээр бүртгэнэ. Харин орон нутгийн элсэгчдийг 2018 оны 07 дугаар сарын 01-ээс МИДСК-ийн журмын дагуу бүртгэнэ.

ҮНДЭСНИЙ БАТЛАН ХАМГААЛАХЫН ИХ СУРГУУЛЬ

Элсэлт Улаанбаатар хот болон Дархан-Уул, Орхон, Говьсүмбэр, Хэнтий, Дорноговь, Сэлэнгэ аймаг, Багануур дүүрэгт элсэлтийн цахим бүртгэл 2018 оны 06 дугаар сарын 25-ний өдрийн 08:00 цагт эхэлж 07 дугаар сарын 04-ний 12:00 цагт дуусна. Цахим бүртгэлийг http://mndu.gov.mn/elselt/ вебээр явуулна. Бусад орон нутагт элсэлт МИДСК-ийн тусгай журам, хуваарийн дагуу явагдана.

ТЭЭВРИЙН ДЭЭД СУРГУУЛЬ

Элсэлтийн бүртгэл 2018 оны 07 сарын 01-ний өдрийн 08:00 цагаас 07 сарын 03-ны 17:00 цаг хүртэл явагдана.

ХҮМҮҮНЛЭГИЙН УХААНЫ ИХ СУРГУУЛЬ

Элсэлтийн бүртгэл 2018 оны 05 дугаар сарын 22-ноос 07 дугаар сарын 01-ний 22:00 цаг хүртэл https://elselt.humanities.mn/ хаягаар явагдана.

МИДСК-ийн журмын тухай дэлгэрэнгүй мэдээллийг дараах холбоосоор харна уу. http://www.cmuc.edu.mn/news_full.php?sub=87

Э.АНУДАРЬ

Баянгол дүүрэг дэх мэргэжлийн хяналтын хэлтсээс хүнсний чиглэлийн үйл ажиллагаа эрхлэгч нь үйл ажиллагааг эхлэхийн өмнө харьяалах нутаг дэвсгэр дэх хүнсний хяналт хэрэгжүүлэх эрх бүхий байгууллагад мэдээлж зөвшөөрөл аваагүй, стандарт эрүүл ахуйн шаардлага хангаагүй нөхцөлд хүнсний бүтээгдэхүүний үйлдвэрлэл явуулж байсан “Өег хүнс трейд”ХХК-ий үйлдвэрлэсэн “Өег” нэрийн бууз баншнаас дээж НМЭГ-ын лабораторит шинжилгээнд хамруулж, зөрчил гаргасан аж ахуйн нэгжид Зөрчлийн хуулийн 6.15 дугаар зүйлийн 1.2 дэх заалтын дагуу зөрчлийн хэрэг үүсгэн шалгаж байна. Хяналт шалгалт үргэлжилж байна.

2017 оны Ерөнхийлөгчийн сонгуулийн зардлын тайлан ил болжээ. Сонгуулийн тухай хуулиар зардлын дээд хэмжээ нь нам 6,8 тэрбум төгрөг, нэр дэвшигч 3,9 тэрбум төгрөг байна. Гэвч энэ босгыг хэрхэн тогтоосон нь тодорхойгүй ажээ.

Шударга сонгуулийн төлөө иргэний нийгмийн сүлжээний гишүүн “Бодлогод залуусын хяналт” ТББ энэ талаар дүн шинжилгээ хийсэн байна. Тус ТББ-ийн тэргүүн Ц.Мандхайхатан “Бидний мониторингийн гол зорилго нь сонгуулийн тухай хуульд зааснаар төрийн байгууллагууд холбогдох мэдээллээ хүлээн авч, түүндээ хяналт тавьдаг эсэх дээр тулгуурлан ажилласан. Улс төрийн намууд болон нэр дэвшигчдийн өгсөн зардлын тайланг хүлээн авахад хүндрэл учирсан ч өнгөрсөн сард эх хувиар нь олж авлаа. Зардлын утга нь хэт ерөнхий, багцлагдсан байгаа нь дүн шинжилгээ хийх явцад харагдсан. Үүнийг маш тодорхой байлгах ёстой” гэлээ.

Сонгуулийн тухай хууль болон бусад хууль тогтоомжийн улдаа сул байна гэлээ. Тиймээс улс төрийн намын санхүүжилтийн ил тод байдлыг хангах цогц зохицуулалт хэрэгтэй байгааг онцоллоо. Сонгуулийн хугацаанд нийт 1030 гомдол ирснээс 151 нь мөнгө, эд зүйл тараасантай холбоотой байсан ч эрүүгийн болон захиргааны хариуцлага хүлээлгэх үндэслэлгүй нь тогтоогджээ.

Олон улсад хандив болон зарлагын тайлан нь маш нарийвчилсан байдаг аж.

Э.АНХМАА

“Эрдэнэт” үйлдвэрийн 51 хувийг гадны “Стандарт” банкны барьцаанд тавьж, их хэмжээний зээл авсан гэх хэрэгт “Жаст”-ын Ш.Батхүү нарыг яллагдагчаар татан шалгаж байгаа билээ. Түүнийг одоогоос гурван сарын өмнө шүүхийн шийдвэрээр ШШГЕГ-ын харьяа Цагдан хорин 461 дүгээр ангид саатуулан шалгаж байсан юм. Тэгвэл “Жаст”-ын Ш.Батхүүг өчигдөр орой батлан даалтад гаргаж, хилийн хориг тогтоожээ. Түүний эрүүл мэндийн байдал муудаж, бөөр, тархины мэдрэлийн судсанд нь ноцтой өөрчлөлт гарсан тул ийнхүү батлан даалтад гарчээ. Энэ талаар албаны эх сурвалжаас тодруулахад “Ш.Батхүүг өчигдөр орой батлан даалтад гаргасан. Яг хэдэн цагт гаргасан нь тодорхойгүй. Ямартай ч гадуур шалгахаар болсон” гэх мэдээллийг өглөө.

Монголын аялал жуулчлалын холбооны удирдах зөвлөл, Хяналтын зөвлөл, аялал жуулчлалын компаниуд Үндэсний их баяр наадмын нээлтийн үйл ажиллагаанд жуулчдад зориулсан суудлыг тоо хүрэлцээ муу учраас 1000 суудал нэмж өгөхийг хүсэн өнөөдөр мэдээлэл хийлээ.

Жуулчин тус бүр дунджаар 2000 ам долларыг манай улсад аялахдаа зарцуулдаг байна. Энэ онд дунджаар 90,000 орчим жуулчин ирнэ гэсэн тооцоо бий. Үүнээс 110 компаний захиалга бүхий 12,000 орчим гадныхан наадмын нээлтийг үзэх эрэлттэй байгаа аж. Гэтэл наадмын нээлтийг үзэх хүсэлтэй арван жуулчин болгоны найм нь Төв цэнгэлдэх хүрээлэнд нэвтэрч чадахгүй хаалганы гадна үлддэг болохыг аялал жуулчлалын салбарынхан хэлж байв.

“Засгийн газраас энэ чиглэлийн үйл ажиллагаануудыг аялал жуулчлалын энэ үетэй давхцуулахгүй байх, намар, хавар, өвлийн улиралд хийх тогтоолууд гарсан. Гэтэл энэ жил төр засгаас зохион байгуулагдаж байгаа хурал, үйл ажиллагаанууд наадамтай давхардаж байна. Аялал жуулчлалын улирлын гол имидж нь баяр наадам юм. Тиймээс Монголын аялал жуулчлалын холбооны удирдах зөвлөл, аялал жуулчлалын компаниудын зүгээс жуулчдад зориулсан суудлын тоог 1000-аар нэмэгдүүлж өгөхийг эрхэм наадамчин олон, ард түмнээсээ ойлгон дэмжиж өгөхийг хүсье” гэж Монголын аялал жуулчлалын холбооны ерөнхийлөгч Д.Гантөмөр хэллээ.

Д.ХУЛАН

Улаанбаатар хотын Захирагчийн ажлын албанаас “Харшлийн эсрэг хамтдаа” уриан дор “Шарилжгүй Улаанбаатар-3” аяныг энэ сарын 29-нөөс эхлэн наймдугаар сарын 17-ныг хүртэл зохион байгуулах гэж байна. Уг аяны нээлтийг маргааш буюу баасан гарагийн 11 цагт дүүргийн хэмжээнд эхлүүлж 90 минут үргэлжлэх аж.

Хөл газрын ургамлын тоосноос үүдэх харшлын өвчлөлөөс урьдчилан сэргийлэх, тоог бууруулах, тархалтыг багасгах, иргэдэд нэгдсэн мэдлэг, зөв ойлголтыг өгөх, хөл газрын ургамлыг хадаж тайрах ажилд иргэдийн оролцоог нэмэгдүүлэх зорилготой юм. Нэгдсэн арга хэмжээ энэ сарын 29, 30-ны өдрүүдэд болно. Хоёр дахь арга хэмжээ наймдугаар сарын 10, 11-нд зохион байгуулагдах юм.

Хотын гол гудамж болон туслах зам дагуу замын хажуугийн ногоон байгууламж, явган хүний зам талбайн зах болон замын хөвөө хажуугийн далан дээр ургасан хөл газрын ургамлыг цэвэрлэх ажилд дүүргийн Засаг даргын Тамгын газар, харьяа хэлтэс алба, хороод, Сууц өмчлөгчдийн хороо, дүүрэг дэх Мэргэжлийн хяналтын хэлтэс оролцох аж. Мөн иргэн, байгууллага, аж ахуйн нэгжүүд өөрийн хашаан дотор болон гаднах, хашаа дагасан хөл газрын ургамлыг цэвэрлэх үүрэгтэйгээр идэвхтэй оролцохыг Баянзүрх дүүргийн ЗДТГ-ын Хэвлэл мэдээллийн албанаас уриаллаа.

Арьсны өвчин судлалын үндэсний төвийн Харшлийн лабораторийн эрхлэгч Б.Сангидорж ярихдаа: Сүүлийн жилүүдэд олон төрлийн харшлийн шинж чанартай өвчлөл ихэсч байна. Тэр дундаа улирлын чанартай тохиолдох ургамлын тоосны харшил. Нийт хүн амын 2-3 хувь нь ургамлын тоосны харшилтай гэж судалгаагаар гарсан. Хот суурин газрын орчны бохирдол, байгаль, экологийн доройтол, цөлжилт зэрэгтэй холбоотойгоор шарилжийн тоосны харшил хүн бүрийн анхаарлыг татаж байна. Иймд дээрх үйл ажиллагааг зохион байгуулснаар тодорхой хэмжээнд харшлын тоо буурна гэв.

Ц.УРАНБОЛОР