Month: March 2018

УИХ Нийтийн сонсголын тухай хуулийг 2015 онд баталсан. Улмаар 2016 оны гуравдугаар сарын 1-нээс хэрэгжиж эхэлсэн юм. Өөрөөр хэлбэл, энэ хууль хэрэгжиж эхлээд хоёр жилийн хугацаа өнгөрчээ. Гэвч энэ хуулийг хэрэгжүүлэхэд шаардлагатай зарим журмыг одоо болтол батлаагүй байна. Нээлттэй нийгэм форум энэ хуулийн дагуу төрийн бус байгууллага, мэргэжлийн холбоод, нутгийн удирдлагын байгууллагуудад орон нутагтаа сонсгол зохион байгуулахад нь дэмжлэг үзүүлэх зорилгоор тэтгэлэг олгож хамтран ажиллаж байна. Үүний дагуу Нийтийн сонсголын тухай хуулийг үндэслэн анх удаа Говь-Алтай аймагт төр, төрийн бус байгууллагын 150 гаруй төлөөлөгч оролцуулан зохион байгуулжээ. Мөн Хөвсгөл, Сэлэнгэ, Ховд, Завхан, Дорнод аймаг, Багануур дүүрэгт иргэний нийгмийн байгууллагууд нутгийн удирдлагын байгууллагуудтайгаа хамтран нийтийн сонсгол зохион байгуулжээ. Нийтийн сонсгол зохион байгуулсан дээрх аймаг, дүүргийн төлөөлөгчдийг оролцуулсан туршлага солилцох уулзалтыг Нээлттэй нийгэм форум энэ сарын 28, 29-нд зохион байгуулж байна. Иргэдийн идэвхи санаачилга их байгаа ч Нийтийн сонсголын тухай хуулийг хэрэгжүүлэхэд шаардлагатай зарим журмыг Засгийн газар батлахгүй байгааг уулзалтад оролцогчид шүүлжилж байлаа. Хэдийгээр нарийвчилсан журам нь батлагдаагүй ч орон нутагт хуулийнхаа ерөнхий шаардлагыг баримтлан нийтийн сонсгол зохион байгуулж байгаа ажээ. Харин Улаанбаатар хотод Нийтийн сонсголын тухай хууль хэрэгжихгүй байгааг онцолж байлаа. Тухайлбал, Утааны эсрэг аав, ээжүүд төрийн бус байгуулагынхан нийтийн сонсгол хамтран зохион байгуулахаар төрийн байгууллагуудад хандсан боловч бүгдээс нь татгалзсан хариу авчээ.

НИТХ-ын дарга С.Амарсайханы урилгаар БНСУ-ын Танжинь хотын ИТХ-ын дарга Иэ Жон Ёон тэргүүтэй төлөөлөгчид Нийслэл хотод хүрэлцэн ирснийг өнөөдөр НИТХ-ын дарга С.Амарсайхантай хүлээн авч уулзлаа.

Уулзалтаар НИТХ-ын С.Амарсайхан Нийслэл хотын талаарх ерөнхий танилцуулгыг хэлж, Танжинь хотын ИТХ-ын дарга, дэд дарга, иргэдийн хурлын төлөөлөгчдийн хамтаар бидний урилгыг хүлээн авч Улаанбаатар хотод айлчилж байгаад талархал илэрхийлээд, Улаанбаатар хотын өмнө тулгамдсан олон асуудлуудыг бид хамтын ажиллагаатай хотуудын дэмжлэг болон харилцан үр ашигтай хамтарч ажиллах байдлаар шийдвэрлэхийг зорьж байна. Энэ хүрээнд та бүхэнтэй бид бүх талаар хамтран ажиллах болсонд баяртай байна” гэлээ.

БНСУ-ын Танжинь хотын ИТХ-ын дарга Иэ Жон Ёон “НИТХ-ын дарга С.Амарсайханы урилгаар Улаанбаатар хотод хүрэлцэн ирсэндээ талархаж байгаагаа илэрхийлээд, Танжинь хотын хувьд 1.7 сая хүн амтай, 14 дүүргээс сонгогдсон 12 төлөөлөгчтэйгээр Иргэдийн хурлын үйл ажиллагаагаа явуулдаг бөгөөд энэ удаа Улаанбаатарт ирэхдээ бид 12 төлөөлөгчийнхөө 5 төлөөлөгчид болох ИТХ дэх хороодын дарга нарыг дагуулж ирсэн. Бид 3 хоногийн хугацаатай Улаанбаатар хотод айлчилж байна. Энэ хугацаанд тантай уулзаж хамтран ажиллах санамж бичигт гарын үсэг зурах, Улаанбаатар хотын хөгжил дэвшилтэй биечлэн танилцах, цаашид ямар чиглэлээр хамтын ажиллагаагаа үргэлжлүүлэх боломжтой байна гэдгийг судлах зорилготой. Танжинь хот бол ХАА-н салбар түлхүү хөгжсөн бүс нутаг, мөн далайн боомттой хотын хувьд бараа материал тээвэрлэх чиглэлээр улс орнуудтай хамтран ажилладаг. Энэ боомтоор дамжин зүүн өмнөд Ази, Япон, Вьетнам, Гонконг, тэр байтугай Европын улс орнууд руу ачаа тээвэрлэлт хийдэг. Солонгосын Хьюндай группийн төмөрлөгийн үйлдвэр манай хотод байрладаг. Танжинь хотод Монгол улсаас цөөнгүй оюутнууд их дээд сургуульд сурдагийн зэрэгцээгээр олон монголчууд гэрээгээр ажилладаг. Манай Танжинь хотын ИТХ-ын зүгээс эдгээр монголчуудад боломжтой бүх хэлбэрээр дэмжиж туслах болно гэдгээ энэ дашрамд илэрхийлье. НИТХ-ын дарга С.Амарсайхан таныг болон ИТХ-ын төлөөлөгчид та бүхнийг боломжтой үедээ манай Танжинь хотод айлчлаарай гэж албан ёсоор урих байна” гэв.

Уулзалтын төгсгөлд Улаанбаатар, Танжинь хоёр хотын ИТХ-ын дарга нар худалдаа эдийн засаг, аялал жуулчлал, нутгийн удирдлагын чиглэлээр хамтран ажиллах, мөн хоёр хотын төр засгийн байгууллагын ажилтан, албан хаагчдыг харилцан туршлага солилцуулах, боловсрол соёл, нийгмийн салбарын харилцааг идэвхжүүлэх зэрэг асуудлаар санал солилцож, цаашид хамтран ажиллах санамж бичигт гарын үсэг зурлаа.

Монголын зэс, алтны “Оюутолгой” төслийг тойрсон авлигын хэргийг Швейцарийн прокурорууд шалгаж байгаа бөгөөд тэдний мөрдөн шалгалт нь төслийг хэрэгжүүлэгч Англи-Австралийн “Рио Тинто” групп руу шууд чиглээгүй ажээ гэж Лондон хотод төвтэй “Financial Times” сонин мэдээлжээ.

“Financial Times” сониныхон энэ дуулианы талаар тодруулга авахаар Швейцарийн Ерөнхий прокурорын газар руу захидал илгээсэн байна. Хариу захидалд “Бидний шалгалт “Рио Тинто” руу шууд чиглээгүй” гэжээ.

Авлигын мөнгийг шилжүүлэхэд ашигласан байж болзошгүй дансуудыг Монгол Улсын Авлигатай тэмцэх газрын /АТГ/ хүсэлтийн дагуу Швейцарийн прокурорууд битүүмжилж, хэргийг мөрдөн шалгаж байгаа юм.

2009 онд “Оюутолгой”-н хөрөнгө оруулалтын гэрээ байгуулах хэлэлцээний үеэр “холбогдох албаны хүмүүс эрх мэдлээ урвуулан ашигласан байж болзошгүй” учир шалгаж байна гэсэн мэдээллийг Монголын АТГ-аас хүлээн авснаа “Туркойз Хилл Ресурс” энэ сарын эхээр мэдэгдсэн юм. “Оюутолгой”-н гэрээг байгуулах үед “Рио Тинто” нь тухайн үед “Айвенхоу Майнз” гэсэн нэртэй байсан “Туркойз Хилл Ресурс”-ын хувьцааны 10 хувийг эзэмшдэг байжээ. Харин одоо “Рио Тинто” нь “Туркойз Хилл Ресурс”-ын хувьцааны 51 хувийг эзэмшиж байгаа юм.

“Рио Тинто”-гийн хамгийн чухал төслүүдийн нэг гэгддэг “Оюутолгой” орд нь 2025-2030 он гэхэд жилд 560 мянган тонн зэс олборлохыг зорьж байна.

Швейцарийн прокурорууд “Оюутолгой”-г тойрсон авлигын хэрэгтэй холбогдуулан “Рио Тинто”-г шалгаагүй гэх энэ мэдээ нь Лондоны хөрөнгийн биржид бүртгэлтэй тус компанид нэг ч гэсэн дуулианаас салахад “тус” болж магадгүй. Учир нь тус компанийг Африкийн нүүрс, төмрийн хүдрийн томоохон төслүүдтэй холбоотойгоор АНУ болон Их Британийн холбогдох байгууллагууд одоо шалгаж байгаа юм.

ОУВС-гийн Захирлуудын зөвлөл өчигдөр Монгол Улсад хэрэгжүүлж буй Өргөтгөсөн санхүүжилтийн хөтөлбөрийн гурав дахь үнэлгээг хэлэлцэж баталсан. Үүнтэй холбогдуулан ОУВС-гийн Монгол дахь суурин төлөөлөгч Нийл Сакер мэдээлэл хийлээ. Тэрээр “Захирлуудын зөвлөлийн гишүүд хөтөлбөрийн хэрэгжилт дээр сэтгэл хангалуун байгаа. Үнэлгээг баталснаар дараагийн санхүүжилт олгогдох үүд хаалга нээгдлээ. Эдийн засаг бидний тооцоолж байснаас хамаагүй эрчимтэй сэргэж, өндөр өсөлттэй гарч байна. Монгол Улсын гадаад валютын нөөц ч эрчимтэй нэмэгдэж одоогийн байдлаар гурван тэрбум ам.доллар боллоо. Засгийн газраас өнгөрсөн нэг жилийн хугацаанд шийдвэртэй арга хэмжээ авсны үндсэн дээр ийм үр дүн гарлаа. Нэгэнт эдийн засгийн нөхцөл байдал сайжирсан учраас Засгийн газар цаашид урт хугацааны тогтвортой бодлогодоо анхаарлаа хандуулах хэрэгтэй. Энэ утгаараа хөтөлбөрийн хүрээнд дэвшүүлсэн бүтцийн шинэчлэлийн арга хэмжээнүүд илүү ач холбогдолтой болж байна. Бүтцийн шинэчлэлийн хүрээнд татварын орчныг таатай болгож, их хэмжээний татварын орлого цуглуулдаг тогтолцоо рүү шилжих зорилт дэвшүүлж байгаа. Эдийн засаг сэргэхтэй зэрэгцээд төсвийн орлого ч нэмэгдэж байна. Тэгэхээр Засгийн газраас төсвийн зарлагыг үр ашигтай болгох тал дээр анхаарах шаардлагатай. Санхүүгийн салбарт банкууд эдийн засгийн өсөлтийг дэмжиж байх хэрэгтэй. Үүнээс гадна олгож буй зээл нь бага хүүтэй, жижиг, дунд үйлдвэрлэл, хөдөө аж ахуйг дэмжсэн байвал эдийн засагт тустай” гэлээ.

Нийслэлийн Сонгинохайрхан дүүргийн нутаг дэвсгэрт шүлхий өвчин гарсан тухай мэдээлэл олон нийтийн сүлжээгээр цацагдсан.

Энэ талаар Нийслэлийн мал эмнэлгийн газрын дарга М.Адилбишээс тодруулахад, “Сонгинохайрхан дүүргийн 32 дугаар хорооны нэг өрхийн үхэрт шүлхийтэй төстэй өвчний шинж тэмдэг илэрсэн. Одоогоор тус хэсэгт түр хугацааны хорио цээр тогтоож, шинж тэмдэг илэрсэн үхэрнээс дээж авч Улсын мал эмнэлэг, ариун цэврийн төв лабораторит хүргүүлээд байна. Шинжилгээний хариу хараахан гараагүй байгаа. Тиймээс шүлхий гарсан гэж хэлэх боломжгүй. Олон нийтийн сүлжээгээр Булган аймгаас ачиж ирсэн мал шүлхийтэй байсан гэсэн мэдээлэл тархсан. Одоогоор тухайн хэсэгт тандалт судалгааны ажил явуулж байна. Шинжилгээний хариу өнөөдөр орой эцсийн байдлаар гарна” гэлээ.

Японы Олон улсын хамтын ажиллагааны байгууллага (ЖАЙКА)-ын санхүүжилтээр ХНХЯ, Гэр бүл, хүүхэд залуучуудын хөгжлийн газар (ГБХЗХГ) хамтран Баянзүрх, Сонгинохайрхан, Чингэлтэй дүүргийн 6 хороо, Архангай аймгийн Батцэнгэл, Хайрхан, Эрдэнэбулган суманд хэрэгжүүлсэн “Монгол Улсад хүүхэд хамгааллын тогтолцоог бэхжүүлэх нь” төслийн хаалтын зөвлөлгөөн өнөөдөр боллоо.

Гурван жилийн хугацаанд хэрэгжсэн энэхүү төслийн үр шимийг нийт 9 сум, баг, хорооны 28 мянга 637 хүүхэд хүртсэн гэсэн тооцооллыг төслийн баг гаргажээ. Төслийн хүрээнд дээрх хороо, сумдад гэр бүл, хүүхэд хамгааллийн үйлчилгээ үзүүлэх хамтарсан баг байгуулж, чадавжууулан, олон нийтэд хүүхэд хамгааллын талаар ойлголтыг нэмэгдүүлэхэд чиглэсэн үйл ажиллагааг зохион байгуулжээ. Төсөлд хамарсан сум, баг, хорооны хамтарсан багийн 165 гишүүн өнгөрсөн хугацаанд хүүхдийн эрхийг зөрчсөн 176 баримтыг илрүүлж, 204 хүүхэд, гэр бүлд зөвлөгөө өгчээ.
Мөн олон нийтийн дунд хүүхэд хамгааллын талаарх ойлголт мэдлэгийг нэмэгдүүлэхийн тулд хүмүүжлийн эерэг аргын цуврал сургалтад 221 эцэг эх, асран хамгаалагчдыг хамруулжээ. Тухайлбал, эцэг эхчүүдэд зориулж хүүхдийн нас насны онцлог, түүнд тохируулсан аргаар хүүхдээ өсгөн хүмүүжүүлэх тухай “Аав ээжийн ном” нь 2017 онд ГБХЗХГ-ын “Эерэг Өөрчлөлт” цом хүртжээ.