Month: March 2018

Нийслэлийн Засаг даргын 2018 оны А/41, Баянзүрх дүүргийн Засаг даргын А/72 дугаар захирамжийн дагуу болзошгүй гамшиг ослоос урьдчилан сэргийлэх, хүн ам, эд хөрөнгө, байгаль орчныг гамшиг ослын аюулаас авран хамгаалах, сэргээн босгох арга ажиллагаанд төрийн болон аж ахуй нэгж, байгууллага, мэргэжлийн анги, ажилтан, албан хаагчид, иргэдийг сурган дадлагажуулах зорилгоор “Нүүлгэн шилжүүлэх дадлага сургууль”-ийг зохион байгууллаа.

2018 оны гуравдугаар сарын 29-ний өдөр Баянзүрх дүүргийн 11 дүгээр хорооны аж ахуйн нэгж, айл өрхийн нийт 514 иргэнийг 5 цэгээс “Нүүлгэн шилжүүлэх дадлага сургууль”-ийг гүйцэтгэсэн юм. “Нүүлгэн шилжүүлэлт, тээвэр зохицуулах алба” буюу нийслэлийн Тээврийн газар нь нийтийн тээврийн 10 том оврын автобус, холбогдох техник, хэрэгслийг хамруулав.

Тус дадлага сургуулийг “Нүүлгэн шилжүүлэлт, тээвэр зохицуулах алба”-ны бүрэлдэхүүн буюу Нийслэлийн Тээврийн газрын дарга Д.Отгонбаатар, Орлогч дарга Г.Доржпалам, Х.Булгаа болон холбогдох нэгжийн дарга нар амжилттай үүргээ биелүүлж оролцлоо гэж нийслэлийн Тээврийн газраас мэдээллээ.

Нийслэлийн Байгаль орчны газраас санаачлан НҮБ-ийн Хүүхдийн сангийн дэмжлэгтэйгээр нийслэлийн ерөнхий боловсролын сургуулийн сурагчдад орчны бохирдлоос урдчилан сэргийлэх, өөрийгөө хамгаалах сэдвээр цуврал сургалтыг 3 дугаар сараас эхлэн зохион байгуулж байна.

Уг ажлын хүрээнд ерөнхий боловсролын сургуулийн сурагчдын хичээлийн дэвтрийн хавтсанд ногоон амьдралын хэв маяг, эрчим хүч, дулаан, ус хэмнэх, орчны бохирдлоос сэргийлэх талаар ойлголт өгөх энгийн ойлгомжтой зурагт мэдээллийг оруулж, сурагчдын хэрэглээнд гаргахаар боллоо.

Хүүхэд багачууд өдөр тутам хэрэглэдэг дэвтрээр нь дамжуулан байгаль орчноо хайрлах, байгалийн шавхагдах нөөц баялагийг хэмнэлттэй хэрэглэж сурах дадалтай болгоход энэхүү “Хэмнэе, гамная дэвтэр”–ийн ач холбогдол оршиж байна.

Энэхүү санаачилгыг Таван богд группийн Улаанбаатар принт хэвлэх үйлдвэр дэмжин оролцохоо илэрхийлж, 2018 оны 9 дүгээр сараас ерөнхий боловсролын сургуулийн сурагчдад зориулж “Хэмнэе, гамная дэвтэр”-ийг хэрэглээнд нэвтрүүлэхэд хамтран ажиллахаар болов гэж нийслэлийн Байгаль орчны газраас мэдээллээ.

Аливаа гамшиг бэрхшээл хэлж ирдэггүй. Байгалийн давагдашгүй хүчин зүйл, гамшигт байнгын бэлэн байх, иргэдэд гамшгаас урьдчилан сэргийлэх, бэлтгэл бэлэн байдлыг хангах мэдлэг, мэдээлэл өгөх үүднээс Засгийн газрын тогтоолоор жил бүр зарлан мэдээллийн дохиогоор ажиллах дадлага сургуулийг зохион байгуулдаг. Эхний дохиогоор “суу, нуугд, хүлээ” зарчмаар хатуу зүйл, ширээний дор нуугдах бол 2 дахь дохиогоор “гүйхгүй, түлхэхгүй, буцахгүй, ярихгүй” зарчмыг баримтлан баруун гараа барьж барилга, байгууламжаас гарна.

Налайх дүүргийн хувьд Гамшгийн аюулын зарлан мэдээллийн дуут дохиогоор иргэд, олон нийт, 60 гаруй байгууллагын ажилтан, албан хаагчид түр цугларах 7 цэгт шилжин байршиж дадлага сургуульд идэвхитэй оролцлоо.

Мөн дүүргийн Онцгой байдлын хэлтэс, ОБЕГ-ын харьяа Уул уурхайн аврах анги, Цагдаагийн хэлтэс, Эрүүл мэндийн нэгдэл, холбогдох мэргэжлийн ангиуд хамтран Налайх дүүрэгт байрлах Монгол Германы хамтарсан ашигт малтмал, технологийн их сургуульд гал түймрийг унтраах, аврах ажиллагааны хамтарсан тактикийн сургуулийг зохион байгууллаа гэж Налайх дүүргийн ЗДТГ-аас мэдээллээ.

Удирдлагын академийн эрдэмтэн, багш нар Улаанбаатар хотын Захирагчийн ажлын алба, Захирагчийн харьяа байгууллагуудын албан хаагчдын дунд төрийн албаны мэдлэг боловсролыг дээшлүүлэх зорилгоор 32 цагийн сертификат олгох сургалтыг анх удаа ажлын байрнаас нь хөндийрүүлэлгүйгээр тус албан дээр зохион байгууллаа. Сургалтад 62 төрийн албан хаагч хамрагдаж сертификатаа гардан авч, үргэлжлүүлэн 3 албан хаагчийг магистрын ангид суралцуулахаар болов.

Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр нь Удирдлагын академид багшилж докторын зэргээ тус сургуульд хамгаалж байсан төрийн захиргааны шилдэг менежерүүдийн нэг ажээ гэж Улаанбаатар хотын Захирагчийн ажлын албанаас мэдээллээ.

Монгол Улсад гэмт хэргээс урьдчилан сэргийлэх ажлыг зохицуулах зөвлөл, Нийслэлийн иргэдийн Төлөөлөгчдийн Хурал, нийслэлийн Цагдаагийн газраас хамтран нийслэл хотод үйлдэгдэж буй гэмт хэргийн шалтгаан нөхцөлийг арилгах ажлын хүрээнд орон сууцны орц, гадна орчин, гэр хорооллын гудамж, нийтийн эзэмшлийн талбай зэрэг газруудыг камержуулж иргэдийн эрүүл, аюулгүй орчинд амьдрах нөхцөлийг бүрдүүлэх, гэмт хэргээс урьдчилан сэргийлэх ажилд иргэд, олон нийтийн оролцоог нэмэгдүүлэх зорилгоор 60 сая төгрөгийн шагналын сантай “Камержуулалт” болзолт уралдааныг 2018 оны 04 дүгээр сарын 1-ний өдрөөс эхлэн 2 сарын хугацаатай зарлаж байна.

Өнгөрсөн онд зохион байгуулсан “Камержуулалт” болзолт уралдаанд нийслэлийн 152 хороо, 270 гаруй сууц өмчлөгчдийн холбоо, хөршийн хяналтын бүлэг, иргэд идэвхтэй оролцож гэмт хэрэг, зөрчил ихээр үйлдэгддэг эмзэг цэгүүдэд 534.0 сая төгрөгийн 2211 камер шинээр суурилуулжээ.

Энэ удаагийн болзолт уралдаанд дүүрэг, хороо, сууц өмчлөгчдийн холбоо, хөршийн хяналтын бүлэг, иргэдээс гадна аж ахуйн нэгж байгууллага оролцох боломжтойгоороо онцлог юм.

Уралдааны талаарх дэлгэрэнгүй мэдээллийг МУГХУСАЗЗ, НИТХ, Нийслэлийн цагдаагийн газрын вэб сайт, фэйсбүүк хуудас болон 9910-9382 дугаараас тодруулах боломжтой гэж нийслэлийн Цагдаагийн газраас мэдээллээ.