Month: March 2018

Монгол Улс, БНСУ-ын Засгийн газар хоорондын хамтарсан хорооны III хуралдаан болж өнгөрлөө. Энэхүү хуралдааныг Монголын талаас БОАЖ-ын сайд Н.Цэрэнбат, БНСУ-ын талаас тус улсын Гадаад хэргийн дэд сайд Чо Хьюн нар даргалсан юм. БОАЖ-ын сайд Н.Цэрэнбат сэтгүүлчдийн асуултад дараах хариултыг өглөө.

-Монгол,Солонгосын Засгийн газар хоорондын хамтарсан хорооны III хуралдаанаар ямар асуудал хэлэлцсэн бэ?

-Монгол Улс, БНСУ-ын өнөөгийн харилцаа, эдийн засгийн хамтын ажиллагаа, цаашид хөгжлийн чиглэлээр хэрхэн хамтарч ажиллах, иргэд хоорондын визний асуудал, Монгол Улс, Солонгос Улс хооронд байгуулсан буцалтгүй тусламж, зээл, төсөл хөтөлбөрүүдийн талаар ямар бодлого баримталж ажиллах вэ гэдэг дээр санал солилцож, нэгдсэн ойлголтод хүрлээ. Мөн Ерөнхий сайдыг БНСУ-д айлчах үеэр яригдсан хэд хэдэн асуудлыг эрчимжүүлэх талаар ч санал солилцсон.

-Тодорхой ямар саналууд тавьсан бэ?

-Бидний зүгээс аялал жуулчлалын чиглэлээр мэргэжилтэн бэлтгэх, байгаль орчны салбарт БНСУ-тай хамтарч ажиллах, БНСУ-ын ААН-үүдтэй эхлүүлсэн ажлаа үргэлжлүүлэх, тэдний зүгээс хөрөнгө оруулагчдад таатай нөхцөл бүрдүүлэх саналыг тавьсан. Мөн Засгийн газрын тэтгэлгээр сурч байгаа оюутнуудын тоог нэмэгдүүлэх, харилцан визгүй зорчих асуудлыг нэн дариу шийдэх, далайн тээврийн мэргэжилтнүүд бэлтгэхэд БНСУ Монгол Улсад дэмжлэг үзүүлэхээр болсон.

-Агаарын бохирдлыг бууруулах чиглэлээр БНСУ-аас хөнгөлөлттэй зээлээр авахаар болсон 500 сая.ам долларыг хэрхэн зарцуулах талаар санал солилцсон уу?

-БНСУ-аас Монгол Улсад хөнгөлөлттэй нөхцөлөөр зээлэхээр болсон 500 сая.ам долларын ерөнхий нөхцөлийг онцгой нөхцөл байдлаар харгалзан, хугацааг нь эрчимжүүлье. Энэ асуудлаар дахин 4 дүгээр сард хуралдаж, зарцуулалтыг нарийвчлан ярилцъя гэж тохирсон. Тэр болтол Сангийн яамд хоорондын бодлогын зөвлөлдөх уулзалтаар цаашид хамтын ажиллагааны гэрээ, хэлэлцээрт нийтлэг ярих асуудлуудаа тодорхой болгохоор санал нэгдсэн.

-Монгол Улсын Засгийн газраас 500 сая.ам долларыг хэрхэн зарцуулах тал дээр ямар санал тавьж байгаа вэ?

-Засгийн газрын зүгээс агаарын бохирдлыг бууруулах гол арга хэмжээг орон сууцжуулах гэж шийдвэрлэсэнтэй холбоотойгоор эрчим хүч, дулааны дэд бүтцийн шугам татах, орон сууцны хороолол барих, Улаанбаатар хотын агаарын бохирдолд тодорхой хэмжээний нөлөө үзүүлж байгаа нийтийн тээвэрт парк шинэчлэл хийе гэдэг саналыг хүргүүлсэн. Одоогоор БНСУ-аас хариу хүлээж байна.

Монгол Улсын нийт шүүхийн хэргийн хөдөлгөөний мэдээллээр олон нийтийг хангах боломж бүхий “Хэргийн хөдөлгөөний удирдлагын төв”-ийг Шүүхийн ерөнхий зөвлөлийн байранд өнөөдөр (2018.03.26)-нд нээлээ.

“Хэргийн хөдөлгөөний удирдлагын төв”-ийн нээлтэд Шүүхийн ерөнхий зөвлөлийн дарга, гишүүд, нийслэл дэх анхан болон давж заалдах шатны шүүгчдийн төлөөлөл, тамгын газрын дарга нар оролцов.

Хэргийн хөдөлгөөний удирдлагын төвтэй болсноор шүүхийн захиргааны төв байгууллага хүний нөөцийн зохицуулалт хийхээс гадна шүүхийн үйлчилгээг ил тод, нээлттэй хэрэгжүүлэх боломж бүрдэж байгааг Шүүхийн ерөнхий зөвлөлийн дарга Н.Лүндэндорж онцолсон юм. Тэрбээр “Монгол Улсын нийт шүүхийн статистик мэдээллийг “Хэргийн хөдөлгөөний удирдлагын төв”-өөс харах боломжтой. Статистик мэдээлэлд дүн шинжилгээ хийх, бодлого тодорхойлох, тодорхой асуудлыг шийдэх бололцоо бүрдэж байгаагаараа түүхэн ач холбогдолтой” хэмээсэн.

Эрүү, Иргэн, Захиргааны хэргийн бүртгэл, хяналтын нэгдсэн системүүдэд тулгуурласан “Хэргийн хөдөлгөөний удирдлагын төв”-ийн цахим мэдээлэл нь гурван үндсэн бүтэцтэй. Шийдвэрлэсэн, хүлээн авсан, хэрэг хянан шийдвэрлэх ажиллагаанд байгаа хэргийн ерөнхий мэдээлэл болон хойшилсон, түдгэлзүүлсэн, хугацаа хэтэрсэн хэргүүдийн талаарх нарийвчилсан мэдээлэл байх юм. Мөн дотоод мэдээ буюу хэргийн хөдөлгөөний нарийвчилсан мэдээг судалгааны чиглэлээр ашиглах боломжтой. Үндсэн буюу Монгол Улсын шүүн таслах ажиллагааны мэдээг хагас, бүтэн жилээр “Хэргийн хөдөлгөөний удирдлагын төв”-өөс авах боломжтой юм. “Хэргийн хөдөлгөөний удирдлагын төв”-ийн цахим сисемийн архитектурын талаар Шүүхийн мэдээллийн технологийн хэлтсийн дарга Д.Мөнхзориг, референт Э.Амарсанаа нар танилцууллаа.

Уг төв нь иргэд, судлаачдад нээлттэй байх юм.

“Хангарьд-Улаанбаатар” төрийн бус байгууллага БНХАУ-ын “Энхтайван хөгжлийн сан”-тай хамтран Улаанбаатар хотын эрүүл мэндийн тусламж үйлчилгээг сайжруулах төсөл хэрэгжүүлж байна. Уг төслийн хүрээнд эхний ээлжинд Чингэлтэй дүүрэгт орчин үеийн стандарт бүхий Хүүхдийн амбулаторийн барилгыг барьж, ашиглалтад хүлээлгэн өгсөн. Мөн 2017 оны 10 дугаар сард Налайх дүүрэгт 50 ор бүхий “Хүүхдийн эмнэлэг” ашиглалтад оруулаад байгаа юм. “Хангарьд-Улаанбаатар” төрийн бус байгууллагын тэргүүн, МАН-ын Хэвлэл мэдээллийн албаны дарга Г.Ганбаяр хэлэхдээ “Нийслэл хотын эрүүл мэндийн тусламж үйлчилгээ тэр дундаа хүүхдийн эмчилгээнд онцгой анхаарч байгаа манай төсөл нь 3 жилийн хугацаанд хэрэгжинэ. Нийтдээ 5 дүүрэгт Хүүхдийн эмнэлэг, амбулатори барих зорилт тавьж байна. 2022 онд төсөл ажлаа дүгнэнэ. Энэхүү төслийн хүрээнд Налайх дүүргийн Хүүхдийн эмнэлэгт нэн шаардлагатай байгаа мэс заслын тоног төхөөрөмж, эмнэлгийн зориулалтын ор, инкубатор аппарат, нярай хүүхдийн шарлалтыг бууруулах төхөөрөмж зэрэг 1 сая юаний тоног төхөөрөмжийг гардуулж байна” гэлээ.

Налайх дүүргийн “Хүүхдийн эмнэлэг”-т тоног төхөөрөмж гардуулах ёслолд НИТХ-ын дарга С.Амарсайхан, Нийслэлийн Засаг дарга бөгөөд Улаанбаатар хотын захирагч С.Батболд, БНХАУ-аас Монгол Улсад суугаа Онц бөгөөд Бүрэн эрхт Элчин сайд Шин Хаймин, Эрүүл мэндийн дэд сайд Л.Бямбасүрэн болон албаны хүмүүс оролцлоо.

Нийслэлийн Засаг дарга бөгөөд Улаанбаатар хотын захирагч С.Батболд хэлэхдээ “Улаанбаатар хот эрүүл мэндийн салбартаа онцгой анхаарч, хөрөнгө оруулалтыг нэмэгдүүлж, гадна тохижилтыг эрчимтэй хийж байна. Иргэд ч ам сайтай байгаа гэдгийг онцлон хэлье. Тухайлбал, Налайх дүүргийн 180 ортой нэгдсэн эмнэлэгт өнгөрсөн онд 400 сая төгрөгийн хөрөнгө оруулалт бүхий засварын ажил хийсэн. Хоёр ч авто замын шинэчлэлийг хийж дуусгасан. Энэ онд нэгдсэн эмнэлгийг мэс заслын тасагтай болгож иж бүрэн тохижуулах, рентген тоног төхөөрөмж суурилуулах ажил хийгдэнэ. Ойролцоогоор 280 орчим сая төгрөгийн хөрөнгө оруулалт хийхээр төлөвлөж байна. “Хангарьд-Улаанбаатар” ТББ болон Хятадын Энхтайван хөгжлийн сангийн Улаанбаатар хотод хүүхдийн эмнэлэг, амбулатори барьж, тоног төхөөрөмжийг иж бүрнээр нь шийдэж өгч байгаад хотын иргэдийн өмнөөсөө талархаж байгаагаа илэрхийлье” гэлээ.

Нийслэлийн иргэдийн Төлөөлөгчдийн Хурлын дарга С.Амарсайхан “Налайх дүүргийн Хүүхдийн эмнэлэг бол маш богино хугацаанд бүтээн байгуулалт нь өрнөж, ашиглалтад орсон орчин үеийн эмнэлэг юм. Бусад дүүрэгт жишиг болохуйц стандартыг нэвтрүүлж чадсан. 2017 оны 5 сарын эхээр бүтээн байгуулалтын ажил нь эхэлж, 10 сарын сүүлээр дуусч, ашиглалтад орсон, Налайхын иргэдийн талархлыг хүлээсэн бүтээн байгуулалтын ажил. Иргэдийнхээ эрүүл мэндийн асуудалд хотын удирдлагын зүгээс онцгой анхаарч ажиллаж байгаагийн нэг жишээ нь энэхүү эмнэлэг юм” гэж хэллээ.

Налайх дүүргийн “Хүүхдийн эмнэлэг” ашиглалтад орсноос хойш 1684 хүүхэд үйлчлүүлж, 600 гаруй хүүхэд хэвтэн эмчлүүлсэн аж. “Энэ өвөл томуу, томуу төст өвчний үед ганц ч хүүхдийг газраар хэвтүүлж эмчлээгүй. Орны хүрэлцээ сайн байсан. Тоног төхөөрөмжийн хувьд мэс заслын, цусны төвийн болон нярай хүүхэд эмчлэх, оношлох тоног төхөөрөмжүүд ирсэн. Анх удаа Налайх дүүрэг цусны шинжилгээний төвтэй болж байгаа гэдгийг тодотгоё” гэж Налайх дүүргийн Хүүхдийн нэгдсэн эмнэлгийн дарга Л.Байгалмаа ярилаа гэж НЗДТГ-ын Хэвлэл мэдээлэл, олон нийттэй харилцах албанаас мэдээллээ.

Дорноговь аймгийн Замын-Үүд суманд ой найман сартай хүүхдийг хүчирхийлсэн хэрэг гарч, Цагдаагийн байгууллага уг хэргийг үйлдсэн гэх этгээдийг баривчлан, мөрдөн байцаах ажиллаагааг явуулж байгаа. Тэгвэл олон нийт хүчирхийллийн эсрэг жагсаал хийхээр болсон. Жагсаал ирэх бямба гаригт 11 цагт Сүхбаатарын талбайд болно. Жагсаалд иргэд, төрийн бус байгууллагууд, урлаг, спортынхон нэгдэж буйгаа илэрхийлсээр байгаа аж. Жагсаал зохион байгуулагчид Эрүүгийн хууль, Хүүхдийн эрхийн тухай хууль, Гэр бүлийн хүчирхийллийн хуульд нэмэлт өөрчлөлт оруулах тухай саналыг Ерөнхийлөгчийн Тамгын газар, Засгийн газарт шаардлага хүргүүлнэ гэлээ.