Month: February 2018

Жилийн бүрийн гуравдугаар сарын нэгэнд дэлхий нийтээр Олон улсын Иргэний хамгаалалтын өдрийг тэмдэглэдэг. Энэ жилийн хувьд Олон улсын иргэний хамгаалалтын байгууллагаас Дэлхийн иргэний хамгаалалтын өдрийг тохиолдуулан “Гамшгийн удирдлагыг сайжруулахад иргэний хамгаалалтын байгууллагын оролцоо” уриаг дэвшүүлсэн байна.

ОБЕГ-аас уг өдрийг угтан онцгой байдлын албаны үйл ажиллагааг олон нийтэд сурталчлан таниулах, алба хаагчдын чөлөөт цагийг зөв боловсон өнгөрүүлэх, мэдлэг боловсролыг дээшлүүлэх зорилтын хүрээнд спортын уралдаан тэмцээн, мэдээллийн цагийг зохион байгуулах юм. Тухайлбал, их, дээд сургуулиудын оюутнуудын дунд “Хүн ам, эд хөрөнгө, хүрээлэн буй орчныг хамгаалахад-Бидний оролцоо” сэдэвт сургалт зохион байгуулах, нийслэлийн ерөнхий боловсролын ахлах ангийн сурагчдын дунд “Гамшгийн эрсдэлийг бууруулахад миний оролцоо” сэдэвт гар зургийн уралдаан зохион байгуулах аж. Мөн “Цэвэр агаар” сэдэвт явган аялал, цасны баяр, нийслэлийн хүрээний анги, байгууллагын офицер бүрэлдэхүүний дунд гар бөмбөгийн тэмцээнийг зохион байгуулна.

Монгол Улс Олон улсын иргэний хамгаалалтын байгууллагад 1992 онд ажиглагч гишүүнээр, 2002 онд жинхэнэ гишүүнээр элсэж, 2011 онд Гүйцэтгэх зөвлөлийн гишүүн улс болсон юм.

Нийслэлийн Засаг дарга бөгөөд Улаанбаатар хотын захирагчийн мөрийн хөтөлбөрт “1.5.4 Улаанбаатар хотод тулгамдаж буй асуудал /агаар, ус, хөрсний бохирдол, нийтийн тээвэр/-ыг шийдвэрлэхэд гадаад улс, хотуудын туршлагаас судалж, нэвтрүүлнэ.”, “2.5 Түгжрэлгүй гудамж – Бухимдалгүй хот, Нийтийн тээврийг шинэ шатанд гаргана.”, “2.5.20 Улаанбаатар хотын такси үйлчилгээг хөгжүүлэх хөтөлбөр хэрэгжүүлнэ.” хэмээн заалтуудаар туссаны дагуу Улаанбаатар хотод олон улсын жишигт нийцсэн такси үйлчилгээг нэвтрүүлэх талаар нээлттэй хэлэлцүүлэг, чөлөөт уулзалтыг хийх гэж байна.

Энэхүү нээлттэй хэлэлцүүлгээр такси үйлчилгээний өнөөгийн нөхцөл байдал, хөрш зэргэлдээ хотуудын такси үйлчилгээний талаарх судалгаа, цаашид баримтлах бодлого зэрэг асуудлуудыг хэлэлцэх юм.

Тус хэлэлцүүлэгт иргэд, такси үйлчилгээ эрхлэгч ААН, холбогдох харьяа байгууллагууд гээд бүх талыг хамруулах нээлттэй хэлэлцүүлэг болох юм.

Иймд Эрхэм Таныг энэхүү нээлттэй хэлэлцүүлэгт өргөнөөр оролцохыг урьж байна.

Нээлттэй хэлэлцүүлэг 2018 оны 02 дугаар сарын 26-ны өдөр Нийслэлийн Иргэний танхим /Нийслэлийн төр захиргааны 5-р байр буюу Төв бассейн ертөнцийн зүгээр хойд талд/-д 9:30-13:00 цагийн хооронд зохион байгуулагдана.

Жич: Та ААН, холбогдох байгууллагаас оролцох бол нэрийн хуудсаа авчирна уу.

Ерөнхий зохион байгуулагч: “Улаанбаатар хотын хөгжлийн корпораци”ХК

Турк улсын Измир хотод 2018 оны 2 дугаар сарын 15-наас 16-ны өдрүүдэд Стандартчиллын бүс нутгийн холбоо /МАС/-ын Стратеги бизнес, хөгжлийн удирдах зөвлөлийн 3 дугаар хуралдаан хуралдаж, нийт 17 гишүүн орнуудын төлөөлөгчид оролцлоо.

Энэхүү хуралдаанаар нийт 14 асуудал хэлэлцэж, хэлэлцсэн асуудлаар 10 шийдвэрийг гаргасан бөгөөд хамгийн чухал ач холбогдолтой нь МАС-ын Ерөнхий Ассемблейн 27 дугаар хуралдааныг Монгол Улсын нийслэл Улаанбаатар хотод 2018 оны 4 дүгээр сард зохион байгуулахаар тогтлоо.

Стандарт, хэмжил зүйн газар бүс нутгийн стандартчиллын холбооны үйл ажиллагаанд идэвхтэй оролцдогийн зэрэгцээ дээрх орнуудаас анх удаа Европын стандартчиллын байгууллагын Хамтрагч гишүүн орноор 2016 оноос эхлэн ажиллаж байгааг өндрөөр үнэлж байгаагийн илрэл юм.

Дэлхийн эх хэлний өдөр болсонтой холбогдуулан Монгол Улсын Ардын багш , шинжлэх ухааны доктор, профессор Ц. Өнөрбуян гуайн “Монгол хэлний дархлаа ба үнэлэмж” сэдэвт илтгэл болон “Монгол хүүхэд” , “Чихинү чимэг болсон аялгуу сайхан монгол хэл” номын нээлт боллоо.

ЧИХИНҮ ЧИМЭГ БОЛСОН АЯЛГУУ САЙХАН МОНГОЛ ХЭЛ

Энэхүү эмхэтгэл “Монгол хэл” шүлгийг зохиосны 60 жилийн ойг ташлуулан МУБИС-Монгол судлалын төвөөс эмхэтгэн хэвлүүлсэн бүтээл юм. Уг эмхэтгэлд Б.Ринчений “Монгол хэл”, Монголын их бичгийн хүн Лувсандондов буюу Лу гүний “Үсэг бичиг” шүлэг, шинэ үеийн уран зохиолыг үндэслэгч Д.Нацагдоржийн “Эх хэл”, “Түүхийн шүлэг”-ээс эхлээд Монгол улс болон БНХАУ-ын Өвөр Монгол, Шиньжан Уйгарын Өөртөө Засах Орон, бусад муж ОХУ-ын Халимаг, Буриадын Бүгд Найрамдах улсын үе үеийн зохиолч, яруу найрагч, үгийн урлагийн дархадын бичсэн монгол хэл, бичгийн тухай 100 гаруй шүлэг, өгүүллэг, эсээ, нийтлэл.Мөн манай улсын зарим эрдэмтний бичсэн 20 гаран өгүүлэл, ярилцлагыг багтаасан юм.

МОНГОЛ ХҮҮХЭД (МОНГОЛЫН ТҮҮХ, УРАН ЗОХИОЛЫН СУРВАЛЖ БИЧИГТ ТУССАН МОНГОЛ ХҮҮХЭД)

МУБИС-Монгол судлалын төвөөс эрхлэн гаргаж буй “Монгол хүүхэд” (Монголын түүх, уран зохиолын сурвалж бичигт туссан монгол хүүхэд) баримт бичгийн эмхэтгэл нь Монголын анхны төрт улс болох Хүннү гүрний үеэс XX зууны эхэн хүртэлх монголын түүх, хууль цаазын бичигт туссан монгол хүүхдийн талаарх мэдээ сэлт, ардын аман болон бичгийн уран зохиол дахь монгол хүүхдийн дүр дүрслэлийг түүвэрлэн эмхэтгэсэн бүтээл юм. Энэхүү эмхэтгэл нь монголын түүх, хууль цаазын бичгээс түүвэрлэсэн монгол хүүхдийн талаарх 202 баримт, аман болон бичгийн уран зохиолын 33 үлгэр тууж, 328 цээр, 61 ардын дуу, 7 уртын дуу, 40 оньсогоос бүрджээ.

Г. МӨНХЦАЦРАЛ

Жил бүрийн хаврын эхэн сарын шинийн 15-ны дотор иргэд Алтан-Овоо, Шилийн Богд уул руу гарч, хийморио сэргээхээр Сүхбаатар аймгийг зорих нь элбэг байдаг. Иймд орон нутгийн холбогдох байгууллагуудаас сэрэмжлүүлэг гаргажээ.

Тодруулбал, Шилийн Богд руу явахдаа Асгат сумаар дамжин явах боломжгүй цас их, зам даваа хаагдсан байгаа. Харин Дарьганга сумаар дамжин ариутгал халдваргүйтгэлийг хийлгэн зорчих боломжтой. Ингэхдээ автомашины аюулгүй байдлыг хангаж туулах чадвар сайтай автомашинтай явах, хүүхэд болон эмэгтэйчүүдийг авч явахгүй байх, аюулгүй байдлаа сайтар хангахыг анхааруулж байна.

Түүнчлэн Сүхбаатар аймгийн Онгон, Наран, Эрдэнэцагаан сумдад малын гоц халдварт шүлхий өвчин гарч хорио цээрийн дэглэм тогтоосон учир тус сумд руу зорчихгүй байхыг анхааруулжээ. Мал, амьтны гоц халдварт өвчний улмаас тогтоосон хорио цээрийн дэглэм нь өвчний тархалтаасаа хамааран 21 хоногоос гурван сар хүртэл, түүнээс дээш хугацаагаар ч үргэлжилдэг юм.

Өвөрхангай аймгийн Арвайхээр сумын 4-р багийн нутаг дэвсгэрээс 2018 оны хоёрдугаар сарын 12-ны өдөр 3.400 грамм жинтэй, 53 см урттай эмэгтэй нярайн цогцос олджээ.

Хүүхдээ төрүүлээд хаясан эмэгтэйг Өвөрхангай аймгийн цагдаагийн хэлтсээс одоо хүртэл эрэн сурвалжилж байгаа бөгөөд дээрх эмэгтэй нь жирэмсэн байх хугацаандаа эмчийн хяналтад оролгүй явсаар эмнэлгийн бус орчинд төрсөн байх магадлалтай ажээ.

Иймд хэргийн тухай бодит үнэн мэдээлэл өгсөн иргэнийг Цагдаагийн албаны тухай хуулийн 39 дүгээр зүйл, Гэмт хэргээс урьдчилан сэргийлэх тухай хуулийн 14 дүгээр зүйлд заасны дагуу 5.000.000 хүртэлх төгрөгөөр урамшуулж өндөр нууцлал дор мэдээллийг худалдан авах юм байна.

Засгийн газрын хуралдаан 2018 оны 02 дугаар сарын 22-ны өдөр боллоо. НИТХ, Засаг даргын Тамгын газар, Захирагчийн ажлын алба, түүний харьяа байгууллагуудыг Хан-Уул дүүргийн 4, 8 дугаар хорооны нутаг дэвсгэр /Яармаг шинэ төв/-т шилжүүлэн байршуулах бэлтгэлээ шуурхай хангаж ажиллахыг Нийслэлийн Засаг дарга бөгөөд Улаанбаатар хотын захирагчид даалгав.

Энэ нь хотын төвийн хэт төвлөрөл, автомашины түгжрэл, агаарын бохирдлыг бууруулахаас гадна хотын хөгжлийн ерөнхий төлөвлөгөөг хэрэгжүүлж эхлэх, бизнесийн таатай орчин бүрдүүлэх, аялал жуулчлалын шинэ төв байгуулах, иргэдэд нутгийн захиргааны үзүүлэх үйлчилгээний хүртээмжийг сайжруулах зэрэг зорилготой юм.

Нийслэлийн төр, захиргааны байгууллагуудад 1933 хүн ажилладаг бөгөөд өдөрт дунджаар 5700 иргэн, аж ахуйн нэгжид 332 нэр төрлийн үйлчилгээ үзүүлдэг байна. Яармагт шилжүүлснээр үйлчилгээ авах гэсэн дээрх хэдэн мянган хүн хотын төвийг зорих шаардлагагүй болох юм гэж Засгийн газрын Хэвлэл, мэдээлэл олон нийттэй харилцах хэлтсээс мэдээллээ.