Month: January 2018

Нийслэлийн цагдаагийн газраас хулгайлах гэмт хэрэгтэй тэмцэх урьдчилан сэргийлэх, иргэдээс энэ төрлийн гэмт хэрэгтэй холбоотой мэдээ мэдээлэл, видео бичлэг, фото зураг хүлээн авах, шалгах зорилгоор “ХУЛГАЙЧААС САЛЦГААЯ” https://www.facebook.com/groups/891949624298528/ фэйсбүүк нээлттэй группийг нээн ажиллуулж эхлээд байна.

Өнгөрсөн онд 21947 гэмт хэрэг бүртгэгдсэний 8614 буюу 39.2 хувийг бусдын эд хөрөнгийг хулгайлах гэмт хэрэг эзэлж байна. Иймд иргэд та бүхэн дээрх группэд нэгдэж энэ төрлийн гэмт хэрэгтэй холбоотой мэдээллийг цагдаагийн байгууллагад шуурхай мэдэгдэж хамтран ажиллахыг хүсэж байна.

Өнгөрсөн амралтын өдрүүдэд цаг агаар муудаж, хөдөө орон нутгийн дийлэнх хэсгээр цасан шуургатай байснаас онцгой байдлын байгууллагад эрэн хайх, аврах ажиллагааны олон дуудлага иржээ. Тухайлбал,

• Өвөрхангай аймгийн Зүүнбаян-Улаан сумын Дэвшил багийн “Чулуунбулаг” гэдэг газар Бүрд сумаас Зүүнбаян-Улаан сум руу 70 тооны адуу тууж явсан Бүрд сумын Онгит багийн малчин Б /63 настай, эрэгтэй/ малтайгаа төөрсөн тухай дуудлагыг 01.07-ны өдрийн 21:10 цагт хүлээн авч тус аймгийн Онцгой байдлын газрын Эрэн хайх аврах бүлгийн 4 алба хаагч, 1 автомашинтай эрэн хайх ажиллагааг зохион байгуулж 23:45 цагт Дэвшил багийн “Чулуунбулаг” гэдэг газраас эсэн мэнд олж, аймгийн төвд авч ирж ар гэрт нь хүлээлгэн өгсөн.
• Өмнөговь аймгийн Ханхонгор сумын Өгөөмөр багийн “Хондот” гэдэг газар тус сумын малчин Э /31 настай, эмэгтэй/ 01.07-ны өдрийн 14:00 цагт малдаа яваад сураггүй болсон тухай дуудлагыг мөн өдрийн 15:58 цагт хүлээн авч тус аймгийн Онцгой байдлын газрын Эрэн хайх, аврах салбарын 8 алба хаагч, 1 автомашинтай, орон нутгийн 4 хүн, 1 автомашинтай, нийт 12 хүн, 2 автомашинтай эрэн хайх ажиллагааг зохион байгуулж, мөн өдрийн 18:35 цагт “Хондот” гэдэг газар байхад нь эсэн мэнд олж, ар гэрт нь хүлээлгэн өгсөн.
• Өмнөговь аймгийн Цогтцэций сумын Сийрст багийн “Хар-Эрэг” гэдэг газар тус сумын малчин Г /17 настай, эрэгтэй/ 01.07-ны өдрийн 15:00 цагт малдаа яваад сураггүй болсон тухай дуудлагыг мөн өдрийн 18:55 цагт хүлээн авч тус сумаас 6 хүн, 1 автомашинтай эрэн хайх ажиллагааг зохион байгуулж байх явцад иргэн Г гэртээ эсэн мэнд өөрөө ирсэн тул эрэн хайх ажиллагааг 20:30 цагт ажиллагааг зогсоосон.
• Өмнөговь аймгийн Цогтцэций сумын Бортээг багийн ”Наймтай” гэдэг газар тус сумын харьяат иргэн Т /41 настай, эрэгтэй/, иргэн С /19 настай, эрэгтэй/, иргэн Б /17 настай, эрэгтэй/ нар 01.07-ны өдрийн 12:00 цагт малдаа яваад сураггүй болсон тухай дуудлагыг мөн өдрийн 18:30 цагт хүлээн авч тус аймгийн Онцгой байдлын газрын Гал түймэр унтраах, аврах 44 дүгээр ангийн 2 алба хаагч, орон нутгийн 5 хүн, 1 автомашинтайгаар эрэн хайх ажиллагааг зохион байгуулж, 01.08-ны өдрийн 00:35 цагт гэрээсээ урд зүгт 5 км зайд ”Наймтай” гэдэг газраас эсэн мэнд олж, ар гэрт нь хүлээлгэн өгсөн.
• Өмнөговь аймгийн Цогтцэций сумын Билгэх багийн “Хацавчийн бууц” гэдэг газар тус сумын малчин малчин Б /46 настай, эрэгтэй/, Д /40 настай, эмэгтэй/ нар 01.07-ны өдрийн 12:00 цагт малдаа яваад сураггүй болсон тухай дуудлагыг мөн өдрийн 21:20 цагт хүлээн авч тус аймгийн Онцгой байдлын газрын Гал түймэр унтраах, аврах 44 дүгээр ангийн 3 алба хаагч, 1 автомашин, орон нутгийн 11 хүн, 1 автомашин, нийт 14 хүн, 2 автомашинтайгаар эрэн хайх ажиллагааг зохион байгуулж байх явцад гэртээ эсэн мэнд өөрсдөө ирсэн тул 22:45 цагт эрэн хайх ажиллагааг зогсоосон.
• Өмнөговь аймгийн Номгон сумын Эмгэнбулаг багийн “Үзүүр сүүж” гэдэг газар тус сумын харьяат малчин Б /30 настай, эмэгтэй/, Э /21 настай, эрэгтэй/ нар 01.07-ны өдрийн 16:00 цагт малдаа яваад сураггүй болсон тухай дуудлагыг мөн өдрийн 21:50 цагт хүлээн авч орон нутгийн 4 хүн, 1 автомашинтайгаар эрэн хайх ажиллагааг зохион байгуулж, 01.08-ны өдрийн 01:50 цагт гэрээсээ зүүн урд зүгт 6 км зайд ”Үзүүр сүүж” гэдэг газраас эсэн мэнд олж, ар гэрт нь хүлээлгэн өгсөн.

Мөн онцгой байдлын байгууллагад цасан суусан гэх дуудлага ихээр иржээ.

Тухайлбал, Говь-Алтай аймгийн Есөнбулаг сумын Наран багийн ”Дөтийн даваа” гэдэг газар 24-29 ГАҮ улсын дугаартай УАЗ-469 загварын 7 зорчигчтой түргэн тусламжийн автомашин цасанд суусан тухай дуудлагыг 01.08-ны өдрийн 02:50 цагт хүлээн авч тус аймгийн Онцгой байдлын газрын Гал түймэр унтраах, аврах 59 дүгээр ангийн 4 албан хаагч, 1 автомашинтай 06:35 цагт очиж, цаснаас татан гаргасан.

Орхон аймгийн Баян-Өндөр сумын Дулаан-Уул багийн УБЭҮ-ийн хиймэл нуурын урд талд Орхон аймгаас Улаанбаатарын чиглэлд зорчиж явсан 02-84 УНК улсын дугаартай Харриер загварын суудлын автомашин, 44-88 УБД улсын дугаартай “Пажеро” загварын суудлын автомашин цасанд суусан тухай дуудлагыг 01.07-ны өдрийн 19:52 цагт хүлээн авч тус аймгийн Онцгой байдлын газрын Гал түймэр унтраах, аврах 56 дугаар ангийн 4 алба хаагч, 1 авто машинтай 20:40 цагт очиж, 15 минут ажиллаж цаснаас татан гаргасан. Нийт 16 хүнд тусламж, үйлчилгээ үзүүлсэн.

Төв аймгийн Сэргэлэн сумын Эрдэнэ-Уул багийн ”Хатуугийн даваа” гэдэг газар ээж хаднаас Улаанбаатар хотын чиглэлд зорчиж явсан 18 зорчигчтой 3 автомашин цасанд суусан тухай дуудлагыг 01.07-ны өдрийн 17:09 цагт хүлээн авч тус аймгийн Онцгой байдлын газрын 14 алба хаагч 2 автомашинтай гарч ажиллаж, цасанд суусан нийт 41 зорчигчтой, 6 автомашиныг татан гаргаж, аюулгүй байдлыг ханган ажилласан.

Өмнөговь аймгийн Цогтцэций сумын Цагаан-Овоо багийн ”Гоёот” гэдэг газар тус аймгийн харьяат иргэн А 89-69 УНӨ улсын дугаартай “Приус 20″ загварын суудлын автомашинтай Цогтцэций сумаас Улаанбаатар хотын чиглэлд зорчиж яваад төөрч, цасанд суусан тухай дуудлагыг 01.07-ны өдрийн 20:20 цагт хүлээн авч тус аймгийн Онцгой байдлын газрын Гал түймэр унтраах, аврах 44 дүгээр ангийн 5 алба хаагч, орон нутгийн 2 хүн, нийт 7 хүн, 1 автомашинтайгаар эрэн хайх ажиллагааг зохион байгуулж, 01.08-ны өдрийн 01:50 цагт ”Гоёот” гэдэг газар цасанд суусан байсныг татан гаргажээ.

Өчигдөр орсон цас болон цасан шуурганы улмаас Өмнөговь аймгийн орон нутаг руу зорчих хөдөлгөөнийг түр хугацаагаар хязгаарласан бөгөөд өнөөдрийн /2018.01.08/ байдлаар хөдөө, орон нутагт хаасан зам, даваа байхгүй хөдөлгөөн хэвийн үргэлжилж байна.

Гэсэн хэдий ч замын гадаргууд ихээхэн халтиргаа гулгаа үүссэн байгаа тул өдрийн цагт хөдөлгөөнд оролцохдоо замын нөхцөл байдалд хурдаа зөв тохируулах, үзэгдэлт хангалтгүй буюу шөнийн цагаар хөдөө, орон нутгийн замд зорчихгүй байхыг зөвлөж байна. Мөн нийслэл хотын халтиргаа, гулгааг арилгах зорилгоор тус албаны Техник, замын хяналтын хэлтсээс Улаанбаатар хотын Шуурхай удирдлага, зохицуулалтын төвтэй хамтран зургаан дүүргийн хэмжээнд 25 гол гудамж, замуудад 66 тн бодис, 50 тонн давс цацуулж ажилласан байна.

ШӨХТГ-аас 2017 онд хийсэн онцлох ажил, хэрэглэгчийн өргөдөл, гомдол, хяналт шалгалтын үр дүн болон цаг үеийн шинжтэй зарим хяналт шалгалтын талаар мэдээлэл хийлээ.

Өнгөрөгч онд ШӨХТГ-аас нийт дөрвөн удаагийн хуралдаан хийж хорь гаруй асуудлыг хэлэлцэж, 19 тогтоол гаргажээ. Тухайлбал: Зүй ёсны монополь байдалтай аж ахуй эрхлэгчийг тогтоосон тав, давамгай байдалтай аж ахуй эрхлэгчийг тогтоосон 30, үнэ тарифт өөрчлөлт оруулсан хоёр ажлыг хийсэн байна. Мөн өрсөлдөөний хуулийн шинэчилсэн найруулгын төслийг УИХ-аар хэлэлцүүлэхийн сацуу Зар сурталчилгааны тухай хуульд нэмэлт, өөрчлөлт оруулах хуулийн төслийг боловсруулжээ.

Өнгөрөгч онд иргэдийн гомдол, мэдээллийн дагуу асуудлыг шийдэн ажилласан бөгөөд нийт иргэдийн дийлэнх буюу

31.6 хувь нь Барилга, ОСНААҮ, СӨХ,

21.2 хувь нь Хүнс, худалдаа, үйлчилгээ

10.1 хувь нь Харилцаа, холбоо, мэдээлэл

5.5 хувь нь Банк, санхүү, даатгал

3.7 хувь нь Боловсрол, эрүүл мэнд, нийгмийн асуудлаар хандсан байна.

Өнгөрсөн онд зөвлөн туслах, соён гэгээрүүлэх, урьдчилан сэргийлэх чиглэлд анхаарч ажилласан бол энэ жил гүйцэтгэлийн хяналт шалгалтыг түлхүү хэрэгжүүлж,хэрэглэгчийг төөрөгдүүлсэн, өрсөлдөөнд харш, хууль бус зар сурталчилгааг таслан зогсоох, орон нутгийн хэрэглэгчийн эрхийг хамгаалах, гомдол, саналыг шуурхай шийдвэрлэхэд анхаарч, орон нутагт чиглэж ажиллах юм байна.

МӨН ЭНЭ ҮЕЭР ШАТАХУУНЫ ҮНИЙН ӨСӨЛТ, ХОМСДОЛЫН ТАЛААР МЭДЭЭЛЭЛ ӨГСӨН ЮМ

ШӨХТГ-аас шатахуун түгээх станцуудын үнийн хөөрөгдөлт болон хомсдол үүссэнтэй холбогдуулан гурван ажлын хэсгийг гарган ажиллуулж байгаа юм байна. Одоогоор гурван шатахуун түгээх станц үнэ нэмж, хомсдол үүсгээд байгаа аж. Үүнд: Магнай трейд, Петровис, Сод Монгол группийн шатахуун түгээх станцууд гэдгийг илрүүлжээ. Уг гурван шатахуун түгээх станцын захирлуудтай уулзалт зохион байгуулсан бөгөөд тэд хомсдолоо зогсоон гэх бичиг ирүүлжээ. Өөр үнэ нэмсэн, хомсдол үүсгэсэн шатахуун түгээх станцууд байхгүй юм байна.

Энэ талаар ШӨХТГ-ын дарга Б.Лхагва ярихдаа”Өнөөдөр шатахуун түгээж, жижиглэнгээр борлуулж байгаа байгууллагуудад үнэ тарифаа нэмэх эрх байхгүй. Нэмэхгүй байх шаардлагыг манай байгууллагын зүгээс тавьж байна. Тэдэнд хязгаарлалт тогтоох шалтгаан байхгүй. Онцгой байдал зарласан, бензин шатахууны нөөц багассан тохиолдолд бензин шатахууныг хязгаарлах ёстой. Аж ахуй нэгжүүд шууд дур мэдэн хязгаарлалт тавих эрх байхгүй. Бидний хувьд үнэ нэмэхгүй, иргэдэд дарамт үүсгэхгүй байх чиглэлд анхаарал тавин ажиллана. Хомсдол үүсгэсэн, үнэ нэмсэн байгууллагын албаны хүмүүстэй уулзалт хийсэн. Өнөөдөр хомсдол үүсгээгүй гэж найдаж байна” хэмээлээ.

Шатахууны үнэ нэмсэн, хомсдол үүсгэсэн тухайн байгууллагууд ямар арга хэмжээ авах талаар ШӨХТГ-ын Бодлого зохицуулалтын газрын дарга Ц.Тэрбиш хэлэхдээ “Өрсөлдөөний хууль болон зөрчлийн тухай хуульд заасан журмын дагуу зөрчлийн төрлөөс хамааран өмнөх жилийн борлуулалтын орлогын 4-5 хувиар торгодог” гэв.

Ардчилсан Эмэгтэйчүүдийн Холбоо болон иргэний нийгмийн байгууллагууд хамтран “Цахим халдлагаас хүүхдээ хамгаалъя” нэг сарын аяныг эхлүүлээд байгаагаа Монгол Улсын Ерөнхийлөгчид танилцуулж, удирдамжаа гардууллаа.

Монгол Улсын Ерөнхийлөгч Х.Баттулгад удирдамж гардуулах үеэр аяныг санаачлан зохион байгуулагч Ардчилсан Эмэгтэйчүүдийн Холбооны тэргүүн С.Одонтуяа “Бид хүүхдээ хамгаалж чадахгүй бол Үндэсний аюулгүй байдал гэж яриад ч нэмэргүй” хэмээн хэлсэн юм. Цахим орчинд хүүхдүүд донтож, хүчирхийлэлд өртөх гэх мэт маш олон сөрөг тал байгааг хэрхэн өөрчлөх талаар аяныг зохион байгуулагчидтай Монгол Улсын Ерөнхийлөгч Х.Баттулга санал солилцов. Тэрбээр хүүхдүүдийг цахим орчноос гараад цагаа үр бүтээлтэй өнгөрүүлэх боломж бүрдүүлэх нь Монгол Улсын хөгжлийн бодлоготой нягт уялдаатай асуудал хэмээн онцлоод, уг аянаас бодит үр дүн гараасай хэмээн хүсэв.