Month: January 2018

БНХАУ-ын Тээврийн сайд Ли Сяопөний урилгаар Зам, тээврийн хөгжлийн сайд Ж.Бат-Эрдэнийн БНХАУ-д албан ёсны айлчлал хийж байна. Айлчлалд ИНЕГ, УБТЗ, АТҮТ, МТЗ, Далайн захиргааны удирдлагууд багтжээ.

Айлчлалын эхний өдөр ЗТХ-ийн сайд тэргүүтэй төлөөлөгчдийг БНХАУ-ын Тээврийн сайд Ли Сяопөн хүлээн авч уулзан, хоёр улсын тээврийн салбарын хамтын ажиллагааны хүрээнд авто зам, агаарын тээвэр болон БНХАУ, ОХУ, Монгол Улсын хамтран байгуулахаар хэлэлцэж буй төмөр замын коридорын асуудлыг хэлэлцлээ.

Ли Сяопөн сайд уулзалтын эхэнд, 2014 онд хоёр улс “Иж бүрэн стратегийн түншлэлийн харилцааг хөгжүүлэх тухай хамтарсан тунхаглал” тогтоосноор бүх салбар, ялангуяа зам тээврийн салбарт онцгой анхаарч ажиллаж байна. БНХАУ-ын “Зам ба бүс” хөтөлбөртэй Монгол Улсын “Хөгжлийн зам” хөтөлбөрийн бодлого бүрэн нийцэж байгааг онцоллоо. Мөн тэрээр 2011 онд Монгол Улс, БНХАУ-ын хооронд байгуулсан Авто тээврийн хэлэлцээр одоогийн нөхцөлтэй нийцэхгүй байгаа учир хоёр улсын мэргэжилтнүүдийн ажлын хэсэг байгуулж, тус гэрээг яаралтай шинэчлэх шаардлагатай байгааг энэ үеэр илэрхийлсэн юм.

Зам, тээврийн сайд Ж.Бат-Эрдэнэ “БНХАУ-ын зам, тээврийн үйл ажиллагааны төлөвлөлт, зохион байгуулалт, гүйцэтгэл зэргээс суралцаж, сургамж авах зүйл олон байна. Салбартаа тэргүүлж буй тус улсын хөгжлөөс хоцрохгүйн тулд хамтран ажиллаж, зарим зүйлд дэмжлэг, туслалцаа авах хүсэлтэй байна. Хамтын ажиллагааны хүрээнд яамнаас шалтгаалах ажлаа боломжоороо хурдан хийж гүйцэтгэх болно. Тиймээс БНХАУ-ын Тээврийн сайдын хувьд дараах асуудлыг нэн даруй шийдвэрлэхэд дэмжлэг үзүүлж ажиллахыг уулзалтын үеэр ноён Ли Сяопөнээс хүслээ. Үүнд:

• Тяньжин-Улаан-Үүдийн авто замыг сайжруулах, хурдны зам тавих
• Хоёр улс хоорондын төмөр замын шугамыг сайжруулах, тэлэх, ажиллах хүчийг нэмэгдүүлэх
• Баруун, зүүн, хойд чиглэлийн дамжин өнгөрөх тээврийн чиглэлийг өргөжүүлэх
• Нарийн сухайт, Шивээ хүрний чиглэлийн төмөр замын асуудал
• Таван толгой-Гашуун сухайт чиглэлийн авто замын асуудлыг онцоллоо.

Мөн тэрээр “Тавантолгой- Гашуунсухайт чиглэлийн авто замын тээвэрлэлт нь Монгол Улсын эдийн засагт чухал нөлөөтэй. Тиймээс энэ асуудлыг нэн даруй шийдвэрлэх шаардлагатай байна. Эхний ээлжид холболтын цэгийг нэмэх талд анхаарч өгнө үү. Мөн Зүүнбаянгаас Ханги мандал хүртэл төмөр зам барих нь зүйтэй гэж үзэж байна. Хэрэв энэ чиглэлд төмөр замын холболттой болчихвол ӨМӨЗО-ны нутаг дээрх Бугатын төмөрлөгийн үйлдвэрт нийлүүлж буй Монголын төмрийн хүдрийн тээвэрлэлтийн зай одоогийнхоос даруй 400 км-ээр дөт тээвэрлэх боломжтой бөгөөд Замын-Үүд-Эрээн боомтын ачаалал буурах юм” гэдгийг уулзалтын үеэр онцлон илэрхийлэв.

• Харин агаарын тээврийн хувьд Улаанбаатар-Бээжин-Улаанбаатар чиглэлийн нислэгийн давтамжийг нэмэгдүүлэх, бууж хөөрөх цаг олгоход анхаарахыг хүслээ. Мөн Улаанбаатар-Улаан-Үүд-Улаанбаатар чиглэлд нислэг үйлдэж буй “Хүннү Эйр” ХХК-ийн нислэгийн чиглэлийг өргөтгөж, Улаанбаатар-Улаан-Үүд-Манжуур-Улаан-Үүд-Улаанбаатар чиглэлд нислэг үйлдэх хүсэлт тавив. Энэ нь гурван улсын эдийн засгийн коридорын хүрээнд хийгдэх агаарын тээврийн салбарын хамтын ажиллагаа болон аялал жуулчлалын салбарт томоохон ахиц авчрах болно хэмээн үзэж буйгаа салбарын сайд Ж.Бат-Эрдэнэ хэлсэн юм.

БНХАУ-ын тээврийн сайд уулзалтын төгсгөлд ярилцсан асуудлын хүрээнд хоёр талын ажлын хэсэг байгуулж судалгаа хийх шаардлагатай. Таны саналуудыг бид судлан үзээд бүх салбарт хамтран ажиллахад бэлэн байна гэдгээ илэрхийлээ.

Үүний дараа Монгол Улсын Далайн захиргаа болон БНХАУ-ын Далайн хэргийн газар хоорондын далайн салбарт хамтран ажиллах тухай харилцан ойлголцлын санамж бичиг болон Монгол Улсын Зам, тээврийн хөгжлийн яамны Авто тээврийн бодлогын хэрэгжилтийг зохицуулах газар, БНХАУ-ын Тээврийн яамны тээврийн үйлчилгээний газартай хэлэлцээ хийсэн тухай протоколд талууд тус тус гарын үсэг зурав.

Эрүүл мэндийн сайдын 2016 оны “Төгсөлтийн дараах үндсэн ба төрөлжсөн мэргэшлийн сургалтын чиглэл, индекс батлах тухай” тушаалаар Үндсэн мэргэшлийн сургалтын чиглэлд “Ерөнхий мэргэшил судлал” чиглэлийг шинээр зохион байгуулахаар баталж, 2017-2018 оны хичээлийн жилд уг сургалтыг эхлүүлэх бэлтгэл ажлыг хангаж байгаа билээ.

Энэ ажлын хүрээнд Эрүүл мэндийн яам, Эрүүл мэндийн хөгжлийн төв, Японы олон улсын хамтын ажиллагааны байгууллагын “Анхан болон хоёр дахь шатлалын эмнэлгийн төгсөлтийн дараах сургалтыг сайжруулах” төслийн багтай хамтран “Ерөнхий мэргэшил судлал, сургалтын хөтөлбөр боловсруулах арга зүй” сэдэвт сургалтыг 01 сарын 30-31-ны өдрүүдэд зохион байгуулж байна.

Сургалтаар Эмнэлгийн мэргэжилтний төгсөлтийн дараах сургалт эрхлэгч байгууллагуудын үйл ажиллагааг олон улсын жишигт нийцүүлэн хөгжүүлэхэд чиглэсэн, эмнэл зүйн чадамжид суурилсан байдлаар хөтөлбөрийг шинэчлэн боловсруулах арга зүйг эзэмшүүлэх юм.

Сургалтад Ерөнхий мэргэшил судлал үндсэн мэргэшлийн сургалтыг зохион байгуулах Анагаахын шинжлэх ухааны их сургуулийн эрдэмтэн багш нар, Орхон, Дорнод аймгийн Бүсийн оношилгоо эмчилгээний төв, Булган аймгийн Нэгдсэн эмнэлэг, Нийслэлийн Чингэлтэй дүүргийн нэгдсэн эмнэлгийн эмнэл зүйн сургагч багш, эмч нар, төгсөлтийн дараах сургалт эрхлэгч 19 байгууллагын сургалтын албаны ажилтнууд нийт 50 хүн оролцож байна. Японы олон улсын хамтын ажиллагааны Жайка байгууллагын “Анхан болон хоёр дахь шатлалын эмнэлгийн төгсөлтийн дараах сургалтыг сайжруулах” төслийн багийн урилгаар ирсэн тухайн чиглэлдээ хүлээн зөвшөөрөгдсөн Японы дөрвөн судлаач багш сургалтыг удирдан явуулж байгаа юм. Сургалтын үр дүнд дэлхий нийтийн жишигт нийцсэн байдлаар Ерөнхий мэргэшил судлал үндсэн мэргэшлийн сургалтын хөтөлбөрийн төслийг боловсруулан хэрэгжүүлэхээр зорьж байгаа аж.

Цагаан сар дөхөж гадуур худалдан авалт ихэссэнтэй холбогдуулан МХЕГ-аас хяналт, шалгалж хийсэн байна. Үүнтэй холбогдуулан зарим нэг худалдаа эрхлэгчид компаниудыг шалгажээ. “Хан талт ХХК”-ийн “Баянзүрх” хүнсний захад үйл ажиллагаа явуулж буй 12 иргэний нарийн боовны лангуунуудад хяналт шалгалт хийхэд “Амдэ ХХК”-ийн “Гандан”-ийн хэвийн боов, “Арвай” хэвийн боов, “Өгөөж архад ХХК”-ийн “Өгөөмж еэвэн”, “Хишигийн хур ХХК”-ийн “Өлзий” хэвийн боов, еэвэнгүүд нь үйлдвэрлэсэн он, сар, хугацаа, хаяг байршил тодорхойгүй байсан байна.

Шалгалтын явцад 12 иргэний 212 ширхэг нийт 381.600 мянган төгрөгийн хэвийн боов, есөн ширхэг нийт 72.000 мянган төгрөгийн еэвэнг газар дээр нь буцаан татан авалт хийлгүүлж мэргэжил арга зүйн зөвлөгөө өгч ажилласан байна. МХЕГ-аас иргэдийг он, сар, хугацаа тавиагүй хүнсний бүтээгдэхүүн авахгүй байхыг сэрэмжлүүллээ.

Санхүүгийн зохицуулах хороонд өнгөрсөн онд иргэд, үйлчлүүлэгчид, хөрөнгө оруулагч нараас нийт 267 өргөдөл, гомдол ирүүлжээ. Эдгээрийн дийлэнх нь буюу 54 хувь нь даатгалын компаниуд, мэргэжлийн оролцогчдын үйл ажиллагаатай холбоотой байжээ. Үүнд даатгалын компани нөхөн төлбөр олгохоос үндэслэлтэй татгалзсан тохиолдлын тоо нийт өргөдлийн жар гаруй хувийг эзэлсэн байна.

Жолоочийн хариуцлагын албан журмын, тээврийн хэрэгслийн, орон сууцны зээлдэгчийн эрсдэлийн болон бусад төрлийн даатгалын тохиолдлуудад хамаарах 141 өргөдөл, гомдлыг хянан үзсэний үндсэн дээр даатгагчаас даатгуулагч иргэн, хуулийн этгээдийн нөхөн төлбөрт нийт 729.1 сая төгрөгийг олгуулахаар шийдвэрлэсэн байна. Мөн давхар даатгагчаас нийт 1,849.3 сая төгрөгийг олгуулжээ.

Үнэт цаасны зах зээлтэй холбоотой өргөдөл, гомдол нийт өргөдлийн хорин зургаан хувийг эзэлсэн байна. Тэдгээрийн дийлэнх нь эзэмшигчийн зөвшөөрөлгүй хийгдсэн арилжаатай холбоотой гомдлууд байгаа аж. Эзэмшигчээс нь зөвшөөрөл авалгүй дур мэдэн үнэт цаас арилжаалсан үйлдлийг Хорооноос үйл ажиллагаа эрхлэх тусгай зөвшөөрлийг хүчингүй болгосон 17 брокер, дилерийн компани хийснийг тогтоожээ. Нийт 17 хувьцаа эзэмшигчийн үнэт цаасыг зөвшөөрөлгүй арилжаалсныг хянан шалгаж, гурван иргэний хохирлыг барагдуулсан байна. Түүнчлэн нэг иргэний дөрвөн ширхэг хувьцааг буцаан байршуулах, нэг иргэний 2006 оноос хойших ногдол ашгийг нөхөн олгуулах, 11 иргэний хохирлыг барагдуулах шийдвэр гаргажээ.

Банк бус санхүүгийн байгууллагуудтай холбоотой нийт 34 өргөдөл, гомдол ирсний ихэнхийг зээлийн хүү, алданги буруу тооцсон, барьцаа хөрөнгийг чөлөөлөөгүй, зээлийн гэрээг тухайн ББСБ өөртөө давуу эрх олгох байдлаар байгуулсан, Зээлийн мэдээллийн санд шинэчлээгүйгээс зээлийн ангилалд сөргөөр нөлөөлсөн зэрэг гомдлууд эзэлжээ. Хадгаламж, зээлийн хоршоодод холбогдуулсан 19 өргөдөл, гомдол ирсэн бөгөөд хувь нийлүүлсэн хөрөнгийн болон гишүүдийн гэрээний маргаан ижил хэмжээтэй байсан байна. Өргөдөл, гомдлыг хуулийн хугацаанд хянан шийдвэрлэж, үүрэг даалгавар, чиглэл болон мэдэгдлийг өгч ажиллажээ.

НӨАТ-ын урамшууллын 2018 оны 2 дугаар сарын сугалааны тохирол 18-ны ням гаригт Боловсрол телевизээр орон даяар шууд явагдана. Иргэн таны 2018 оны 1 дүгээр сарын 1-нээс 1 дүгээр сарын 31-ний өдөр хүртэлх хугацаанд худалдан авалт хийсэн баримтаа 2018 оны 2 дугаар сарын 18-ны өдрийн 23 цаг 59 минутаас өмнө Цахим төлбөрийн баримтын системд бүртгүүлснээр НӨАТ-ын урамшууллын сугалаанд хамрагдаж, азтан болох боломжтой.

Энэхүү сугалааны тохирол нь 2018 оны 1 дүгээр сарын 1-нээс 1 дүгээр сарын 31-ний өдөр хүртэлх хугацаанд худалдан авалт хийсэн баримтын дунд явагдах тул Сангийн сайдын 2017 оны 12 сарын 26-ны өдрийн 381 дугаар тушаалаар батлагдсан Сугалааны тохирлоор 2018 оны төсвийн жилд олгох урамшууллын хэмжээ хамаарна. Өөрчлөлтийг доор зургаар үзүүллээ.

Засгийн газар өнөөдөр ээлжит бусаар хуралдахаар болжээ.

Ерөнхий сайд У.Хүрэлсүх өчигдөр “Засгийн газар Хүн амын орлогын албан татварын нэмэгдлийг засч залруулан хуучнаар нь мөрдөж, эрэгтэй 60, эмэгтэй 55 насандаа тэтгэвэрт гарах эрхтэй байхаар зохицуулалт хийнэ. Хэрвээ тухайн иргэн өөрөө хүсвэл эрэгтэй 65, эмэгтэй 60 нас хүртлээ ажиллах боломжтой. Хөдөлмөрийн хүнд нөхцөлтэй бол эрэгтэй 55, эмэгтэй 50 настайдаа тэтгэвэрт гарч болно. Тэтгэвэрт гарах насыг зургаан сараар нэмж байгааг гурван сар болгож бууруулна. Иргэдийн илүү төлсөн татварын мөнгийг буцааж олгохоор ОУВС-тай ярьж тохирлоо. Цаашид нийт хүүхдийн 60 хувьд өгч байгаа хүүхдийн мөнгийг 80 хувьд нь өгч, цалин, тэтгэвэр, тэтгэмжийг нэмэхээр төлөвлөсөн. Мөн төрийн албан хаагчдын цалин нэмэхээр болсон” хэмээн мэдэгдсэн.

Эдгээртэй холбоотой хуулийн төслүүдийг Засгийн газар өнөөдөр яаралтай горимоор хэлэлцэн лхагва гарагт УИХ-д өргөн барьж, чуулган завсарлахаас өмнө шийдвэрлүүлэх чигтэй ажиллаж байгаа аж.

Өнөөдрийн байдлаар аймгийн хэмжээнд 11 сумын 787 айл өрх отроор явж байгаа бөгөөд эдгээр айл өрхөд жирэмсэн эх 28, өндөр настан 125, 0-5 насны хүүхэд 317, хөгжлийн бэрхшээлтэй иргэн 63 байна. Харин отроор 273024 мянган толгой мал явж байгаагаас бод 9578, бог 263446 толгой байгаа юм байна. Малчид 2017 онд өөрийн хэрэгцээнд өвс 50100 тн, тэжээл 1900 тн, давс, хужир 8020 тн бэлтгэхээс өвс 44737 тн, тэжээл 1185 тн, хужир шүү 5637 тн бэлтгэсэн бол аймгийн 2016 оны өвс, тэжээлийн аюулгүйн нөөцөнд 319 тонн өвс, 64.0 тонн тэжээл, 2017 онд шинээр нэмж 180.0 сая төгрөгөөр 300 тонн өвс, 180 тонн тэжээл бэлтгэжээ.

Сумдын өвс, тэжээлийн аюулгүйн нөөцөнд 685.9 тонн өвс, 188.3 тонн тэжээл бэлтгэсэн бөгөөд аймаг болон зудтай, зудархуу байгаа сумдын өвс, тэжээлийн нөөц дууссан гэж аймгийн Засаг даргын орлогч Ч.Батболд танилцууллаа. Тус аймагт улсын чанартай Улаан даваа, Боршоо, Наранбулаг, Сонгино зам даваанд шуурхай ажлын хэсгүүдийг ажиллуулж байгаа бөгөөд Цагаанхайрханы “Мөндөөхэй”, Хяргас “Нарийн зураа” зэрэг орон нутгийн чанартай чиглэлийн зам давааг өөрсдийн хүчээр гаргах ажлыг зохион байгуулан ажиллажээ.

Тус аймгийн Баруунтуруун, Зүүнговь, Наранбулаг, Өндөрхангай, Тэс, Хяргас сум зудтай, Зүүнхангай, Малчин, Улаангом зудархуу байгаа бөгөөд Завхан, Тариалан, Цагаанхайрхан сумын өвөлжилтийн нөхцөл байдал хүндэрч 5900 толгой мал хорогдоод байна. Тухайлбал: Тэмээ 7, адуу 187, үхэр 312, хонь 2122, ямаа 3209 хорогджээ. Аймгийн онцгой комиссоос Улсын онцгой комиссын шуурхай бүлэгт хандан хэд хэдэн тулгамдсан асуудлыг шийдвэрлэж өгөхийг хүсч байлаа.

Аймгийн аюулгүйн нөөцөнд өвс, тэжээл нэмж бэлтгэхэд 500 сая төгрөгийн хөрөнгийн асуудлыг шийдвэрлэх, Хяргас сумын Засаг даргын тамгын газарт автомашины асуудлыг шийдвэрлэх, Бөхмөрөн, Тэс, Зүүнговь сумдын Эрүүл мэндийн төвүүдэд автомашины асуудлыг шийдвэрлэх шаардлагатай байгааг уламжиллаа. Мөн Тэс сумын Улсын нөөцийн цэгийг Наранбулаг сум руу шилжүүлэх, Өндөрхангай суманд шинээр Улсын нөөцийн цэгийг байгуулах саналыг ч тавьсан юм.

Аймгийн өвөлжилтийн нөхцөл байдал, сумдын өвс, тэжээлийн нөөц дууссан зэрэг аймаг, орон нутгаас тавьсан саналыг үндэслэн Увс аймагт улсын нөөцөөс 1060 тонн өвсийг үнэгүйгээр, 500 тонн тэжээлийг 50 хувь хөнгөлөн олгохоор шийдвэрлэж, өвс, тэжээлийн эхний цувааг аймаг, орон нутагт хүлээлгэн өглөө.