Цагдаагийн байгууллагын удирдах албан тушаалтан болон байгууллагын үйл ажиллагаатай холбоотой бодит санал, шүүмжлэл, гомдол мэдээллийг Цагдаагийн ерөнхий газрын 126 тусгай дугаарт хүлээн авч байна.
Иргэдээс ирүүлсэн бодит мэдээлэлд цагдаагийн байгууллагын зүгээс тодорхой ажил явуулан, арга хэмжээ авч хариу мэдэгдэх аж.
Монгол Улс ДОХ-оор нас барагсдын тоогоороо Азид сүүлээсээ нэгдүгээрт бичигдэж байна гэж Азийн хэвлэл мэдээллийн байгууллагуудын эвсэл мэдээллээ.
Дэлхий дахинд ДОХ-оор нас барагсдын тоо тогтвортой буурсаар байгаа хэдий ч энэ өвчнөөр жилд цөөнгүй хүн хорвоог орхиж байна. 2010 онд Азид ХДХВ/ДОХ-ын улмаас нас барсан 240 мянган тохиолдол бүртгэгдэж байсан бол 2016 онд энэ тоо 170 мянга болж цөөрсөн байна.
НҮБ-ын ДОХ-ын нэгдсэн хөтөлбөрөөс /UNAIDS/ өчигдөр гаргасан судалгааны тайланд дурдсанаар, одоо Ази-Номхон далайн бүс нутагт ХДХВ-тэй 5.1 сая хүн байгаагийн ердөө 2.4 сая нь л эмчилгээнд хамрагдаж байгаа аж.
Монголд 2016 онд ДОХ-оор “100-гаас цөөн” хүн нас барсан гэж уг судалгааны тайланд “баримжаалан” бичжээ. Гэхдээ өнгөрсөн оны 12 дугаар сарын 1-нд “ДОХ-той тэмцэх дэлхийн өдөр”-ийг тохиолдуулан Монгол Улсын ЭМЯ-наас гаргасан мэдэгдэлд “Манай улсад 1992 онд ХДХВ-ийн халдварын анхны тохиолдол бүртгэгдсэнээс хойш 2017 оны 11 дүгээр сарын 21-ний байдлаар, ХДХВ-ийн халдвар авсан 249, ХДХВ/ДОХ-ын улмаас нас барсан 40 тохиолдол бүртгэгдээд байна” гэсэн байна.
Хятад улс ХДХВ/ДОХ-той хүмүүсийнхээ талаарх мэдээллийг өгөөгүй байна. Хятад улсад ХДХВ-тэй 430 мянгаас 1.5 сая хүртэлх тооны хүн байж магадгүй гэсэн тооцоог НҮБ-ын холбогдох албаны хүмүүс гаргажээ.
Харин Энэтхэг улс ДОХ-оор нас барагсдынхаа тоогоор Азид жагсаалтын хамгийн эхэнд бичигдэж байна. Тодруулбал, 2016 онд тус улсад 62 мянган хүн ДОХ-оор нас баржээ. Мөн Энэтхэг нь ДОХ-оор нас барагсдынхаа тоогоор дэлхийд ӨАБНУ болон Нигери улсын араас бичигдэж байгаа аж.
Тэгвэл Индонези улс ДОХ-оор нас барагсдын тоогоороо Азид эхнээсээ хоёрдугаарт бичигдэж байна. Тус улсад 2016 онд 38 мянган хүн энэ өвчнөөр нас баржээ.
Тайланд улс 2016 онд ДОХ-оор нас барагсдын тоогоороо Азид гуравдугаарт /16 мянган хүн нас барсан/ бичигджээ. Тус улс нь 2023 он гэхэд ХДХВ-ийн тархалтыг бүрэн зогсоох зорилтыг өнгөрсөн онд дэвшүүлсэн гэнэ.
“Нийгмийн
хамгааллын тухай Монгол Улс, Бүгд Найрамдах Польш Улс хоорондын
хэлэлцээр”-т УИХ-ын гишүүн, Хөдөлмөр, нийгмийн хамгааллын сайд
С.Чинзориг, БНПУ-ын Гэр бүл, хөдөлмөр, нийгмийн бодлогын сайд Элжбиета
Рафалса нар Варшав хотноо энэ оны 01 дүгээр сарын 24-ний өдөр гарын үсэг
зурав.
Гарын
үсэг зурах ёслолын арга хэмжээнд Монгол Улсаас БНПУ-д суугаа Элчин сайд
Н.Батаа, БНПУ-ын Гэр бүл, хөдөлмөр, нийгмийн бодлогын яамны Төрийн
нарийн бичгийн дарга Марчин Зиэлэниэцки нарын хоёр талын албаны хүмүүс
оролцов.
Энэхүү
хэлэлцээрт гарын үсэг зурснаар хоёр улсын иргэдийн нийгмийн даатгалд
шимтгэл төлсөн хугацааг аль алийг нь тооцуулж тэтгэврээ тогтоолгох
боломжтой болж байгаа юм. Мөн Монгол, Польш хоорондын нийгмийн
хамгааллын салбарын хамтын ажиллагаа төдийгүй бусад салбарт хоёр талын
харилцааг хөгжүүлэхэд түлхэц болох юм.
Эрүүл мэндийн сайд Д.Сарангэрэлийн урилгаар манай улсад айлчилж буй
ДЭМБ-ын Номхон далайн баруун бүсийн Эрүүл мэндийн тогтолцооны газрын
дарга, зохицуулагч нар орон нутгийн эрүүл мэндийн салбарын тогтолцоо,
үйл ажиллагаатай танилцахаар төлөөлөл болгон Төв аймгийн Эрдэнэ суманд
ажиллаа.
Төв аймгийн Эрүүл мэндийн газар нь 1 нэгдсэн эмнэлэг, 26 сумын эрүүл
мэндийн төв, 1 өрхийн эрүүл мэндийн төв, 77 хувийн хэвшлийн эрүүл
мэндийн байгууллагыг мэргэжил арга зүйгээр ханган ажиллаж, нийт 1270
эмч, эмнэлгийн мэргэжилтэн орон нутгийн 92832 хүн амд эрүүл мэндийн
тусламж, үйлчилгээг хүргэж байна. Аймгийн хэмжээнд эмнэлгийн тоног
төхөөрөмжийн стандартын хангалт 48.5%, хүний нөөцийн стандарт хангалт
61.6% байна.
Төв аймгийн эрүүл мэндийн салбар 2017 онд нийт 14 тэрбум төгрөгийн
санхүүжилтээр тусламж, үйлчилгээг хүргэснээс 2,3 тэрбум төгрөгөөр
эмнэлгийн тоног төхөөрөмж, автомашины парк шинэчлэл, барилгын засвар,
шинэчлэлд хөрөнгө оруулалт хийсэн нь өмнөх жилүүдэд хийгдэж байгаагүй их
хөрөнгө оруулалт байлаа.
Мөн олон улсын байгууллагуудттай хамтран ажилласанаар аймгийн эрүүл
мэндийн салбарын үйл ажиллагаа сайжирсан гэж Төв аймгийн Эрүүл мэндийн
газрын дарга С.Мөнхтуяа танилцуулгадаа онцоллоо. Үүний нэг жишээ нь Төв
аймгийн Баянчандмань суманд хэрэгжсэн “Эрүүл мэндийн анхан шатны
тусламж, үйлчилгээ болон олон нийтийн түвшинд мобайл технологийн
хэрэглээг өргөжүүлэх нь” төслийг хэрэгжүүлсэн. Тус төсөл нь орон нутгийн
хүн амд үзүүлж буй эрүүл мэндийн анхан шатны тусламж, үйлчилгээнд өндөр
ач холбогдолтой байсан тул 2018 онд 14 суманд тус төслийг өргөжүүлэн
хэрэгжүүлэхээр орон нутгаасаа нийт 140 сая төгрөгийн санхүүжилтийг
шийдвэрлэсэн байна.
Мөн 2016 онд ДЭМБ-ын санхүүгийн дэмжлэгтэйгээр “Сум, баг бүрт хүрч
үйлчилье” төслийн хүрээнд нийт 27 сумын 16075 хүнийг илрүүлж, эрүүл
мэндийн анхан шатны болон нийгмийн халамж, хамгааллын тусламж,
үйлчилгээг хүргэсэн байна. Төслийн үр шимийг хүртсэн нэг өрхийн аж
байдалтай танилцлаа
Монгол, Хятадын хүмүүнлэгийн солилцооны хамтарсан зөвлөлийн анхдугаар
хурал 2018 оны 1 дүгээр сарын 25-ны өдөр Бээжин хотноо болов. Зөвлөлийн
анхдугаар хурлыг Монгол Улсын Гадаад харилцааны яамны Төрийн нарийн
бичгийн дарга Д.Даваасүрэн, БНХАУ-ын Гадаад хэргийн дэд сайд Кун Шюаньёу
нар даргалж, монголын талаас Монгол Улсын Гадаад харилцааны яам,
Боловсрол, соёл, шинжлэх ухаан, спортын яам, Байгаль орчин, аялал
жуулчлалын яам, Хөдөлмөр, нийгмийн хамгааллын яам, Нийслэлийн Засаг
даргын тамгын газар, Биеийн тамир, спортын газар, Монголын Залуучуудын
холбоо, МОНЦАМЭ агентлаг, Монголын Үндэсний олон нийтийн радио телевиз,
хятадын талаас БНХАУ-ын Гадаад хэргийн яам, Боловсролын яам, Соёлын яам,
Эрүүл мэнд, гэр бүл төлөвлөлтийн хороо, Хэвлэл мэдээлэл, радио, кино,
телевизийн Ерөнхий газар, Биеийн тамирын Ерөнхий газар, Аялал жуулчлалын
газар, Төрийн зөвлөлийн харьяа Хэвлэл мэдээллийн алба, Хятадын Ардын
гадаад орнуудтай найрамдлаар харилцах нийгэмлэг, Бүх Хятадын Залуучуудын
нэгдсэн холбоо, ӨМӨЗО-ны Ардын Засгийн газар зэрэг байгууллагын нийт 40
гаруй төлөөлөгчид оролцов. Талууд боловсрол, соёл, эрүүл мэнд, хэвлэл
мэдээлэл, кино, телевиз, биеийн тамир, спорт, аялал жуулчлал, найрсаг
солилцоо, хүүхэд залуучууд, орон нутгийн солилцоо зэрэг хүмүүнлэгийн 9
салбарын хамтын ажиллагааны асуудлаар өргөн хүрээнд санал солилцож, нийт
44 төсөл, арга хэмжээ хэрэгжүүлэхээр тохиролцов. Талууд харилцан
тохиролцсон асуудлаар хурлын протокол байгуулав. Монгол, Хятадын
хүмүүнлэгийн солилцооны хамтарсан зөвлөлийн анхдугаар хурал нь 2017 оны 5
дугаар сард байгуулсан “Монгол, Хятадын хүмүүнлэгийн солилцооны
хамтарсан зөвлөл байгуулах тухай, Монгол Улсын Засгийн газар, БНХАУ-ын
Засгийн газар, хоорондын харилцан ойлголцлын Санамж бичиг”-ийн дагуу
хэрэгжиж буй арга хэмжээ бөгөөд Зөвлөлийн хоёр дахь удаагийн хурал 2019
онд Улаанбаатар хотод болно.
ГХЯ,
Монголын түүхийн олимпиадыг зохион байгуулах дэд хороо хамтран 2017 оны
12 дугаар сарын 09-ний өдөр хилийн чанадад төрж, өссөн Монгол
хүүхдүүдийн дунд Монгол түүхийн мэдлэг олгох, эх хэл, соёл ёс заншлыг
түгээн дэлгэрүүлэх зорилготой “Эх түүхийн олимпиад”-ыг цахим хэлбэрээр
амжилттай зохион байгууллаа.
“Эх
түүхийн олимпиад”-ыг дунд, ахлах сургуулийн сурагч гэсэн хоёр түвшинд
нэг үе шаттайгаар зохион явуулж 11-14 насны ангилалд нийт 75 хүүхэд
оролцсоноос Москва хотын 14 дүгээр дунд сургуулийн сурагч Доржготовын
Өнөрмаа дэд байрыг эзэлсэн байна.
Олимпиадад
шагналт байр эзэлсэн бүх хүүхдэд өргөмжлөл, мөнгөн шагнал, худам монгол
бичгээр бичсэн уран бичлэг, Найрамдал олон улсын хүүхдийн цогцолборт
амрах эрхийн бичиг олгосныг Монгол Улсаас ОХУ-д суугаа ЭСЯ-ны зүгээс
нийт оролцсон хүүхдүүдэд талархал илэрхийлж, Доржготовын Өнөрмааг Элчин
сайд Б.Дэлгэрмаа хүлээн авч, шагналыг нь гардуулан өгч, баяр хүргэлээ.
Элчин
сайд Б.Дэлгэрмаа шагналыг гардуулах үед хэлсэн үгэндээ: “Анх удаагийн
цахим олимпиадад дэлхийн өнцөг булан бүрээс 2 насны ангилалд нийт 132
хүүхэд цахим сорил бөглөж, эссэ бичиж өрсөлдлөө. Цаашид уламжлал болгон
явагдах олимпиадын цаг хүрээ улам өргөжин тэлэх болно гэдэгт итгэж
байна” гэж онцлон тэмдэглэв.
Эрүүл мэндийн сайд
Д.Сарангэрэл өнөөдөр Дорноговь аймагт ажиллаж байна. Тэрээр энэ удаагын
орон нутгийн томилолтоо Дорноговь аймгийг сонгосон нь учиртай. Өнөөдрийн
байдлаар Сайншанд сумын 50 ортой төрх эмнэлэг, Замын-Үүдын 100 ортой
эмнэлгийн барилгын ажлууд зогсонги байдалтай байгаа. Эдгээр барилгууд
ямар учир шалтганаас товлосон цаг хугацаандаа ашиглалтад ороогүй ингэж
олон жил зогсонги байдалд орсонтой газар дээр нь танилцаж, удахгүй
барилгын ажлыг эхлүүлэх гарц шийдлийг УИХ-гишүүн О.Дэлгэрсайхан,
аймгийн удирдлагууд болон бусад холбогдох албаны хүмүүстэй уулзаж,
тодорхой мэдээллүүдийг авч, цаашид ямар арга хэмжээ авч ажиллах талаар
ярилцлаа.
.png)
2011 оноос эхлэн баригдсан 50 ортой төрөх эмнэлгийн барилгын тендерт
“Мон Инж Бар” ХХК шалгарч улсын төсвийн 1.2 тэрбум төгрөгийн хөрөнгөөр
дээрх эмнэлгийн барилгыг барьж эхэлсэн боловч хугацаанд нь ашиглалтад
оруулаагүй өдий хүрсэн байдаг.
Мөн
тэрээр Тус аймгийн нэгдсэн эмнэлгийн амбулатори, яаралтай, хүүхэд,
сүреэгийн тасгуудад ажиллаж, эмч эмнэлгийн ажилчид, хэвтэн
эмчлүүлэгчидтэй уулзаж, санал бодлоо солилцоо.
Монгол Улсын Шадар сайдаар ахлуулсан Улсын Онцгой комиссын шуурхай
бүлэг баруун бүсийн төв Ховд аймагт ажиллаж байна. Шуурхай бүлэг аймгийн
Онцгой комиссын өргөтгөсөн хурлыг хуралдууллаа. Аймгийн Засаг дарга
Д.Галсандондог болон баруун бүсийн төв Ховд аймгийн Онцгой байдлын
газрын дарга, хошууч Б.Алтанбадралт нар өвөлжилтийн нөхцөл байдлын
талаар танилцууллаа.
Ховд аймгийн 17 сум, 91 багт 2016-2017 оны өвөл 8295 малчин өрх
өвөлжсөн, 2017-2018 онд урьдчилсан дүнгээр 6863 малчин өрх өвөлжиж
байна.
Өвөлжилт, хаваржилтын бэлтгэл ажил хангах Засгийн газрын 186 тогтоол,
аймгийн Засаг даргын 05 тоот албан даалгаврын хүрээнд хадлан 64,5
мянган тн, сүрэл 304 тн, ногоон тэжээл 143 тн, үйлдвэрийн тэжээл 358 тн,
гар тэжээл 2,4 мянган тн-ыг тус тус бэлтгэж дотоодын хэрэгцээг хангасан
бол малчин өрх өвөлжилтийн хувийн бэлтгэлийг 90,7 хувиар, аймгийн мал
аж ахуйн өвөлжилтийн бэлтгэл 77,4 хувиар хангасан байна.
Аймгийн сумдаар 5-10 см цасан бүрхүүл тогтож, хунгарласан газраа
10-30 см-т хүрч, мал бэлчээрлэх боломжгүй болох нөхцөл байдал үүсчээ.
Аймгийн нийт нутгийн 94 орчим хувь нь цасан бүрхүүлтэй болж, шөнөдөө
29-42 хэм, өдөртөө 22-30 хэм хүрч хүйтэрч байна. 2018 оны 01 дүгээр
сарын 25-ны байдлаар 27740 мал хорогдож (үүнээс тэмээ 157, адуу 840,
үхэр 1365, хонь 8364, ямаа 17014), 3585 мал хээл хаясан мэдээтэй байна.
Чандмань, Манхан, Дарви, Дөргөн, Мөнххайрхан, Мянгад сумдад малын
хорогдлын ихэнх хувийг эзэлж байгаа аж. Алтай, Үенч, Булган сумдын
нутгаар ургац 1.0-3.0 ц/га ургацтай, Алтай салбар уулсаар 0.5-1.0 ц/га,
ихэнх сумдын нутгаар ургац маш бага 0.0-0.5 ц/га ургацтай гарсан нь ирэх
2017-2018 оны бэлчээрийн даац, багтаамжийн хэмжээг тодорхойлсон
байдлаар гаргахад 5% нь бэлчээрийн нөөцтэй, 5% нь бэлчээр хүрэлцээтэй,
17% нь даац 1-3 дахин хэтэрсэн, 10% нь даац 3-5 дахин хэтэрсэн, 63% нь
даац олон дахин хэтэрсэн судалгаа гарчээ.
Малчид, ард иргэдээс гарч байгаа санал, асуултуудад дурдагдаж байсан
анхаарал татсан асуудлуудын нэг нь энэ жил “өвсгүйн зуд” болж байгааг
онцолж байсан байна. Тухайлбал иргэд, олон жилийн зудыг үзэж байсан.
Гэхдээ энэ жилийнх шиг газарт ганц ч өвсгүй зуд харж байгаагүй гэдгийг
хэлж байгаа нь хавар нэлээд хүндрэх төлөвтэй байгааг харуулж байна гэж
Онцгой байдлын газрын дарга, хошууч Б.Алтанбадралт ярьлаа.
Аймгийн аюулгүйн нөөцөөс өвөлжилтийн нөхцөл байдал хүндэрсэн Дөргөн,
Чандмань, Дарви, Зэрэг, Цэцэг, Манхан, Мөст, Мөнххайрхан, Дуут, Ховд,
Эрдэнэбүрэн, Мянгад нийт 12 суманд 6000 боодол өвс, 2400 уут тэжээлийг
малчдад хүргэжээ.
Мөн өвөлжилт хүндэрсэн Дөргөн, Чандмань, Дарви, Зэрэг, Манхан, Цэцэг,
Мөст, Мөнххайрхан, Дуут, Ховд, Эрдэнэбүрэн, Мянгад нийт 12 сумдын Засаг
даргын Тамгын газарт шатахууны дэмжлэг болгож сум тус бүрт 500,0 мянган
төгрөг нийт 6,0 сая төгрөгийн дэмжлэг үзүүлсэн байна.
Өвөлжилт хүндэрсэн сумдын малчид, ард иргэдэд эрүүл мэндийн
үйлчилгээг газар дээр нь хүргэх зорилгоор аймгийн Эрүүл мэндийн газар,
Бүсийн оношилгоо эмчилгээний төвийн эмч, мэргэжилтнүүдээс бүрдсэн ажлын
хэсэг сумдад ажиллажээ.
Аймгийн хэмжээнд өвөлжилт хүндэрсэн сумдад 472 сая төгрөгийн үнэ
бүхий өвс, тэжээл, шатахуун, гурил будаа, бусад эд материалын тусламжийг
орон нутгаас үзүүлсэн байна.
Аймгийн онцгой комиссоос Улсын онцгой комиссын шуурхай бүлэгт хэд хэдэн санал, хүсэлтийг тавьлаа.
Ховд аймгийн Бүсийн оношлогоо эмчилгээний төв, Зэрэг, Дуут сумдын
эрүүл мэндийн төвийн эмнэлгийн үйлчилгээ үзүүлдэг автомашинуудын гүйлт,
километр дууссан, эвдрэл, гэмтэл тогтмол гарч эрүүл мэндийн үйлчилгээ
явах боломжгүй болсон тул гурван автомашин, Онцгой байдлын газрын Улсын
нөөцийн салбарт 1000 тн өвс, 250 тн тэжээлийн тусламж, Мөст сум дахь
шатахууны цэгээс 100 тн түлш хөнгөлөлттэй үнээр гаргах, бог малын
мялзан өвчнөөс урьдчилан сэргийлэх вакциныг 2018 онд төллөх төл малд 5-7
дугаар сард хийх вакциныг шийдвэрлүүлэх зэрэг саналыг Улсын Онцгой
комиссын шуурхай бүлэгт уламжиллаа.
Аймгийн өвөлжилтийн нөхцөл байдал, аймаг, орон нутгаас тавьсан
саналыг үндэслэн Ховд аймагт улсын нөөцөөс 400 тонн өвсийг үнэгүйгээр,
250 тонн тэжээлийг 50 хувь хөнгөлөн олгохоор шийдвэрлэж, өвс, тэжээлийн
эхний цувааг аймаг, орон нутагт хүлээлгэн өглөө гэж Онцгой байдлын ерөнхий газраас мэдээллээ.
Монгол Улсын Их Хурлын дарга М.Энхболдын захирамжаар агаарын бохирдлыг бууруулах чиглэлээр байгуулагдсан Ажлын хэсгийг УИХ-ын гишүүн НББСШУ-ны байнгын хорооны дарга Ё.Баатарбилэг ахалж, арван таван гишүүний бүрэлдэхүүнтэйгээр байгуулагдсан билээ.
Ажлын хэсгээс гаргасан удирдамжийн дагуу Улсын Их Хурлын гишүүд хууль, тогтоомжийн хэрэгжилтийн биелэлттэй танилцах хүрээнд Улаанбаатар хотын дүүргүүдэд агаарын бохирдлыг бууруулах чиглэлээр хувиараа ажиллаж байгаа аж ахуйн нэгж, төр болон төрийн бус байгууллагуудын үйл ажиллагаа, гэр хорооллын иргэдийн нөхцөл байдалтай биечлэн танилцаж, санал сонсохоор тогтсон.
Дээрх удирдамжийн дагуу өчигдөр УИХ-ын гишүүн, Ажлын хэсгийн ахлагч Ё.Баатарбилэг, УИХ-ын гишүүн Д.Тэрбишдагва, Засгийн газрын гишүүн, Байгаль орчин, аялал жуулчлалын сайд Н.Цэрэнбат болон Нийслэлийн Засаг даргын Тамгын газар, Барилга, хот байгуулалтын яам, Эрчим хүчний яам, Байгаль орчин, аялал жуулчлалын яамны холбогдох албаны хүмүүс агаарын бохирдлыг бууруулах чиглэлээр үйл ажиллагаа явуулдаг байгууллагуудын үйл ажиллагаатай танилцав.
“ЗОХИЦОЛ” ТӨСЛИЙН ҮЙЛ АЖИЛЛАГААТАЙ ТАНИЛЦАВ
Эхлээд Баянзүрх дүүргийн 21-р хороонд байрладаг “Эм Ай Эйч” группийн “Зохицол” төслийн үйл ажиллагаатай танилцав. Уг төслийн зорилго нь гэр хорооллын хашаа байшинг инженерийн дэд бүтэц шийдэгдсэн эко-хаус болгон хөгжүүлж ашиглалтын зардал багатайгаар, тав тухтай амьдрах нөхцөлийг бүрдүүлэхэд оршиж байгаа аж.Одоогийн байдлаар төслийн нэгдүгээр шат хэрэгжиж үр дүнг танилцуулж байгаа юм байна. 700 м2-аас доошгүй талбайтай газарт гурван хувилбараар таван айлын амины орон сууц, үүнээс хоёр нь үйлчилгээ эрхлэх боломжтой, дөрвөн автомашины гараж бүхий инженерийн дэд бүтцийг бүрэн шийдсэн бичил хотхоныг нийт 284 сая төгрөгийн хөрөнгө оруулалтаар барьсан байна. Эдгээр байшингууд нь дулаан алдагдал хамгийн бага тул энэхүү бичил хотхоны загварыг Улаанбаатар хотод шинэ шийдэл бүхий гэр хороолол бий болгох, дахин төлөвлөлтөд ашиглах бүрэм боломжтой хэмээн “Эм Ай Эйч” группийн захирал Ж.Бат-Ирээдүй Ажлын хэсгийнхэнд танилцуулж байлаа.
“УЛААНБААТАР ХОТЫН ГЭР ХОРООЛЛЫГ ХӨГЖҮҮЛЭХ, ХӨРӨНГӨ ОРУУЛАЛТЫГ ДЭМЖИХ ХӨТӨЛБӨР”-ИЙГ ХЭРЭГЖҮҮЛЖ БУЙ ТӨСЛИЙН ҮЙЛ АЖИЛЛАГААТАЙ ТАНИЛЦАВ
Төслийн талаарх танилцуулгыг төслийн зохицуулагч Д.Авирмэд хийсэн юм. Тэрбээр “Уг төслийн хүрээнд Сэлбэ болон Баянхошуу дэд төвүүдийг нийслэлийн хойд бүсийн хүн амд үйлчлэх худалдаа, соёлын үйлчилгээний төвлөрөл бүхий байгаль орчинд ээлтэй ногоон орчинг бүрдүүлсэн дүүрэг, бүсийн чанартай төв болгохоор зорин ажиллаж байна” гээд Баянхошуу дэд төв нь 156 га талбайг хамарч байгаа бөгөөд төвлөрсөн дулааны шугамд холбосноор 14 812 айл өрх, 14 сургууль, цэцэрлэг, эмнэлэг дулааны шугамд холбогдож, түүхий нүүрсний хэрэглээ эрс буурч, агаарт хаягдах хорт бодисын хэмжээ жилд дунджаар 153,649 тонноор буурна гэлээ. Мөн Баянхошуу дэд төв байгуулах суурь нөхцөлийг бүрдүүлэн ажиллаж байгаа ба газар чөлөөлөлтийн явц 70 хувьтай явагдаж байна хэмээн мэдээллээ.
“УТААГҮЙ ВАГОН” ТӨСӨЛ
Дараа нь Ажлын хэсгийн гишүүд Улаанбаатар төмөр зам ХНН-ийн Зорчигчийн вагон депо дээр ажиллав. Зорчигчийн вагон депогийн нутаг дэвсгэрт зорчигчийн вагоныг жижүүрт халуун зогсолтоор зогсож байх болон аялаллын үед түүхий нүүрс шатааж байгаа үйл ажиллагаанд дэвшилтэд технологийг нэвтрүүлж агаарын бохирдлыг бууруулах, зорчигч үйлчлүүлэгч, ажилчдын ая тухтай орчныг бүрдүүлэх, эрүүл ахуйн стандартад нийцүүлэхээр ажиллаж байгаа хэмээн Зорчигчийн вагон депогийн ерөнхий инженер Х.Зоригоо хэлэв. Тэрбээр, хатуу түлш ашиглаж байгаа зорчигчдын вагонд хийсэн судалгаагаа дэлгэрэнгүй танилцуулж, вагоныг утаагүй түлшээр тоноглох ажлын хүрээнд хийсэн ажлуудаа тайлагналаа.Танилцуулгатай холбогдуулж Байгаль орчин, аялал жуулчлалын сайд Н.Цэрэнбат хэлсэн үгэндээ “Агаарын бохирдлыг бууруулах чиглэлээр санаачилгатай ажиллаж байгаа Зорчигчийн вагон депогийн хамт олонд баяр хүргэе. Ашигт малтмал, газрын тосны газрын дэргэдэх нүүрсний лаборатори, Геологийн төв лаборатори, хараат бус SJS лабораторийн шинжилгээнд үндэслэж утаагүй “бүтээгдэхүүний” үр дүнг эцэслэн шийдвэрлэдэг болохоор тогтсон. Цаашид бид түүхий нүүрсний хэрэглээг хориглоно. Иймд Улаанбаатар вагон депо ойрын ирээдүйд сайжруулсан түлш хэрэглэх учир энэ тал дээр судалгаа хийхийг зөвлөж байна” гэлээ.
“МОНГОЛ ТҮЛШ” ХХК-НИЙ ҮЙЛ АЖИЛЛАГААТАЙ ТАНИЛЦАВ
Ажлын хэсгийн гишүүдийн очсон дараагийн газар бол Хан-Уул дүүрэгт байрлах “Монгол түлш” ХХК-ний загварын байр юм. Уг компани нь газрын гүний дулааныг ашиглан барилга байгууламжийн халаалт, хөргөлт, хэрэглээний халуун усыг шийдэх жишиг төсөл хэрэгжүүлж Монгол Улсад нутагшуулах зорилготой юм байна. Газрын гүний хөрс буюу 50-150 м орчимд байгаа жилийн туршид тогтмол байдаг нөхөн сэргээгдэх эрчим хүчийг дулааны насосны тусламжтайгаар барилга байшин халаах, хөргөх, хэрэглээний ус халаах зэрэгт ашиглах боломжтой аж. Тодорхой бүсэд газрын гүний насос байршуулснаар 50-80 жилийн хугацаанд төвлөрсөн шугам сүлжээ суурилсантай адил эрчим хүчний систем үүснэ гэж тус компанийн зөвлөх Б.Баттулга танилцуулсан юм.УИХ-ын гишүүн, Ажлын хэсгийн ахлагч Ё.Баатарбилэг “УИХ-аас Агаарын бохирдлыг бууруулах чиглэлээр байгуулагдсан ажлын хэсэг өнөөдөр хэд хэдэн байгууллагын үйл ажиллагаатай танилцаж дулааныг янз бүрийн арга технологиор шийдэж байгаа шийдлүүдтэй танилцлаа. Одоо бид төрийн зүгээс зоригтой шийдэл гаргаж ажиллах хэрэгтэй байна. Агаарын бохирдлыг бууруулах чиглэлээр Засгийн газарт бодлогын хувьд дэмжлэг үзүүлж, тогтоолын хэрэгжилтийг хангуулахад анхаарч ажиллана” гэж хэллээ
Монгол Улсын Ерөнхийлөгч Х.Баттулга Дорноговь аймгийн иргэдтэй
уулзахаасаа өмнө тус аймгийн Өргөн сумын Их-Уул багийн нутагт өвөлжиж
байгаа малчин айлаар зочиллоо. Өргөн сумын нутагт өвөлжиж байгаа өрхийн
тэргүүн Л.Наранзул 1977 оноос хойш энэ нутагт мал маллаж амьдрах болжээ.
Тэрбээр “Говь нутагт цас багатай, өвөлжилт хэвийн байгаа хэдий ч
хадлан тэжээл бага, ургац муутай байна. Ноолуурын үеэр бага сага мөнгө
олж байгаа ч малынхаа ашиг шимийг бүрэн хүртэж чадахгүй байгаа, ноолуур
80 мянга орчим төгрөг болж байгаа бол ноос, нэхий үнэгүй шахуу болсон”
талаар Төрийн тэргүүнд хэлэв.
Харин Монгол Улсын Ерөнхийлөгч Х.Баттулга “Малын гаралтай бүх түүхий
эд урд хөрш рүү гардаг. Малчин та бүхэн жилдээ 15 сая мал, ийм тооны
арьс ,9.5 мянган тонн ноолуур зэргийг бий болгож, түүгээрээ амьдардаг.
Таны хэлж байгаачлан эдгээр түүхий эдийн үнэ, ханш үнэгүйдэж, бараг
80-90 орчим хувь нь урагшаа түүхийгээрээ гардаг юм. Харин эргээд бидэнд
бараа, бүтээгдэхүүн болж ирэхдээ үнэ нь нэмэгдсэн байдаг. Малаас гарах
ашиг шимийг нэмэгдүүлэхийн тулд бид түүхий эдээ дотооддоо боловсруулж,
тогтмол үнээр малчдаасаа худалдаж авдаг байх ёстой. Энэ тухай танай
аймгийн иргэдэд танилцуулахаар явна” гээд Дорноговь аймгийн иргэдтэй
хийх уулзалтандаа малчин Л.Наранзулыг урив.
Дорноговь аймгийн хэмжээнд нийт 4167 өрхийн 72620 үхэр, 133213 адуу,
40722 тэмээ, 861363 хонь, 89322 ямаа, нийт 1.2 сая толгой мал өвөлжиж
байгаа юм байна. Тус аймагт дундын отрын бүс нутаг байхгүй бөгөөд цагийн
байдал хүндэрсэн үед өөр аймгийн нутагт долоон сумын 90 өрхийн 68.9
мянган толгой мал, өөрийн аймгийн зэргэлдээ сумдын нутагт 10 сумын 132
өрхийн 90.2 мянган толгой мал, хилийн зурваст таван сумын 149 өрхийн
88.5 мянган толгой мал, улсын тусгай хамгаалалттай бүс нутагт нэг сумын
94 өрхийн 31.4 мянган толгой мал, нийт 465 өрхийн 278.5 мянган толгой
мал отроор өвөлжиж байна.
Мөн Дорноговь аймагт цаг агаарын нөхцөл байдлаас шалтгаалан өвөлжилт хүндэрсэн сум байхгүй байна.
