Month: January 2018

Засгийн газрын Хэрэг эрхлэх газрын дэд дарга Б.Даажамба тэргүүтэй төрийн болон төрийн бус байгууллагуудын төлөөлөл 2017 оны 12 дугаар сард Индонез Улсын Жакарта хотноо Индонез Улсын Засгийн газар болон Олон улсын нээлттэй засгийн түншлэл байгууллагаас хамтран зохион байгуулсан “Нээлттэй засгийн түншлэл, Ази, Номхон далайн манлайлагчдын форум”-д оролцлоо.

Форумд Ази, номхон далайн улс орнуудын төр, засгийн тэргүүнүүд болон иргэний нийгмийн байгууллага, олон улсын хөгжлийн түнш байгууллагын 700 гаруй манлайлагч нар оролцлоо.

Бүс нутгийн форум уулзалтыг нээж Индонез Улсын дэд Ерөнхийлөгч Еүсүв Калла, “Төр засаг нь иргэдээ мэдээллээр хангаж, тэдний оролцоо, хүсэл эрмэлзлэлийг дэмжсэнээр улс орны цогц хөгжил бүрдэх болно. Энэ удаагийн форум уулзалт нь гишүүн орнууд туршлага хуваалцаж, мэдлэг цуглуулах замаар бүс нутагт олон талт оролцоог хангасан засаглалыг бэхжүүлэх шинэ зорилго, зорилтуудыг нээхэд оршино” гэлээ.

ЗГХЭГ-ын дэд дарга Б.Даажамба тус форумын Сайд нарын дугуй ширээний уулзалтад Монгол Улс дахь авлигын эсрэг үйл ажиллагаа, Авлигатай тэмцэх Үндэсний хөтөлбөр, олборлох салбарын ил тод байдлыг хангах асуудлаар хэрэгжүүлж байгаа үйл ажиллагаа, туршлага, амжилтын талаар мэдээлэл хийлээ.

Форумын үеэр НЗТ-ийн Дэмжлэг үзүүлэх дэд хороо, НЗТ-ийн удирдах хорооны төлөөллүүдтэй хоёр талт уулзалт зохион байгууллаа. Эдгээр байгууллагын зүгээс Монгол Улсын Нээлттэй засгийн чиглэлээр авч хэрэгжүүлж буй хүчин чармайлт, гаргасан амжилт, тулгарч буй бэрхшээлүүдийг даван туулах болон дэмжлэг үзүүлэх чиглэлээр нягт хамтран ажиллах боломжуудыг ярилцлаа.

Нээлттэй засгийн түншлэлийг түгээн дэлгэрүүлэх, үйл ажиллагааны төлөвлөгөөний олон талт оролцоог нэмэгдүүлэх, зорилтыг амжилттай хэрэгжүүлэхэд дэмжлэг үзүүлэх зорилго бүхий «Oлон талт хандивын сан» энэ оноос гишүүн орнуудад дэмжлэг үзүүлж эхлэх бөгөөд энэ хүрээнд НЗТ-ийн Дэмжлэг үзүүлэх дэд хорооны мэргэжилтнүүд 2018 оны гуравдугаар сард манай улсад ирж ажиллахаар харилцан тохиролцлоо гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Шинэ оны анхны нар харах ёслол Багахангай дүүрэгт 2018 оны нэгдүгээр сарын 1-ний өдөр боллоо. Тус арга хэмжээг Багахангай дүүргийн Засаг даргын захирамжаар энэ удаа 6 дахь жилдээ зохион байгуулсан юм. Уг арга хэмжээний үеэр шинэ оны анхны нарнаас энерги авч, ажил үйлсээ даатгахаар 1800 гаруй автомашин, 6000 гаруй иргэн хүрэлцэн ирсэн ба ирсэн зочдод Багахангай дүүргийн Засаг даргын Тамгын газраас үнэгүй халуун аарц, чацарганаар үйлчилж, соёлын ордоны уран бүтээлчид урлагийн тоглолт зохион байгуулав гэж Багахангай дүүргийн ЗДТГ-аас мэдээллээ.

“Минт Интернэшнл” групп Шинэ оны босгон дээр Хан-Уул дүүргийн Нэгдсэн эмнэлгийн Хүүхдийн тасагт 20 ширхэг утлагын аппарат, мөн тус дүүргийн 15 хорооны Өрхийн эмнэлэгт зургаан аппаратыг тус тус хандивласан байна. Тус групп нь эл ажлыг зохион байгуулахдаа Нийгмийн хариуцлагаа ухамсарлаж хэн нэгэнд тус дэм болж, аз жаргал, инээд хөөр бэлэглэх зорилгоор сэтгэл зүрхээрээ нэгдэн сайн үйлсийн аянд нэг баг болон ажилласан байна.

Мэдээж тус ажлыг зохион байгуулсан нь учир шалтгаантай. Тухайлбал, Улаанбаатар хотын агаарын бохирдол эрс ихэссэн, хүйтний эрч чангарч ес эхэлж байгаа энэ үед нийслэл дэх хүүхдийн эмнэлгүүдийн ачаалал нэмэгдэж, зарим тохиолдолд өвчтөнүүд шаардлагатай тусламж үйлчилгээ авахад хүндрэл үүсдэг. Эрс тэс уур амьсгалтай манай орны хувьд өвлийн эхэн энэ цаг мөчид ханиад томууны дэгдэлт ихэсдэг. Иймээс эмнэлгийн ачаалал энгийн үеэс хоёр дахин нэмэгдэж, эм тариа, бусад эмнэлгийн тоног төхөөрөмжийн хүрэлцээ хангамж дутагддаг билээ. Үүнийг “Минт Интернэшнл” групп олж харан, судалгаа хийж энэ удаад сайн үйлсийн аянаа ийнхүү эмнэлгийн зүг хандуулсан байна. Түүнчлэн тэд энэхүү ажлыг зохион байгуулахдаа дүүргийнхээ Нэгдсэн эмнэлэгт хэвтэн эмчлүүлж буй 115 хүүхэд багачуудад шинэ жилийн бэлэг гардуулан өгсөн нь эцэг эхчүүд төдийгүй тэнд байсан хүмүүсийн сэтгэлийг хөдөлгөж байсан юм.

Өчигдөр Хан-Уул дүүргийн 14 дүгээр хороонд гэр шатаж, хүний амь эрсэдсэн хэрэг гарчээ. Галын дуудлагыг 1-ний өдрийн 14:14 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 65 дугаар ангийн найман алба хаагч, хоёр автомашинтайгаар галыг унтраажээ. Харамсалтай нь гал түймэрт иргэн Д /37 настай, эрэгтэй/ нас баржээ. Мөн өчигдөр Хан-Уул дүүргийн 12 дугаар хороонд амралтын газрын 2 давхар мансардтай байшин, Сонгинохайрхан дүүргийн 7 дугаар хороонд гэр, 9 дүгээр хороонд иргэн О-гийн 13-38 УНМ улсын дугаартай “Элентра” загварын автомашин, Чингэлтэй дүүргийн 10 дугаар хороонд байшин шатсан зэрэг хэрэг гарч, Онцгой байдлын хэлтсийн Гал түймэр унтраах, аврах ангийн алба хаагчид шуурхай ажиллан унтраажээ.

Япон улсын ерөнхий сайд Шинзо Абэ, Япон улсын бахархал болсон дэлхийд данстай шилдэг эрдэмтэд, агуу бүтээгчиддээ хүндэтгэл үзүүлэн хамтдаа дурсгалын зургаа татуулжээ. Эдгээр нь Шинжлэх ухааны суурь судалгаа, Технологи хөгжүүлэлт, Үйлдвэрлэлийн шилдэгүүд ажээ.