Month: January 2018

Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүүгийн илтгэл:

Эрхэм хүндэт ноёд, хатагтай та бүхний энэ өдрийн амар амгаланг айлтгая.

Нийслэл хот өнөөдөр Монгол Улсын хүн ам, эдийн засгийн дийлэнх хэсгийг нуруун дээрээ үүрч яваагийн хувьд дэлхийн бусад хотуудад тулгардаг бэрхшээлүүдтэй ч мөн бид тулгарч байна. Эдгээр бэрхшээл бүрийг улс орон бүр өөрийн онцлог, давуу тал, ололт амжилтаа ашиглан хамтдаа эв нэгдэлтэй байж хөдөлмөрлөсний дүнд асуудлаа шийдвэрлэсэн олон жишээг бид мэдэх билээ.

Өнөөдрийн хөрөнгө оруулалтын форум ч мөн адил хамтдаа шийдэл дэвшил хайсан, ажил хэрэгч, бүтээлч, шинийг эрэлхийлсэн байна гэдэгт эргэлзэхгүй байна. Улаанбаатар хотын агаар, орчны бохирдлыг дунд болон урт хугацаанд бууруулах үндсэн шийдэл нь гэр хорооллыг орон сууцжуулах, дэд бүтцээр хангах явдал юм.

”ДЭД БҮТЦИЙН ТӨВ”

Бид гэр хорооллын бүсийг төвийн, дундын, захын гэсэн 3 бүсэд хувааж хөгжүүлэхээр төлөвлөөд байна. Төвийн бүсийн гэр хороолол нь 2501.3 га буюу нийт гэр хорооллын газар нутгийн 23.8 хувийг эзэлж байгаа бөгөөд өндөр болон дунд давхрын орон сууц, бизнес үйлчилгээний төв байхаар төлөвлөгдсөн. Гэр хорооллын төвийн бүсийг төвийн шугам сүлжээнд холбохоор төлөвлөсөн.

Дундын бүсийн гэр хороолол нь 2720 га буюу нийт гэр хорооллын газар нутгийн 28.8 хувийг эзэлж байгаа бөгөөд хэсэгчилсэн болон бие даасан инженерийн шугам сүлжээнд холбоно.

Дундын бүсийн нэг онцлог бол хүн амын болон газар нутгийн нягтаршил өндөр, агаарын бохирдлын 60 хүртэл хувийг үүсгэж байгаа онцгой бүс юм.

Бид “Гэр хорооллын иргэдийн хүсэлт, санаачлаганд тулгуурлан амины орон сууцанд нь инженерийн болон нийгмийн дэд бүтцийг холбон ашиглалтын зөв дадлыг төлөвшүүлэх замаар гэр хорооллын нутаг дэвсгэрийг орчин цагийн хотын соёл, хэрэгцээ шаардлагад нийцсэн уламжлалт өнгө төрхийг хадгалсан, эрүүл аюулгүй, тохилог орчин болгон хөгжүүлэх”-ийг төслийн зорилгоо болгож байна.

Судалгаагаар гэр хорооллын иргэдийн 80 гаруй хувь нь амьдрах орчин нөхцлөө сайжруулж, тухайн газар нутагтаа үргэлжлүүлэн амьдрах хүсэлтэйгээ илэрхийлсэн байна.

Дэд бүтцийн төвийн төслийг та бүхэнд дэлгэрэнгүй танилцуулъя.

“Дэд бүтцийн төв” нь хүчин чадлын хувьд 200-300 өрхийг хангах боломжтой ба зоорийн давхартайгаа нийлээд 3 давхар байхаар төлөвлөөд байна. Зоорины давхарт усан хангамж, ариутгах татуурга, дулаан хангамж, цахилгаан, холбоо дохиолол хангамжийн тоног төхөөрөмжүүдээ байрлуулах ба 1 дүгээр давхарт дэд бүтцийн төвийн ашиглалтын захиргаа байрлаж иргэдийн инженерийн шугам сүлжээний тооцоо хураамж, засвар үйлчилгээг хариуцан ажиллана. 1-2 дугаар давхарт жижиг дунд бизнес эрхлэлтийг дэмжих чиглэлээр 15-20 ажлын байр бий болгон орчин цагийн хотын соёл, нийгмийн хэрэгцээ шаардлагад нийцсэн эрүүл аюулгүй, тохилог орчин бий болгон хөгжүүлэх юм.

Гэр хорооллын иргэдийн хэрэглээний нэг жилийн зардал 1,210,000 төгрөг зарцуулж байгаа нь сард 60-130,000 төгрөг зарцуулж байна гэсэн тооцоо гарч байгаа бол орон сууцны иргэдийн нэг жилийн хэрэглээний зардал 910,050 орчим төгрөг болж байгаа нь сард 85-95,000 төгрөг зарцуулж байна. Амьдрах нөхцөл хэдийгээр доор боловч орон сууцанд амьдардаг иргэдээс илүү зардалтай байгааг харуулж байна.

Энэ ялгааг арилгах, гэр хорооллын бүсэд нийгмийн болон инженерийн дэд бүтцийг хамгийн оновчтой хүртээх, өнөөдрийн гэр хорооллыг ирээдүйд амины орон сууцны хороолол болгох, эрүүл аюулгүй амьдрах орчныг бүрдүүлэх, ажлын байр нэмэгдүүлэх эхлэл нь “Дэд бүтцийн төв” байх болно.

“Дэд бүтцийн төв”-д холбогдсоноор иргэд ойролцоогоор 1 157 562 төгрөгийг инженерийн шугам сүлжээ ашигласныхаа нэг жилийн хэрэглээнд зарцуулахаар байгаа нь өнөөдөр төлж байгаагаасаа буурч төвлөрсөн инженерийн шугам сүлжээнд холбогдсон төвийн бүсийн үнэ тарифтай ойролцоо байгаа нь гэр хорооллын иргэдэд санхүүгийн дарамт үүсгэхгүйгээр инженерийн дэд бүтцийн хангамжтай болох таатай нөхцөлийг бүрдүүлж өгч байгаа юм.

“Дэд бүтцийн төв”-ийн дулаан хангамжийн эх үүсвэр нь төвийн шугам сүлжээнд холбох, хатуу түлшний зуух, цахилгаан зуух, хийн түлшний зуух, газрын гүний дулаан,

Цахилгаан хангамжийн эх үүсвэр нь төвийн шугам сүлжээнд холбох, бие даасан /сэргээгдэх эрчим хүч бүхий/,

Цэвэр усан хангамжийн эх үүсвэр нь төвийн шугам сүлжээнд холбох

Ариутгах татуургын хангамжийн эх үүсвэр нь төвийн шугамд холбогдох, бие даасан тус тус байж болох ба сонгож буй технологиосоо хамаарч дотроо дахин 3-аас 30 хүртэл дэд хувилбаруудтай байна.

Дээрх технологийн сонголтыг тухайн газар нутгийн байршил, газар зүйн онцлогоос хамаарч аль нэг хувилбарыг сонгож хэрэгжүүлнэ.

Мөн энэхүү төслийн нэг онцлог нь иргэд “Газар дахин зохион байгуулах” үйл ажиллагаанд хамрагдана. Энэ нь иргэд өөрийн өмчлөлийн газраас автозам, инженерийн болон нийгмийн дэд бүтэц, хөрөнгө оруулалтад шаардлагатай газрыг хувь нийлүүлэн гаргана.

Төслийн хүрээнд гарах зардлыг иргэд болон улс, нийслэл гэж хувааж үзвэл улс, нийслэл зөвхөн дэд бүтцийн төв, түүний гол болон салбар шугам сүлжээ, авто зам, тохижилтын ажлыг хариуцах бол иргэд амины орон сууцаа дулаалах, сантехникийн тоноглол суулгах, амины орон сууцаа шинэчлэн барих, хашаа болон түүн доторх тохижилтын ажлуудаа тус тус өөрсдөө хариуцах юм.

Уг төслийг бид 2018 онд 3 байршилд цаашлаад 2019 онд 47 байршилд, 2020 онд 50 байршилд нийт 100 байршилд барьж байгуулснаар 20 000-30 000 өрхийн амьдрах нөхцөл сайжирч агаарын бохирдол 20 хүртэл хувиар буурна.

Эхний 3 байршлын дэд бүтцийн төвийн барилга угсралтын ажлыг 4 дүгээр сараас эхлүүлж 11 сард дуусгаж, хүлээлгэн өгөхөөр ажиллаж байгаа бөгөөд бэлтгэл үе шатны ажлууд хийгдэж байна.

Мөн Монгол улсын Засгийн газрын 2017 оны 179 дүгээр тогтоолоор “Дэд бүтцийн төв”-ийн эхний 50 байршлыг баталж, БНХАУ-ын 2 тэрбум юаний буцалтгүй тусламжаар хэрэгжих төсөл арга хэмжээний жагсаалтад оруулсан.

Улаанбаатар хотын гэр хорооллын суурьшлын бүсийн хамгийн их агаар, хөрсний бохирдолтой хэсгийн нэг болох Чингэлтэй дүүргийн 7-р хорооны нутаг дэвсгэрийн 232 нэгж талбарыг хамарсан 12,12 га газарт барьж байгуулах “Дэд бүтцийн төв” төсөл нь хамгийн эхний загвар төслүүдийн нэг болох юм.

Мөн Сүхбаатар дүүргийн 18 дугаар хороонд 181 нэгж талбарыг хамарсан 15,8 га-д “Дэд бүтцийн төв”-ийг барьж байгуулахаар ажлын зураг төслийг хийж бэлэн болгоод байна.

200-300 айл өрхийг бие даасан болон хэсэгчилсэн инженерийн хангамжаар хангах ажлыг хийж гүйцэтгэхэд төр, хувийн хэвшил, иргэд нягт хамтран ажиллах шаардлагатай. Иргэд дараах оролцоотой байна.

Төр дараах оролцоотой байна.

Аж ахуй нэгж байгууллагууд дараах оролцоотой байна.

“Дэд бүтцийн төв” төслийг хэрэгжүүлснээр 20-30 мянган айл өрхийн инженерийн дэд бүтцийн асуудал шийдвэрлэгдэж, агаарын бохирдол 20 хүртэл хувиар бууруулах, 61.3 га газрын хөрсийг бохирдуулагч эх үүсвэрийг устгаж, 439,200 м3 хөрсийг нөхөн сэргээх, Улаанбаатар хотын гүний усны нөөц, эх үүсвэрүүдийг хамгаалж, бохирдох эрсдэлийг бууруулж, гэмт хэргийн гаралт 20-30 хувиар буурч, гэр хорооллын айл өрхүүдийн өмчлөлийн газрын үнэлгээ өсөж эдийн засгийн эргэлтэд орж гэр хорооллын иргэдийн бизнес эрхлэх хөрөнгийн эх үүсвэр болох, иргэдийн амьдрах орчин сайжрах зэрэг олон талт үр дүнд хүргэх юм.

Анхаарал тавьсан явдалд баярлалаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

УИХ-ын Байгаль орчин, хүнс, хөдөө аж ахуйн байнгын хорооны дарга Л.Элдэв-Очир өнөөдөр ХБНГУ-ын Бундестагийн гишүүн Валдемар Хэртийг хүлээн авч уулзав.

УИХ дахь АН-ын бүлэг өнөөдөр Төрийн ордонд ээлжит хуралдаанаа хийлээ.

Хуралдаанаар хэлэлцсэн асуудлын талаар УИХ дахь АН-ын бүлгийн дарга Д.Эрдэнэбат, УИХ-ын гишүүн Б.Пүрэвдорж нар мэдээлэл хийв. Тус бүлэг эхлээд Үндсэн хуульд нэмэлт өөрчлөлт оруулах асуудлыг хэлэлцээд уг хуулийн өөрчлөлтийг энэ удаагийн парламент хэлэлцэх эрхгүй гэж үзжээ. Учир нь нэг намын эрх ашгийг хангасан хэмээн үзэж ийм байр суурьт хүрсэн байна. Мөн Нийслэлийн эрхзүйн байдлын тухай хуулийн шинэчилсэн найруулгын төслийг авч хэлэлцээд боловсруулалтын хувьд учир дутагдалтай, яаралтай байдлаар хэлэлцэх нь зохимжгүй гэж үзжээ. Үүний дараад БОАЖЯ-ны Био аюулгүй байдлыг хангах үндэсний хорооны мэдээллийг сонссон байна. Манай улс био аюулгүй байдлыг хангах үндэсний хөтөлбөргүй байгааг гишүүд буруушаагаад БОАЖЯ, ЭМЯ, ХХААХҮЯ энэ асуудалд анхаарах хэрэгтэй хэмээн үзжээ.

Бүлгийн дарга Д.Эрдэнэбат ярихдаа: “Ардчилсан нам 60 тэрбум төгрөгийн хуйвалдаанаар гарч ирсэн парламент Үндсэн хуулийн өөрчлөлтийг хэлэлцэх эрхгүй гэж үзэж байгаа. Үндсэн хуулийн өөрчлөлтийг онцгойлон авч үзэх ёстой. Нийслэлийн эрхзүйн байдлын тухай хуулийг намрын чуулганаар багтаан батлахаар оруулж ирж байна. Сүүлийн үед төсвийн зардалтай холбоотой асуудал яригдах боллоо. Нөгөө төсвийн хяналт нь хаана байна. Үүнийг зайлшгүй хянах шаардлагатай боллоо. Тиймээс төсвийн хуулийг сайжруулах шаардлага үүсч байна. Манай бүлэг энэ асуудлаар УИХ-ын гишүүн Б.Пүрэвдоржоор ахлуулсан ажлын хэсэг байгуулсан.Засгийн газрын өнөөдөр 100 хоногийн тайлангаа тавилаа. Ард иргэдийн бухимдал их байгаа. Татварын асуудлаар тавьсан манай шаардлагын хариуг өнөөдрийг хүртэл өгөөгүй. Татвар тогтоосон нь алдаа болж хувирч байна. Засгийн газрын бодлогогүй, болчимгүй шийдвэрийн эцсийн дүнд ард иргэд хохирч байна.Ерөнхий сайд “Эдийн засаг сэхээнээс гарч, энгийн тасагт шилжлээ” гэж байсан. Тэгвэл ард түмэн хэзээ сэхээнээс гарч, энгийн тасагт шилжих вэ? гэдэг асуудлыг Ардчилсан нам үргэлж шаардах болно.Амлалтаас амлалт руу шилжсэн, ард түмэн амлалтад алгадуулсан 100 хоног болж өнгөрлөө. Эдийн засгийн өсөлт нь ард түмэнд бодитой туссан байх ёстой. Гэтэл Засгийн газар бодлогогүй алхам хийж байна” гэв.

Засгийн газрын 100 хоногтохиожбайгаатай холбогдууланМонгол Улсын Ерөнхий сайд У.Хүрэлсүх сайд нарынхаа хамт өнгөрсөн хугацаанд хийж хэрэгжүүлсэн ажил болон цаашдын бодлого, зорилтынхоо талаар мэдээлэл хийв.

“Засгийн газар Хүн амын орлогын албан татварын нэмэгдлийг засч залруулан хуучнаар нь мөрдөж, эрэгтэй 60, эмэгтэй 55 насандаа тэтгэвэрт гарах эрхтэй байхаар зохицуулалт хийнэ. Хэрвээ тухайн иргэн өөрөө хүсвэл эрэгтэй 65, эмэгтэй 60 нас хүртлээ ажиллах боломжтой. Хөдөлмөрийн хүнд нөхцөлтэй бол эрэгтэй 55, эмэгтэй 50 настайдаа тэтгэвэрт гарч болно. Тэтгэвэрт гарах насыг зургаан сараар нэмж байгааг гурван сар болгож бууруулна” гэж Ерөнхий сайд У.Хүрэлсүх мэдэгдлээ. Иргэдийн илүү төлсөн татварын мөнгийг буцааж олгох юм байна.

Эдгээртэй холбоотой хуулийн төслүүдийг лхагва гарагт УИХ-д өргөн барьж, чуулган завсарлахаас өмнө шийдвэрлүүлэхээр болжээ. Цаашид нийт хүүхдийн 60 хувьд өгч байгаа хүүхдийн мөнгийг 80 хувьд нь өгч, цалин, тэтгэвэр, тэтгэмжийг нэмэхээр төлөвлөөд байна.

Эдийн засгийн уналт зогсон, өсөлт төсөөлж байснаас илүү гарч, энэ онд 4,2 хувиар өсөх төлөвтэй, төсөв, санхүүгийн сахилга бат, хариуцлага сайжирсан зэрэг үндэслэлээр Ерөнхий сайд У.Хүрэлсүх ийм шийдвэр гаргасан. Үүнийг Олон улсын валютын сан ч дэмжжээ.

Өнгөрсөн хугацаанд эдийн засаг өсч, төсвийн орлого, Дотоодын нийт бүтээгдэхүүн, аж үйлдвэрлэлийн хэмжээ нэмэгдсэн, зээлжих зэрэглэл ахисан, гадаад худалдааны тэнцэл ашигтай гарсан, их хэмжээний өр дарсан, гадаад валютын нөөц нэмэгдсэн, малын тоо өссөн зэргийг Ерөнхий сайд дурдав.

Иргэдээ эрүүл хүнсээр хангаж улмаар хүнс экспортлогч орон болох, эрчим хүчний найдвартай хангамж, сүлжээ бий болгох, газрын тос боловсруулах үйлдвэртэй байх нь улс орны хөгжлийн тулгын гурван чулуу гэж Ерөнхий сайд У.Хүрэлсүх үзэж байна.

Энэ хүрээнд малаа эрүүлжүүлж, Атрын III аяныг үргэлжлүүлэн, дулааны цахилгаан станцуудаа өргөтгөж шинэчлэх, 10 аймагт дулааны цахилгаан станц барих, сэргээгдэх эрчим хүч ашиглах зэргээр шаардлагатай бүх арга хэмжээг авч байгааг хэлэв.

Мөн зам, тээвэр, дэд бүтэц, мэдээлэл, харилцаа холбооны салбараа хөгжүүлж, гадаад харилцаандаа илүү ач холбогдол өгөн, Дотоодын нийт бүтээгдэхүүний 70 хувийг үйлдвэрлэдэг хувийн хэвшил, бизнес эрхлэгчдээ дэмжих юм.

Уул уурхай шүтсэн, бүтээгдэхүүний үнэ дэлхийн зах зээлд унахад дагаж савладаг эдийн засгаа хос болгохын тулд хөдөө аж ахуй, газар тариалангийн салбараа хөгжүүлэх нь чухал байгааг Ерөнхий сайд хэлэв.

Ойрын хугацаанд баруун таван аймгийг хатуу хучилттай замаар бүрэн холбож, Тавантолгой-Гашуунсухайт болон бусад чиглэлийн төмөр замыг барьж, агаарын тээврийн салбарыг либералчилж өрсөлдөөн бий болгон, шинэ нисэх буудлыг ашиглалтад оруулахыг зорьж байна.

Засгийн газар бүрэн эрхийнхээ хугацаанд Төв цэвэрлэх байгууламж, хог боловсруулах үйлдвэр барих, сургууль, цэцэрлэгээр бүрэн хангах, ипотекийн зээлийг үргэлжлүүлэх зэрэг томоохон төсөл, хөтөлбөрийг бүрэн хэрэгжүүлэх юм.

Агаарын бохирдлыг бууруулах үүднээс 2019 оны дөрөвдүгээр сараас Улаанбаатар хотод түүхий нүүрс оруулахыг хориглоно гэдгээ Ерөнхий сайд У.Хүрэлсүх мэдэгдлээ. Нүүрс боловсруулах үйлдвэр барьж, цахилгаан халаагуур, шингэн хийг хэрэглээнд нэвтрүүлэн гэр хорооллыг орон сууцжуулна, харин зуух тараахгүй гэлээ. Түүхий нүүрсний хэрэглээг хориглосноор агаарын бохирдол 50 хувь буурна гэсэн тооцоо, судалгаа хийсэн байна.

Засгийн газар хэрэгцээт хүнсээ дотоодоос хангах, иргэдээ гэр, орон сууцтай, боловсрол, мэргэжилтэй, ажилтай орлоготой болгож, эрүүл мэндийг нь хамгаалах зорилтын хүрээнд гурван тулгуурт хөгжлийн бодлогоо боловсруулаад байна.

У.Хүрэлсүхийн тэргүүлсэн Засгийн газар өнгөрсөн 100 хоногт:

зэрэг томоохон ажлыг хийж хэрэгжүүлжээ хэмээн Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

“Улаанбаатар хөрөнгө оруулалт-2018” бизнес уулзалтад Нийслэлийн засаг дарга бөгөөд Улаанбаатар хотын захирагч С.Батболдын тавьсан илтгэл;

Төр, засгийн түшээд, хатагтай, ноёд оо,

Хүндэт зочид оо,

Бидний урилгыг хүлээн авч, хүрэлцэн ирсэн Та бүхнийхээ энэ өдрийн амар амгаланг айлтгаж, чин сэтгэлийн талархлаа сайн сайхны ерөөлтэй хамт өргөн барья.

Нийслэлийн 2017 оны төсвийн орлого 19.3 тэрбум төгрөгөөр буюу 102.7 хувиар давж биеллээ

Эрхэм нөхөд өө,

Бид 2017 оны хоёрдугаар сард яг ийм бизнес уулзалтыг зохион байгуулж, Улаанбаатар хотын хөгжлийн бодлого, 2017 онд хэрэгжүүлэх хөрөнгө оруулалт, төсөл арга хэмжээ, хотын хөгжлийн бодлоготой гадаад, дотоодын хөрөнгө оруулалтыг уялдуулж, үр өгөөжийг дээшлүүлэх, төр-хувийн хэвшлийн түншлэлийг хөгжүүлж, харилцан ашигтай хамтын ажиллагааг өрнүүлэх зорилтоо танилцуулж байсан билээ.

Түүнээс хойш нэг жилийн дараа та нартайгаа дахин уулзаж байна. Дэвшүүлсэн зорилт, хэрэгжүүлсэн ажил маань үр дүнгээ өгсөөн. Бид эдийн засаг, хөрөнгө оруулалтын үйл ажиллагаагаа илүү нээлттэй, ил тод болгох, хөрөнгө оруулагчдад олон шат дамжлагагүй, хүнд сурталгүй, чирэгдэлгүй үйлчилж, ажил хийх боломж нөхцөлөөр хангах, тендер концессийн ажлыг хугацааг зарлахаас эхлээд шалгаруулах хүртэл цахимаар явуулах, чанаргүй зүйл хийж, хайран хөрөнгийг үргүй зарцуулж улсаа, хотоо, иргэдээ хуурахгүй байх, харилцан хариуцлагыг эрхэмлэхийг хичээн чармайсан.

Аливаа харилцаа илэн далангүй, нээлттэй байж гэмээнэ итгэл буй болдог. Итгэл оршин буй тэр газарт л үйлс ажил бүтэмжтэй өрнөдөг. Энгийн энэ үнэнийг мэдэрч, ойлгож авсан маань Та бидний нэгэн жилийн хамтын үйл ажиллагааны үнэ цэнэ юм.

Нийслэлийн 2017 оны төсвийн орлого 19.3 тэрбум төгрөгөөр буюу 102.7 хувиар давж биеллээ. Үүнээс хотын орлого 21.5 тэрбум төгрөгөөр буюу 104.1 хувиар давжээ. Товчхондоо 2017 оны нийслэлийн эдийн засаг, нийгмийг хөгжүүлэх үндсэн чиглэл, зорилт амжилттай биелэгдлээ гэдгийг Та бүхэндээ тайлагнаж хэлэхэд таатай байна. Энэ бол бидний хамтын хүчин чармайлт, мөнөөхөн ойлголцож, итгэлцэж ажиллаж чадсаны үр дүн юм.

Нийслэлд 2017 онд улсын төсвийн хөрөнгөөр 133,9 тэрбум төгрөг,нийслэлийн төсвийн хөрөнгөөр 193,1 тэрбум төгрөг, орон нутгийн хөгжлийн сангийн хөрөнгөөр 11.3тэрбум, нийтдээ 338.3 тэрбум төгрөгийн ажил хийгджээ.

Улсын эдийн засаг амаргүй, хөрөнгө оруулалтын хэмжээ санасан хэмжээнд хүрч чадахгүй байгаа ч 2017 онд бидний хийсэн ажил, хүрсэн үр дүн чамлахааргүй түвшинд хүрснийг тэмдэглэж хэлье.

Эрхэм нөхөд өө,

Одоо та бүхэнд 2018 онд улс, нийслэлийн төсөв, гадаадын зээл тусламжаар нийслэлд хийхээр төлөвлөгдсөн хөрөнгө оруулалт, төсөл хөтөлбөрийн талаар товч танилцуулъя.

Нийслэлийн төсвийн хөрөнгөөр 2018 онд хэрэгжүүлэх хөрөнгө оруулалт, төсөл, арга хэмжээ, барилга байгууламжийг иргэд олон түмнийнхээ санаа бодолд тулгуурлаж шийдсэн. Гадаад дотоодын зээл, тусламж, концессээр хэрэгжүүлэх хөтөлбөр, төслийн хувьд хотын хүлээх үүргийг заавал биелүүлэх, урьд оноос шилжсэн төсөл арга хэмжээг бүрэн дуусгах, шинээр баригдах барилга байгууламжийн газар чөлөөлөх, техникийн нөхцөлийг сайтар хангахад онцгой анхаарсан болно.

Нийгмийн салбарын бүтээн байгуулалтад улс, нийслэлийн төсвийн хөрөнгө оруулалт түлхүү хувийг эзэлнэ

2018 онд нийслэлийн төсвийн хөрөнгөөр 116.2 тэрбум, замын сангийн хөрөнгөөр 36.8, орон нутгийн хөгжлийн сангийн хөрөнгөөр 16.3 тэрбум, улсын төсвийн хөрөнгө оруулалтаар 193.8 тэрбум, гадаадын зээл тусламжаар 51 тэрбум буюу нийтдээ 414.1 тэрбум төгрөгийн ажил хийгдэнэ. Дээрх ажлаас нийгмийн салбарын бүтээн байгуулалтанд улс, нийслэлийн төсвийн хөрөнгө оруулалт түлхүү хувийг эзэлж байна.

Тухайлбал, энэ онд 52 цэцэрлэг, 34 сургуулийн барилгыг шинээр барьж, өргөтгөнө. Ингэснээр ЕБС-ийг 2 ээлжид шилжүүлж, цэцэрлэгт хамрагдалтыг 85 хувьд хүргэнэ.

Эрүүл мэндийн салбарт 8.6 тэрбум төгрөгийн хөрөнгө оруулалт хийж Чингэлтэй дүүргийн түргэн тусламжийн төв, Багахангайн 40 ортой эмнэлэг, Туул тосгоны эмнэлгийг барьж, Шүд эрүү нүүрний төвийг зориулалтын байртай болгоно. Мөн Үндэсний оношлогоо эмчилгээний төв, АШУҮИС-ийн дэргэдэх эмчилгээний төвийн барилгыг барьж дуусгана.

Гэр хорооллын дахин төлөвлөлтийн дэд бүтэц болон газар чөлөөлөх, нөхөн олговор олгох арга хэмжээнд тус бүр 30 тэрбум, шинээр барих барилгын инженерийн шугам сүлжээний зураг төсөвт 0.5 тэрбум, нийтдээ хот байгуулалтад 74.8 тэрбум төгрөг зарцуулахаар байна.

БНХАУ-ын Засгийн газрын буцалтгүй тусламжийн 2.0 тэрбум юаниар гэр хорооллыг орон сууцжуулах инженерийн болон дэд бүтцийн ажлуудыг хийж, 1000 айлын орон сууц барих ажлыг эхлүүлнэ. Нийслэлийн төсвийн хөрөнгөөр Чингэлтэй дүүргийн 7 дугаар хороонд 200 ажлын дэд төвийг /сервис центр/ гэрэлтүүлэг камержуулалт, цэвэр, бохир усаар хангах системээс бүрдсэн орчин үеийн шийдэлтэй “хаус” хороолол болгох ажлыг эхлүүлнэ.

Автозамын салбарт 36.9 тэрбум төгрөгийн хөрөнгө оруулалт хийгдэхээс 18.5 тэрбум төгрөгийг 13.1 км авто зам шинээр барихад, 12.5 тэрбум төгрөгийг засвар арчлалтад зарцуулна. Хот доторх замын засварт 3.8 тэрбум, орон сууц, гэр хорооллын доторхи зам засварт тус бүр 2.0 тэрбум төгрөг зарцуулна. Мөн энэ онд Зүүн дөрвөн замын гүүрэн гарцын барилгын ажлыг эхлүүлнэ.

Гэр хороололд жишиг гудамж бий болгох, 6 эмнэлгийн гадна тохижилт, Энэбишийн өргөн чөлөөний тохижилт, төвлөрсөн хогийн цэгт хашаа барих, хогийн цэгт ажиллах тусгай зориулалтын машин техник худалдан авах зэрэгт нийтдээ 8.4 тэрбум төгрөг төлөвлөөд байна.

Орон нутгийн хөгжлийн сангийн хөрөнгөөр 132 төсөл арга хэмжээнд 11.4 тэрбум төгрөг зарцуулна. Үүнээс хот тохижилтодд 3.2 тэрбум, гэрэлтүүлэг, камержуулалтад 724 сая, автозамын засварт 961 сая, ус түгээх цэгт 330 сая, орон сууцны дээвэр, цахилгаан шат, гадна дулаалгад 1.9 тэрбум төгрөг хуваарилагдсан.

Түүнчлэн улсын төсвийн хөрөнгөөөр 14.7 тэрбум төгрөгийн хөрөнгө оруулалтаар 68 халаалтын зуухыг буулгаж, хэрэглэгчдийг төвлөрсөн дулаанд холбоход 11.9 тэрбум, дулааны төв шугамын шинэчлэлд 2.0 тэрбум, Багануурын дулааны станцын шинэчлэл, өргөтгөлд 750 сая төгрөгийг зарцуулах юм.

Агаарын бохирдлыг бууруулахад нийслэлийн төсвөөс 3.8 тэрбум төгрөг төсөвлөсөн. Улсын төсвийн хөрөнгө оруулалтаар агаарын чанарыг сайжруулах бүсийн зорилтот айл өрхүүдэд цахилгаан халаагуур, сайжруулсан зуух, боловсруулсан түлш олгоход 1.4 тэрбум, гэр хорооллын 110 мянган айл өрхийг цахилгаанаар халаах дэд станц, цахилгаан дамжуулах агаарын шугамыг шинэчлэх, хүчин чадлыг нэмэгдүүлэхэд 2.9 тэрбум, 80 мянган тонн хагас коксжсон түлшийг хөнгөлөлттэй үнээр зарахад үнийн зөрүүнд 3.1 тэрбум төгрөг олгохоор болсон.

Эрхэм нөхөд өө,

Би та бүгдэд 2018 онд хийхээр төлөвлөгдсөн хөрөнгө оруулалтын төсөл арга хэмжээ, барилга байгууламжийн талаар танилцууллаа. Өөрөөр хэлбэл хот хөрөнгө оруулалтын төсөл, арга хэмжээний “үүцээ” задалж байна. Эдгээр бүтээн байгуулалтын ажлыг хэрхэн эхлүүлэх, хөрөнгө оруулалтын чиглэлээр яаж хамтран ажиллах бодолтой байгаа бол гэж Та бүгд бодож байгаа байх аа. Энэ талаар одоо ярья.

Нэгдүгээрт: УИХ “Хөрөнгө оруулалтын тухай” хуульд нэмэлт өөрчлөлт оруулж, хөрөнгө оруулалтын эрх зүйн орчныг илүү нээлттэй болголоо. Засгийн газрын дэргэд хөрөнгө оруулагчийн хууль ёсны эрх ашиг, сонирхлыг хамгаалах чиглэлээр дэмжлэг, үйлчилгээ үзүүлэх асуудлаар дүгнэлт гаргах Орон тооны бус зөвлөлийг байгуулан ажиллаж байна. Одоо бид хөрөнгө оруулагч та бүгд рүү чиглэсэн сурталчилгааг маш сайн хийх хэрэгтэй гэдгийг ойлгож байна. Тиймээс мэдээлэл зүйн дэд бүтцийг сайжруулах, хөрөнгө оруулагчидтайгаа харилцан мэдээлэл солилцох арга хэлбэрээ нэмэгдүүлэх талаар нэлээд зүйл хийхээр төлөвлөж байна

Хоёрдугаарт: Өнгөрсөн онд нийслэлийн Засаг даргын дэргэд Хөрөнгө оруулалтыг дэмжих зөвлөл байгуулагдсан. Энэ зөвлөл хөрөнгө оруулагчдын өмнө ямар хүндрэл бэрхшээлүүд байна, түүнийг яаж шийдвэрлэх вэ, хөрөнгө оруулалтыг хэрхэн дэмжиж өргөтгөх вэ зэрэг асуудлаар сар бүр хуралдаж шийдвэр гаргаж ирсэн. Энэ зөвлөлийн үйл ажиллагааг цаашид эрчимжүүлнэ.

Гуравдугаарт: Хотын хөрөнгө оруулалтын чухал нөхцөлийн нэг нь газар. Тиймээс иргэн, хуулийн этгээдийн газар эзэмших эрхийн хугацааг сунгаж 15 жил болгосон нийслэлийн Засаг даргын шийдвэр гарч,хөрөнгө оруулагчдад өмнөхөөс илүү таатай боломж бүрдүүлнэ гэж тооцож байна.

Хот газраа ашиглахгүй байгаа буюу хууль зөрчиж авсан газруудыг буцаан авч Газрын сан байгуулна. Нээлттэй дуудлага худалдаагаар газраа хөрөнгө оруулагч нарт худалдана. Дэд бүтэцтэй төвийн газар илүү үнэтэй байх болно. Бид газраараа мөнгө босгож, хотынхоо дэд бүтцийг сайжруулдаг тогтолцоог энэ онд бий болгоно.

Дөрөвдүгээрт: Орон сууцжуулах, агаарын бохирдлыг бууруулах “Бодлогын хувьсгал” өрнүүлье. Үүний тулд бүгдээрээ орчноо өөрчилье. Бага орлоготой иргэдэд зориулсан орон сууц барья. Бас зах зээлийн эрэлт нийлүүлэлтэд нийцсэн орон сууц барья. Шинэ сонголтыг иргэд, залуусын өмнө нээж өгье. Нөөц бололцоо, боломжоо ашиглаад, хуримтлал бий болгох зорилготой ийм бодлогыг бид дэвшүүлж байна. Та бүхэн санал бодлоо нэмэрлээрэй.

Тавдугаарт: Хотын өмнөх удирдлагын үед концессийн гэрээгээр зураг төсөв боловсруулах, барих-шилжүүлэх хэлбэрийн олон ажил хийсэн. Гэхдээ тэдгээр нь хотод зайлшгүй шаардлагатай байсан уу, төсөв хөрөнгө нь хэр үндэслэлтэй байсан бэ гэвэл эргэлзээтэй зүйл олон бий. Би өмнөх үеэ муулах дургүй. Бурууг бусад руу түлхэхийг тэвчдэггүй. Гэхдээ бодит үнэн энэ. Нөгөө талаар тэдний хийсэн ажил, үлдээсэн өв бидэнд хамаагүй гэж үзээгүй. Бид 2017 онд ашиглалтад хүлээн авсан концессын ажлын төлбөрийг төлсөн. Энэ онд ч төлнө. Хотын дарга хэн байх нь, хэний үед юу хийсэн байх нь хамаагүй, хөрөнгө оруулагчдын өмнө хүлээсэн үүргээ ХОТ бүрэн биелүүлэх үүрэгтэй. Бид үүргээ биелүүлсэн, цаашид ч биелүүлэх хариуцлагаа үүрч ажиллах болно.

Зургадугаарт: Хотын худалдааны танхимтай хамтарч бизнесийг хөнгөвчлөх, хотын арбитрыг дэмжих, хотын хөгжлийг түргэтгэх, иргэдийн оролцоог нэмэгдүүлэх чиглэлээр идэвхтэй ажиллах ёстой гэж бодож байгаа.

Долдугаарт: Худалдан авах ажиллагааг цаасгүй зохион байгуулна. Өөрөөр хэлбэр тендерийн урилга байршуулахаас эхлээд гүйцэтгэгчийг сонгон шалгаруулах хүртэл бүх үйл явц цахим хэлбэрээр явагдана. Хэнд ч эргэлзээ үлдэх ёсгүй. Ил тод, нээлттэй байдал манай ажлын үндсэн зарчим байх болно.

Худалдан авах ажиллагааг мэргэжлийн байгууллагаас гадна холбогдох газар, дүүргийн Засаг дарга нар зохион байгуулж явуулна. Зураг төсөв боловсруулах, батлуулах, гүйцэтгэгчийг сонгон шалгаруулах ажлыг III сард багтаан явуулж, IV сарын 01 гэхэд барилга угсралтын ажлыг эхлүүлэх арга хэмжээ авна.

Улс орны, түүний дотор нийслэл хотын эдийн засаг, төсөв санхүүг хямралаас гаргахад том төслүүдээ эхлүүлж, гадаад, дотоодын хөрөнгө оруулалтын үр өгөөжийг дээшлүүлэх нь мэдээж чухал. Гэхдээ хамгийн чухал нь монголчууд бид өөрсдөө бүтээгч, үйлдвэрлэгч байх ёстой.

Ийм учраас бид 2018 оныг “ИРГЭДИЙН ОРОЛЦООТОЙГООР АМЬДРАХ ОРЧНОО САЙЖРУУЛАХ ЖИЛ” болгож байгаа. Амьдрах орчноо сайжруулахыг, аз жаргалтай, сэтгэл хангалуун амьдрахыг хүн бүхэн хүсдэг. Тэр хүслийг нэгдмэл зорилго чиглэл, зохион байгуулалтаар дэмжиж, хөрөнгө оруулалтаар тэтгэж ажиллах нь төр, засгийн бидний үүрэг. Төрийн бодлогоор хийж хэрэгжүүлэх бүтээн байгуулалтын ажлыг дагалдан үүсдэг бизнесийн боломж бололцоо бүхнийг хөрөнгө оруулагчдадаа нээж өгье. Хамтын ажиллагаандаа хариуцлага, чанарыг эрхэмлэж, хүлээсэн үүрэгтээ эзэн нь байх шударга зарчмыг мөрдөж ажиллая. Иргэдийн оролцоо бүрэн хангагдсан газарт хөндлөнгийн хяналтын эрүүл саруул орчин бүрддэг. Тийм жишиг Улаанбаатарт тогтох ёстой. Ийм эрүүл хандлага зөв хэвшвэл та бид улсын нийслэлээ бусдын жишигт хүргэх зорилтоо хангаж чадна. Иргэнийхээ, бизнес эрхлэгчдийнхээ, хөрөнгө оруулагчдынхаа оролцоог хамгийн сайн хангаж чадвал хамгийн сайн үр дүн гарах болно гэдэгт миний хувьд эргэлзэхгүй байна.

Тиймээс бид та бүхний оролцоог хүсэж байна.

Иргэн бүхэн нь гар бие, сэтгэл итгэлээрээ оролцож хөгжүүлсэн, шинэ Улаанбаатарыг хамтдаа бүтээцгээе.

Монгол Улсын гал голомтыг хөгжил дэвшлийн мөнхийн галаар тэтгэх эрхэм хийгээд хүндэтгэлтэй үйл хэргийн төлөө хамтдаа зүтгэцгээе.

Та бүхэндээ сайн сайхныг ерөөе.

Анхаарлаа хандуулсанд баярлалаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.