Month: December 2017

Авлигатай тэмцэх газраас 2017 оны 12 дугаар сарын 1-15-ны өдрүүдэд гэмт хэргийн шинжтэй 41 гомдол, мэдээлэл хүлээн авч, нийт 65 гомдол, мэдээллийг шалгав. Үүнээс 19 гомдол, мэдээлэлд хэрэг бүртгэлтийн хэрэг нээж, 23 гомдол, мэдээлэлд хэрэг бүртгэлтийн хэрэг нээхээс татгалзан, 2 гомдол, мэдээллийг харьяаллын дагуу шилжүүлэх саналтайгаар прокурорт шилжүүлсэн байна. Ажиллагаанд одоогоор 21 гомдол, мэдээлэл шалгагдаж байна.

Өнгөрсөн 14 хоногийн хугацаанд эрүүгийн 7 хэрэг хүлээн авсан бөгөөд 19 хэрэгт хэрэг бүртгэлтийн хэрэг нээж, 194 хэрэгт мөрдөн байцаалтын ажиллагаа явуулснаас 11 хэргийг шүүхэд шилжүүлэх, 9 эрүүгийн хэргийг хаах, 4 эрүүгийн хэргийг харьяаллын дагуу шилжүүлэх саналтай прокурорт шилжүүллээ. Одоогоор 170 хэрэгт мөрдөн байцаалтын ажиллагаа явуулж байна.

“Ахмад уурхайчдын холбоо” ТББ-аас Ховд аймгийн Цэцэг, Дарви сумын нутаг дэвсгэрт байрлах Хөшөөтийн уурхайг стратегийн ордод оруулахыг Ерөнхийлөгч Х.Баттулгаас хүслээ.

Энэ талаар өнөөдөр “Ахмад уурхайчдын холбоо” ТББ-ын удирдлагууд мэдээлэл хийв. Тус ордыг стратегийн ордод оруулах асуудлыг судлахаар 2012 онд Ерөнхийлөгчийн тамгийн газрын дарга П.Цагаан, УИХ-ын гишүүн О.Эрдэнэ нарын ажлын хэсэг газар дээр нь ажиллажээ. Тухайн ордод олборлолт явуулж буй “Мо Эн Ко” компани 311 км хатуу хучилттай автозам шинээр тавьсан байсан тул хариуцлагатай уул уурхайг хөгжүүлэх үүднээс стратегийн ордын жагсаалтад оруулахаас татгалзсан гэдгийг тус “Ахмад уурхайчдын холбоо”-ны Удирдах зөвлөлийн дарга Д.Цэдэнбал дурьдлаа.

Тус уурхайн нүүрсний нөөцийг эцсийн байдлаар тогтоогоогүй бөгөөд 1980 онд хийсэн судалгаагаар 23 сая тонн нөөцтэй хэмээн үзэж байсан юм. Харин “Мо Эн Ко” компани үйл ажиллагаа явуулж эхлэхдээ уурхайн нөөцийг 30 сая тонн хэмээн шинэчлэн тогтоожээ. “Мо Эн Ко” компани олборлолт явуулахдаа орон нутгийн ИТХ-тай гэрээ байгуулж, “Хөшөөт сан”-д тодорхой хэмжээний мөнгө төвлөрүүлж байхаар тохирчээ. Тохиролцооны дагуу тус компани “Хөшөөт сан”-д жилд дунжаар 1.4 тэрбум төгрөг төвлөрүүлэх ёстой ч өнгөрсөн 10 жилд ердөө 500 сая төгрөг төвлөрүүлснийг “Ахмад уурхайчдын холбоо” ТББ-ийн тэргүүн Н.Бүргэд шүүмжлэв.

Тэрбээр, ““Мо Эн Ко” компани гэрээгээр хүлээсэн үүргээ биелүүлэхгүй байгаагаас гадна байгаль орчинд ихээхэн хохирол учруулж байгаа юм. Тиймээс Хөшөөтийн уурхайг стратегийн ордод оруулахыг Ерөнхийлөгчөөс хүсч байна” гэлээ.

Засгийн газрын 2006 оны 115-р тогтоолоор батлагдсан “Дүрслэх урлагийн шилдэг бүтээлийг улсын санд худалдан авах журам”-ын дагуу 2017 оны дүрслэх урлагийн шилдэг бүтээлийг шалгаруулсан.

Жил бүр Нийслэлийн хуульчдын дунд тодорхой сэдвийн хүрээнд зохион байгуулдаг хуульчдын зөвлөгөөнийг энэ удаад “Иргэдийн эрх зүйн боловсролыг дээшлүүлэхэд төрийн байгууллагын үүрэг оролцоо, хамтын ажиллагаа” сэдвийн дор зохион байгууллаа.

Иргэдийн эрх зүйн мэдлэг дутмаг, мэдээлэл авах нөхцөл боломж хангалтгүйгээс гэмт хэрэг, зөрчилд холбогдох, нэр төр, эрүүл мэнд, эд хөрөнгөөрөө хохирч, зөрчигдсөн эрхээ сэргээлгэх явдал хангалтгүй байгааг сүүлийн жилүүдэд хийсэн судалгааны дүнгээс харагддаг. Иймээс иргэдийнхээ эрх зүйн боловсролыг дээшлүүлэхэд төр засгийн нэгдсэн бодлого зайлшгүй шаардлагатай байгаа юм.

Тийм ч учраас Монгол Улсын Засгийн газрын 2016-2020 оны үйл ажиллагааны хөтөлбөрт “Бүх нийтийн эрх зүйн боловсролыг дээшлүүлэх үндэсний хөтөлбөр”-ийг батлан хэрэгжүүлэхээр Засгийн газрын хуралдаанаар хэлэлцэж байгаа бол Нийслэлийн Засаг даргын 2016-2020 оны үйл ажиллагааны хөтөлбөрт тусгагдсан “Нийслэлийн иргэдийн эрх зүйн боловсролыг дээшлүүлэх дэд” хөтөлбөрийн төслийг эцэслэн боловсруулж энэ ондоо багтаан батлуулахаар НИТХ-д өргөн бариад байгаа билээ.

Нийслэлийн Засаг дарга 2017 оныг “Иргэдийн оролцоотой эрх зүйн шинэтгэлийн жил” болгон зарласан ажлынхаа хүрээнд иргэд олон нийтэд хандсан олон арван ажлыг амжилттай хэрэгжүүлээд байна.

Тухайлбал Нийслэлийн өмнө тулгамдаж буй асуудлыг шийдвэрлэх зорилгоор Нийслэлийн эрх зүйн байдлын тухай хууль түүнийг дагалдан гарах 19 хуулийн төслийг боловсруулж, Засгийн газраар уламжлуулан УИХ-д өргөн барисан. Мөн сар бүрийн 20-ны өдрүүдэд Нийслэлийн давж заалдах шатны шүүх, Монголын Өмгөөлөгчдийн холбоо зэрэг холбогдох хуулийн байгууллагуудтай хамтран иргэддээ хууль, эрх зүйн үнэ төлбөргүй туслалцаа үзүүлэх өдөрлөгийг зохион байгуулж, давхардсан тоогоор 11000 гаруй иргэнд хүрч ажиллаа.

Цаашид Нийслэлийн зүгээс иргэдийнхээ эрх зүйн мэдлэг боловсролыг дээшлүүлэх, төр засгаас гаргаж буй аливаа шийдвэрт иргэдийн оролцоог нэмэгдүүлэх, иргэдэд төрийн байгуулагын аль үйлчилгээ, чиг үүрэг хүндрэл учруулж байгаа, түүнийг хэрхэн шийдвэрлэх талаар энэ удаагийн зөвлөгөөнд оролцогчид санал бодлоо илэрхийлэн оролцлоо гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн Эрүүл мэндийн газрын санаачлагаар нийслэлийн Засаг дарга бөгөөд Улаанбаатар хотын Захирагч С.Батболд өнөөдөр дүүргүүдийн эрүүл мэндийн төвийн дарга, дүүргийн Засаг даргын Эүүл мэнд, нийгмийн асуудал хариуцсан орлогч нартай ажил хэргийн уулзалт зохион байгууллаа. Уулзалтанд нийслэлийн Засаг даргын орлогч Ш.Анхмаа, нийслэлийн Эрүүл мэндийн газрын дарга Л.Төмөрбаатар болон холбогдох албаны хүмүүс оролцов.

Өнөөдрийн уулзалтаар томуу, томуу төст өвчнөөс урьдчилан сэргийлэхээр хийсэн болон цаашид хэрэгжүүлэх арга хэмжээний талаар хэлэлцэж, санал солилцсон юм. Түүнчлэн эрүүл мэндийн салбарт хийгдэж байгаа томоохон ажлууд, ирэх жилүүдэд хийгдэхээр төлөвлөсөн ажлуудын талаар ярилцлаа.

Өнгөрсөн зургаадугаар сард нийслэлийн Засаг дарга захирамж гаргасны дагуу томуу, томуу төст өвчний дэгдэлтийн үед авах арга хэмжээний төлөвлөгөөг баталсан. Тус төлөвлөгөөний дагуу бүх дүүргүүд бэлтгэлээ хангасан байна. Тухайлбал нийслэлээс тодорхой хэмжээний хөрөнгө гаргаж, ор бэлтгэх, агааржуулах систем, засвар үйлчилгээ гэх мэт олон зүйлс багтаж байгаа юм.

“Мэргэжлийн хүмүүсийн хэлж байгаагаар томуу, томуу төст өвчний дэгдэлтийн шинж тэмдэг илэрч эхэлсэн байна. Гэхдээ өргөн цар хүрээтэй дэгдсэн асуудал байхгүй, харьцангуй гайгүй байна. Одоогоор эмнэлгийн ачаалал ихэсэх хандлагатай байна. Цаашдаа өрхийн эрүүл мэндийн төвүүдийн үйл ажиллагааг сайжруулна. Түүгээр дамжуулж эцэг, эхчүүдэд зөвлөгөө өгөх, утсаар зөвлөх зэрэг ажлыг нэлээд эрчимжүүлж байгаа. Бүх дүүргийн эрүүл мэндийн төвүүд уртасгасан цагаар ажиллаж, үзлэг хийж, зөвлөгөө өгч байна. Бид өмнөх жилүүдээс харьцангуй сайн бэлтгэлтэй байгаа” хэмээн нийслэлийн Засаг дарга бөгөөд Улаанбаатар хотын Захирагч С.Батболд ярилаа.

Мөн “Нийслэлийн эрүүл мэндийн салбарын ирээдүй нэлээд эерэгээр төсөөлөгдөж байгаа. Учир нь Улаанбаатар хотод үндэсний оношлогоонгы төв 2019 онд ашиглалтанд орно. Мөн Анагаах ухааны их сургуулийн сургалтын эмнэлэг ажшиглалтанд орно. Энэ хоёр бол үндэсний хэмжээний оношлогооны чадавхийг одоогийн байгаагаас өөр түвшинд хүргэнэ. Мөн Сонгинохайрхан дүүрэгт дэлхийн жишигт нийцсэн 250 мянган хүн амд үйлчлэх чадалтай нэгдсэн эмнэлэг ашиглалтанд орно” гэдгийг онцолж байлаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Япон Улсын Элчин сайдын яам энэ сарын 29-нөөс ирэх сарын 03-нд шинэ жилийн баярыг тохиолдуулан амрахаар болжээ. Үүнтэй холбогдуулан тус улсад зорчих визийн мэдүүлгийг энэ сарын 25-ныг хүртэл хүлээн авч, 26-28-нд хариуг өгөхийг тус улсад зорчихоор төлөвлөж буй иргэдэд Элчин сайдын яамнаас анхааруулав. Энэхүү шийдвэртэй холбогдуулан энэ сарын 25, ирэх сарын 04-нд Элчин сайдын яамны Консулын хэлтсийн ачаалал нэмэгдэх магадлалтай тул иргэдийг цагаа төлөвлөхийг санууллаа. Энэ баасан гаригийг хүртэл ердийн хувиараар ажиллах бөгөөд ирэх даваа гаригт 2017 оны визний мэдүүлэг хүлээн авах сүүлийн өдөр аж.