Month: November 2017

Монгол улсын Засаг захиргаа нутаг дэвсгэрийн нэгж, түүний удирдлагын тухай хуулийн 29 дүгээр зүйл, Замын хөдөлгөөний аюулгүй байдлын тухай хуулийн 9 дүгээр зүйлийн 9.4.5 дахь заалтыг үндэслэн Орхон аймгийн Засаг даргын 2017 оны 11 дүгээр сарын 01-ний өдрийн А/636 тоот захирамж гарчээ.

Тус захирамжаар 2017 оны 11 дүгээр сарын 01-ний өдрөөс эхлэн 2018 оны 04 дүгээр сарын 01-ний өдрийг хүртэлх хугацаанд хоёр болон гурван дугуйт тээврийн хэрэгслээр хөдөө хээр, орон нутаг болон, улсын чанартай авто замд хөдөлгөөн хийхийг хориглосон байна.

Учир нь манай улсад мотоцикль унаж яваад осолд орох, улмаар амь насаа алдах явдал орон нутгийн түвшинд өндөр байгаа юм. Мотоцикль унаж яваад зам тээврийн осол гаргасан зөрчил улсын хэмжээгээр жилдээ 300-400-ийн хооронд хэлбэлздэг байна. Харин мотоциклын ослын улмаас амь насаа алдагсдын тоо жилдээ 100-аас хол давдаг юм. Хөдөө орон нутгийн эмнэлгийн байгууллагад хандаж байгаа хүмүүсийн багагүй хувийг мотоциклоос унаж бэртсэн хүмүүс эзэлдэг. Иймээс өвлийн халтиргаа гулгаатай үед мотоциклоор зорчихыг ийнхүү хориглож байгаа аж.

Хүүхэд харах үйлчилгээ эрхлэгчдийн нэгдсэн холбооноос өнөөдөр Засгийн Газар, УИХ, Ерөнхийлөгч болон бусад холбогдох байгууллагуудад шаардлага хүргүүлж байгаа талаар мэдээлэл хийлээ.

Хүүхэд харах үйлчилгээний тухай хууль Монгол Улсын Их Хурлаар 2016 оны нэгдүгээр сарын 1-ээс эхэлж хэрэгжиж эхэлсэн. Уг хуулийн зорилго бол цэцэрлэгт хамрагдаж чадахгүй байгаа 70,000 гаруй хүүхдийг харж, хандах хууль юм. Өнгөрсөн жил 5.8 тэрбумыг УИХ-д төсөвлөж 6,000 хүүхэд хамруулах ёстой гэдгийг баталсан.Харин одоогийн байдлаар 5,275 хүүхэд уг үйлчилгээнд хамрагдаж, тогтмол 1,025 ажлын байр бий болж, 10,000 гаруй эцэг эх ажил хийх боломжтой болсон гэж Хүүхэд харах үйлчилгээ эрхлэгчдийн нэгдсэн холбооны тэргүүн Б.Өлзийбат онцлон хэлж байлаа.

Мөн Хүүхэд Харах Үйлчилгээ Эрхлэгчдийн Нэгдсэн холбооны ажлын хэсгийн ахлагч Б.Мягмардорж хэлэхдээ: “Өнөөдөр Монгол Улсын хүний эрхийн хуульд “Хүн амьд явах, боловсрол эзэмших” эрхтэй гэж заасан байдаг. Гэвч одоогийн сайд, дарга нар эхний эрхийг халаад, хоёр дахийг нь илүүд үзэж байна. Тодруулбал 73,524 хүүхэд өнөөдөр цэцэрлэгт хамрагдаж чадахгүй, цоожтой хаалганы цаана өдрийг өнгөрөөж байгаа юм. Үүнээс болж сард 15-17 хүүхэд ертөнцийн мөнх бусыг үзлээ. Түлэнхийн төвд очсон хүүхдүүдийн ихэнх нь гэртээ харах хүнгүй, эсвэл насанд хүрээгүй хүүхдээр харуулсан хүүхдүүд байдаг.

Үүнийг шийдэх гарц байна. Жишээлбэл: жилийн хугацаанд 5.8 тэрбум төгрөгөөр 6,343 хүүхдүүдэд үйлчилгээ үзүүлсэн.

Төр 80 тэрбум төгрөгөөр шийдэх асуудлыг Хүүхэд харагчид бид 5.8 тэрбум төгрөгөөр шийдэж төрд ирэх хүнд ачааллыг бууруулж байгаа хүүхэд харах үйлчилгээ эрхлэгчдийг дэмжиж ажиллахыг уриалж байна.

Төр засаг бидэнтэй хамтарч ажиллаж Монголын ирээдүй болсон эдгээр 70,000 гаруй хүүхдийг аврахыг хүсэж байна” гэлээ.

ШААРДЛАГА

Цэцэрлэггүй үлдсэн зөвхөн хоёр настай 23 мянган багачууд, 3-5 настай ах, эгч нарынхаа хамтаар 73,524 хүүхэд гэртээ цоожтой хаалганы цаана байна. Хүүхэд бүрт ижил боломж олгоё.

Монгол Улсын нийт хүн амын 10.0 гаруй хувь болох 300,000 орчим хүн ам бүхий 25 хороо цэцэрлэггүй байгаа нь Монгол төрийн эмгэнэл юм!

Монгол Улсын Тогтвортой хөгжлийн үзэл баримтлал – 2030, Монгол улсын засгийн газрын 2016-2020 оны үйл ажиллагааны хөтөлбөрийн 3.2.2.“Хүүхэд бүр цэцэрлэгт” хөтөлбөрийг хэрэгжүүлж хот суурин газарт хүүхэд бүр цэцэрлэгт хамрагдах боломжийг бий болгоно гэж тусгасан.

Монгол Улсын нийт хүн амын 9,3 хувь буюу 2-5 насны цэцэрлэгт хамрагдах ёстой 280,000 хүүхэд байна. Үүнээс улсын болон хувийн цэцэрлэгт 206,476 хүүхэд хамрагдсан бол Хүүхэд харах үйлчилгээний тухай хууль хэрэгжсэнээр өнгөрсөн жил хоёроос таван нас хүртэлх 5,496 хүүхэд хамгаалагдсан байна. Мөн 297 хөгжлийн бэрхшээлтэй хүүхэд хамгаалагдсан. Үлдсэн 73,524 хүүхэд гэртээ харгалзах хүнгүйгээр цоожлогдон аливаа болзошгүй эрсдэлд өртөх, халамж, хамгааллаас ангид, эрсдэлтэй үлдэж байна.

2017 оны Улсын төсөвт 5.8 тэрбум төгрөгөөр Хүүхэд харах үйлчилгээнд, цэцэрлэгт хамрагдаж, чадахгүй байгаа нийт хүүхдийн 9 хувь болох 6,343 хүүхдүүдэд ХАМГААЛЛЫН ҮЙЛЧИЛГЭЭ үзүүлж, ажилгүй иргэд, залуу гэр бүл, эмэгтэйчүүдийн хөдөлмөр эрхлэлтийг дэмжих, төрийн бодлогыг хэрэгжүүлсэн.

Хууль хэрэгжсэнээс хойш 426 хүүхэд харах төвд 2016 онд 5,496, 2017 онд 5,275 хүүхдүүд хамгаалагдаад байна. Үүний үр дүнд 10,000 гаруй иргэн ажил хөдөлмөр эрхлэх нөхцөл бүрдсэн нь уг хууль иргэдэд, нийгэмд ямар их хүлээлттэй, ач холбогдолтой нь харагдаж байна.

Иймд хүүхэд хамгааллыг нэмэгдүүлэхэд анхаарч ажиллах шаардлагыг хүргэж байна.

• 73,524 хүүхдүүдийг дахиад цоожтой хаалганы цаана байлгасаар байх уу? Хүүхдийн эрх, хүүхэд хамгааллын талаарх хуулийг олон нийтэд зөв ойлгуулж, хүүхэд хамгаалал, соён гэгээрүүлэх ажлыг онцгойлон анхаарч ажиллах
• 2018.01.01-нээс Удирдлага зохион байгуулалт, санхүүжилт Хөдөлмөр Нийгмийн Хамгааллын сайдаас боловсролын асуудал эрхэлсэн төрийн захиргааны төв байгууллагад шилжүүлсэнтэй холбогдуулан тус яамдын сайд нар цаашид ямар бодлого барьж ажиллах талаараа бидэнтэй уулзалт хийнэ үү? Мөн хуулийн хэрэгжилт, нэмэлт өөрчлөлт оруулахтай холбогдуулан хамтарсан ажлын хэсэг байгуулах
• 73,524 цэцэрлэгт хамрагдаж чадахгүй байгаа хүүхдүүд нийгмийн хамгаалал, эрүүл аюулгүй орчинд байх боломжийг олгож 2018 онд төсөвлөсөн төсвийг цаашид нэмэгдүүлэхэд анхаарч ажиллана уу?

Энэ хууль хэрэгжсэн хугацаанд стандарт журмын дагуу өнөөдөр 426 Хүүхэд харах төв нь сум, дүүргийн Засаг дарга, мэргэжлийн хяналт, нийслэлийн онцгой байдлын газар зэрэг эцэг эхийн хараа хяналт, зөвшөөрлийн үндсэн дээр 1025 хүний тогтмол ажлын байрыг бий болгож, 6,343 хүүхэд өсөж хүмүүжих, амь нас, эрүүл, аюулгүй орчинд хамгаалагдлаа.

Төр 80 тэрбум төгрөгөөр шийдэх асуудлыг Хүүхэд харагчид бид 5.8 тэрбум төгрөгөөр шийдэж төрд ирэх хүнд ачааллыг бууруулж байгаа хүүхэд харах үйлчилгээ эрхлэгчдийг дэмжиж ажиллахыг уриалж байна.

Хүүхэд харах үйлчилгээ бол нийгмийн халамж биш энэ бол ирээдүйдээ хийж буй хөрөнгө оруулалтын асуудал, ХҮҮХЭД ХАМГААЛАЛ, ХҮҮХДИЙН ЭРХ, тэгш эрхийн асуудал, аав, ээж нь ажилгүй, танилгүйгээс болж хүүхэд хохирч, сугалааны ард үлдэх ёсгүй!

Шаардлагын хариуг 2017 оны 11 сарын 08-ны дотор өгнө үү?

НҮБ-ын Хүн амын сангаас жил бүр гаргадаг “Дэлхийн хүн амын байдал 2017” тайланг өнөөдөр танилцууллаа. Тус тайланд хамгийн ядуу эмэгтэйчүүдэд тулгарч буй тэгш бус байдлыг шийдвэрлэж, тэдний эрхийг хамгаалахгүй бол дэлхийн хөгжлийн зорилтуудад хүрч чадахгүй байж болзошгүйг анхааруулсан байна.

“Тэгш бус байдлын эрин үе дэх нөхөн үржихүйн эрүүл мэнд ба түүнийг эдлэх эрх” сэдэвтэй уг тайлангийн хүрээнд НҮБ-ын Хүн амын сангийн Монгол дахь суурин төлөөлөгч Наоми Китахара мэдээлэл өглөө. Тэрбээр “Хөгжиж буй ихэнх оронд хамгийн ядуу эмэгтэйчүүд хэзээ, хэдэн удаа жирэмслэхээ шийдэх эрх хомс байдгаас гадна жирэмсэн, амаржих үеийн эмнэлгийн тусламж үйлчилгээг чанартай хүртэж чаддаггүй. Энэ тэгш бус байдал нь эмэгтэйчүүдийн эрүүл мэнд, ажил, амьдрал, орлого олох боломжийг устгаж, улс үндэстнийхээ хөгжилд хувь нэмэр оруулахад нь саад тотгор учруулдаг юм.

Монголд бараг гурван хүний нэг нь ядуу амьдарч байна. Бидний тооцоогоор Монголд нийт жирэмслэлтийн 14 хувь нь хүсээгүй, огт төлөвлөөгүй жирэмслэлт. Энэхүү тоон мэдээллээс үзвэл эмэгтэйчүүд жирэмслэлтээс сэргийлэх арга хэрэгсэл, холбогдох мэдээллийг авч чадахгүй, улмаар ядуурлын эргүүлгээс гарч чадахгүй улам ядуурч байна.

Эмэгтэйчүүд нөхөн үржихгүйгээ хянах боломжтой болсон тохиолдолд тэд сурч боловсорч, цалинтай ажил хийж, эдийн засгийн илүү их эрх мэдэлтэй болдог.

Чинээлэг Монголчууд жирэмсний үеийн чанартай хяналт, эмчилгээ хүртэж, ядуучууд нь чадахгүй байна. Эмэгтэйчүүдийг үр хүүхэд төрүүлснийхээ төлөө гэсгээл хүртдэг байдлаас хамгаалах нь чухал” гэв.

Эрүүл мэндийн сайд Д.Сарангэрэл хэлэхдээ: “Бид энэ асуудлыг хүлээн авч тодорхой бодлого төлөвлөгөөтэй ажиллах ёстой. Нөхөн үржихүйн эрүүл мэндийн асуудал ядууралтай холбоотой. Хэдийгээр эхийн эндэгдэл өнгөрсөн жилтэй харьцуулахад буурсан ч энэ оны эхний 8 сарын байдлаар 14 эх эндчихээд байна. Нялхсын эндэгдэл эхний найман сарын байдлаар 825 болжээ. Үр хөндөлтийн хувьд энэ тоо 18 мянгад хүрсэн.

Тиймээс дэлхийн хүн амын тайланд дүгнэлт хийж, онцгой анхаарах ёстой гэж дүгнэж байна. Ядуурал, эмэгтэйчүүдийн хүнд нөхцөл байдал ажилгүйдэлтэй холбоотой. Залуу, хөдөлмөрийн насны ээжүүд гэртээ хүүхдээ хараад байж байна. Шинэ Засгийн газрын хамгийн түрүүнд баримталж буй чиглэл бол бүх хүүхдийг цэцэрлэгтэй болгох.

Мөн Эрүүл мэндийн яамнаас эрүүл мэндийн боловсролыг цоо шинэ түвшинд гаргах зорилт тавьж ажиллаж байна. Өнөөдөр ядуу эмэгтэйчүүд эмнэлгийн чанартай тусламж үйлчилгээг авч чадахгүй байгаа нь үнэн. Тиймээс бид үйл ажиллагааны төлөвлөгөөгөө энэ чиглэл рүү хандуулж байгаа” гэлээ.

Увс аймгийн иргэд Засаг дарга Д.Батсайханыг огцрохыг шаардаж энэ сарын долоонд Улаангом хотын төв дэх маршал Ю.Цэдэнбалын нэрэмжит талбайд тайван жагсаал, цуглаан хийхээр болжээ Өнөөдөр Үндэсний мэдээллийн төвд 11 цагт “Увс аймгийн хөгжлийн төлөө хамтдаа” нэртэй энэхүү тайван жагсаал, цуглааны талаар аймгийн ИТХ-ын төлөөлөгч Ц.Батболд тэргүүтэй тус аймгийн зарим сум, багийн иргэдийн төлөөлөл мэдээлэл хийлээ.

Мэдээлэл хийж байгаа төлөөлөгчид хэлэхдээ: “Увс аймаг сүүлийн нэг жил эзэнгүй мэт болж, аймгийн Засаг даргын мөрийн хөтөлбөрт туссан ажлууд хэрэгжиж эхлээгүй, төрийн алба цөөн хэдэн хүний гар хөл бологсод дүүрч 60 тэрбумын жижгирүүлсэн хувилбар хэрэгжиж байгаа гэдгийг хурлын эхэнд онцолсон юм.

Мөн Увс аймагт төрийн албаны сонгон шалгаруулалт дарга нарын эрх ашгийн дагуу явагддаг бөгөөд тэд өөрсдийн хүнийг түр томилоод, сонгон шалгаруулалтыг нэр төдий явуулан өнөөх хүнээ жинхэлдэг.Ажлаа шударгаар хийж байгаа төрийн албан хаагчдыг дарамтлах нь их байна. Тухайлбал, элдэв баяр ёслол, наадам зохион байгуулахдаа төрийн албан хаагчдаас хураамж татаас авдаг байдал хэрээс хэтэрсэн гэнэ.

Түүнчлэн Увс аймгийн Засаг дарга Д.Батсайхан нь ял шийтгэлтэй байхдаа албан тушаалдаа томилогдсон юм. Энэ талаар өнгөрсөн онд түүнийг томилогдсоны дараахан АН-ынхан олны сонорт хүргэж байсан ажээ. Тодруулбал, Увс аймгийн Засаг дарга Д.Батсайхан нь эрүүгийн хэргийн шүүхээр Эрүүгийн хуулийн 263 дугаар зүйл буюу өршөөлд орохгүй зүйл ангиар ял шийтгэгдсэн юм байна. Тэрээр Увс аймгийн ИТХ-ын даргаар ажиллаж байхдаа төрийн албан хаагчдад зориулсан таван давхар 24 айлын орон сууцыг дөрвөн давхар болгож 120 гаруй сая төгрөгийг завшсан нь мөрдөн байцаалтаар тогтоогдсон. Тиймээс шүүхээс түүнд хоёр жил төрийн албан тушаал эрхлэх эрхийг нь хасч, хоёр жил жирийн дэглэмтэй хорих ангид ял эдлүүлэхээр шийдвэрлэж байжээ. Энэ ял нь яван явсаар 10 сая төгрөгийн торгууль болон дуусжээ.

Иймээс хэвлэлийн хуралд оролцсон иргэд “Увсынхан ялтай Засаг даргаар удирдуулахыг хүсэхгүй байна” хэмээн байр сууриа илэрхийлэв. Уг жагсаал, цуглаанд аймгийн төвийн иргэдээс гадна 16 сум 150 багийн иргэдийн төлөөлөл оролцохоо мэдэгдээд байгаа ажээ.

Хуралд оролцсон иргэдийн нэг болох Улаангомын гуравдугаар багийн иргэн О.Булган ярихдаа: “Мэргэжил, боловсролтой залуус нутагтаа ажиллах боломж алга. Дарга нарын ах дүү, хамаатан садан, тойрон хүрээлэгчид л төрийн албанд ажилладаг юм байна. Хязгаар нутагт залуус ажиллаж хөдөлмөрлөх, үйлдвэрлэл эрхлэн сайхан амьдрах боломж нөхцөлгүй учир тэд Улаанбаатар рүү шилжиж байна. Тиймээс би энэ байдлыг өөрчлөхийг хүсч тайван жагсаал, цуглаанд нэгдэж байгаа” гэв.

Б.Үржиг

Монгол Улсын Биеийн тамир, спортын тухай хуулийн 10 дугаар зүйл, Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөр, Нийслэлийн эдийн засаг, нийгмийг 2017 онд хөгжүүлэх үндсэн чиглэлийг хэрэгжүүлэх зорилгоор “Нийслэлийн иргэдийн спортын VI наадам”-ыг 2017 оны гуравдугаар сараас эхлэн спорт явган аялал, ширээний шагайн наадгай, хийн дасгал, аэробик, олс таталт, софт волейбол, волейбол, сагсан бөмбөг гэсэн спортын 8 төрлөөр хэсэг, хороо, бүс, дүүрэг, нийслэл гэсэн 5 үе шаттайгаар амжилттай зохион байгуулж байна.

Нийслэлийн 9 дүүргийн 152 хорооноос шалгарсан Шилдгийн шилдэг 108 багийн 1638 тамирчдын сүүлийн шатны Шигшээ тэмцээн 2017 оны 11 дүгээр сарын 05-06-ны өдрүүдэд “Буянт-Ухаа” спорт ордонд зохион байгуулагдана гэж нийслэлийн Нийтийн биеийн тамир, спортын хорооноос мэдээллээ.

Соёл, урлагийн газраас улс, орон нутгийн музейн сан хөмрөгт үзмэр худалдан авах ажлыг 2017 оны 11-12 дугаар сард зохион байгуулахтай холбогдуулж музейнүүдээс 2017 онд худалдан авах үзмэрийн санал, холбогдох баримт бичиг, гэрэл зургийг хүлээн авч нэгтгэв.

Монголын Үндэсний музей, Монголын Театрын музей, Богд хааны ордон музей, Дархан-уул аймгийн музей, Хөвсгөл аймгийн музей, Ховд аймгийн музей, Чойжин ламын сүм музей, Увс аймгийн музей, Төв аймгийн музей, Завхан аймгийн музей, Хэнтий аймгийн музей, Архангай аймгийн музей, Хархорум музей, Сүхбаатар аймгийн музей, Баянхонгор аймгийн Түүх угсаатны зүй байгалийн музей, Баян-Өлгий аймгийн музей, Байгалийн түүхийн музей, Дорноговь аймгийн музей, Дундговь аймгийн музей зэрэг 19 улс, орон нутгийн музейгээс 200 нэр төрлийн 540 гаруй эд өлгийн зүйл, түүх соёлын дурсгалт зүйлийг худалдан авах санал ирүүлээд байна.

Худалдан авахаар ирүүлж буй эд өлгийн зүйлсийн ихэнх хувийг түүх, угсаатны эд хэрэглэлийн зүйлс хувцас, чимэглэл, сав суулга, ваар, хөөрөг, хэт хутга, аяга, монгол гутал, дарханы багаж, мал аж ахуйн тоног хэрэгсэл эзэлж, түүний дараа амьтны чихмэл, араг яс эзэлж байгаа бөгөөд саналд ирүүлээд буй эд өлгийн зүйлсийн түүх, соёл, шинжлэх ухааны ач холбогдлыг тогтоолгох зорилгоор БСШУСЯ-ны дэргэдэх Түүх соёлын дурсгалт зүйлийн зэрэглэл, үнэлгээ тогтоох мэргэжлийн зөвлөлд хүргүүлээд байна. Боловсрол, соёл, шинжлэх ухаан, спортын сайдын 2017 оны төсвийн багцад музейн үзмэр худалдан авахад зориулж 285,8 сая төгрөгийг хуваарилсан.

Соёл, урлагийн газраас хүүхдэд зориулсан уран бүтээлийн XI дэх удаагийн уралдааныг 4-н төрлөөр зарласан бөгөөд уралдаанд Монгол улсын 8-н аймаг, нийслэлийн харьяаны 13-70 насны уран бүтээлчид оролцсон ба драмын жүжгийн төрөлд 23, дуулалт жүжгийн төрөлд 16, бүрэн хэмжээний уран сайхны киноны төрөлд 20, олон ангит уран сайхны киноны төрөлд 4 нийт 56 зохиол ирсэн юм.

БСШУСЯ-ны сайдын А/140 дүгээр тушаалаар томилогдсон мэргэжлийн зөвлөлийн гишүүд батлагдсан удирдамж, бүтээлд тавигдах шаардлага зэргийг үндэслэн дараах бүтээлүүдийг шалгарууллаа. Үүнд:

• Драмын жүжгийн төрөлд

– 1-р байр Н.Мандалын “Нууцын эрэлд”

– 2-р байр Г.Мишээлийн “Торнхилийн ой”

• Дуулалт жүжгийн төрөлд

– 1-р байр О.Сундуйгийн “Хонхот гөлчгийн адал явдал”

– 2-р байр Д.Цэнгэнжавын “Би хэн бэ?”

• Уран сайхны киноны төрөлд

– 1-р байр Т.Номин-Эрдэний “Кибер сүлжээ”

– 2-р байр Ч.Наранцэцэгийн “Сүүн хэлхээ”

• Олон ангит уран сайхны киноны төрөлд

– 1-р байр Б.Анармаагийн “Виртуал хүү UP”

– 2-р байр П.Наранбаатарын “Мөрөөдлийн төгөл”

Шалгарсан бүтээлүүдийг хэвлүүлэх болон цаашид тайз, дэлгэцийн бүтээл болгоход ЗГХА, Соёл урлагийн газраас анхааран ажиллах юм.