Нийслэлийн хэмжээнд хэрэгжүүлж буй “Эргүүл” дэд хөтөлбөрийн хэрэгжилтийг хангах, Цагдаагийн албаны тухай хууль, Зөрчлийн болон Зөрчил шалган шийдвэрлэх тухай хууль, Цагдаагийн ерөнхий газрын даргын 2017 оны А/121, 122 дугаар тушаалаар шинэчлэн батлагдсан “Олон нийтийн цагдаагийн дүрэм”, журмын мэдлэг олгох, практикт хэрэглэх ур чадварыг сайжруулах, ажилтнуудын ажлын идэвхи санаачлагыг өрнүүлж, үр дүнг дээшлүүлэх зорилготой “Олон нийтийн цагдаагийн сургалт, зөвлөгөөн”-ийг Нийслэлийн цагдаагийн газраас Цагдаагийн ерөнхий газрын Сургалтын нэгдсэн төвтэй хамтран зохион байгууллаа.
Зөвлөгөөний үеэр олон нийтийн цагдаа нартай тус цагдаагийн газрын удирдлагаас хөдөлмөрийн гэрээг шинэчлэн байгуулж, ажлын үр дүнгээр бусдыгаа хошуучлан ажилласан 6 олон нийтийн цагдааг Нийслэлийн цагдаагийн газрын 2017 оны 09 дүгээр сарын 26-ны өдрийн б/663 дугаар тушаалаар “Баярын бичиг”-ээр шагналаа. Хууль тогтоомжид нийцүүлэн олон нийтийн цагдаагийн эрх зүйн орчныг сайжруулах, эрх, үүргээ биелүүлэх баталгааг хангахад Нийслэлийн цагдаагийн газраас ихээхэн анхаарснаар одоогоор “Цагдаагийн байгууллагад ажиллах иргэнд тавигдах тусгай шаардлага, шалгуур”-ыг хангасан 75 олон нийтийн цагдаагийн ажилтныг цагдаагийн алба хаагчаар томилон ажиллуулж байна. Олон нийтийн цагдаа нар Нийслэлийн хэмжээнд 2017 оны эхний 9 сард зохион байгуулагдсан “Сар шинэ”, “Эргүүл”, “Хичээлийн шинэ жил” зэрэг нэгдсэн 5, хэсэгчилсэн 316 удаагийн арга хэмжээнд оролцож, цагдаагийн алба хаагчтай хамтран 84 гэмт хэргийг шуурхай илрүүлж, таслан зогсоон, 987 удаагийн хэргийн газрын хамгаалалтад ажиллан, хэсгийн байцаагчтай хамтран 15968 аж ахуй нэгж байгууллагад 10617 мэдэгдлийг хүргүүлэн биелэлтийг тооцуулж, 59521 иргэнд хууль тогтоомжийг тайлбарлан таниулж, ахуйн хүрээнд болон гудамж талбайд үйлдэгдсэн 4260 зөрчлийг шийдвэрлүүллээ. Нийслэлийн ерөнхий боловсролын 198 сургуулийн орчимд гэмт хэрэг, зөрчлөөс урьдчилан сэргийлэх “School police”-ийн эргүүлээр ажилласан 7021 эцэг, эхэд үүрэг гүйцэтгэхэд нь дэмжлэг үзүүлж, сурагчдын хичээл цуглах, тарах үеэр зам, уулзвар, гарцуудад тодорхой цагуудад цагдаагийн 2752 алба хаагчийн хамт хяналт тавьж ажиллаж цагдаагийн байгууллагын үйл ажиллагаанд дэмжлэг үзүүлэн ажиллаад байнагэж УБХЦГ-аас мэдээллээ.
Каталоны нийслэл Барселоны төв талбай дээр олон мянган тусгаар улс болохыг дэмжигчид цуглан каталоны туг далбааг мандуулж, сүлд дуугаа дуулж баяраа тэмдэглэв. Энэхүү цуглаанд оролцсон Каталоны удирдагч Карлес Пуиждемонт өчигдөр болсон бүх нийтийн санал асуулга амжилттай өндөрлөн каталончууд испаниас салж тусгаар улс болно гэдгээ баталлаа. Бидний тусгаар улс болох үүд хаалга нээгдлээ. Иймээс Европын холбоо бидний талаар үзэл бодлоо илэрхийлэхээс өөр аргагүй болсон. Миний удирдаж буй Засгийн газар өнөөдрийн санал асуулгын дүнг Каталоны парламентад цаг алдалгүй явуулж хуулийн дагуу Бүгд найрамдах тусгаар улсаа тунхаглах шийдвэр гаргуулна хэмээн мэдэгдлээ. Испаний Үндсэн хуулийн шүүх энэхүү санал асуулгыг хууль бус хэмээн зарлаж засаг захиргаа санал асуулгыг тасалдуулах зорилгоор автономит эрхтэй Каталон мужид цэрэг цагдаагийн хүч оруулан билээ.Цэрэг цагдаа хэдэн арван санал асуулгын хэсгийг хүчээр хааж, олон сая саналын хуудас, хайрцаг хураан авсан боловч санал асуулга ийнхүү амжилттай болж өндөрлөжээ. Харин Испании Ерөнхий сайд Мариано Рахой энэхүү санал асуулгыг “ардчиллыг доромжилсон явдал” хэмээн нэрлэсэн байна.
УИХ дахь АН-ын бүлэг өнөөдөр хуралдаж, энэ долоо хоногт нээлтээ хийж буй УИХ-ын Намрын ээлжит чуулганаар хэлэлцэх асуудлаар байр сууриа нэгтгэжээ. Хуралдааны талаар УИХ дахь АН-ын бүлгийн дарга Д.Эрдэнэбат мэдээлэл хийлээ. 
Монголын ууган их сургууль МУИС байгуулагдаж, үндэсний дээд боловсролтой мэргэжилтэн бэлтгэж эхэлсний 75 жилийн ой энэ сарын 05-06 нд тохиож байна. Ойн хүрээнд зохион байгуулах ажлын талаар өнөөдөр сэтгүүлчдэд мэдээллээ.
Баянгол дүүргийн Засаг даргын тамгын газраас Хархорин зах, 32-ын автобусны буудал орчимд зогсдог наймаачдыг худалдаа хийхийг хориглосон. Тус автобусны буудлын наймаачид 10-ыг харьцах 60 метр квадрат хөрс нь бохирдсон талбайд худалдаа эрхлэх зөвшөөрөл хүссэн ч тус дүүргийн тамгын газар хариу өгөөгүй байна. Жижиглэн худалдаа эрхэлдэг 12 иргэн ажлын байраа хамгаалахаар 168 цаг өлсгөлөн зарласан ч тус дүүргийн удирдлагууд хариу өгөөгүй гэлээ. Тиймээс эдгээр иргэд Нийслэлийн иргэдийн төлөөлөгчдийн хуралдаан болж байгаа танхимын гадна ирж эсэргүүцэл илэрхийлэв. Тэд мөн аравдугаар сарын 4-нөөс хуурай өлсгөлөн зарлахаа мэдэгдсэн юм. Өлсгөлөн зарласан 12 иргэний бие муу байгаа бөгөөд дөрвөн иргэний бие огцом муудаж эмнэлэгт хүргэгджээ. Эдгээр 12 иргэний олонхи нь эмэгтэй, 0-2 насны хөхүүл эхчүүд гэнэ. 
Монгол Улсын Их Хурлын дарга М.Энхболд Улаанбаатар хотноо зохион байгуулагдаж буй “Монгол-Оросын хамтын ажиллагаа-2017” чуулга уулзалтад оролцож буй ОХУ-ын Холбооны хурлын Холбооны зөвлөлийн Эдийн засгийн бодлогын байнгын хорооны нэгдүгээр орлогч дарга Сергей Вячеславович Калашников тэргүүтэй төлөөлөгчдийг хүлээн авч уулзлаа.
Түүнчлэн хууль тогтоох байгууллагуудын хамтын ажиллагаанд сэтгэл хангалуун байдгаа тэмдэглээд “Санасан хэмжээнд төдийлэн хүрэхгүй байгаа худалдаа, эдийн засгийн хамтын ажиллагааг өргөжүүлэн хөгжүүлэхэд хууль, эрх зүйн орчныг боловсронгуй болгох нь нэн чухал юм. Хоёр орны хууль тогтоох байгууллагууд энэ чиглэлээр хамтран ажиллаж, хил, гааль, татвар, тээврийн зэрэг зарим салбарын тулгамдсан асуудлуудыг шийдвэрлэхэд хүчин чармайлт тавих ёстой. Мөн хил орчмын бүс нутаг, байгууллагуудын хамтын ажиллагааг өргөтгөх, үүссэн асуудлуудыг цаг алдалгүй шийдвэрлэж байх нь харилцааг идэвхжүүлэхэд чухал түлхэц болно” хэмээн тэмдэглэлээ.
Аливаа улсын нийслэлийн 90 хувь нь ногоон байгууламж байна гэсэн олон улсын стандарт байдаг юм байна. Гэтэл манай улсын нийслэл Улаанбаатар хотын ердөө тавхан хувь нь ногоон байгууламж байдаг гэсэн харамсалтай тоо бий. Тиймээс сүүлийн жилүүдэд нийслэл, дүүрэг, хороо шат шатандаа энэ асуудалд багагүй ач холбогдол өгч байгаа.