Month: August 2017

Улсын Дээд шүүхээс Ц.Амгаланбаатар, Б.Содномдаржаа, Т.Чимгээ нарыг төр нийгмийн нэрт зүтгэлтэн С.Зоригийг хөнөөсөн хэрэгт гэм буруутай гэж үзэн, Хаалттай дэглэмтэй хорих ангид тус бүр 20 жил хорих ял оноолоо.

Сүхбаатар дүүргийн Эрүүгийн хэргийн анхан шатны шүүхийн 2016 оны 12 дугаар сарын 27-ны өдрийн 03 дугаар шийтгэх тогтоол, Нийслэлийн Эрүүгийн хэргийн давж заалдах шатны шүүхийн 2017 оны 3 дугаар сарын 14-ний өдрийн 171 дүгээр магадлалтай, Б.Содномдаржаа, Ц.Амгаланбаатар, Т.Чимгээ нарт холбогдох эрүүгийн хэргийг шүүгдэгч Б.Содномдаржаа, түүний өмгөөлөгч Л.Мөнхтөр, шүүгдэгч Ц.Амгаланбаатар, түүний өмгөөлөгч Д.Дашдорж, шүүгдэгч Т.Чимгээ, түүний өмгөөлөгч С.Оюунцэцэг, хохирогчийн хууль ёсны төлөөлөгч С.Оюуны өмгөөлөгч Л.Энхсайхан нарын гаргасан гомдлыг үндэслэн хянан хэлэлцсэн юм.

Шүүх хуралдаанд ерөнхий шүүгчээр Ц.Зориг, шүүгчээр Д.Эрдэнэбалсүрэн, Б.Цогт, Б.Батцэрэн,Ч.Хосбаяр нар, улсын яллагчаар Г.Эрдэнэбат оролцлоо.

Дээд шүүх Ц.Амгаланбаатар, Б.Содномдаржаа, Т.Чимгээ нарын өмгөөлөгчдийн гаргасан нэхэмжлэлийг хүчингүй болгож, өмнөх хоёр шатны шүүх хэргийг хянан хэлэлцэхдээ хуулийн дагуу ажилласан гэж үзлээ.

Шүүгдэгч Б.Содномдаржаа, Т.Чимгээгийн гэр бүлийнхэн Дээд шүүхийн шийдвэрийг хүлээн зөвшөөрөхгүй Олон улсын хүний эрхийг хамгаалах байгууллагад хандана гэв.

Чингэлтэй дүүргийн нутаг дэвсгэр Ар согоотод бэлчээрлэж байсан малаас малын гоц халдварт шүлхий өвчний шинж тэмдэг илэрчээ. Иймд мал бүхий иргэд малаа дээрх чиглэл болон ойр орчимд бэлчээхгүй байхыг холбогдох газраас мэдэгдэж байна.

Мал эмнэлэг-Үржлийн албанд хандаж өөрийн эзэмшлийн малыг урьдчилан сэргийлэх үзлэг, тандалтад хамруулан өөрт болон бусдад учрах хохиролоос урьдчилан сэргийлж хамтран ажиллахыг уриалжээ.

Хан-Уул дүүргийн 15 дугаар хороо, Богд Жавзандамбын гудамжны уулзварын өргөтгөл шинэчлэлтийн ажлын хүрээнд автозамын хучилтын ажил хийгдэх тул 2017 оны наймдугаар сарын 5-ны өдрийн 06:00 цагаас 2017 оны наймдугаар сарын 7-ны өдрийн 06:00 цагийн хооронд автозамын зорчих хэсэг хаагдах болно.

Иймд тус замаар дайран өнгөрдөг нийтийн тээврийн үйлчилгээний дараах чиглэлүүдэд түр хугацаанд өөрчлөлт орно. Үүнд:

1.Ч:8 “Зайсан-Цэцэг төв-Хайлааст”

Ч:42 “Сүлжмэл-Нарны гүүр-Зайсан”

Ч:45 “Ган хийц-ХМК-Зайсан”

Ч:52 “3,4-р хороолол-Тэнгис кино театр”

Ч:55 “Зайсан-Дэнжийн 1000-ЗГАБ-Согоотын гудамж” чиглэлүүд120 мянгат, Ажилчдын соёлын ордон, Дунд голын замаар орж Энхтайвны гүүрэн доогуур явжүндсэн замналдаа орно.

1.Ч:36 “Гачуурт-Офицеруудын ордон-Зайсан” чиглэл Төв цэнгэлдэх хүрээлэнгээр богино эргэж иргэдэд үйлчилнэ.

Мөн Зайсангаас Оргил худалдааны төв хүртэл 3 тээврийн хэрэгсэл богино эргэлтээр 5 минутын зайтай үйлчилнэ.

Иймд иргэд та бүхэн зураглалын дагуу зорчилтоо төлөвлөж нийтийн тээврийн үйлчилгээг авна уу.

Нийслэлийн Сонгинохайрхан дүүргийн 1, 22 дугаар хороонд мал амьтны гоц халдварт шүлхий өвчин гарсантай холбогдуулан тус дүүргийн Засаг дарга 2017 оны А/363, А/365, А/369, А/370 дугаартай захирамжуудыг баталж 2 голомтын бүс, 2 устгалын цэг үүсгэн хорио цээрийн дэглэм тогтоож, дүүргийн Онцгой комиссын даргын 2017 оны 01 дүгээр тушаалаар “Шуурхай удирдлагын штаб”-ыг байгуулан холбогдох албан хаагчдыг томилж, 24 цагаар үүрэг гүйцэтгэж байна. Мөн нийслэлийн Онцгой байдлын газар “Мал амьтны гоц халдварт өвчний үед ажиллах шуурхай штаб” байгуулан 24 цагаар мэдээ, мэдээллийг боловсруулан удирдах дээд шатны байгууллагад хүргүүлж, үүссэн нөхцөл байдлыг удирдлага, зохион байгуулалтаар ханган ажиллаж байна.

УИХ-ын Өргөдлийн байнгын хорооны ажлын алба /төсөл хэлэлцүүлэгч баг/ Үндсэн хуульд оруулах нэмэлт, өөрчлөлтийн төслийг олон нийтээр хэлэлцүүлэхээр Баянхонгор аймгийн Баянхонгор, Богд, Галуут суманд 2017 оны 7 дугаар сарын 31-нээс 8 дугаар сарын 02-ны өдрүүдэд бүсчилсэн сургалт, хэлэлцүүлгийг зохион байгуулсан билээ.

Тэгвэл Монгол Улсын Их Хурал; Монгол Улсын Ерөнхийлөгч; Монгол Улсын Засгийн газар; Төрийн алба; Шүүх эрх мэдэл; Монгол Улсын засаг захиргаа, нутаг дэвсгэрийн нэгж, түүний удирдлага гэсэн зургаан багц сэдвийн хүрээнд зохион байгуулж буй сургалт, хэлэлцүүлгийг Говь-Алтай аймагт үргэлжлүүлж байна.

Энэ хүрээнд Монгол Улсын Үндсэн хуульд оруулах нэмэлт, өөрчлөлтийн төслийн талаархи бүсчилсэн сургалт өнөөдөр (2017.08.04) Говь-Алтай аймгийн төв Алтай суманд боллоо.

Сургалтад Говь-Алтай аймгийн иргэдийн Төлөөлөгчдийн Хурал, ЗДТГ, аймгийн Прокурор, Шүүх, Цагдаагийн газар, Шүүхийн шийдвэр гүйцэтгэх алба, Онцгой байдлын газар, Аудитын газар, Хуульчдын холбоо, Өмгөөлөгчдийн зөвлөл, мөн Есөнбулаг сумын иргэдийн Төлөөлөгчдийн Хурал, Тамгын газар болон 11 багийн ИНХ төлөөлөл, нийт 64 албан хаагчид хамрагдлаа.

Дээрх зургаан багц сэдвийн хүрээнд зохион байгуулсан сургалтын үеэр албан хаагчид зөвхөн тодруулга авахын зэрэгцээ бас иргэнийхээ хувьд саналаа илэрхийлж байсан юм. Тухайлбал, Говь-Алтай аймгийн Хөдөлмөр, халамжийн үйлчилгээний газрын дарга М.Мянганбуу, аймгийн төвд сумын статус байх шаардлагагүй зөвхөн орон нутгийн статустай хот гэж байгаад захирагчийн ажлын алба байвал зохистой. Мөн 59-р зүйлийн 3 дахь хэсэгт, аймаг, нийслэлийн иргэдийн Төлөөлөгчдийн Хурлыг дөрвөн жилийн хугацаагаар сонгох бөгөөд тухайн шатны Хурлын төлөөлөгчийн 10 хувь нь төрийн жинхэнэ албан хаагч байж болно гэсэн санал хэлж байв.

Ийнхүү өнөөдрийн сургалт асуулт, хариултаар үргэлжилж, төсөл хэлэлцүүлэгч баг үргэлжлүүлэн Монгол Улсын Үндсэн хуульд оруулах нэмэлт, өөрчлөлтийн төслийн талаархи хэлэлцүүлгийг үдээс хойш иргэдийн дунд өрнүүлэх юм хэмээн УИХ-ын Хэвлэл мэдээлэл, олон нийттэй харилцах хэлтэс мэдээллээ.