Month: July 2017

Олон улсын “Найрамдал” цогцолборт 31 дэх удаагийн Жембори буюу майхант зуслан гурав дахь өдрөө үргэлжилж байна. Найрамдал цогцолборт 40 орны 7000 гаруй хүүхэд нэгдэн нэгэн “вант улс”-ыг бий болгон аж төрсөөр байна.

Нийгмийн халамжийн тухай хууль тогтоомжийн хүрээнд 2017 оны нэгдүгээр сарын 02-ны өдрөөс 2017 оны долоодугаар сарын 26-ны өдөр хүртэл Нийслэлийн үйлчилгээний нэгдсэн төв болон дүүргүүдээс 18,870 ахмад настан, 10,903 хөгжлийн бэрхшээлтэй иргэн нийт 29,773 иргэнд нийтийн тээврийн хэрэгслээр үнэ төлбөргүй зорчих смарт картыг олгоод байна.

Мөн Улаанбаатар хотын нийтийн тээврийн үйлчилгээний чанар, соёлыг сайжруулах, цахим картын хэрэглээнд бүрэн шилжүүлэх, үйлчилгээг шинэ түвшинд гаргах зорилгоор “Улаанбаатар смарт карт” ХХК-тай хамтран нийгмийн зорилтот бүлгийн 20,000 иргэнд смарт картыг үнэ төлбөргүй олголоо.

НЗД-ын 2017 оны А/479 дүгээр захирамжийн хүрээнд Нийслэлийн цагдаагийн газар, Энэрэл эмнэлэг, Наркологийн клиник эмнэлэг, дүүргүүдийн Хөдөлмөр, халамжийн үйлчилгээний хэлтэстэй хамтран 2017 оны 06 дугаар сарын 24-ний өдрөөс 27-ны өдөр хүртэл нийслэлийн төвийн 6 дүүрэгт хог түүж амьдардаг, гэр оронгүй тэнэмэл амьдралтай 223 иргэдийг бүртгэлжүүлэн, усанд оруулж, хувцаслан, эмнэлгийн үйлчилгээнд бүрэн хамруулан ажилласан байна.

Үндэсний статистикийн хороо /ҮСХ/-ноос сар тутам улс орны нийгэм, эдийн засгийн мэдээллийг тоймлон гаргадаг. Уг тоймд дурдсан тоо баримтуудаас олны дунд эрглэзээ төрүүлсэн үзүүлэлт мэр сэр байдаг. Тэдгээрийн дотор ажиллагсдын дундаж цалин хийгээд өрхийн орлого багтдаг.

Дундаж цалинг хэрхэн тооцдог вэ?
Хүмүүсийн амжиргаа дээшлээгүй, цалин хөлс, тэтгэвэр тэтгэмж нэмэгдээгүй хэр нь өрхийн орлого өсөөд цалингийн хэмжээ ч нэмэгдээд байдгийн учрыг мэргэжлийн хүн хэрхэн тайлбарласныг хүргэе. ҮСХ-ны дарга А.Ариунзаяа тайлбарлахдаа:

-Үндэсний статистикийн хороо нь ажиллагчдын сарын дундаж цалингийн мэдээллийг Эрүүл мэнд, нийгмийн даатгалын ерөнхий газрын нийгмийн даатгалын сангийн мэдээлэлд үндэслэн тооцдог. 2017 оны нэгдүгээр улирлын байдлаар нийгмийн даатгалын шимтгэл төлж буй 37.6 мянган аж ахуйн нэгж, байгууллагын 566.7 мянган ажиллагчид хамрагдсан мэдээллийг бид өмнө нь хүргэсэн. Дундаж цалин нь тайлант хугацаанд цалин хөлс авсан ажиллагчдын тоогоор жигнэсэн нийт цалин хөлс болон тайлант хугацаанд цалин хөлс авсан ажиллагчдын тооны харьцаа юм. Дундаж цалин нь үндсэн цалин, нэмэгдэл хөлс, нэмэгдэл, шагнал урамшуулал, ажиллаагүй цагийн олговор болон бусад олговроос бүрдэх бөгөөд нэрлэсэн цалин буюу нийгмийн даатгалын шимтгэл, хүн амын орлогын албан татвар тооцохоос өмнөх цалин юм гэжээ.

Энэ жилийн хувьд уул уурхайн салбарын ажиллагсдын цалин нэмэгдсэн гэдгийг тэрбээр ярилцлагадаа онцолжээ. Энэ нь уул уурхайн баялгийн үнэ ханш дэлхийн зах зээл дээр өссөн, гаднаас ажиллах хүчин бага орж ирсний сацуу өндөр мэргэжлийн ажилчдыг татах өрсөлдөөн гэх мэтийн олон шалтгаан нөлөөлсөн байх магадлалтай ажээ. Ямар ч байгууллага цалингаа хэдий хэмжээгээр нэмэгдүүлснээ зарладаггүй. Гагцхүү төлж буй НДШ-ээр цалин өссөн буурсныг харж болдог байна.

Дундаж болон голч цалингийн ялгаа
Олон улсад цалинг дундаж ба голч цалин гэсэн хоёр үзүүлэлт гаргадаг. Дундаж цалинд дээр дурдсан бүхий л орлого шимтгэл төлөөгүйгээр багтдаг бол голч цалинг тооцохдоо бүх цалингаа эгнүүлээд 50 дахь хувь дээр хэдэн төгрөг авч байгааг тооцдог. Энэ аргаар тооцохоор голч дундаж цалин 600 байхад дундаж цалин 900 мянган төгрөг болох жишээтэй. Дундаж болон голч цалингийн зөрүү их байх тусмаа орлогын ялгаа ихэсч байгааг харуулдаг онцлогтой. Иргэдийн орлогын ялгаа нэмэгдэх нь баялгийн хуваарилалт шударга бус явагдаж байна гэсэн үг. Зөрүү бага байх тусам баялгийн хуваарилалт тэгш явагдаж байгаа нь харагдана гэж мэргэжлийн статтстикч тайлбарлажээ.

“Вирүст хепатиттай тэмцэх дэлхийн өдөр”-ийг дэлхий нийтээрээ жил бүрийн 7 дугаар сарын 28-нд тэмдэглэн өнгөрүүлдэг. Тус өдрийг ДЭМБ-ын дэмжлэгтэйгээр ЭМЯ, Хууль зүй, дотоод хэргийн яам, Нийгмийн эрүүл мэндийн үндэсний төв, Төрийн тусгай албан хаагчдын нэгдсэн эмнэлэг хамтран “Вирүст хепатитын тархалтыг зогсооё” уриан дор тэмдэглэн өнгөрүүлж байна.

Өнөөдөр НЭМҮТ, ТТАХНЭ хамтран Тусгаар тогтнолын талбайд иргэдэд үнэ төлбөргүй дотор ЭХО, хоол боловсруулах эрхтэн, элэгний В,С вирүсийн хурдавчилсан оношилгоо, ясны сийрэгжилт тодорхойлох, шүдний нарийн мэргэжлийн эмч нар үзлэг хийн, зөвлөгөө өгөх, амин үзүүлэлт үзэх, биеийн жингийн индекс тодорхойлох, зөв хооллолтын зөвлөгөө өгөх зэрэг өвчлөхөөс урьдчилан сэргийлэх үзлэгийг 500 гаруй иргэдэд хийлээ.

Өвлийн бэлтгэл хангах ажлын хүрээнд “ДЦС IV” ТӨХК зуны ээлжит засварын зогсолтыг 2017 оны долоодугаар сарын 28-ны өдрийн 00:00 цагаас эхлүүлсэн.

“Эрдэнэт үйлдвэр” ХХК-ийн ээлжит засвартай зэрэгцүүлэн хийж байгаа уг засварын зогсолт долоодугаар сарын 31-ний өдрийн 10:00 цаг хүртэл үргэлжилнэ.

Засварын зогсолтын энэ хугацаанд “ДЦС IV” ТӨХК нэг зуух, нэг турбингенератортой /70 МВт ачаалалтай/ ажиллаж байгаа бөгөөд 72 цагийн дотор засварыг дуусгахаар төлөвлөөд байна.

Нэгдсэн сүлжээний хэмжээнд онцгой үеийн горимыг мөрдөж, шаардлагатай тохиолдолд зарим хэрэглэгчдийг 1-2 цаг цахилгаан эрчим хүчээр хязгаарлах графикийг мөрдөн ажиллана.

Өвлийн бэлтгэл ажлыг хангах хүрээнд засварын дээрх зогсолтыг таван жил тутамд мөрдөж, салбарын аюулгүй байдлыг хангадаг байна.

Олон улсын Физикийн 48 дахь олимпиад энэ жил Индонез улсын Ёгякатра хотод болж өндөрлөлөө.

Тус олимпиадад нийт 86 орны 400 гаруй сурагч оролцсон бөгөөд манай улсаас таван сурагч оролцож багаараа амжилт үзүүлээд эх орондоо ирсэн таатай мэдээг бид уншигч та бүхэнтэй хуваалцаж байна.

Тэд хоёр мөнгө, гурван хүрэл медаль хүртсэн бөгөөд улсынхаа амжлтаар эхний 30 дотор багтаж байгаа нь оюуны спортынхоо зэрэглэлээр ЖИ-20 буюу дээд хэмжээнд ойртжээ.

Уг олимпиадад монгол улс 1997 онд анх ажиглагчаар орж эхэлснээс хойш 20 дахь удаагаа оролцож байгаа юм.

Мөн энэ жил физикийн олон улсын олимпиад явагдаж эхэлсний 50 жилийн ой тохиож байгаа энэ түүхэн мөчид манай монгол хүүхдүүд бахархмаар сайхан амжилтыг үзүүлээд эх орныхоо нэрийг дэлхийд дуурсгаад ирлээ.

Тус багийн хүүхдүүдийг МУИС-ийн физикийн багш Д.Улам-Оргих ахлан явжээ.

Дараах сургуулийн сурагчид медаль хүртжээ.

• “Шинэ Монгол” сургуулийн сурагч Лхагвадоржийн Дөлгөөн мөнгөн медаль,
• “Сант” сургуулийн сурагч Луубаатарын Оюунтөгс мөнгөн медаль,
• Хөвсгөл аймгийн Ирээдүй сургуулийн сурагч Сарангэрлийн Сумъяажав хүрэл медаль,
• Нэгдүгээр сургуулийн сурагч Бямбажаргалын Амарболд хүрэл медаль,
• Нэгдүгээр сургуулийн сурагч Эрдэнэчулууны Гарьд хүрэл медалийг тус тус хүртжээ.

Тэднийг олимпиадад оролцоход Монгол-Германы хамтарсан ашигт малтмал, технологийн их сургуулийн зүгээс тав тухтай орчинд олимпиадын бэлтгэл, туршилтаа хийхэд нь сургуулийнхаа хотхонд үнэ төлбөргүй байрлуулж, лаборатори болон хичээлийн танхим, оюутны байраар хангаж тусалсан байна.

Тус сургуулийн багш хамт олон 3 дахь жилдээ олон улсын физикийн олимпиадад бэлдэж буй сурагчдад ийнхүү туслалцаа үзүүлж байгаа юм байна.

Цаашид ч инженер болох хүсэл мөрөөдөлтэй, МГТИС-д суралцалцахыг зорьж буй ирээдүйн сайн оюутнуудад тус сургуулийн хамт олон эрдмийн эрх чөлөө, тав тухтай, аюулгүй орчинд суралцах боломжоор хангах юм байна.