Month: May 2017

“1000 цагаан нөмрөгтөн” чуулганы бүрэлдэхүүн хэсэг болгон зохион байгуулагдаж буй “ХДХВ, ДОХ, БЗДХ-ын асуудлаарх үндэсний VII чуулган”-нд Эрүүл мэндийн сайд А.Цогцэцэг үг хэллээ.

Тэрбээр хэлэхдээ, Улсын хэмжээнд ХДХВ, ДОХ, БЗДХ-аас сэргийлэх, эмчилгээ тусламж үйлчилгээний чанар хүртээмжийг нэмэгдүүлэх, ХДХВ, ДОХ, БЗДХ-аас сэргийлэх үйл ажиллагаанд төр, иргэний нийгмийн хамтын оролцоог өргөжүүлэх зорилгоор энэхүү чуулганыг зохион байгуулж байгаа юм. Манай улс ХДХВ-ын тархалт багатай орны тоонд багтдаг хэдий ч, сүүлийн 5 жилд тууштай буурахгүй, нийт халдварт өвчний тогтмол 28-40 гаруй хувийг эзэлж байна. Бид үүнийг бууруулах үүднээс “Төрөөс эрүүл мэндийн талаар баримтлах бодлого”-доо тодорхой заалт оруулж, “Халдварт өвчнөөс сэргийлэх, хянах үндэсний хөтөлбөр”-ийг батлууллаа. ХДХВ/ДОХ-той тэмцэх үйл ажиллагаанд жилд дунджаар 5 орчим тэрбум төгрөгийг зарцуулдаг бөгөөд 56,6 хувийг улсын төсвөөс, 40,8 хувийг олон улсын байгууллагуудаас, 2,6 хувийг хувийн салбарын санхүүжилтээр шийдвэрлэж байна хэмээн онцоллоо.

Манай улсын нийт БЗДХ-ын өвчлөлийн 29,8 хувийг заг хүйтэн, 45 хувийг тэмбүү, 25 хувийг трихомониаз, 0,2 хувийг ХДХВ/ДОХ тус тус эзэлж байна. Чуулганд олон улсын байгууллага болон төрийн бус байгууллага, 21 аймгийн Эрүүл мэндийн газрын дарга нар, эмч мэргэжилтнүүдийн төлөөлөл 150 гаруй хүн оролцлоо.

Ойрд сэрүүхэн байсан цаг агаар маргаашнаас эхлэн дулаарч өдөртөө 25 градус хүртэл халах төлөвтэй байна. Энэ сарын14-нөөс эхлэн ихэнх нутгаар өдөртөө хална.

Ирэх долоон хоногийн цаг агаарын мэдээ:

17-нд нутгийн хойд хэсгээр хур тунадас орно. Бусад хугацаанд хур тунадас орохгүй. Салхи баруун өмнөөс секундэд 6-11 метр, 17-нд ихэнх нутгаар түр зуур секундэд 18-20 метр хүртэл ширүүсч шороон шуурга шуурна. Дулаарч Идэр, Тэс голын хөндий, Хүрэн бэлчир, Дархадын хотгор болон Хангай, Хөвсгөл, Хэнтэйн уулархаг нутгаар шөнөдөө 1-6 градус, өдөртөө 19-24 градус, Орхон-Сэлэнгийн сав, Их нууруудын хотгор болон говийн бүс нутгаар шөнөдөө 10-15 градус, өдөртөө 30-35 градус, бусад нутгаар шөнөдөө 6-11 градус, өдөртөө 25-30 градус дулаан байна. 17-нд нутгийн хойд хэсгээр сэрүүснэ.

Жил бүр уламжлал болгон зохион байгуулдаг “Автомашингүй өдөр” буюу ”“Улаанбаатар марафон” олон улсын гүйлтийн тэмцээн энэ сарын сарын 20-нд болно. Дэлхийн улс орнууд жил бүр автомашингүй өдрийг уламжлал болгон тэмдэглэдэг бөгөөд энэ жишгийн хүрээнд нэг ч гэсэн өдөр утаагүй, эрүүл а агаараармьсгалж, явган алхаж эрүүл мэнддээ анхаарахыг уриалан манай улс энэхүү арга хэмжээг 8 дахь жилдээ тэмдэглэн өнгөрүүлэх гэж байна.

“Улаанбаатар марафон-2017” олон улсын гүйлтийн тэмцээний үеэр зохион байгуулах үйл ажиллагааны хүрээнд Бага тойруу, Энхтайваны өргөн чөлөө, Баруун 4 замын уулзвараас Зүүн 4 зам хүртэлх авто зам, Сөүлийн гудамж, Бээжингийн гудамж, Анкарагийн гудамж, Самбуугийн гудамжны авто замын хөдөлгөөнийг хязгаарлах тул дээрх гудамж, авто замаар үйлчилгээ үзүүлдэг нийтийн тээврийн 34 чиглэлийн 331 тээврийн хэрэгслийн чиглэл, замналд өөрчлөлт оруулж байна. Тодруулбал, хотын төвийн буюу Их тойруу доторх гол гудамж, замууд хаагдах үед нийтийн зорчигч тээврийн үйлчилгээний чиглэлүүд хойгуураа Их тойруугийн гудамж, урдуур Нарны зам, Намъяанжугийн гудамжаар явах бөгөөд хойноос урагш болон урдаас хойш явдаг босоо чиглэлүүд Баруун 4 зам, Нарны гүүр, Зүүн 4 замаар үйлчилнэ.

Энхтайваны өргөн чөлөөний авто замын тодорхой хэсгийн хөдөлгөөн хаагдах тул тухайн өдөр троллейбус үйлчилдэг Т:2 “5 шар – Ботаник”, Т:4 ” Ботаник-Вокзал”, Т:5 “3,4 хороолол-Офицеруудын ордон” чиглэлийн нийтийн тээврийн хэрэгслүүд үйлчилгээ үзүүлэхгүй болохыг иргэдэд анхааруулж байна гэж нийслэлийн Тээврийн газраас мэдээллээ.

Цагдаагийн ерөнхий газраас “Иргэдэд ойр эрх зүйн үйлчилгээ” уриан дор Хууль зүй, дотоод хэргийн яамны харьяа агентлаг, байгууллагуудын нээлттэй хаалганы өдөрлөгийг зохион байгуулах гэж байна. Өдөрлөгийг 2017 оын 05-р сарын 17ны өдөр Их жанжин Д.Сүхбаатарын талбайд зохион байгуулна. Иргэд та бүхнийг хүрэлцэн ирэхийг урьж байна.

Хавар намартаа жилд хоёр удаа болдог номын баяр 21 дэх жилдээ Сүхбаатарын талбайд үргэлжилж байна. Номын худалдааг зорих хүмүүсийн цуваа тасрахгүй байгаа бөгөөд урьд урьдын жилүүдээс хөл хөдөлгөөн ихтэй байна. Сүүлийн үед хамгийн их эрэлттэй байгаа номын зохиогчидтой энэ л өдөр уулзан гарын үсэг, тамгатай номыг нь авах ховорхон боломж тохиож байна.

Энэ удаагийн яармагт хамгийн эрэлттэй байгаа номнууд нь хуучин номнууд байна. Эрж сураад олддоггүй хуучны ховор номнуудыг хүмүүс хайж сураглаж байгаад олж авч байгаа нь содон харагдаж байлаа. “Өдрийн сонин”-ы уран бүтээлчид уламжлал ёсоор энэ хаврын номын баярт оролцож байна.

Манай сонины эрхлэгч Ж.Мягмарсүрэнгийн амьтдын тухай сонирхолтой хүүрнэсэн “Барын зулзага бамбар” өгүүллэгийн ном, Төрийн шагналт Б.Цэнддоогийн шилдэг нийтлэлүүдийн ном, СГЗ Жамъяан гуайн “Сөрж сөхөрч туулсан хорвоо”, Болор цомын эзэн Норовын Гантулгын “Бөхөн шарын тэмдэглэл” ярилцлага, аян замын тэмдэглэлийн ном болон нээлтээ хийгээд удаагүй байгаа “Сэтгэлгээний шилэн хананд” яруу найргийн номууд нь үзэсгэлэнд оролцож байна.

Мөн Очирбатын Дашбалбар яруу найрагчийн 60 насны ойд зориулан хүүхдүүдийнх нь эмхэтгэн гаргасан “Амьддаа бие биеэ хайрла хүмүүсээ” шинэхэн ном, ярилцлагын хатан хаан хэмээн нэрлэгддэг сэтгүүлч Б.Ганчимэгийн “Аав бид хоёр” дурсамж, тэмдэглэлийн ном, Ж.Гангаагийн “Цагаан гэгээ” нийтлэлийн ном, сэтгүүлч, яруу найрагч Л.Батцэнгэлийн шүлгийн түүвэр, залуу сэтгүүлч Э.Энхболд, Д. Гансаруул, О.Өнөрцэцэг нарын яруу найраг, өгүүллэгийн номуудыг “Өдрийн сонин” асраар зочлон худалдан аваарай.

О.ӨНӨР

Нийслэлийн Засаг дарга С.Батболдоор ахлуулсан ажлын хэсэг дахин төлөвлөлтийн хүрээнд хийгдэж буй Сэлбэ коллекторын явц, Гэр хорооллын бие даасан дэд бүтцийн төв /Сервис центр/-ийн үйл ажиллагаатай өнөөдөр танилцлаа. Энэ үеэр нийслэлийн Засаг дарга С.Батболд хэлсэн үгэндээ “Хотын өмнө тулгамдаж буй гол асуудлын нэг бол иргэдийг орон сууцжуулах ажил юм. Нийслэлийн дахин төлөвлөлтийн хүрээнд өндөр давхрын орон сууц барьж, иргэдийн газрыг орон сууцаар солих хөдөлгөөн 28 байршилд эхлээд явж байна. Цаашид энэ ажлыг үргэлжлүүлэн 76 байршил болгох төлөвлөгөөтэй ажиллаж байгаа. Мөн “Сервис центр” буюу үйлчилгээний төв бүхий “Орон сууцны бичил хороолол”-ууд байгуулна. Энэ нь өөрөө иргэдийн газрыг авахгүйгээр Нийслэлийн төсвөөс иргэдэд дэд бүтцийн тал дээр дэмжлэг үзүүлнэ.

Энэ ажлыг хэрэгжүүлэхэд хамгийн гол нь иргэдийн оролцоо чухал байна. Төслийн давуу тал нь иргэд өөрсдийн газар дээрээ зохион байгуулалт хийх юм. Анхны төсөл энэ зунаас хэрэгжиж эхэлнэ” хэмээлээ. Энэхүү төслийг хэрэгжүүлснээр нийслэлийн гэр хорооллын айл өрхүүд ил задгай жорлонтой, бохир ус, хог хаягдлаа жалганд асгадаг байдлаасаа татгалзан байгаль экологид хор нөлөөгүй сууцанд амьдрах, гадаргын усыг хуримтлуулан цэвэршүүлж, ахуйн хэрэглээнд ашиглан гүний цэвэр усаа хэмнэх боломж бүрдэх юм байна. Түүнчлэн “Орон сууцны бичил хороолол” байгуулснаар Улаанбаатар хотын гүний усны нөөц, эх үүсвэрүүдийг хамгаалж, бохирдох эрсдэлийг бууруулах төдийгүй агаар, хөрс, усны бохирдол үүсгэгч эх үүсвэрүүдийг арилгаснаар халдварт өвчлөл бодитойгоор буурна гэж тооцжээ. Мөн газрын үнэ өсч, жижиг дунд бизнес эрхлэх боломж бүрдэн, иргэдийн үл хөдлөх хөрөнгийн үнэлгээ өсөх зэргээр олон эерэг үзүүлэлт гарна гэдгийг тус төвийнхөн танилцуулж байлаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Өнөөдөр бүх нийтээр мод тарих өдөр тохиож байна. Монгол Улсын Ерөнхийлөгчийн “Мод тарих үндэсний өдөр зарлах тухай” зарлигийг хэрэгжүүлэх зорилгоор 2017 оны хаврын бүх нийтээр мод тарих өдрийг өнөөдөр тэмдэглэн өнгөрүүлж байна. Үндэсний цэцэрлэгт хүрээлэнд 11:00 цагаас нээлт нь болов.

Энэ өдөр уламжлал ёсоор дүүрэг бүр мод, сөөг тарих газруудыг сонгож бэлтгэн, үзэсгэлэн худалдаа зохион байгуулж, дүүрэг, хороод, аж ахуйн нэгж байгууллага, айл өрх, иргэд өргөнөөр оролцох юм. Энэхүү үйл ажиллагааг улсын хэмжээнд 14 удаа зохион байгуулж, 10,1 сая мод тарьжээ. Мод тарих өдрийн бэлтгэл ажлын хүрээнд Байгаль орчин, аялал жуулчлалын яам, нийслэлийн Байгаль орчны газар, Ойн судалгаа хөгжлийн төв, Ногоон хэрэм төслөөс “Тарьц суулгац-2017” үзэсгэлэн, дүүрэг бүрийн төлөөлөл 400 гаруй иргэдийг хамарсан сургалт зохион байгуулж, мод тарих арга зүйг үзүүлсэн видео хичээл бэлтгээд байгаа аж. Бүх нийтээр мод тарих өдрийн арга хэмжээнүүдэд идэвхтэй оролцохыг нийслэлийн Байгаль орчны газраас уриалж байна.