Month: May 2017

Монголын Ерөнхий сайд Ж.Эрдэнэбат саяхан Бээжинд болсон “Бүс ба зам”олон улсын хамтын ажиллагааны форумын үеэр Хятадын төв телевиз болох CCTV-д ярилцлага өглөө. Тэрбээр дэлхийн улс төр, эдийн засгийн өнөөгийн байдалд “Бүс ба зам” санаачилга нь маш гүн гүнзгий ач холбогдолтой гэдгийг дурдлаа.

Монголын Ерөнхий сайд Ж.Эрдэнэбат хэлэхдээ, олон улсын улс төр, эдийн засгийн байдал хөгжил, өөрчлөлтийн үедээ ороод байна, энэ нь бидний хамтдаа хэрэгжүүлэх тогтвортой хөгжлийн зорилтод асар том сорилт болж байна.

Дэлхий даяар улс төр, эдийн засгийн маш хүнд нөхцөлтэй тулгарч байна, ийм нөхцөлд БНХАУ-ын дарга Си Жиньпин ”Бүс ба зам” санаачилгыг дэвшүүлэн тавьсан ба энэ нь улс орнуудын харилцан ашигтай, хамтран хожих, хамтдаа хөгжин дэвжихэд чухал нөлөөтэй юм.

Хятад улсын анх удаа санаачилсан “Бүс ба зам”олон улсын хамтын ажиллагааны форумын үеэр 29 орны төр засгийн тэргүүн нар нэг дор цугларсны дээр НҮБ, Дэлхийн банк, ОУВС зэрэг олон улсын байгууллагууд идэвхтэй оролцлоо. Ингэснээр “Бүс ба зам” санаачилга нь олон улсын маш чухал үйл хэрэг , дэлхийн хөгжлийн бэлгэ тэмдэг болж, дэлхийн бүх хүмүүст үр өгөөжөө түгээж байгааг харуулж байна.

Монголын Ерөнхий сайд цааш нь хэлэхдээ “Хятад улсын дарга Си Жинпин дарга “Бүс ба зам”-ын бүтээн байгуулалтыг олон орон оролцсон найрал дуу хэмээн тодорхойлсон. Энэ утгаараа Монгол Улс ч гэсэн мөн адил өөрийн үндэсний зэмсэг /өөрийн хөгжлийн онцлогийг харгалзан/ болох “Хөгжлийн зам”-ыг дэвшүүлсэн” гэлээ.

Монгол Улс ч мөн адил энэхүү найрал дуунд өөрийн гэсэн дуу хоолойг гаргах болно. “Бүс ба зам” санаачилга нь бүх улс орнуудад харилцан зөвлөлдөх явцад яриа өрнүүлэх боломжийг олгож байгаа ба энэхүү яриа хэлэлцээ нь зөвхөн нэг бүс нутгаар хязгаарлагдахгүй харин бүхэл бүтэн дэлхий нийтийг хамрах болно. Иймээс дэлхийн бүх улс орны ард түмэн уг санаачилгыг дэмжиж, “Бүс ба зам” санаачилгын үр өгөөжийг хүртэхийг хүлээж байна. “Бүс ба зам” санаачилгын бүтээн байгуулалтын явцад хамтын ажиллагаа нь өгөөжөө өгч, хөгжлийн зорилтоо биелүүлэхэд бидэнд тус дөхөм болно гэж найдаж байна.

УИХ-ын чуулганы нэгдсэн хуралдаанаар Эрүүгийн хэрэг хянан шийдвэрлэх тухай хуулийн шинэчилсэн найруулгын төслийг хэлэлцэж байна. Өмнөх парламентын үед энэхүү хуульд өөрчлөлт оруулж прокурорын дэргэдэх мөрдөн байцаах албыг татан буулгасан юм. Энэ удаад уг албыг сэргээх шаардлагатай эсэхийг хэлэлцэж байна. Өнгөрсөн долоо хоногийн чуулганы нэгдсэн хуралдааны үеэр прокурорын дэргэдэх мөрдөн байцаах албыг сэргээн байгуулах санал дэмжигдсэн юм. Гэвч Хууль зүйн байнгын хороо эцсийн хэлэлцүүлэгт бэлтгэх үеэр гишүүд санал гаргаж гуравны хоёрын дэмжлэгтээгээр прокурорын дэргэдэх мөрдөн байцаах алба байх шаардлагаггүй гэсэн саналын томъёолол бэлтгэжээ.

Гишүүд асуулт асууж, хариулт авч байна.

УИХ-ын гишүүн О.Баасанхүү:Эрүүгийн байцаан шийтгэх хууль орж ирж байхад хэргийн харьяалал дурдагдаж байна. Эх орноосоо урвахгүйгээр тагнуулын ажиллагаа хийж болно гэх мэт олон заалт орж ирсэн. Үүнийг яагаад ингэж яаран оруулж ирж байгаа юм бэ. Шүүхийн шийдвэр эцсийнх байх ёстой гэж заажээ. Гэтэл хоёр гурван жилийн дараа дахиж сөхвөл яах вэ. Дайны үед эх орноосоо урваж болно, бусад үед урваж болно гэж байна. Урвагчдыг өөхшүүлэхээ болиоч ээ. Эх орноосоо урвах гэдэг бол тусдаа бие даасан зүйл анги. Гэтэл үүнийг яах гэж оруулж ирсэн юм бэ

УИХ-ын гишүүн Х.Нямбаатар:О.Баасанхүү гишүүний хууль санаачлах эрхийг бид хаагаагүй. Хоёр жил унтаж байгаад босч ирсэн юм уу хаашаа юм бэ. Өөрийнхөөрөө, ганцаараа хуулийг тайлбарлаад байх юм. Ард иргэдийн сэтгэл санааг үймүүлсэн буруу юм ярихаа болиоч ээ. Хөнгөн хэргүүд дээр одоогийн хэргүүдийн хөөн хэлэлцэх хугацааг зааж өгсөн байгаа. Гишүүнд нэг ярьсан юмаа өдөр бүр 10-15 удаа давтаж хэлмээргүй байна. Та өөрөө жинхэнэ экстермист үйл ажиллагаа явуулж байна шүү.

Чуулганы үдээс өмнөх хуралдаан үргэлжилж байна.

О.ӨНӨР

УИХ-ын гишүүн С.Жавхлан өнөөдөр Төрийн ордонд мэдээлэл хийлээ. Тэрбээр өнгөрсөн дөрөвдүгээр сарын 19-нд УИХ-ын дарга М.Энхболдод шаардлага хүргүүлсэн юм байна. Шаардлагын хариуг дөрөвдүгээр сарын 25-ны дотор өгөхгүй бол Байнгын хороо болон чуулганы хуралдаанд суухгүй гэдгээ илэрхийлжээ.

Уг шаардлагадаа “УИХ-д олонхийн суудал бүхий танай намд доорх дурдсан шаардлагуудыг хүргүүлж байна. Хилийн чандад данстай гишүүдийнхээ нэрсийг санаачлагчтай ил тод зарлах, Их хурлын гишүүнээс татуулах, хилийн чандад данстай төрийн өндөр албан тушаалтай гишүүдийн нэрсийг зарлан, албан тушаалаас нь буулгах, намын гишүүдийнхээ хилийн чандад байгаа мөнгийг Ерөнхийлөгчийн сонгуулийн нэрс тодрохоос өмнө гаргах, эрх баригч намын хувьд татварын асуудлыг эргэн харж, гаргасан буруу шийдвэрийнхээ төлөө нийт түмэн олноос уучлал гуйх ёстой” хэмээжээ.

Хэвлэлийн хурлын үеэр С.Жавхлан гишүүн хэлэхдээ “Олонхийн саналыг авч, хэнээс ч юунаас ч айлгүй санал бодлоо хэлж байна. Гэтэл намайг нохой хуцсан чинээ тоохгүй байна. Хүний олон хүнээ барьдаггүй гэдэг, гэтэл барьдаг болчихсон цаг болж. Түмэн олныхоо төлөө нэг ч шийдвэр гаргаддаггүй төрд байх нь зөв ч юм уу буруу ч юм уу’’ хэмээн юм. Мөн түүнчлэн “Намайг тэмцэл хийж, хурал тасаллаа гэж байна. Энэ талаар тайлбарлахаар өнөөдөр хэвлэлийнхэнд мэдээлэл хийж байна. Өмнө нь УИХ-ын даргад хүргүүлсэн шаардлагыг дахин сануулах үүднээс дахин УИХ-ын даргад шаардлага өгч байна. Монгол Улсын Ерөнхийлөгч, УИХ-ын дарга, Ардчилсан намын дарга, Хувьсгалт намын дарга нарт түрүүчийн шаардлагатайгаа хавсарган шаардлага хүргүүлж байна.

Хилийн чандад мөнгөө нуусан хүн л ялдаг юм байна. Үнэн худалд ялагддаг юм байна. Монгол түмний заяа буян хаяж, сэтгэл нь харалган болбол сайхан зүйл болоод ч яах билээ. Завсарлага ч авах эрхгүй, Засалт ч байх эрхгүй болчихлоо би. Намайг байхгүй үед энд сайхан байдаг юм шиг байна. Дэнжийн мянгын Дорж, Долгорын амьдралд нөлөөлөх хууль гарахгүй байна. Эрх баригчид өөрсдийн бузар булайг халхалсан хууль хийж байна. Би энд байгаад буулгалаа, ялагдлаа, гуниглалаа, гутарлаа. ТҮЦ-ийн асуудал нийгэмд асуудал дагуулж байхад тэдний төлөө юу ч дугараагүй хэр нь оффшорчдоо хамгаалсан хууль баталж байна. Би тойрогтоо юм тарааж, ганц зам барих гэж гишүүн болоогүй” гэсэн юм.

Миний шаардлагад залруулга хийж өгнө үү хэмээн хүсэж байна. Энэ бүхэн шийдэгдэхгүй бол дараа долоо хоногт дахин мэдээлэл хийнэ.

МАХН-аас Ерөнхийлөгчийн сонгуульд УИХ-ын гишүүн асан С.Ганбаатарыг нэр дэвшүүлэх болсонтой холбогдуулан тус намаас хэвлэлийн бага хурал хийлээ.

Хэвлэлийн хурлын үеэр нэр дэвшигч С.Ганбаатар хэлэхдээ: Дөрвөн асуудлын талаар би хариулт өгөх гэсэн юм. Нэгдүгээрт, Ерөнхийлөгч бол нам биш ард түмнийг төлөөлж сонгогддог. Би 2016 онд нам бусаар УИХ-д дэвшиж байсан. Энэ намын үзэл суртал бол зүүн төв буюу жирийн ард иргэдийн эрх ашгийг төлөөлдөг. Хоёрдугаарт, миний боловсролын асуудал яригдаж байна. Оюутолгой дээр мэтгэлцсэн хүн С.Баярцогт өндөр боловсролтой хүн. Одоо тэгвэл бид хоёрын хэн нь өндөр боловсролтой байгааг цаг хугацаа харуулж байгаа байх. Гуравдугаарт, О.Баасанхүү гишүүн намайг дэмжиж байгаа эсэх талаар хүмүүс их сонирхож байна. Өнгөрсөн хугацаанд би түүнтэй хамт зовлон жаргалаа нэгтгэж, хамтдаа зүтгэж явсан болохоор итгэж байна. Одоо түүнээс очоод асуусан ч болно. Тэр намайг дэмжиж байгаа.

Надад Монголыг аврах төлөвлөгөө байгаа. Би Н.Энхбаярыг тууштай дэмжиж сонгуульд оролцоно гэдгээ саяхан болтол илэрхийлж байсан. Өмнө нь намайг дэвших үү гэж О.Баасанхүү гишүүн асуухад “Дэвшихгүй” гэж хариулж байсан. Гэхдээ Бага чуулганаар ингэж шийдсэн учир нийт ард түмнийхээ эрх ашгийн төлөө би зүтгэнэ ээ.

Мөн МАХН-ын Гүйцэтгэх товчооны гишүүн Ц.Оюунбаатар: Манай С.Ганбаатар бол эгэл бор амьдралаас гарч ирсэн. Багадаа ээж нь нас барж олон дүү нараа гарыг нь ганзаганд хөлийг нь дөрөөнд хүргэсэн. Гадаадад хар бор ажил хийж, Монголд боловсрол эзэмшсэн. Боловсрол бол эцэг өвгөдөөс дамжсан цогц асуудал байдаг. Ганц дипломны асуудал биш шүү. 300 тэрбум ам.долларын баялагтай эх оронд төрчихөөд ядуу зүдүү амьдарч байгаа нь бидний буруу биш. Энэ бол МАНАН бүлэглэлийн буруу. Тиймээс бид түүнийг ард түмнийхээ төлөө ачаа үүрч чадна гэж бодож дэвшүүлж байгаа юм.

Энэ үеэр “О.Баасанхүү гишүүн намаасаа гарвал МАХН сонгуульд оролцох эрх байгаа юу” гэсэн сэтгүүлчийн асуултад тус намын Ерөнхий нарийн бичгийн дарга Э.Эрдэнэжамъяан “Сонгуулийн үр дүнгээр энэ асуудал шийдэгддэг. Манай нам сонгуулиар суудал авсан нь үнэн. Тийм учраас бидэнд хүнээ дэвшүүлэх эрх хэвээр хадгалагдана. Бид энэ сонгуульд ялсны дараа О.Баасанхүү гишүүн хамтдаа баяраа тэмдэглэнэ гэдэгт итгэж байна” хэмээн хариулсан юм.

О.ӨНӨР