Month: May 2017

-Ерөнхий сайд өнөөдөр Булган, Орхон аймагт ажиллана-

Энэ онд улсын хэмжээгээр 381,6 мянган га-д үр тариа, 23,6 мянган га-д төмс, хүнсний ногоо, 23,2 мянган га-д тэжээлийн таримал, 28,6 мянган га-д тосны ургамал, нийтдээ 458,0 мянган га-д тариалалт хийхээр бэлтгэл ажлаа хангаж, тариалалтын ажил ид явж байна.

Монгол Улсын Ерөнхий сайд Ж.Эрдэнэбат тавдугаар сарын 21-ний ням гаригт газар тариалангийн бүс нутаг Төв, Дархан-Уул, Сэлэнгэ аймагт ажиллаж, зарим аж ахуйн нэгжийн тариалалтын явцтай танилцаж, тариаланч, ногоочидтой уулзан, тэдний өмнө тулгамдсан асуудлыг сонслоо. Төв, Дархан-Уул, Сэлэнгэ аймагт ажилласан Ерөнхий сайд Ж.Эрдэнэбат өнөөдөр Булган, Орхон аймагт ажиллах юм.

Япон Улсад төмс экспортолно

Монгол Улсын Ерөнхий сайд Ж.Эрдэнэбат амралтын энэ өдөр эхлээд Төв аймгийн Жаргалант сумын нутаг дахь “Хөх баян булаг” ХХК-ийн улаан буудайн тариалалтын явцтай танилцлаа.

Тус компани энэ онд 3000 га-д улаанбуудай тарихаар төлөвлөсөн байна. Өнгөрөгч дөрөвдүгээр сарын 8-нд тариалалт эхэлсэн, өнөөдрийн байдлаар 93 хувьтай байна. Газрын чийг сайн байна. Энэ жил Засгийн газар үүлэнд зориудаар нөлөөлөх хөрөнгийг шийдвэрлэсэн. Иймд хур бороо, чийг хангалттай сайн авна гэдэгт итгэж байгаагаа тус компанийн захирал Ж.Ариунболд хэлээд Засгийн газрын тэргүүнд талархлаа илэрхийллээ.

Хүнсний ногоо, ялангуяа төмсний борлуулалтад Засгийн газар бодлогоор дэмжиж оролцох, төрийн худалдан авалт хийж ногоочид, тариаланчдаа дэмжихийг тус компанийн захирал хүсч байлаа. Энэ асуудалд Засгийн газар анхаарч ажиллаж байгаа. Тухайлбал, Японы компаниуд монгол төмс худалдан авах захиалга ирүүлж байгаа. Одоогоор хоёр удаагийн дээж явуулсан нь тус улсын стандартад тэнцээд байгааг Ерөнхий сайд хэлж байлаа. Ингэхдээ тариаланчид маань төмс, хүнсний ногооны чанарт онцгой анхаарч, хэрэглэгчдийн шаардлагад нийцсэн чанартай бүтээгдэхүүн гаргах ёстой гэдгийг хэлж байлаа.

Төв аймгийн Засаг даргын захирамжаар тариалалтын штаб байгуулагдсан. Тавдугаар сарын 5-нд аймгийн хэмжээнд тариалалт эхэлсэн. Энэ үеэр чийг унасан. Өнөөдөр л гэхэд хөрсний чийг хангалттай байна. Манай аймаг 93 мянган га-д үр тариа тариалахаар төлөвлөсөн, энэ сарын 20-ны байдлаар тариалалт 50 хувьтай, 6500-га-д төмс, 900 гаруй га-д хүнсний ногоо, 7000 гаруй га-д тэжээлийн ургамал тариалж байна. Энэ эрчээрээ явахад зургадугаар сараас өмнө тариалалт дуусна гэж тус аймгийн Засаг даргын Тамгын газрын дарга Ч.Сарангэрэл хэлж байлаа.

Хөрс арчилгаа, хөрс хамгаалах чиглэлээр Хятадтай хамтарсан лаборатори байгуулна

Ерөнхий сайд Ж.Эрдэнэбат дараа нь Дархан-Уул аймгийн Хонгор сумын “Газар өгөөж” ХХК-ийн хаврын тариалалтын явцтай танилцлаа.

Тус компани нийт 7300 га талбай эзэмшдэг бөгөөд энэ онд 4500 га-д нь улаан буудай тариалахаар төлөвлөжээ. Одоогоор тариалалтын явц 80 гаруй хувьтай байна гэж тус компанийн удирдлага Ерөнхий сайдад танилцууллаа. Тус компани 2012 оноос хойш техникийн шинэчлэл бүрэн хийсэн, улаан буудай, тосны ургамал, гурвалжин будаа зэрэг таримлуудыг сэлгэн тариалж байгаа ажээ.

Энэ уулзалтын үеэр хөндөгдсөн гол сэдэв нь хөрс арчилгааны тухай байлаа. Тариаланчид арвин ургац авахын тулд хөрсний үржил шимийг хамгаалах, сайжруулах, нөхөн сэргээх нь чухал. Тус компани эзэмшил талбайдаа мэргэжлийн шинжилгээ хийлгэх, дутагдаж буй эрдэс бодисоор бордох, сэлгэн тариалалт хийх зэрэг арга хэмжээ авч буй гэлээ.

Хүнс, хөдөө аж ахуй, хөнгөн үйлдвэрийн сайд П.Сэргэлэн “Хөрс арчилгааны чиглэлд Монгол Улс БНХАУ-тай хамтран ажиллана. Энэ хүрээнд хөрс арчилгаа, шинжилгээний хамтарсан лаборатори байгуулахаар тохирсон” гэж хэллээ.

Дархан-Уул аймаг энэ жил 16100-га-д үр тариа тариалахаар төлөвлөсөн. Гүйцэтгэл нь 75 хувьтай байна. 14 хоногт багтаан төлөвлөгөөт тариалалтаа бүрэн хийх боломжтой. Зургаан сарын эх гэхэд үр тариа, төмс, хүнсний ногоогоо тарьж дуусна. Манай аж ахуйн нэгжүүд ургац алдахгүй, орон нутгийн төсвийн орлогыг бүрдүүлэх, ажлын байрыг тогтмолжуулах, чадавхжуулахад анхаарч байгаа. Хөдөө аж ахуйн салбарын хөгжил жил ирэх бүр сайжирч байна. Боловсон хүчний нөөцөө өндөр хөгжилтэй орнуудад сургаж бэлтгэхэд ахиц дэвшил гарч байгаа гэж тус аймгийн Засаг дарга С.Насанбат ярилаа гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

УИХ дахь Ардчилсан намын бүлэг мэдээлэл хийлээ. Төрийн албаны тухай хуулийн өөрчлөлт нь хэт улстөржсөн байгааг тэд онцлов.

АН-ын бүлгийн дарга Д.Эрдэнэбат “Төрийн албаны зөвлөлийг үгүйсгэсэн хууль болж байна. ЗГХЭГ-т эрх мэдлийг төвлөрүүлсэн нь улстөржсөн үйлдэл юм. Төрийн албанд орох эрх нь бүх иргэнд нээлттэй байх ёстой. Шинээр сургууль төгссөн мэргэжил боловсролтой боловсон хүчнийг төрийн албанд ороход нь саад учруулах заалтууд байна. Монгол Улсын Ерөнхийлөгчийн өнгөрсөн парламентын үед өргөн мэдүүлсэн Төрийн албаны тухай хуулийн төсөл сайн, чамбай болсон байсан. Одоогийн хуулийн төсөлд Ерөнхийлөгчийн өргөн мэдүүлсэн төсөлд тусгасан байсан төрийн албан хаагчдыг цахим бүртгэлтэй болгох заалт байхгүй байна. Үндсэндээ ЗГХЭГ улс төрийн байгууллага болж хувирах нөхцөл бүрдүүлсэн төсөл болжээ. Төрийн албаны зөвлөл Үндсэн хуулийн цэцтэй адил байгууллага байх ёстой” гэлээ.

2016 оны ээлжит сонгуулиас хойш төрийн албанд 22235 хүн солигджээ. Тодруулбал, 3100 хүн тэтгэвэрт, 6100 хүн өөр ажилд шилжиж, 7700 хүн өөрийн хүсэлтээр ажлаас чөлөөлөгдөж, 5200 хүн хууль бусаар ажлаасаа халагдсан байна. Эрх баригчид Төрийн албаны тухай хуульд өөрчлөлт оруулах гэж байгаа нь дээрх томилогдсон хүмүүсээ шинэ батлагдах хуулийн хүрээнд ажилд нь үлдээх зорилго хэмээн сөрөг хүчнийхэн үзэж байгаа аж. Тиймээс энэ хуультай хамтатган УИХ-ын тогтоолыг батлах ёстой гэлээ.

Түүнчлэн төрийн албаныхан дунд аттестачлал заавал явуулах ёстой гэдгийг ч хэлсэн. Мөн улс төрийн албан тушаалтан гэдэгт ямар хүмүүс орох вэ гэдгийг дахин тодорхойлох хэрэгцээ шаардлага үүссэн хэмээн АН-ын бүлгийн дарга хэллээ.

Сүхбаатар аймгийн ИТХ 33 суудалтай бөгөөд МАН 17, АН 16 суудал авч хүч тэнцүүхэн болсон. Тэнцүүхэн шахам суудал авсан намууд аль нэгийгээ хүлээн зөвшөөрөлгүй маргасаар өнөөг хүрчээ.

Намуудын үл ойлголцлоос болж иргэд хохирох ёсгүй тул намууд зөвшилцөхөөр болжээ. Ингээд 5-р сарын 20-ны өдөр МАН-ын нарийн бичгийн дарга Ц.Бат-Энх, АН-ын Ерөнхий нарийн бичгийн дарга Ц.Туваан, Сүхбаатар аймгийн МАН-ын хорооны дарга З.Энхтөр, Сүхбаатар аймгийн АН-ын хорооны дарга М.Идэрбат нар хамтарсан зөвшилцөлд хүрч, санамж бичигт гарын үсэг зуржээ. Хоёр зүйлтэй тус санамж бичиг байгуулсан өдрөөсөө хүчин төгөлдөр мөрдөгдөж эхэлсэн байна.

Сингапурын Үндэсний хөгжлийн яам, Сингапурын “Тав тухтай хот” төв, Сүжоу хотын Ардын Засгийн газар хамтран БНХАУ-ын Жяньсу мужийн Сүжоу хотод энэ сарын 18-21-ний өдрүүдэд дэлхийн хотуудын 8 дахь удаагийн дээд хэмжээний уулзалтыг амжилттай зохион байгууллаа.

Дээд хэмжээний уулзалтын хүрээнд “Дэлхийн хотын дарга нарын форум” болон “Дэлхийн залуу удирдагчдын симпозиум” болсон юм. Дэлхийн 60 гаруй хотын төлөөлөгч оролцсон энэхүү уулзалтаар хотуудын өмнө тулгарч буй асуудлууд болох дэд бүтцийн санхүүжилт, хотын засаглал, хотын өв соёлыг хадгалан хөгжүүлэх, байгаль орчны тэнцвэртэй байдлыг ханган тогтвортой хөгжүүлэх зэрэг асуудлаар илтгэл тавигдаж, хэлэлцүүлэг явагдсан байна. Мөн оролцогчид харилцан санал солилцож, уулзалт илүү ажил хэрэгч хүрээнд өрнөж дууссан аж. Дээд хэмжээний энэхүү уулзалтад Улаанбаатар хотыг төлөөлж, нийслэлийн Засаг даргын орлогч Ш.Анхмаа оролцлоо. Тэрбээр хэлэлцүүлэгт өөрийн санал бодлоо илэрхийлж, зарим хотын удирдлагатай уулзан туршлагаас хуваалцав.

Дашрамд дурьдахад Сүжоу нь уламжлалт өв соёлоо хадгалж үлдсэн түүхт хот бөгөөд Сингапурын удирдагч асан Ли Киан Ю-ын нэрэмжит дэлхийн шилдэг хотоор 2014 онд шалгарч байсан аж. Дэлхийн хотуудын 9 дэх удаагийн дээд хэмжээний уулзалт ирэх оны долоодугаар сард Сингапурт зохион байгуулагдана.