Month: April 2017

Categories
их-уншсан онцлох-нийтлэл туслах-ангилал

Ганцхан оффшорчинтой мэт С.Баярцогтыг баалахын цаад учир

Оффшорын тухай яриа сүүлийн үед ид хүчээ авч байна. Оффшор бүсийн тухай ярьдаггүй ч хүнгүй болж, энэ тухай ам нээхгүй бол өөрөө оффшорчин болчихож байгаа мэтээр амтай болгон уралдан ярьж, хамаг муу муухайн жишээ болгон бөөлцгөөж байна. Бүр төв талбай дээр оффшорчдын эсрэг жагсаал, суулт болон өргөжив шүү. Зарим хүнийг харж байхад оффшор гэдэг ойлголтоо ч муухан мэддэг болов уу гэж бодогдох юм. Хэнд ч үзэл бодлоо илэрхийлэх, жагсах, тэмцэх эрх бий. Гэхдээ оффшор ярьж байгаа хүмүүс бүгд адилхан, амнаасаа нэг л хүний нэрийг жишээ болгон унагах юм. Тэдний оффшорын жишээ болгон ярьдаг ганцхан хүн нь С.Баярцогт. Монголд ганцхан оффшорчин байдаг, тэр нь С.Баярцогт гэж хичнээн ч жил улиглан ярив. АН, МАН бүр Иргэний хөдөлгөөнийхөн хүртэл ингэж зүхнэ. Эдэн дундаа АН нь бусдаасаа арай илүү хашгирч байгаа харагдах юм. Саяхан УИХ-ын чуулганаар Оффшорын эсрэг хууль батлахад С.Баярцогтыг шийтгэсэнгүй гэж улайран дайрч ч байх шиг. Ямар ч тохиолдолд хууль эргэж үйлчилдэггүй ёстой. Хэрэв хууль эргэж үйлчилдэг бол энэ нийгэм хөл толгойгоо алдаж, эмх замбараагүй байдал үүснэ. Үүнийг мэддэг ч эс мэдэн будилагчид С.Баярцогтыг шоронд хатааж байж санаа нь амрах гэсэн юм болов уу.

Одоогоос дөрвөн жилийн өмнө буюу 2013 онд УИХ-ын дэд дарга С.Баярцогттой холбоотой гэж оффшорын дуулиан тархсан билээ. Швейцарийн банкинд нэг сая долларын нууц данстай гэх мэдээллийн хариуд тэрбээр “Олон улсын үнэт цаасны арилжаа нээхийн тулд хоёр найзын хамт данс нээж байсан. Одоо миний дансанд 2000 шахам евро л бий” гэсэн даруухан тайлбар хийгээд өнгөрсөн. Мөн үүнийгээ хөрөнгө орлогын мэдүүлэгтээ мэдүүлээгүй хэмээн өөрөө ёсзүйн хариуцлага хүлээн УИХ-ын дэд даргын албан тушаалаа сайн дураараа хүлээлгэн өгсөн байдаг. Үнэндээ С.Баярцогтын нэг сая доллар гэдгийн дэргэд одоо нэр нь тодроод байгаа оффшорчингуудын мөнгө хавьгүй их жинтэй дуулдах юм. Аль дөрөв, таван жилийн өмнөх зүйлийг ярьж байхаар шил шилээ даран гарч ирсээр байгаа оффшорчингуудаа яагаад ярьдаггүй билээ гэдэг тун сонин юм. Уучлал гуйж, албан тушаалаа хүлээлгэн өгч хариуцлага хүлээсэн С.Баярцогт одоо улс төрд байхгүй. Байхгүй тусам балбаад байх юм. Намынхан нь хүртэл “энэ оффшорчинг Бодлогын зөвлөлдөө оруулахгүй” гээд нэрийг нь хасч байх жишээтэй.

Яг одоо эрх барьж буй намаас УИХ-д сонгогдсон арав, хорин гишүүн оффшор бүсэд данстай, хичнээн сая доллараар нь мөнгөө байршуулсан гээд зөндөө зарлах юм. Тэрийг тоож байгаа хүн байна уу. Эрх баригчид болохоор юун уучлал гуйх “Тэр чинь би биш” гэх анзааны тайлбар шидчихээд гүрийчихэд бүгд дуугүй болчихож байна. Харин ч заримд нь албан тушаал өгч гадаадад Элчингээр залж байх юм.

Монголд оффшортой холбогдсон хүмүүсээс С.Баярцогтоос өөр хэн ч уучлал гуйж, албан тушаалаа өгч өөрөө өөртөө хариуцлага тооцож байсангүй.

С.Баярцогт бол Монголын улс төрд гялалзаж яваа улстөрч. Түүний намтар, туулж ирсэн замнал нь үр хүүхдэдээ үлгэр дуурайл болгомоор бахархам түүхээр дүүрэн юм. Арван жилээ алтан медаль, их сургуулиа улаан дипломтой төгссөн тэрбээр Москва хотын Улсын их сургуулийг эдийн засагч, багш мэргэжлээр дүүргэжээ. Мөн ХБНГУ-ын Гадаад худалдааны академийг бизнесийн удирдлагын мэргэжлээр, АНУ-ын Колумбийн их сургуулийг олон улсын эдийн засагч мэргэжлээр, МУИС-ийг хуульч мэргэжлээр төгссөн хүн. Орос, англи, герман хэлтэй. Сурч болох бүхий л сургуульд сурсан өндөр боловсролтой залуу. 23-хан насандаа буюу 1990-1992 онд АИХ-ын депутат, Улсын бага хурлын гишүүнээр сонгогдон ажиллаж, шинэ Үндсэн хуулийг батлалцсан хамгийн залуу улстөрч болжээ. Түүний намтар түүх УИХ, Засгийн газрын гишүүн гэсэн хариуцлагатай албан тушаал хашиж байсан он жилүүдээр зузаарсаар байгаа.

Ийм өндөр боловсролтой, гялалзсан амжилттай яваа түүнд хүний өөрийн гэлтгүй атаархаж үхэх шахдаг биз ээ. Тиймээс л С.Баярцогтыг нийгмийн шаар шавхруу мэт есөн шидээр нь муулдаг. Хэрэв муулагчдын үгэнд автах юм бол “Энэ нөхрийг яаж газар дэлхий даадаг байна аа” гэж бодмоор. Харин энгийн ард түмэн өөр бодолтой байдаг, энэ боловсролтой залууг үнэлж, хүндэлдэг гэдэг нь саяхны нэгэн сонгуулиас харагдаж байна. АН-ынхан Бодлогын зөвлөлөө сонгох сонгуульдаа С.Баярцогтыг оруулахгүй гэсэн ч намын жирийн гишүүд түүнд хамгийн олон санал өгч гаргаад ирсэн байдаг. Үүн шиг Монголын төрд С.Баярцогт шиг өндөр боловсролтой, шинэ цагийн шилдэг залуучуудыг гаргаж ирэх хэрэгтэй байна. С.Баярцогт гэх энэ эрхэмд сайндаа би ингэж хэлсэнгүй. Мухар сүсэг биш боловсрол, мэдлэгтэй хүмүүс л Монгол Улсыг хөгжүүлж, улс шиг улс болгож чадна. Ядуурал, гуйланчлал, нийгмийн элдэв гэмт хэрэг багасч, ард түмэн өр зээлгүй амар тайван амьдрахыг хүсч байна. Ард түмний аз жаргалтай амьдрах хүслээр Монголын төрд байгаа мухар сүсэгтнүүд тоглож гүйцлээ.

Монгол Улсын Ерөнхийлөгч нь дэргэдээ үзмэрч төлгөчтэй байсан цаг саяхан. Одоо албан ёсны бөө, үзмэрчийн орон тоо байхгүй ч төрийн тэргүүнд сууж байгаа нөхөд бүгд багш ламтай, бөө үзмэрчтэй. Тэднийхээ заавар зөвлөгөөгөөр төрийн ажлыг явуулдаг. Ажил хийхийн тулд ламаас асуудаг, бөө бөөлүүлдэг. Байшин барихын тулд газарт цай, сүү булж, хонх дамар тачигнуулан оршуулга хийдэг. Албан бичигт гарын үсэг зурахын тулд сайн өдөр таарахыг хүлээдэг болсоор удаж байна. Ингээд Монгол Улс өөдөлж дэвждэг бол бид өнөөдөр аз жаргалтай амьдарч байхсан. Харамсалтай нь, өнөөдөр өөрсдийгөө аваад явчихдаг дундаж давхаргынхан ядуусын эгнээнд шилжиж, хэдэн зуун компани үүд хаалгаа барьж, улс орон маань санхүүгийн эрх мэдлээ гадны байгууллагад өгчихөөд сууж байна.

Монголын ард түмэн, Монгол Улсын хувь заяаг эрдэм боловсролд нэвтэрсэн шилдэг сэхээтнүүд л зөв зүгт хөтөлнө. С.Баярцогт шиг боловсрол, мэдлэг, дадлага туршлага нь тэгширсэн залууст атаархаж, замаасаа зайлуулах гэсэн тэнэгүүдийн үгэнд авталгүй дотроо бодолтой, дороо суурьтай байхсан. Нийгмийн сүлжээ, цахим сайтууд, хэвлэл мэдээллээр хийсэх, зорилготой зорилгогүй түмэн янзын мэдээллээс өөрт хэрэгтэй, зөвийг нь ялгаж салгаж авах мэдлэг, чадвартай байхсан. Тэгэхгүй бол мухар сүсэгтнүүд төр удирдаж, шинжлэх ухаан шүтдэг мэдлэг чадвартай боловсон хүчнүүд гудамжинд шахагдаж байна.

Categories
онцлох-нийтлэл туслах-ангилал

П.Хашчулууны “Э.Бат-Үүлийн санаачилсан Хэвлэлийн эрх чөлөөний хуулийг давах гэсэн оролдлого бүр балардаг” нийтлэл хэвлэгдлээ

“Өдрийн сонин”-ы баасан гаригийн дугаар 20 нүүрээр хэвлэгдэн, захиалагчдадаа хүрлээ. Энэ өдрийн дугаарт гарсан нийтлэл, сурвалжлага, ярилцлага, мэдээ мэдээллээс онцолж, тоймлон хүргэж байна.

С.Эрдэнэ “Ерөнхийлөгчид нэр дэвших хүнээ нийт намын гишүүдийн асуулгаар тодруулна” ярилцлага улс төрийн 2-р нүүрт нийтлэгдлээ.

МХАҮТ-аас “ТОР-100” аж ахуйн нэгжийг өргөмжиллөө. Эдгээр 100 аж ахуй нэгжид ямар ямар байгууллагууд орсныг өнөөдрийн дугаараас уншаарай. Энэхүү жагсаалтыг Эрдэнэт үйлдвэр тэргүүлсэн байна.

Д.Дорлигжав “Үндсэн хууль бол ард түмний хүлээн зөвшөөрсөн гэрээ болохоос олонхи хүслээ тулгадаг юм биш” ярилцлагыг өнөөдрийн дугаараас уншина уу.

Иргэдийн болгоомжгүй байдал хар тамхитай холбогдох гол шалтгаан болдог тухай тодруулга ярилцлагыг 11-р дугаараас уншаарай.

“Дарьганга түмний шүтээн Дашбалбар найрагчийн нутгаар” аян замын тэмдэглэлийн 5-р цуврал энэ дугаарт нийтлэгдлээ. Түүний талаарх ойр дотны хүмүүсийнх нь сонирхолтой яриа, дурсамж болон зургийн цомогтой танилцаарай.

Дэлгэрэнгүй мэдээ, мэдээллийг цахимаар уншихыг хүсвэл дараах линкэд бүртгүүлнэ үү. https://admin.dnn.mn/plugins/news/login/

Эдгээр болон бусад цаг үеийн мэдээ мэдээлэл, ярилцлагуудыг “Өдрийн сонин”-ы баасан гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-гоос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 88071920 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХЭН ТАНТАЙ ХАМТ

Categories
мэдээ улс-төр

МАН-ын Бага хурал ирэх сарын 3-нд болохоор товлогджээ

МАН-ын Удирдах зөвлөл өчигдөр хуралдаж, ирэх тавдугаар сарын 3-нд Бага хурлаа хийхээр товложээ. Бага хурал нь 310 гишүүний бүрэлдэхүүнтэй. Өнгөрсөн хугацаанд хэнийг Ерөнхийлөгчид дэвшүүлбэл ялалт байгуулах боломжтой талаар тус нам судалгаа хийжээ.

Ирэх сарын 3-нд хийх бага хурлаараа Монгол Улсын Ерөнхийлөгчийн сонгуульд нэр дэвшигчийг тодруулах аж. Тиймээс судалгаанд үндэслэсэн нэр дэвшигчээ Бага хурлаар оруулж, шийдэх аж.

Categories
мэдээ улс-төр

Ж.Эрдэнэбат: Төр, хувийн хэвшил хамтдаа зүтгэж байж улсаа хөгжүүлнэ

Монгол Улсын эдийн засаг, бизнесийн салбарт амжилт гарган, бусдыгаа манлайлан яваа 2016 оны “ТОП-100” аж ахуйн нэгжид шагнал гардуулах арга хэмжээ Төрийн ордонд боллоо. Улсынхаа дотоодын нийт бүтээгдэхүүний 80 гаруй хувийг бүтээж, нийт ажлын байрны 90 хувийг хангаж буй шилдэг компанийнхан удирдлагуудад Монгол Улсын Ерөнхий сайд Ж.Эрдэнэбат шагнал гардуулж, компанийн баг, хамт олонд баяр хүргэж үг хэллээ.

Тэрээр,

– Бизнесийн салбарынхан дотоод нийт бүтээгдэхүүний 80 гаруй хувийг бүтээж, ажлын байрны 90 хувийг хангаж байна. 2016 оны ТОП аж ахуйн нэгжээр шалгарсан 100 компани гэхэд л татварын орлогын талаас илүү хувийг бүрдүүлж байна. Энэ гуравхан статистикаас харахад Монгол Улсын эдийн засгийн ч, монголчуудын амьдралын ч ачааны хүндийг үүрч байгаа нь манай бизнесийнхэн, энд цугларсан Та бүхэн юм. Засгийн газрын тэргүүний хувиар ард түмнийхээ өмнөөс гүн хүндэтгэлтэйгээр талархлаа илэрхийлж байна. Төр засаг, улстөрчдийн алдаатай бодлогын уршгаар эдийн засгийн хямралыг хамгийн түрүүнд мэдэрдэг, түүнд хамгийн гүн гүнзгий өртдөг нь хувийн хэвшлийнхэн юм. Өнгөрсөн хугацааны тэдгээр алдааны өмнөөс мөн “Уучлал” гуйхын ялдамд алдааг давтахгүйн төлөө манай Засгийн газар хичээж ажиллаж байгаа, цаашид илүү зүтгэж ажиллах болно гэдгээ илэрхийлье.

Бизнес эрхлэхэд амаргүй. Тэр тусмаа тогтолцоо нь бүрэн бүрдээгүй, төрийн хүнд суртал байгаа өнөөгийн нөхцөлд 20 гаруйхан жилийн түүхтэй Монголын бизнесийн салбар өдий зэрэгтэй яваа нь бизнесмэнүүд та бүхний асар их сэтгэл, хөдөлмөрийн үр дүн.

Өнөөдөр бид энэ танхимд шилдгийг шалгаруулж, шилдэгт шагнал гардуулахаар цугларсан ч цаашид яаж илүү амжилтад хүрэх, үүний тулд төр, хувийн хэвшлийн хэн нь юу хийж, ямар үүрэг хүлээх ёстой, яаж хамтарч ажиллах талаар зарим санаа хэлье.

Монголын бизнес бусадтай эн зэрэгцэн хөгжихөд хамгийн их саад болж байгаа гурвын зэрэг шалтгааныг яаралтай засаж залруулах ёстой. Минийхээр, бизнесийн орчныг илүү сайжруулах, төрийн хэт оролцоог хумих, олон түмний сэтгэлгээг өөрчилж чадвал Монголын бизнесийн салбар өнгөрсөн 20 гаруй жилийн түүхээсээ ч ихийг бүтээж, улсынхаа эдийн засагт өнөөдрийнхөөс хувь нэмрээ хэдэн арав дахин илүү оруулж чадна гэдэгт итгэлтэй байна.

Бизнесийн орчныг сайжруулах нь манай Засгийн газрын стратегийн зорилт байх болно. Бизнесийн орчныг сайжруулснаар хөрөнгө оруулалт, ажлын байр нэмэгдэнэ. Бизнесийн орчин сайжирснаар иргэдийн амьдрал дээшилнэ, эдийн засаг өснө. Жижиг, дунд үйлдвэрлэл ч, дэлхийд өрсөлдөх үндэсний компани ч бизнесийн сайн орчноос л төрнө. Томорсон, эсвэл түрүүлж бизнесээ эхэлсэн нь биш, бүх нийтээрээ амжилтад хүрдэг таатай орчин бүрдүүлэх, тийм орчин бүхий компанийн засаглал, менежментийг Монголдоо нутагшуулах, түгээн дэлгэрүүлэхэд төр-хувийн хэвшлийн хамтын ажиллагаа маш чухал юм.

Бизнес дэх төрийн оролцоог хумих эхний алхам бол төрийн байгууллагуудын хүнд суртлыг арилгах, элдэв хяналт шалгалтын дарамтыг багасгах юм. Төр, хувийн хэвшил хоёр нэг нь татвар төлөгч, нөгөө нь татвар хураагч гэх зөвхөн “өгөх-авах”-ын харилцаатай байвал ганцаараа ч, хамтаараа ч хол явахгүй, амжилтад хүрэхгүй. Төр-хувийн хэвшил хоёрт харилцан дэмжсэн, бие биеэ нөхсөн түншлэл хэрэгтэй. Иймд манай Засгийн газар их хэмжээний татвар төлөхийг бус, аль болох олон ажлын байр бий болгох, тухайн жилдээ ажлын байраа хадгалж үлдсэн, нийгмийн эмзэг болон зорилтот бүлгийн төлөөллийг ажлын байраар хангасан бүхий л бизнес, бизнесийн төслүүдийг илүү дэмжих болно.

Бизнесийн хөгжилд саад болж байгаа өөр нэгэн хүчин зүйл бол бидний сэтгэлгээний хоцрогдол юм.

Мөн баялгийн шударга бус хуваарилалт, эрх мэдэлд ойр хэсгийн давуу байдал зэрэг нь бизнесийг, ялангуяа том төслүүдийн мөн чанарыг ойлгоход садаа болж байж магадгүй. Гэхдээ л хэт эх орончийн дүртэй хийрхэл, хэн нэг нь илүү баяжих нь гэсэн атаархал, мөнгөтэй нэгнээ үгүйсгэх сэтгэлгээг хөөргөх нь манай улсын хөгжилд ч, бизнесийн хөгжилд ч ямар нэгэн хэмжээгээр саад чөдөр тушаа болж байна. Бид бизнесмэнүүдээ “зөвхөн өөртөө мөнгө хийж байгаа эзэн” гэж хэзээ харахаа болино, тэр цагт энэ сэтгэлгээ өөрчлөгдөнө. Бид нийгмээрээ бизнесмэнүүдээ баялаг бүтээгчид, ажлын байр бий болгогчид гэж харах ёстой, тэгж харах үнэлэх цаг нь болсон гэж бодож байна.

Нутгийн зөвлөл, эвсэл холбоодоос өгдөг шагнал урамшуулалдаа хамгийн олон хүнийг ажлаар хангаж байгаа, хамгийн их татвар төлсөн, эсвэл тухайн жилдээ хамгийн олон ажлын байр шинээр бий болгосон бизнесмэнүүдийг тодруулж, нэрлэж алдаршуулбал бидний сэтгэлгээ хурдан өөрчлөгдөнө. Та бүхэн ч бас ажилчдадаа хүндэтгэлтэй хандах ёстой. Та бүхэн улсдаа баялаг бүтээж байгаа бол, танай компанийн, таны бизнесийг амжилтад хүргэхэд ажлын голыг нугалж байгаа нь танай ажилчид юм. Бүтээж байгаа баялгаасаа хэд дахин үнэ цэнэтэй нийгмийн баялаг бол танай ажиллах хүч, таны баг хамт олон юм. Сүүлийн үед төрд ч, хувийн хэвшилд ч нэг буруу жишиг тогтож нэлээд газар авах янзтай болсон байна. Энэ нь ажиллах хүчийг туршилт нэрийн дор огт цалингүй буюу бага цалингаар олон сараар ажиллуулж, жаахан бүдүүлгээр хэлбэл мөнгөний машин болгож хөдөлмөрийг нь шулах явдал газар авчээ. Би төрийн байгууллагуудад үүрэг өгч байгаа, ингэж туршилтаар ажиллаж байгаа хүмүүсээ хууль номынх нь дагуу жинхэлж үндсэн ажилтан болгон үндсэн цалинг нь олгох ажлыг шуурхай зохион байгуул гэсэн.

Бизнесийн салбарт ийм буруу хандлага битгий байгаасай гэж хүсч байна. Хэрвээ байвал “туршигдаж байгаа” тэр хүний, түүний гэр бүл, найз нөхдийн хүрээнд бидний өөрчлөхийг хүсээд байгаа өнөөх сэтгэлгээний өөрчлөлт хурдтай явж, урагшилж чадахгүй.

Хувийн хэвшлийн салбар маань 20 гаруй жилийн зам туулж, хөл дээрээ баттай зогсч чадсан ч, суралцах алдаа оноо багагүй байна. Алдаа онооноосоо харилцан суралцах зүйл ч их бий.

Төр, хувийн хэвшил хоёр тусдаа явах учиргүй. Бидний явах зам нэг. Монгол Улсаа хөгжүүлэхийн төлөө хамтран зүтгэж ажиллах, нэр төртэй амьдрахаас өөр сонголт бидэнд байхгүй. Бид хамтарч, харилцан биесээ нөхөн зүтгэж чадвал Монголын маань эдийн засаг тун удахгүй эх орны минь цэлмэг хөх тэнгэрийн нар шиг гэрэлтэх болно гэдэгт итгэлтэй байна. Та бүхнийхээ болон танай баг хамт олны ашиг орлого арвин байхын ерөөлийг дэвшүүлье гэлээ гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ нийгэм

“Ажил олгогчдын зөвлөгөөн-2017” маргааш болно

ЭМНДЕГ, Нийслэлийн эрүүл мэнд, нийгмийн даатгалын газар хамтран “1000 ажил олгогчдын зөвлөгөөн”-ийг маргааш буюу энэ сарын 28-нд МҮЭСТО-нд зохион байгуулах болжээ.

Зөвлөгөөнд ХНХ-ын сайд Н.Номтойбаяр, ЭМНДЕГ-ын удирдлагууд болон нийслэлд йл ажиллагаа явуулдаг 1000 ажил олгогч оролцох юм. Энэ онд Нийгмийн даатгалын салбар үүсч хөгжсөний 75 жилийн ой тохиож байгаа юм. Тиймээс зөвлөгөөний үеэр шилдгийн шилдэг 10, шилдэг 65 шимтгэл төлөгч, ажил олгогчид шагнал гардуулах аж. Шилдэг аж ахуйн нэгжүүдийг ажилтнуудынхаа нийгмийн даатгалын шимтгэлийг үнэн бодитой тодорхойлж, шимтгэл төлөлтөөрөө тэргүүлсэн байх шаардлага тавьсан байна. Мөн шимтгэл төлөлтийн тайланг хуулийн хугацаанд тушаасан, ажилтнуудынхаа нийгмийн даатгалын дэвтрийг баталгаажуулсан байдал зэргийг харгалзан үзжээ.

Мөн үеэр нийгмийн даатгалын салбарын хууль тогтоомжийг сурталчилах нээлттэй өдөрлөг зохион байгуулах юм. Зөвлөгөөн болон нээлттэй өдөрлөгт НЗД С.Батболд, НИТХ-ын дарга Ц.Сандуй, МҮЭХ-ны Ерөнхийлөгч Х.Амгаланбаатар, МҮХАҮТ-ын Ерөнхийлөгч Б.Лхагважав нар урилгаар оролцоно.

Categories
онцлох-нийтлэл туслах-ангилал

Ц.Гарамжав гишүүн саналаа албан ёсоор татаж авч байгаагаа УИХ-ын даргад уламжлав

Зөрчлийн тухай хуулийг УИХ-ын үдээс хойшхи чуулганаар үргэлжлүүлэн хэлэлцлээ. Хэргийн эзэн, хэнгэрэгийн дохиур болсон Ц.Гарамжав гишүүн энэ үеэр торгууль нэмэх шийтгэлээ албан ёсоор татаж авч, протколд тэмдэглүүлж байгаагаа дуулгав. Зөрчлийн хуулийг УИХ-ын Хууль зүйн байнгын хороогоор хэлэлцэх явцад Ц.Гарамжав гишүүний зарчмын зөрүүтэй саналаар гүтгэсэн тохиолдолд хувь хүнийг 10 сая, аж ахуйн нэгжийг 100 сая төгрөгөөр торгохыг гишүүд дэмжсэн юм. Яагаад ийм шийдвэр гаргах болсоноо тэрбээр ийнхүү тайлбарлав.

-Эрүүгийн хуулийн гэмт хэрэг гэсэн зүйл Зөрчлийн хуульд хөнгөвчлөгдөж орж ирж байгаа. Гүтгэлэг гэдэг нийгмийг хамарсан гамшиг гэж би боддог. Би энэ үзэл бодлоо Эрүүгийн хуульд ч илэрхийлж байсан. Сая Зөрчлийн хууль дээр илэрхийлсэн. Ер нь энэ хууль нэг салбарт чиглэгдсэн гэж хэвлэн нийтлэх салбарынхан, сэтгүүлчид маань үзэх нь буруу. Яагаад гэвэл нэг салбар руу чиглэсэн бодлого энд байхгүй. Нийгэмд тархсан гүтгэх доромжлох, бие биедээ хүнлэг бусаар хандах, ёс суртахуунгүй байдлыг зогсоох гэж энэ хуульд санал оруулж, торгох гэсэн үндэслэлийг нэмсэн юм. Ер нь бол сэтгүүлч хэвлэл мэдээллийнхнийг үзэл бодлоо илэрхийлэх, хэвлэн мэдээлэх эрх чөлөөнд нь халдахаас хамгаалсан маш чухал зүйл ангиуд Эрүүгийн тухай хуулийн 14.2, 13.2-т тусгасан байгаа. Хэвлэн нийтлэх байгууллага, сэтгүүлчийн эсрэг ямар нэг иргэн эсэргүүцэл үзүүлэх, хүч хэрэглэх, зохисгүй байдал үзүүлэх аваас дөрвөн төрлийн баривчлах ял өгнө, торгож шийтгэхээр оруулсан юм билээ. Хэвлэл мэдээллээр мэдээлэл авах, үзэл бодлоо илэрхийлэх эрх чөлөө нээлттэй байгаа. Үүнийг Эрүүгийн хуулиар бид хамгаалж өгсөн юм. Та бүхэн маань Эрүүгийн хуулиа үзээрэй. Олон иргэн, хэвлэл мэдээллийнхэн маань надтай уулзлаа. Би эхний хэлэлцүүлэгийн үеэр санал гаргасан. Үүний дараа өчигдөр орон даяар зурагтыг хааж, өнөөдрийн сонингоо харлуулж байхын оронд ирж уулзаад учир байдлаа сайхан хэлэлцэхийг би хүссэн юм. Үүний дагуу цөөхөн хүн ирж уулзсан. Иргэд ирж уулзсан. Тэднийхээ хүсэлтийн дагуу “Торгуулийн хэмжээ өндөр байна” гэсэн саналыг би хүлээж аваад, саналаа албан ёсоор татаж авч байгаагаа хэвлэл мэдээллийн хэрэгслээр өчигдөр орой 21 цагийн үед тараасан. Торгууль нэмэх саналаа би албан ёсоор татаж авч байгаа гэдгээ УИХ-ын даргад уламжилж, протколд тусгуулж байна гэв.

С.Бямбацогт зурган илэрцүүдС.Бямбацогт: 1400 гүтгэх гэмт хэрэгт Эрүүгийн хэрэг үүсгэсэн байдаг

Хууль зүй, дотоод хэргийн сайд С.Бямбацогт сайд “Бид анхаарах ёстой асуудал. Одоогийн хуульд гүтгэх гэмт хэрэг байгаа. Үүнийг зөрчил болгож оруулж ирсэн. Зөрчил болгосноор тодорхой хэмжээнд гүтгэсэн нь тогтоогдоод, торгуульна. Түүний дараа гүтгэгдээд, нэр хүнд, амь нас, эрүүл мэндэд нь хохирол учирсан бол иргэний журмаар нэхэмжлээд, шүүхээр шийдвэр гаргуулаад хохирлоо барагдуулах заалт Иргэний хуульд нээлттэй байгаа. Гүтгэхтэй холбоотой асуудал Монгол Улс даяар сэдэв өнөөдрийн сэдэв болоод зөв үү, буруу юу гэж яригдаж байна. Нэг талаар гүтгэхийг хэтэрхий хатуу хариуцлагатай болгох нь буруу гэж байгаа. Бас хүний нэр хүнд алдар гавьяа, эрүүл мэнд, амь насанд нь хохирол учиртал нь гүтгэдэг, үүнээсээ болж ард иргэд хохирдог. Торгууль өндөр байх нь зөв ш дээ гэсэн талцал хуваагдал явж байгаа. Гүтгэх үйлдэлтэй холбоотойгоор олон нийт ойлголттой болох нь зөв байх аа. Гүтгэх үйлдэл Зөрчлийн хуулиндаа торгуулийн шийтгэлтэй. 2 саяас 20 сая, хохирол учирсан нь тогтоогдсон тохиолдолд иргэний журмаар нэхэмжлээд, нэр төр алдар хүнд, хохирлоо барагдуулах бололцоотой. Хэвлэл мэдээллийн хэрэгслийг шийтгэх гэж байна гэж ойлгоод байх шиг байгаа юм. Үгүй ээ. 1997-2015 оныг хүртэл хугацаанд нийт 1400 орчим гүтгэх гэмт хэргээр Эрүүгийн хэрэг үүсгэсэн байдаг юм билээ. Үүний тал нь хэвлэл мэдээллийн хэрэгсэлд хамаарна. Үлдсэн хэсэг нь аж ахуйн нэгж байгууллага, ард иргэдийн хоорондын бие биенээ гүтгэсэн гэх маргаан байдаг. Зөвхөн хэвлэл мэдээллийн байгууллагатай холбоотой заалт биш шүү” гэлээ.

Б.Эгшиглэн

Categories
мэдээ улс-төр

Монгол Улсын Ерөнхийлөгч Ц.Элбэгдорж Элчин сайд нарыг хүлээн авч уулзав

Монгол Улсын Ерөнхийлөгч Ц.Элбэгдоржид өнөөдөр Бүгд Найрамдах Замби Улсаас Монгол Улсад суух Онц бөгөөд Бүрэн эрхт Элчин сайд хатагтай Вини Натала Чибэсакунда, Шведийн Вант Улсаас Монгол Улсад суух Онц бөгөөд Бүрэн эрхт Элчин сайд хатагтай Анна Линдстэд, Бүгд Найрамдах Словак Улсаас Монгол Улсад суух Онц бөгөөд Бүрэн эрхт Элчин сайд ноён Душан Белла, Холбооны Бүгд Найрамдах Ардчилсан Балба Улсаас Монгол Улсад суух Онц бөгөөд Бүрэн эрхт Элчин сайд ноён Леэла Мани Паудял, Бүгд Найрамдах Намиби Улсаас Монгол Улсад суух Онц бөгөөд Бүрэн эрхт Элчин сайд ноён Элия Жиорж Кайямо нар тус тус Итгэмжлэх жуух бичиг барилаа.

Итгэмжлэх жуух бичиг барьсны дараа Монгол Улсын Ерөнхийлөгч Ц.Элбэгдорж Элчин сайд нарыг хүлээн авч уулзав.

Монгол Улсын Ерөнхийлөгч Ц.Элбэгдорж Бүгд Найрамдах Замби Улсаас Монгол Улсад суух Онц бөгөөд Бүрэн эрхт Элчин сайд хатагтай Вини Натала Чибэсакундатай уулзах үеэрээ Монголын тал далайд гарцгүй орнуудын олон улсын бодлогын хүрээлэн /Think-Tank/ байгуулах санаачилга дэвшүүлсэн талаар ярилаа. Замби Улсын Засгийн газар ч далайд гарцгүй орнуудын олон улсын бодлогын хүрээлэнгийн талаарх гэрээнд гарын үсэг зурж нэгдэх байх хэмээн найдаж буйг мөн дурдав.

Шведийн Вант Улсаас Монгол Улсад суух Онц бөгөөд Бүрэн эрхт Элчин сайд хатагтай Анна Линдстэдтэй уулзахдаа хоёр тал уламжлалт найрсаг харилцаа хөгжүүлж ирснийг дурдаад, Монгол Улс хоёр талын харилцааг өргөжүүлэн хөгжүүлэхэд ач холбогдол өгдгийг тэмдэглэлээ. Ялангуяа Шведийн байгаль орчинд ээлтэй ногоон технологи, цэвэр технологийг Монголд нэвтрүүлэх талаар сонирхон анхаарч буйг мөн дурдав. Монгол Улсын цөөнгүй тооны иргэд Шведэд аж төрдөг. Тэдэнд болон тэдний үр хүүхдэд эх хэлээ сурах, соёл, олон нийтийн арга хэмжээ зохион байгуулахад зориулсан Соёлын төвийг Стокгольм хотод байгуулах саналыг Монголын талаас тавьж ирснийг бас дурдлаа.

Бүгд Найрамдах Словак Улсаас Монгол Улсад суух Онц бөгөөд Бүрэн эрхт Элчин сайд ноён Душан Беллатай уулзахдаа Монгол Улс Европын холбоо, түүний дотор Словак Улстай уламжлалт найрсаг харилцаатай явж ирснийг тэмдэглэв. Монгол-Словак хоорондын эдийн засгийн хамтын ажиллагааны хэлэлцээрт гарын үсэг зурахад бэлэн болсонд баяртай байгаагаа Монгол Улсын Ерөнхийлөгч Ц.Элбэгдорж хэллээ.

Холбооны Бүгд Найрамдах Ардчилсан Балба Улсаас Монгол Улсад суух Онц бөгөөд Бүрэн эрхт Элчин сайд ноён Леэла Мани Паудялтай уулзах үеэр энэ 2017 онд Монгол-Балбын хооронд дипломат харилцаа тогтоосны 55 жилийн ой тохиож байгааг тэмдэглэв.

Түүх, соёл, шашны түүхэн улбаагаар холбогдсон хоёр талын харилцааг цаашид хөдөө аж ахуй, аялал жуулчлалын салбарт хөгжүүлэх сонирхол Монголын талд байгааг дурдав.

Бүгд Найрамдах Намиби Улсаас Монгол Улсад суух Онц бөгөөд Бүрэн эрхт Элчин сайд ноён Элия Жиорж Кайямог хүлээн авч уулзахдаа хоёр орны хооронд ижил төстэй зүйлүүд байдгийг дурдлаа. Тухайлбал, хүн амын тоо, уул уурхай, хөдөө аж ахуй зэргээрээ төстэйг тэмдэглэв. Аялал жуулчлалын салбар хоёр талын эдийн засагт чухал үүрэг гүйцэтгэж болохыг мөн хэлж байв.

Уулзалтын төгсгөлд Монгол Улсын Ерөнхийлөгчийн Тамгын газар, ГХЯ Элчин сайд нарын ажилд тусалж дэмжих болно гэдгийг Монгол Улсын Ерөнхийлөгч тэдэнд хэллээ.

Categories
онцлох-нийтлэл туслах-ангилал

Монголын ТОР-100 Аж ахуй нэгжийг “Эрдэнэт үйлдвэр” дахин тэргүүллээ

ТОР-100 Аж ахуй нэгж зурган илэрцүүдЗасгийн газар, МҮХАҮТ хамтран жил бүр үндэсний шилдэг 100 аж ахуй нэгжийг шалгаруулдаг билээ. Энэхүү үйл ажиллагаа 16 дахь жилдээ Төрийн ордонд боллоо. Энэ жилийн шилдгүүд дараах шалгуураар тодорчээ. Үүнд: Төсөвт оруулсан орлого, компанийн орлого, ажилчдын тоо, хөрөнгө, ашиг гэсэн үзүүлэлтүүд ордог байна.

Өмнөх жилд Эрдэнэт үйлдвэр тэргүүлж байсан бол энэ удаад ч байр сууриа хадгалж чаджээ. “Оюу толгой”, “Хаан банк”, “ХХБанк”, “НИК”, “Хас банк”, “АПУ”, “Төрийн банк”, “Голомт банк” зэрэг байгууллагууд эхний 10 дотор жагссан байна.

Шилдэг 100 ААН-үүдээс групп компаниудыг харьцуулан мөн гаргажээ. МСS компани энэ жагсаалтыг тэргүүлэн “Юнител”, “Спирт бал бурам” зэрэг ААН-үүд удаах байруудыг эзэлжээ.


Categories
мэдээ улс-төр

Тариалан эрхлэгчдэд 5800 тонн улаан буудайн элит үр худалдана

Засгийн газрын ээлжит 18 дугаар хуралдаан 2017 оны 04 дүгээр сарын 26-ны өдөр болж дараах асуудлыг хэлэлцэн шийдвэрлэлээ.

Энэ жил 13 аймгийн 1350 орчим аж ахуйн нэгж, иргэн 381.6 мянган га талбайд үр тариа, үүнээс 362,1 мянган га талбайд улаанбуудай тариалахаар төлөвлөсөн байна. Үүнд нийтдээ 54.3 мянган тонн улаанбуудай шаардлагатай бөгөөд 4,1 мянган тонн улаанбуудайн үр дутагдах тооцоо гарчээ. Засгийн газрын хуралдаанаар энэ тухай хэлэлцээд хаврын тариалалтад зориулж улсын нөөцөд хадгалж байгаа стандартын шаардлага хангасан нийт 5800 тонн улаанбуудайн элит үрийн нэг тонн тутмыг 880,000 төгрөгөөр, 1-3 дугаар репродукцын үрийн тонныг 830,000 төгрөгөөр, хүнсний буудайн нэг тонныг чанартай нь уялдуулан тонн тутмыг 480,000-560,000 төгрөгөөр худалдахаар боллоо. Аж ахуйн нэгж, иргэд үнийн дүнгийн 40 хувийн урьдчилгаа төлбөрийг төлж буудайн үр худалдаж авах боломжтой аж.

Categories
мэдээ нийгэм

В.Инжиннашийн 180 жилийн ойд зориулсан эрдэм шинжилгээний хурал болж байна

“Инжиннаши судлал” бол дэлхийн монгол судлалын салшгүй чухал, хүчирхэг салаа мөчир төдийгүй их зохиолч В.Инжаннашийн намтар, бүтээлийн судалгаанд нэг мөр болж шийдэгдээгүй тулгамдсан асуудлууд оршсоор буй бөгөөд “Инжаннаши судлал”-ыг шинэ шатанд гаргахад дотоод, гадаадын эрдэмтэн, судлаачдын хамтарсан судалгаа чухал гэдгийг онцлов.

Их зохиолч В.Инжаннашийн мэндэлсний 180 жилийн ойд зориулсан олон улсын эрдэм шинжилгээний хурал өнөөдөр МУИС-ийн хичээлийн I байрны Дугуй танхимд эхэллээ. Хурал маргааш мөн үргэлжилнэ.

Хурлыг нээж МУИС-ийн захирал, доктор Я.Төмөрбаатар хэлэхдээ, “Их Монгол Улсын үеийн уран зохиол, уламжлалт соёл, түүхэн сэтгэлгээнд үнэтэй хувь нэмэр оруулсанхүн бол их бичгийн хүн, соён гэгээрүүлэгч Ванчинбалын Инжаннаш билээ. Түүний түүхэн гавьяа бол Дорно дахины чимэглэлт найруулгын тэг ёс, дэг жаягийг ягштал барьж, монгол хэлний ширгэшгүй баялаг, үгийн санг ундарган баяжуулсан, түүх хийгээд уран сайхны сэтгэлгээ, дүр дүрслэлийг баян тансгаар нээн харуулсан “Их Юань улсын мандсан төрийн Хөх судар” нэрт туульс романаараа Монголын уран зохиол, түүний түүх, хүч чадлыг ялгаруулж оюуны асар их өвийг хойч үедээ үлдээсэнд оршиж байна гэж дүгнэж болох юм. Түүний төрөлх эх орон-Монгол Улсад болж буй энэхүү хуралд олон сонирхолтой илтгэл тавьж, судалгааны баялаг арга туршлагаа хуваалцаж, цаашдаа эл чигийн судалгааг гүнзгийрүүлэх, тал бүрээс нь цэгцтэй харж, шинэ нээлт, даацтай судалгааны зам мөрд хөтөлсөн амжилтуудыг Инжаннаши судлагчид гаргана гэдэгт итгэлтэй байна” гэв.

Хоёр өдөр үргэлжлэх тус хуралд Монгол, ОХУ, БНХАУ, БНЧУ-ын эрдэмтэн судлаачид 20 гаруй илтгэл тавьж хэлэлцүүлэх юм.

Хуралд МУИС-ийн доктор, дэд профессор Б.Хишигсүх “XX зууны олон улсын Инжаннаши судал” сэдвээр илтгэл тавилаа. Тэрбээр, “Монголын утга, соёлын нэрт зүтгэлтэн В.Инжаннашийн амьдрал замналын түүх, бүтээлийг судлах ажил 1950-иад оны дунд үеэс эхэлсэн. Ширгэшгүй баян өв сантай судлагдахууныг бидэнд өртөөлүүлэн ирэхэд хичээл зүтгэл гаргасан хүн бол Өвөр монголын Хишигтэн хошууны соёлын нэрт зүтгэлтэн Эрдэнэтогтох, нэрт орчуулагч Содбилиг нар хүчин зүтгэж, тэд 1956-1957 онд Баруун Түмэдийн нутгаар илжгэн тэрэг хөллөн гар бичмэл, судар шастир, аман болон бичгийн сурвалжийг цуглуулж чадсан явдал эдүгээ их зохиолчийн намтар бүтээлийн судалгааны ажилд ихээхэн чухал үйл явдал болсныг тэмдэглэх нь зүйтэй. В.Инжаннаши монголын уран зохиол, урлаг, гүн ухааны онолын сэтгэлгээний хөгжлийн түүхэнд, шүлэг найраг, хурц шүүмжлэлт ёжит зохиолууд, түүхэн, уран сайхны, аж байдлын, адал явдалт, уран сэтгэмжит туульсын романууд, онолын бүтээл туурвилаараа үнэтэй хувь нэмэр оруулсан. “Инжаннаши судлал”-ыг урагш ахиулах, шинэ шатанд гаргахад дотоод, гадаадын эрдэмтэд судлаачдын хамтарсан судалгаа чухал” гэдгийг онцлов.

Мөн тэрбээр “Эснэсэн гэдэг үг бол монгол үг. Бид крилл үсэг авснаас хойш орчин цагийн монгол хэлээр ярих, бичих, хэрэглээ бий болсон. Энэ үгийг хуучирсан үг гэдэг нэр томъёонд оруулсан. Эснэнэ гэдэг үг нь бүтэж бүрэлдэнэ гэсэн үг. Хүн бүтэж бүрэлдээд төрсөн, мэндэлсэн гэдэг утгыг бүрэн илэрхийлж байна. Эснэсэн гэхээр бүтэж бүрэлдсэн, мэндэлсэн гээд утгын гажуудалгүй. Монгол хэлийг гутаах, нэр томъёоны хувьд төөрөлдүүлэх ноцтой байдал үүсэхгүй” хэмээн тайлбарлалаа.

Тус хурал маргааш “В.Инжаннашийн романуудын туурвилын зарим онцлог”, “Хөх судар” романы эмэгтэйчүүдийн дүрийн тухайд”, “Сударч В.Инжаннашийн ёгт зохиолын учир” зэрэг илтгэлээр үргэлжилнэ.

Хурлыг МУИС-ийн Шинжлэх ухааны сургуулийн Хүмүүнлэгийн ухааны салбарын Утга зохиол урлаг судлалын тэнхим санаачлан БСШУСЯ-ны дэмжлэгтэй зохион байгуулж байна.