Month: April 2017

Монгол Улсын ГЕГ-ын дарга Б. Асралт БНХАУ-ын ГЕГ-ын дарга Юй Гуанжоутай хоёр талт ажлын уулзалт хийлээ.

Тус уулзалтаар Монгол Улс, БНХАУ-ын гаалийн байгууллага хоорондын хамтын ажиллагаа, хилийн боомтын үйл ажиллагаа, дэд бүтэц, менежментэд тулгамдаж буй асуудал, тэдгээрийг шийдвэрлэх арга зам, цаашид хамтран ажиллах чиглэлийг харилцан тохиролцлоо. Үүнд:

• Хар тамхи, мансууруулах бодисын тээвэрлэлтэд хяналт тавих, гэмт хэргийг илрүүлэх, таслан зогсоох чиглэлээр нягт хамтын ажиллагаатай ажиллахын зэрэгцээ улсын хилээр хууль бусаар нэвтрүүлэхтэй тэмцэх чиглэлд онцгой анхаарал хандуулахаар болов.
• “Манифестийг цахимжуулах төсөл”-ийн хүрээнд манифестийг цахим хэлбэрээр солилцох туршилтын ажлыг эхлүүлэхээр тохиролцов.

Монгол, Хятадын хилийн боомтуудын хөгжил, тулгамдаж буй асуудлыг шийдвэрлэх арга замын талаар харилцан санал солилцон, нэгдсэн ойлголтод хүрч, протоколд гарын үсэг зурлаа.

Нийслэлийн мэргэжлийн хяналтын газраас барилгын материалуудад хяналт шалгалт хийжээ.

Шалгалтын үеэр ил задгайгаар худалдаалагдаж буй“МЕН ГАО” нэртэй савлагдсан цемент нь стандартын шаардлага хангахгүй, хаяг шошгын зөрчилтэй гарсан байна. Уг цементэд барилгын материалын чанарыг баталгаажуулсан гарал үүслийн гэрчилгээ, лабораторийн батламж байхгүй байв. Мөн стандартаар 50 кг байхаас 47,48 кг жинтэй савлагдсан нь илэрчээ.

БНХАУ-аас импортоор оруулж ирсэн “Мен гао” үйлдвэрийн цемент Монгол улсад 2016 оны зургаадугаар сараас хойш орж ирээгүй байна. Уг цементийн сав баглаа боодлыг ашиглан цементийн орц найрлагад өөрчлөлт оруулж савлан худалдаалж байжээ.

Цементээс дээж авч барилгын сорилын дүнгийн итгэмжлэгдсэн лабораторид шинжилгээ хийж үзэхэд барьцалдах шинж чанарын хувьд чанарын шаардлага хангахгүй гарсан байна. Орц найрлагад ямар бүтээгдэхүүн хольсон тухай шинжилгээний хариу одоогоор гараагүй байгаааж.

Иймд ард иргэд барилгын материал худалдан авахдаа хуурамч бүтээгдэхүүн худалдан авахаас сэргийлж, хаяг шошго, дагалдах баримт бичгийг сайтар үзэж авахыг анхаарууллаа.

Эрүүл мэнд, нийгмийн даатгалын ерөнхий газар, Нийслэлийн эрүүл мэнд, нийгмийн даатгалын газар хамтран зохиож буй 1000 ажил олгогчдын зөвлөгөөн Монголын үйлдвэрчний эвлэлийн соёлын төв ордонд болж байна.

Энэхүү арга хэмжээг шилдэг шимтгэл төлөгч, ажил олгогчийг шалгаруулах, олон нийтэд сурталчилах, нийгмийн даатгалын тухай хууль тогтоомжийн талаарх мэдээ, мэдээллийг хүргэх, хамтран ажиллах зорилгоор энэхүү арга хэмжээг зохион байгуулж байгаа аж.

Зөвлөгөөнд нийслэлд үйл ажиллагаа явуулдаг 1000 ажил олгогч оролцож байгаа аж.

ЭМЯ-наас эрүүл мэндийн салбарт тулгамдаж байгаа асуудлуудыг шийдвэрлэх, шинэлэг, оновчтой санал, санаачилгыг дэмжих, түүнийг хэрэгжүүлэх зорилгоор иргэдээс санал авч байна.

Иргэд дараах чиглэлээр саналаа өгөх боломжтой аж.

• Эмчилгээ, үйлчилгээний соёл, чанар хүртээмжийг нэмэгдүүлэх, хүлээгдлийг бууруулах – (51) 261847, 261742
• Эмч, ажилчдын харьцаа хандлагыг сайжруулах – (51) 266178, 263846
• Урьдчилан сэргийлэх буюу иргэдийн эрүүл мэндийн боловсролыг сайжруулах – (51) 263925, 261129
• Эрүүл мэндийн салбарын хууль эрх зүйн орчныг боловсронгуй болгох – (51) 263957
• Бусад – (51) 261858, 263695

Саналаа ЭМЯ-нд бичгээр, ЭМЯ-ны www.mohs.mn сайт руу орж, ЭМЯ-ны холбогдох газруудын утсаар, ЭМЯ-ны moh@moh.gov.mn и-мэйл хаяг руу тус тус саналаа явуулах юм байна.

Мөн саналаа өгөхдөө “Хамтдаа шийдвэрлэе” олон нийтийн санал асуулгад гэж гарчиглан нэр болон холбогдох утасны дугаараа тодорхой бичиж явуулах ёстой гэнэ. Ийнхүү хамгийн оновчтой саналыг ирүүлсэн гурван хүнд сувилалд хэвтэн эмчлүүлэх эрх олгох ажээ.

Иргэдийн саналыг дөрөвдүгээр сарын 20-ны өдрөөс авч эхэлсэн бөгөөд ирэх тавдугаар сарын 20 хүртэл авах юм байна.

Өнөөдөр “Генералуудын өдөр”-ийг тохиолдуулан Хилийн цэргийн салбараас төрсөн үе үеийн генералуудыг ХЗДХЯ-нд хүлээн авч хүндэтгэл үзүүлжээ.

ХЗДХ-ийн Төрийн нарийн бичгийн дарга Г.Баясгалан генералуудад хандаж хэлсэн үгэндээ “Өнөөдөр бол та бүхний баярын өдөр. Өдгөөгөөс 73 жилийн өмнө генерал цол үүссэн түүхтэй. Манай хил хамгаалах салбараас 17 генерал төрсөн. Та бүхэн монгол төрийн түшиг тулгуур юм шүү. Тиймээс бид генералуудаа хүндэлж, дээдэлж, тэднийхээ үгийг сонсч хариуцсан ажилдаа тусгаж хэрэгжүүлж байх учиртай ” гэсэн юм.

Хүрэлцэн ирсэн генералуудын төлөөллөөс Хилийн тухай хуулийг баталсанд сэтгэл өндөр байгаагаа илэрхийлжээ. ХЗДХ-ийн Төрийн нарийн бичгийн дарга Г.Баясгалан хилийн цэргийн салбараас төрсөн генералуудад бэлэг гардуулж, дурсгалын зураг авахуулсан байна.

Дорноговь аймгийн Сайншанд хотод нарны цахилгаан станцын шав тавилаа. Монголын хамгийн том буюу 30мВт-ын хүчин чадалтай нарны цахилгаан станцыг Дезерт Солар Пауэр Вуан ХХК Герман улсын хөрөнгө оруулалтаар гүйцэтгэх аж.

Тус нарны цахилгаан станцыг Сайншанд сумын III багийн нутаг дэвсгэрт 714000м.кв талбайд барих бөгөөд бүтээн байгуулалтын хүрээнд түр болон байнгын 150 гаруй ажлын байр шинээр бий болох аж. Энэхүү нарны цахилгаан станц нь жил бүр 52.276 сая киловатт цаг цахилгаан эрчим хүч үйлдвэрлэн төвийн эрчим хүчинд нийлүүлэх юм байна. Нарны цахилгаан станцыг барих ажил тавдугаар сараасэхлэх бөгөөд энэ ондоо багтаан барьж дуусгахаар төлөвлөжээ.

Сангийн сайд Б.Чойжилсүрэн “ОУВС-гийн хөтөлбөрт хамрагдах асуудал энэ сарын 28-ны өдөр ОУВС-гийн захирлуудын хурлаар орно” хэмээн мэдэгдсэн билээ. Өнөөдөр болох хурлаар Монгол Улсыг “Өргөтгөсөн санхүүжилтийн хөтөлбөр”-төө багтаах эсэхээ шийдэх юм.

Хэрвээ хөтөлбөрт орохоор болбол эхний ээлжинд Япон улсаас 850 сая ам.долларын зээл манайд олгогдох юм. Гэхдээ Монгол улс энэ хөтөлбөрт орох эсэх нь эргэлзээтэй байна. Учир нь ОУВС-д Зарим хөрөнгө оруулагчдаас гомдол гаргажээ. ОУВС-гийн хөтөлбөрт хамрагдахын тулд 2017 оны төсөвт тодотгол хийгдэж улмаар Төсвийн тодотголын хуулийг дагаж баталсан УИХ-ын тогтоол батлагдсан. Тус тогтоолд хөрөнгө оруулагчидтай холбоотой, хөрөнгө оруулагчдад халтай заалт орсон гэж хөрөнгө оруулагчид үзсэн байна. Тиймээс цуцлагдах магадлал өндөр байгаа аж.