Month: April 2017

УИХ-ын чуулганы өнөөдрийн үдээс өмнөх нэгдсэн хуралдаанаар Зөрчлийн тухай хуулийн шинэчилсэн найруулгын төсөл болон холбогдох бусад хуулийн төслүүдийн анхны хэлэлцүүлгийг үргэлжлүүлэн хийлээ.

Төсөлд зөрчил үйлдсэн хүнийг долоо хоногоос гуч хоногийн хугацаагаар тусгай зориулалтын байранд саатуулахыг баривчлах шийтгэл гэнэ хэмээн тодорхойлсон бөгөөд баривчлах шийтгэлийг шүүгч оногдуулж, баривчлах шийтгэл эдлүүлэх журмыг хуулиар тогтоохоор тусгах саналыг Ажлын хэсгээс оруулжээ. Шүүх баривчлах шийтгэлийг энэ хуулийн тусгай ангид заасан тохиолдолд оногдуулах ба жирэмсэн эмэгтэй, арван дөрөв хүртэлх насны хүүхэдтэй ганц бие эцэг, эх, хөдөлмөрийн чадвараа бүрэн алдсан хүн, баривчлах шийтгэл эдлүүлэхэд саад болохуйц өвчтэй хүнд оногдуулахгүй юм байна. Дээр заасны дагуу баривчлах шийтгэл оногдуулахгүй тохиолдолд нэг хоногийг арван таван нэгжтэй тэнцэх хэмжээний төгрөгөөр тооцож торгох шийтгэл оногдуулж болно хэмээн тусгажээ. Хуульд заасан тохиолдолд баривчлах шийдвэрийг биелүүлэхийг хойшлуулж болох бөгөөд зөрчил шалган шийдвэрлэх ажиллагааны үед саатуулагдсан хугацааг баривчлах шийтгэл эдлүүлэх хугацаанд оруулан тооцно хэмээн баривчлах шийтгэлтэй холбоотой саналыг томьёолсон байна. Энэхүү саналыг хуралдаанд оролцсон гишүүдийн олонхи дэмжсэн юм.

Түүнчлэн Ажлын хэсгээс хуулийн төсөл дэх Албадан сургалт гэсэн зүйлийг өөрчлөн найруулах саналыг гаргажээ. Ажлын хэсгээс, Шүүх баривчлах шийтгэл оногдуулахаар заасан зөрчил үйлдсэн хүнд албадан сургалтад хамруулах албадлагын арга хэмжээг хэрэглэж болно. Албадан сургалтыг баривчлах шийтгэлийг эдэлж байх хугацаанд эрх бүхий байгууллага хэрэгжүүлнэ. Албадан сургалт арван цагаас тавин цагийн хугацаатай байна. Апбадан сургалттай холбоотой харилцааг хуулиар зохицуулна хэмээн найруулах санал гаргасныг Хууль зүйн байнгын хороо дэмжсэн бөгөөд чуулганы нэгдсэн хуралдаанд оролцсон гишүүдийн олонхи мөн дэмжсэн.

УИХ-ын гишүүн Х.Нямбаатар танхайрах үйлдэлтэй холбоотой зүйлийг өөрчлөн найруулах санал гаргасныг олонхи дэмжсэн.

Ингээд төсөлд, Олон нийтийн газарт хэрүүл маргаан үүсгэсэн, бусдыг өдөөн хатгасан, бусдын амгалан тайван байдал алдагдуулсан, олон нийтийг үл хүндэтгэсэн бол, түүнчлэн үйлчилгээний болон дарааллын журам зөрчиж биеэ авч явах нийтээр хүлээн зөвшөөрөгдсөн хэм хэмжээг зөрчсөн, эсхүл аж ахуйн нэгж, байгууллагын хэвийн үйл ажиллагааг алдагдуулсан бол хүнийг нэг зуун нэгжтэй тэнцэх хэмжээний төгрөгөөр торгох, эсхүл албадан сургалтад хамруулж долоо хоногоос гуч хоногийн хугацаагаар баривчлах шийтгэл оногдуулна хэмээн тусгахаар боллоо.

Гэр бүлийн хүчирхийллийн талаар хуулиар хүлээсэн мэдээлэх үүргээ биелүүлээгүй бол хүнийг хоёр зуун нэгжтэй тэнцэх хэмжээний төгрөгөөр торгох, Түр хамгаалах байрны журам зөрчиж нэвтэрсэн бол хүнийг хоёр зуун нэгжгэй тэнцэх хэмжээний төгрөгөөр торгох, Түр хамгаалах байрны зориулалтыг өөрчилсөн, эсхүл хуульд зааснаас өөр зориулалтаар ашигласан бол хүнийг нэг зуун нэгжгэй тэнцэх хэмжээний төгрөгөөр, хуулийн этгээдийг нэг мянган нэгжгэй тэнцэх хэмжээний төгрөгөөр торгох саналыг гишүүдийн олонхи дэмжлээ.

Мөн гэр бүлийн хамаарал бүхий харилцаатай хүнийг зодсон, хүсэл зоригийнх нь эсрэг тодорхой үйлдэл хийх, хийхгүй байхыг албадсан, бусадтай харилцахыг хязгаарласан, хуваарьт болон дундын эд хөрөнгөө эзэмших, ашиглах, захиран зарцуулах эрхэд халдсан нь эрүүгийн хариуцлага хүлээлгэхээргүй бол албадан сургалтад хамруулж долоо хоногоос гуч хоногийн хугацаагаар баривчлах шийтгэл оногдуулахаар тусгасан санал гишүүдийн дэмжлэгийг авсан.

Хуулийн төслийг дараагийн хуралдаанаар үргэлжлүүлэн хэлэлцэж, зарчмын зөрүүтэй саналын томьёоллуудаар санал хураалт явуулна хэмээн УИХ-ын Хэвлэл мэдээлэл, олон нийттэй харилцах хэлтсээс мэдээллээ.

УИХ-ын дарга М.Энхболд өнөөдөр (2017.04.28) Монгол Улсад генерал цол бий болсны 73 жилийн ойг тохиолдуулан генералуудыг Төрийн ордны ёслол хүндэтгэлийн их танхимд хүлээн авч мэндчилгээ дэвшүүллээ.

УИХ-ын дарга М.Энхболд хэлсэн үгэндээ “Эрхэм хүндэт генералууд Та бүхэнд Монгол Улсад генерал цол бий болсны 73 жилийн тэмдэглэлт ойн өдрийг тохиолдуулан баяр хүргэж, ажлын амжилт, сайн сайхан бүхнийг хүсэн ерөөе.

1944 оны 4 дүгээр сарын 28-ны өдөр Ардын сайд нарын Зөвлөлийн тогтоол гарч, тухайн үед хууль хяналт, зэвсэгт хүчний байгууллагад ажиллаж байсан 11 албан хаагчид цэргийн дээд генерал цол олгосноор Монгол Улсад орчин цагийн цэргийн дээд генерал цол бий болсон түүхэн үйл явдал эхэлсэн байдаг. Энэ өдрийг Монголын генералуудын өдөр гэж тэр үеэс өнөөдрийг хүртэл тэмдэглэж ирсэн сайхан уламжлалтай билээ.

Уламжлал ёсоороо өнөөдөр Монголын генералуудын өдрийг Та бид тэмдэглэж байна. Энэ өдөр генерал цолтой, энэ цолыг хүртсэн Батлан хамгаалах, Шүүхийн шийдвэр, Онцгой байдал, Тагнуул зэрэг байгууллагад ажиллаж байсан Та бүхэн энэ салбарын үйл ажиллагааг удирдаж, улс орны хөгжил дэвшилд хувь нэмрээ оруулж, иргэдийнхээ амгалан тайван ажиллах нөхцөлийг бүрдүүлэхэд оюун ухаанаа зориулсныг зориуд тэмдэглэн хэлэхэд таатай байна.

Ингээд генералууд Та бүхэнд ажлын амжилт, эрүүл энх, сайн сайхан бүхнийг дахин хүсэн ерөөж байна” хэмээлээ.

Ёслолын ажиллагааны үеэр “Монгол генерал” ТББ-ын тэргүүн, хошууч генерал С.Баасанхүү, хошууч генерал З.Болдбаатар нар Монгол Улсын Их Хурлын дарга М.Энхболдод дурсгалын зүйлс гардуулан өгсөн юм.

Дараа нь Монгол Улсын Их Хурлын дарга ёслолын ажиллагаанд хүрэлцэн ирсэн генералуудтай хамт дурсгалын зураг татуулав.

Ёслолын ажиллагаанд УИХ-ын Аюулгүй байдал, гадаад бодлогын байнгын хорооны дарга Ж.Энхбаяр, УИХ-ын гишүүн, Засгийн газрын гишүүн, Хууль зүй, дотоод хэргийн сайд С.Бямбацогт нар болон албаны бусад хүмүүс оролцлоо гэж УИХ-ын Хэвлэл мэдээлэл, олон нийттэй харилцах хэлтэс мэдээллээ.

УИХ өнөөдөр Зөрчлийн тухай хуулийг үргэлжлүүлэн хэлэлцэж байна. Гишүүд зарчмын зөрүүтэй 80 орчим саналаар санал хурааж байгаа юм. Энэ үеэр тэдний илэрхийлсэн буй байр суурийг хүргэж байна.

Ардчилсан намын бүлгийн дарга Д.Эрдэнэбат:

-УИХ-ын дарга М.Энхболд өчигдөр “Асуулт, хариулт байхгүй. Гишүүд зөвхөн үг хэлнэ” гэж тайлбарласан. Гэтэл өнөөдөр Ардын намын бүлэг гэнэт хуралдаж орж ирээд, өөр юм яриад эхэллээ. Бид энэ хуулийн санал хураалтад оролцохгүй.

-УИХ-ын гишүүн О.Баасанхүү:

-Хүний биед хохирол учруулахгүй халдах гэж Зөрчлийн хуульд тусгасан байна. Хохирол учруулахгүй халдах гэж юу гэсэн үг вэ. Сая Х.Нямбаатар гишүүн намайг нэгдүгээр курсын оюутан болгочихлоо. Б.Дэлгэрсайхан гишүүн намайг танхайрсан гэлээ. Энэ байдал чинь надад халдсан гэсэн үг. Хоёрдугаарт, гэр бүлийн хамаарал бүхий харилцаатай хүнийг зодсон бол торгох гээд оруулчихсан байна. Хүн зодох гэдгийг Эрүүгийн хуулиар шийдэх хэрэгтэй. Та нар коммунист дэглэмээр асуудлаа шийдвэл шийд. Өнөөдөр О.Баасанхүү гэдэг хүн та бүхэнд гай болоод байгаа юм биш. Та нар өөрөө өөрсдөдөө гай болоод байгаа.

-УИХ-ын дэд дарга Ц.Нямдорж:

-О.Баасанхүү чи, “Та нар” гэдэг үгээр далимдуулж, 65 хүн рүү нэг бүрчлэн дайрахаа боль. Түүнийхээ дараа өөрийнхөө асуудлыг яриарай. Ганц хүн их эрхлэхээр тэнэг болдог юм. Мэдэж ав. Чи дандаа хүн доромжилж байдаг хэн болчихсон юм. Чи бүр час улаан коммунист намын нэр хулгайлж авснаа мэдэж байна уу?

Өнөөдрийн хуралдаанаар Зөрчлийн хуулийн төсөлтэй холбоотой зарчмын зөрүүтэй 80 гаруй саналаар санал хураана. Үдээс өмнөх хуралдаанаар 17 саналаар санал хурааснаар чуулган түр завсарлалаа. Үдээс хойш Зөрчлийн хуулийг үргэлжлүүлэн хэлэлцэнэ.