Month: March 2017

Иргэд хайртай дотны хүмүүстэйгээ золголт хийхээр Улаанбаатар хотоос орон нутаг, орон нутгаас Улаанбаатар хотыг зорих иргэд, тээврийн хэрэгслийн тоо эрс нэмэгдсэн. Замын хөдөлгөөнд оролцох үедээ жолооч нар хурд хэтрүүлэх, гүйцэж түрүүлэх үйлдлийг буруу хийсний улмаас зам тээврийн осолд холбогдох мөн тээврийн хэрэгслийн техникийн бүрэн байдлыг хангаагүйн улмаас эвдэрч зогсох, замын хажуу руу орох, замын цагдаа хармагцаа хамгаалах бүсийг хэрэглэх, мөрөн дээрээ тохох, согтууруулах ундааны зүйл хэрэглэсэн үедээ тээврийн хэрэгсэл жолоодох зэрэг зөрчил гаргаж байна.

Мөн маргаашнаас бүх нийтийн амралт дуусч ажлын өдрүүд эхлэх гэж байгаатай холбоотойгоор орон нутгаас нийслэл хотыг зорьж буй жолооч нар амжиж ирэхийн тулд хурд хэтрүүлэх, хэт ядарсан үедээ тээврийн хэрэгсэл жолоодох, шөнийн цагаар гэрэл шилжүүлэхгүй зорчих зэрэг зөрчлийг гаргаж болзошгүй тул иргэд хөдөлгөөний аюулгүй байдлыг хангаж, анхаарал болгоомжтой зорчихыг сэрэмжлүүлж байна.

Бүх нийтийн амралтын өдрүүдэд буюу Сар шинийн Шинийн 1,2,3-ны өдрүүдэд тээврийн хэрэгслийн улсын дугаарын хязгаарлалт үйлчлээгүй.

Тэгвэл маргаашнаас буюу Пүрэв гарагаас эхлэн тээврийн хэрэгслийг улсын дугаарын сүүлийн оронгоор хязгаарлан хөдөлгөөнд оролцуулж эхэлнэ. Өөрөөр хэлбэл маргааш тээврийн хэрэгслийн улсын дугаар нь 4,9- өөр төгссөн тээврийн хэрэгсэл 08-20 цагийн хооронд хязгаарлагдсан бүсчлэлд замын хөдөлгөөнд оролцохгүй юм.

Монгол түмний уламжлалт Сар шинийн баярын өдрүүдэд Замын цагдаагийн алба хаагчид Монгол улсын замын хөдөлгөөний аюулгүй байдлыг хангах, зам тээврийн осол, хэргээс урьдчилан сэргийлэх, эрдэнэт хүний амь нас, эрүүл мэнд, эд хөрөнгийг хамгаалах эрхэм үүргээ нэр төртэй биелүүлэн ажилаа.

Эдгээр өдрүүдэд Замын цагдаагийн алба хаагчид өндөржүүлсэн бэлэн байдалд, бүрэн бүрэлдэхүүнээрээ ажилласан бөгөөд замын хөдөлгөөн зохицуулахаар нийт 900 гаруй замын цагдаа, ХСИС-ийн сонсогч, хэв журмын алба хаагч нар ажиллаа.

Сар шинийн өдрүүдэд нийслэлийн Онцгой байдлын газарт гал түймрийн 20 дуудлага бүртгэгдсэн байна. Үүнээс битүүний өдөр ес, шинийн нэгэнд долоо, шинийн хоёронд дөрвөн дуудлага иржээ. Дуудлагын ихэнх нь гэр хорооллоос ирсэн бөгөөд хог шатаах, цахилгаан хэрэгслээ салгалгүй гарснаас болж гал түймэр гарсан гэв. Гал түймрийн улмаас хүний амь эрсдээгүй ч айлын амбар, байшин шатсан тохиолдол гарчээ. Өнгөрсөн жилийн хувьд галын дуудлага нилээдгүй гарч хүний амь нас эрсэдсэн тохиолдол гарч байсан. Түүнтэй харьцуулахад энэ жил харьцангуй тайван байна гэв. Мөн иргэдийг золголтоор явахдаа цахилгааны хэрэгслээ бүрэн унтрааж, аюулгүй байдлаа хангаж явахыг нийслэлийн онцгой байдлын газраас сэрэмжлүүлж байна.

Нийслэлийн аврах ангид сар шинийн өдрүүдэд хоёр дуудлага ирж, аврагчид шуурхай ажилласан байна. Тухайлбал, шинийн нэгний өдөр жорлонгийн ухсан нүхэнд морь уналаа гэсэн дуудлагын дагуу ажиллаж, морийг татан гаргажээ. Мөн шинийн нэгнийн өдөр нэг хүн амиа хорлохыг завдсан байна. Тодруулбал,Сонгинохайрхан дүүрэг Орчлон хорооллын 46 дугаар байрны цонхоор Б.Батсайхан гэгч залуу ор хөнжлийн даавуугаа унжуулж үсрэнэ хэмээн орилж байжээ. Энэ үед аврагчид байшингийн дээвэр дээрээс олс унжуулан аварч, цагдаагийн байгууллагад хүлээлгэн өгсөн байна. Учир нь амиа хорлохыг завдсан этгээд согтууруулах ундаа хэтрүүлэн хэрэглэсэн байжээ.

Засгийн газраас амьсгалын замын цочмог томуу, томуу төст өвчний дэгдэлтийг бууруулах, өвчлөлөөс урьдчилан сэргийлэх зорилгоор тогтоол баталсан. Энэ хүрээнд Өрхийн эрүүл мэндийн төвүүдийг нэгдүгээр сарын 02-ноос гуравдугаар сарын 01 хүртэл бямба гариг бүр ажиллаж байсан юм. Тэгвэл Засгийн газрын тогтоолын хэрэгжих хугацаа өнөөдөр дуусч байна. Ингэснээр өрхийн эмнэлгүүд хуучин хуваарийн дагуу ажиллаж эхэлж байна.

Мөн дээрх хугацаанд амьсгалын замын цочмог томуу, томуу төст өвчлөлөөр өвчилсөн 5 хүртэлх насны хүүхдээ эмнэлэгт, мөн гэрээрээ 3-5 хоног асарч байгаа эх, эцэг /асран хамгаалагч нар/-т мөн хугацааны цалинтай чөлөө олгохыг ажил олгогч нарт даалгаад байсан юм. Энэ хугацаа ч мөн өнөөдөр дуусч байна.

Монгол түмний уламжлалт сар шинийн баяр өргөн дэлгэр үргэлжилж байна. Жилд нэг удаа тохиодог цагаан сарын баярын өдрүүдэд үндэсний хувцсаараа гангарч, өв уламжлалаа дээдлэн хүндэтгэдэг уламжлалтай. Ингээд гал тахиа жилд олны танил эрхмүүд хэрхэн гангарсныг хүргэж байна.

Жүжигчин Баясгалангийн гэр бүл

Дуучин МУСТА Б.Чулуунчимэг

Реппэр GEE

Топ модель О.Уянга гэр бүлийн хамт

УИХ-ын гишүүн О.Содбилэг, гэргий Туулын хамт

Дуучин Х.Мөнгөнцэцэг

Дуучин Нара хүүгийн хамт

Б.Чингүүний гэр бүл

Жүжигчин Ганцэцэг 2 хүүгийн хамт

Удам дамжсан аваргын хөвгүүд гэр бүлийн хамт

МУ-ын Төрийн соёрхолт дуучин Г.Ариунбаатар

Шинийн нэгний өглөө нар сайхан мандаж, цаг агаар тогтуун байсан тул түмэн олон сайхан жил гарлаа хэмээн бэлэгшээж байсан юм. Гэхдээ Ус цаг уур орчны шинжилгээний газраас хол замд явах хүмүүст шинийн хоёрноос цаг агаар хүйтэрч болзошгүй хэмээн анхааруулж байсан билээ. Тэгвэл Онцгой байдлын газраас одоогийн байдлаар орон нутагт цаг агаарын улмаас ямар нэгэн гамшигт үзэгдэл болоогүй, тогтуун сайхан байна гэж мэдээллээ.

Алтан унжлагат гал тахиа жилийн баярын өдрүүдэд Эх хүүхдийн эрүүл мэндийн үндэсний төвд одоогийн байдлаар 40 хүүхэд мэндэлсний 21 нь голомт залгах хүү, 19 нь гал сахих охин байжээ. Тодруулбал, шинийн нэгний билэгт сайн өдөр 18 хүүхэд мэндэлсний 11 нь хүү, долоо нь охин байв. Харин шинийн хоёрны өдөр арван хүү, 12 охин мэндэлсэн байна. Гэхдээ өнгөрсөн жилийн сар шинийн баярын өдрүүдтэй харьцуулбал төрөлт бага байсныг ЭХЭМҮТ-ийн эмч нар онцолж байлаа.