Month: February 2017

Нийслэлийн Засаг даргын шийдвэрээр хоёрдугаар сарын 2-ны өдөр нийслэлийн Үйлчилгээний нэгдсэн төвийн “Дүнжингарав” салбарт нээлттэй ажлын байрны өдөрлөг зохион байгуулна. Сүүлийн жилүүдэд Улаанбаатар хотын хэмжээнд тулгамдаж байгаа асуудлуудыг шийдвэрлэх, бүтээн байгуулалтын ажилд иргэдийн оролцоо, залуучуудын мэргэжил боловсрол, мэдлэг чадварыг татан оролцуулах шаардлагатай байгаа юм. Тиймээс Улаанбаатар хотын бүтээн байгуулалтад нэн шаардлагатай мэргэжил эзэмшсэн болон суралцаж байгаа залуусыг “Нээлттэй ажлын байр” өдөрлөгт оролцохыг урьж байна.

НЭЭЛТТЭЙ АЖЛЫН
БАЙРНЫ ӨДӨРЛӨГИЙН ХҮРЭЭНД ЗАРЛАГДСАН НАРИЙН МЭРГЭЖЛИЙН НЭР
Хотын хөгжлийн инженерчлэл (Urban Development Engineering):
Авто замын барилгын инженер
Давхар, зам гүүрийн инженер
Хөдөлгөөн зохион байгуулалтын инженер
Барилгын инженер (LIRA-CAПP, MONOMAX-CAПP зэрэг барилгын тооцооны програм, AUTOCAD барилгын зургийн програм, MICROSOFT OFFICE програмыг эзэмшсэн)
Хот төлөвлөлтийн эдийн засагч
Хотын нийтийн тээврийн инженер (BRT)
Эко хороолол, орон сууцны инженер
Үерийн далан сувгийн инженер
Мэдээллийн технологийн инженер (System admin, Unix, Red Hut, сүлжээний manage төхөөрөмж, сүлжээ хамгааллын төхөөрөмж дээр ажиллах чадвар-тай. Java, My SQL програмчлалын хэлний мэдлэгтэй, кодчлох загвар (Demo) бэлдэх)
Олон нийтийн бодлого боловсруулалт (Public Administration):
Хотын менежментийн менежер
Үл хөдлөх хөрөнгийн менежмент
Инновацийн удирдлага
Гэрээ, эрхийн мэргэжилтэн (FIDIC сургалтын гэрчилгээтэй)
Төслийн удирдлага (Project Management Professional)
Хотын социологич
Хотын патентчин
Event management (Жуулчдад зориулсан арга хэмжээ зохион байгуулах)
Хотын хүрээлэн буй орчныг сайжруулах бодлого боловсруулалт (Improvement of Urban Environment Policy):

Сэргээгдэх эрчим хүчний инженер
Хог хаягдлын дахин боловсруулалтын инженер
Дендерлогич
Ногоон байгууламжийн төлөвлөгч
Цэвэрлэх байгууламжийн технологич – инженер
Байгаль орчны эрсдлийн удирдлага
Санхүү, эдийн засгийн бодлогын менежмент (Fiscal Policy Management):

Хотын санхүүч
Хотын эдийн засагч
Олон улсын мэргэшсэн аудитор

Нээлттэй ажлын байрны өдөрлөгийн үеэр харьяа агентлаг, нийслэл болон орон нутгийн өмчит газруудын мэдээ мэдээллийг нэг дороос авах боломжтой аж. Нийслэл хотын бүтээн байгуулалтад нэн шаардлагатай нарийн мэргэжлийг эзэмшсэн, одоо эдгээр мэргэжлээр магистрт суралцаж байгаа нийслэл хотынхоо бүтээн байгуулалтад гар бие оролцох хүсэл эрмэлзэлтэй залуус www.ulaanbaatar.mn албан ёсны цахим хуудас дахь “Нээлттэй ажлын байр” цонхыг дарж анкетаа бөглөн мэдээллийн санд бүртгүүлэх боломжтой юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

МУИС-ийн оюутны төлөөллийг өнөөдөр БСШУСЯ-ны Боловсролын бодлогын газрын дарга Д.Эрдэнэчимэг, Хуулийн хэлтсийн дарга П.Чулуунбаатар нар хүлээн авч уулзлаа. МУИС оюутнуудаасаа улиралд 112 мянган төгрөг, жилд 224 мянган төгрөг, магистрт суралцаж буй хүмүүсээс жилдээ 336 мянган төгрөгийг хураамж болгон авдаг байна. Үүнийг цэвэрлэгээ, үйлчилгээ, интернетийн холболт зэрэгт ашиглаж байгааг хууль бус үйлдэл хэмээн үзэж оюутнууд жагсаж байгаа аж.

МУИС-ийн “Оюутны холбоо”-ны тэргүүн Ц.Хасбаатар уулзалтын үеэр хэлэхдээ “Оюутнуудаас суурь хураамж авч буй нь хуульд нийцэхгүй байгаа нь аудитын шалгалтаар илэрсэн. МУИС-ийн оюутнууд тав дахь жилдээ сургалтын төлбөрөөс гадна суурь хураамж төлж байна. Хамгийн гол нь биднээс авч буй мөнгөө үр ашигтай зүйлд зарцуулж байвал эсэргүүцэх шаардлагагүй юм. Гэтэл сургуулийн захиргаа оюутнуудаас хурааж авсан мөнгөө юунд зарцуулж байгааг огт тайлагнадаггүй. Бидний хүсэлтийг аргацаасан хариулт өгсөөр удаж байна” гэв. МУИС-ийн 2012-2015 оны төсөв, санхүүгийн нөхцөл байдал түүний зарцуулалт, гүйцэтгэлд Үндэсний аудитын газар өнгөрсөн онд шалгалт хийжээ. Улмаар аудитын газраас суурь хураамжийг хуульд нийцэхгүй байна хэмээн дүгнэлт гаргаж, зөрчлийг арилгахыг сургуулийн удирдлага, Удирдах зөвлөлд хүргүүлсэн байна. БСШУСЯ-ны Боловсролын бодлогын газрын дарга Д.Эрдэнэчимэг “Өнөөдөр БСШУСЯ-ын сайд оюутнуудын болон сургуулийн “Багш нарын холбоо”-ны төлөөллийг хүлээн авч уулзлаа. Бид оюутнуудынхаа санал, хүсэлт, эрх ашигт хүндэтгэлтэй хандах ёстой. Тиймээс ч шаардлагыг нь хүлээн авч холбогдох арга хэмжээг хэрэгжүүлнэ. МУИС-ийн суурь хураамж бол төлбөрийн бүрэлдэхүүн хэсэгт хамаардаг. Сургалтын төлбөрийг Удирдах зөвлөлийн хурлаар шийдвэрлэдэг. МУИС-ийн Удирдах зөвлөл өчигдөр /2017.01.31/-нд хуралдаж, суурь хураамжийн асуудлаар ажлын хэсэг байгуулсан. Ажлын хэсэгт оюутан, багш нарын төлөөлөл багтсан. Хамтдаа асуудлыг хэлэлцэж, хамтдаа шийдвэрлэнэ” гэв.

Сүхбаатаар аймгийн Мөнххаан, Түвшинширээ сумын зургаан голомтонд 32 өрхийн 843 хонь цэцэг өвчнөөр өвчилж, 837 хонийг устгаж, зургаан хонийг зориудаар нядалж дээж авсан байна.

Гоц халдварт өвчин оношлогдсон хоёр суманд Мал эмнэлгийн нөөцөд байсан 6.1 сая төгрөгийн үнэ бүхий өвлийн дулаан хувцас, халдвар хамгааллын хувцас, автомакс, нэг удаагийн тариур, ариутгалын спирт, ариутгал халдваргүйтгэлийн бодис зэргийг шуурхай нийлүүлэн ажилласан байна. Мөнххаан суманд 211.0 мянган тун, Түвшинширээ суманд 23.0 мянган тун вакцин нийлүүлж, вакцинжуулалтын ажлыг бүрэн хийж дуусгасан байна. Тодруулбал: Мөнххаан сумын нийт хонийг вакцинжуулахаар малын их эмчээр ахлуулсан 17 хэсэг гарч, 1 дүгээр сарын 11-нээс 10 хоногийн хугацаанд 192532 толгой хонь тарьж, 100 хувийн гүйцэтгэлтэй ажилласан байна. Харин Түвшинширээ сумын голомтын бүсийн 22000 толгой хонийг вакцинжуулах ажлыг дөрвөн малын их эмчтэй ажлын хэсэг гарч, 22763 толгой хонийг тарилганд хамруулж 98.2 хувийн гүйцэтгэлтэй ажиллаад байна.

Мөн өөрийн аймагт отроор яваа болон гадны аймагт өвөлжиж байгаа малчин өрхийн болон тавиул малын судалгааг гаргаж, масс вакцинжуулалт зохион байгуулах бэлтгэл ажлыг хийж байна.

Олон Улсын Валютын Сангийн төлөөлөгчид Монголд ажиллаж эхлээд байгаа энэ үед олон улсын байгууллагууд эдийн засгийн эрсдэлийг хэрхэн үнэлж байгааг эргэн сануулъя. Монгол Улсын эрсдэл даах чадвар 2016 оны эцэст 32.15 оноогоор үнэлэгдсэн.

Улсын эрсдэл даах чадвар 2016 оны сүүлийн улиралд огцом буурч, эрсдэл даах чадвараараа “Euromoney” сэтгүүлээс нэгтгэн тооцдог 186 улсаас 123 дугаар байрт бичигдэж байна. Гадаад өрийн эргэн төлөлт, төсвийн алдагдал зэрэг сорилтыг давах цорын ганц гарц нь Олон Улсын Валютын Сангийн хөтөлбөр гэж тэд үзжээ. Монгол Улсын эрсдэл даах чадвар 2016 оны эцэст 32.15 оноогоор үнэлэгдсэн. Эдийн засаг эрчтэй өсч байсан 2011 оноос хойш энэ үзүүлэлтээр даруй 43 байр ухарч, эрсдэлийн тав дахь зэрэглэлд буюу дефолтын эрсдэл хамгийн өндөр орны ангилалд багтаж байна. Тэр дундаа, засаглалын эрсдэл, зохицуулалт, бодлого тодорхойлох байдлаараа сүүл мушгиж байгааг “Euromoney” анхаарууллаа.

Дэлхийн эдийн засгийн форумаас танилцуулсан 2017 оны Эрсдэлийн тайланд Монгол Улс санхүүгийн хямрал нүүрлэх эрсдэлтэй улс орнуудын хамгийн түрүүнд бичигдсэн байна. Хямрал тохиох магадлалыг 75.7 хувь гэж тодорхойлсон. Монголын дараа Грек, Коста Рика, Азербейжан улсууд багтаж хямрал тохиох хамгийн эрсдэлтэй орнуудаар бичигдэж байна. Харин улс төрийн тогтворгүй байдлын эрсдэлээр хоёрдугаарт бичигдсэн юм. Манай улсын дараа Йемен, Венесуэл, Болив зэрэг орон улс төрийн орчин хамгийн эрсдэлтэй ангилалд хамаарч байна.

Эх сурвалж: Блүүмберг Тв

Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү Нидерландын Вант улсын “Вэйсис” ХХК-ийн Зөвлөх зөвлөлийн ерөнхийлөгч Пол Стаартжес нар хамтран ажиллах санамж бичигт өнөөдөр гарын үсэг зурлаа. Санамж бичгийн хүрээнд Улаанбаатар хотын авто зам, зогсоол, нийтийн тээврийн салбарт сүүлийн үеийн дэвшилтэт техник технологи болон шилдэг менежментийн шийдлүүдийг нэвтрүүлэхэд хамтран ажиллах юм байна. Түүнчлэн авто зогсоолын шинэ шийдлүүдийг нэвтрүүлж, түгжрэлийг бууруулах үр дүнд хүрэх зорилготой аж.

Санамж бичигт гарын үсэг зурсныхаа дараа нийслэлийн Засаг даргын орлогч П.Баярхүү “Уг санамж бичгийн хүрээнд Улаанбаатар хотод “Ухаалаг авто зогсоол” төслийг хэрэгжүүлэхээр боллоо. Ажлын хэсгийг байгуулж, төслийн ажлыг нэн даруй эхлүүлнэ” гэв. Харин “Вэйсис” ХХК-ийн Зөвлөх зөвлөлийн ерөнхийлөгч Пол Стаартжес “Хамтарч хийх бүтээн байгуулалтын ажлуудыг Монгол Улсын нийслэл Улаанбаатар хотод амжилттай хэрэгжүүлнэ гэдэгтээ итгэлтэй байна” гэсэн юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

2017 он гарсаар Хөвсгөл, Увс, Говь-Алтай, Өмнөговь, Булган аймгийн 6 сум, Улаанбаатар хотын Чингэлтэй, Багахангай, Хан-Уул дүүрэгт галзуугийн эрсдэлд өртсөн 22 тохиолдол бүртгэгдсэн гэж Зоонозийн өвчин судлалын үндэсний төвөөс мэдээллээ. Галзуу өвчнөөс урьдчилан сэргийлэхийн тулд дараахь мэдээллийг уншихад илүүдэхгүй.

Нэр бүхий компаниуд Орхон голыг бохирдуулсан хэргийг прокурорын байгууллагаас сэргээн шалгаж эхэлжээ. Голын эхэнд олборлолт явуулж байсан “Алтандорнод Монгол”, “Монгол газар” компаниуд нөхөн сэргээлт нэрээр өөр компанитай гэрээ байгуулан үлдэгдэл дээрээ ажиллуулсанаас үүдэж Орхон голын ус бохирдож, гол мөрөн татарсан аж. Тиймээс 2010-2011 онд “Алтандорнод Монгол”-ыг удирдаж байсан Ч.Бямбаа, Д.Даваасамбуу, “Монгол газар” компанийн захирал Ц.Мянганбаяр, У.Даш зэрэг хүмүүсийг хэрэгт холбогдуулан шалгаж хэргийг хэрэгсэхгүй болгосон билээ. Харин уг хэргийг үндэслэлгүйгээр хаасан гэж үзэн сэргээн шалгахаар болсон байна.