Month: February 2017

Замын цагдаагийн алба хаагчид энэ сарын 11-12-нд буюу өнгөрсөн амралтын өдрүүдэд согтууруулах ундааны зүйл хэрэглэсэн үедээ тээврийн хэрэгсэл жолоодсон 71 жолоочийг саатуулж, гарч болзошгүй осол, хэргээс урьдчилан сэргийлжээ.

Амралтын өдрүүдэд Замын цагдаагийн албаны Жижүүрийн шуурхай удирдлагын хэлтэст зам тээврийн ослын 272 дуудлага ирсэн байна. Ослын улмаас 15 хүн хүнд, хөнгөн гэмтжээ.

Тухайлбал, Чингэлтэй дүүргийн нутаг дэвсгэр Баянбүрдийн тойргийн уулзварт Honda Grace маркийн автомашин Toyota Pruis-20 мөргөлдөж, найман хүн гэмтсэн байна. Түүнчлэн Дархан-Уул аймгийн Хонгор сумын нутагт Honda Starex автомаүин Howo Sinotruk-тэй мөргөлдсөний улмаас хоёр хүн амиа алдаж, 4 хүн гэмтсэн байна.

БОАЖЯ-ны Хүрээлэн буй орчин, байгалийн нөөцийн удирдлагын газрын дарга Д.Даваасамба, Үнэлгээ Аудитын хэлтсийн дарга П.Бүнчинжав, мэргэжилтэн С.Баярхүү нарын гурван иргэн авлига өгсөн гэх “Оюут цагаан барс” компанийн захирал Ц.Анхбаярыг өнгөрсөн долоо хоногийн пүрэв гаригт саатуулсан.

Тэгвэл П.Бүнчинжав, С.Баярхүү, Ц.Анхбаярыг өчигдөр буюу ням гаригт сулласан бол Хүрээлэн буй орчин, байгалийн нөөцийн удирдлагын газрын дарга Д.Даваасамбын хорих хугацааг 14 хоногийн хугацаагаар сунгажээ.

“Оюут цагаан барс” компанийн захирал Ц.Анхбаяр 600 тонн хуш модны самар хилээр гаргах зөвшөөрөл авахын тулд ил хэргийг үйлджээ.

Одоогоор С.Баярхүүд 40 сая төгрөгийн авлига өгсөн гэдэг нь тодорхой болоод байгаа. Харин газрын дарга П.Даваасамба “Оюут цагаан барс” компанийн 600 тонн самрыг хилээр гаргах зөвшөөрөл олгоод 150 сая төгрөг авсан хэрэгт шалгагдаж байгаа талаар эх сурвалж мэдээллээ.

“Хас”-ын Ч.Ганхуяг, хуульч Б.Баяр, уул уурхайн эксперт Л.Наранбаатар нар өнөөдөр “Эрдэнэс Тавантолгой” ХК-ийн 20 хувийн хувьцаа эзэмшигчдийн эрх ашгийг хамгаалж, арга хэмжээ авахыг шаардлаа. Учир нь ард түмэн хувьцааны ашгаа хүртэж амжаагүй байхад тус уурхайн үр ашигтай олборлож болох нөөц нь найман жилийн дараад дампуурлын ирмэгт хүрэх аюултай байгаа аж.

“Эрдэнэс Тавантолгой” ХК-ны 20 хувийг эзэмшигч нь ард түмэн. Тэгвэл 2011 оноос хувьцаа эзэмшигчийн эрхээ эдэлж, мэдээлэл авах, санал өгөх, хувийн өмчөө чөлөөтэй захиран зарцуулах эрх нь хаалттай байсаар иржээ.

Компанийн санхүү, эдийн засгийн үзүүлэлт, тайлан балансыг олон нийтэд нээлттэй мэдээлэх үүргээ хэрэгжүүлдэггүй, компанийн үйл ажиллагаа олон нийтэд ил биш байсныг тэд шүүмжлэв.

Түүнээс гадна 1072 хувьцаа эзэмшигчдээс хэдэн хүн энэ мөнгөн хэлбэрээр авсан, хэдэн хүн нь хувьцаа эзэмшиж байна вэ гэдэг мэдээлэл одоо болтол тодорхойгүй байгаа гэдгийг онцоллоо. Тиймээс дээрх гурван төлөөлөгч хувьцаа эзэмшигчдийн эрхийг хамгаалах зорилгоор Монгол Улсын Засгийн газарт хандаж алдаа дутагдлаа арилгах, компанийн хувьцаа эзэмшигчдийн эрхийг хангах талаар тодорхой арга хэмжээ авахыг шаардаж, тодорхой акц зохион байгуулахаа мэдэгдлээ.

Уул уурхайн эксперт Л.Наранбаатар, “Эрдэнэс Таван Толгой” ХК нь 100 төгрөгийн орлого олохын тулд 136 төгрөгийн зардал гаргадаг. 2011 оноос хойш нийт 24,2 сая тонн сайн чанарын коксжих нүүрсийг сорчилж олборлон, экспортолсон ч хуримтлагдсан алдагдал нь 453 тэрбум төгрөг байна. Өр төлбөр нь 822 тэрбум төгрөгт хүрсэн байна. Яг энэ байдлаар үргэлжлүүлэн ажиллавал энэ уурхайн үр ашигтай олборлож болох нөөц нь найман жилийн дараа дампуурахад хүрнэ” гэдгийг онцлоллоо.

Энэ арга хэмжээний хүрээнд хувьцаа эзэмшигч иргэн болон аж ахуй нэгжийг www.ard.mnсайтад цахимаар бүртгүүлж, эрх ашгаа хамгаалахад хамтран ажиллахыг хүслээ.

Нийслэлийн Засаг даргын Тамгын газар, Улаанбаатар хотын худалдааны танхимтай хамтран “Улаанбаатар хөрөнгө оруулалт-2017” бизнес чуулга уулзалтыг энэ сарын 20-нд зохион байгуулах гэж байна.

Тус чуулга уулзалтын зорилго нь нийслэлийн эдийн засгийн хөгжлийг дэмжих, бизнес эрхлэгчдийн эрх ашгийг хамгаалах, төр хувийн хэвшлийн хамтын ажиллагааг хөгжүүлэх, иргэд, аж ахуйн нэгжид хөрөнгө оруулалт бизнесийн таатай орчин нөхцөлийг бүрдүүлэхэд оршино. Уулзалтад УИХ болон Засгийн газрын гишүүд, Монгол Улсад суугаа Онц бөгөөд Бүрэн эрхт Элчин сайд нар, нийслэлийн ИТХ-ын төлөөлөгчид, Нутгийн захиргааны байгууллагын удирдлагууд, Улаанбаатар хотын худалдааны танхимын гишүүд, олон улсын байгууллагын төлөөлөгч, үндэсний баялаг бүтээгчид, хөрөнгө оруулагчид оролцоно.

“Улаанбаатар хөрөнгө оруулалт-2017” бизнес чуулга уулзалтаар төр хувийн хэвшлийн түншлэл, эдийн засгийн стратеги, хөрөнгө оруулалтын төсөл хөтөлбөр, худалдан авалт, шилэн тендер, хот байгуулалт, дэд бүтэц зэрэг асуудлыг хэлэлцэх юм. Гадаад, дотоодын төсөв, хөрөнгө оруулалтаар хийгдэх хаврын бүтээн байгуулалтын ажлаа нийслэлээс ил тод зарлаж, аж ахуйн нэгж, бизнесийнхэнд тендерээр зарлах ажлуудаа танилцуулна.

Хаврын бүтээн байгуулалт, хөрөнгө оруулалтын ажил эхлэхээс өмнө бизнесийнхэн чуулж буй уг арга хэмжээнд нийслэлийн иргэд, аж ахуйн нэгжүүд оролцох бүрэн боломжтой гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Манай улсад улаанбурхан, салхинцэцэг, томуугийн өвчлөл нэмэгдээд байгаа учраас Эрүүл мэнд, спортын яамнаас дараах зөвлөмжийг гаргажээ.

Маргааш баруун аймгуудын нутаг, төвийн аймгуудын нутгийн зарим газраар, нөгөөдөр ихэнх нутгаар цас орж, зөөлөн цасан шуурга шуурах юм байна. Улмаар 16-нд нутгийн зарим газраар,17-нд нутгийн зүүн өмнөд хэсгээр бага зэргийн цас орох аж. Салхи 14,15 ихэнх нутгаар, 16,17-нд Алтайн салбар уулс болон Арц богдын өвөр хоолойгоор секундэд 14-16 метр хүртэл ширүүсч шороон болон цасан шуурга шуурна.

Маргааш нутгийн хойд хэсгээр, цаашдаа ихэнх нутгаар хүйтний эрч чангарч Увс нуур болон Дархадын хотгор, Идэр, Тэс, Ерөө голын хөндий, Хүрэн бэлчир орчмоор шөнөдөө 33-38 градус, өдөртөө 21-26 градус, Хөвсгөлийн уулархаг нутаг, Орхон-Сэлэнгэ, Эг, Хараа, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 29-34 градус, өдөртөө 13-18 градус, Монгол Алтайн нурууны өвөр хэсэг, Хангай, Хэнтийн уулархаг нутгаар шөнөдөө 22-27 градус, өдөртөө 9-14 градус, говийн бүс нутгийн өмнөд хэсгээр шөнөдөө 10-15 градус, өдөртөө 3-8 градус, бусад нутгаар шөнөдөө 19-24 градус, өдөртөө 6-11 градус хүйтэн байна.