Month: February 2017

Нийслэлд авто тээврийн болон өөрөө явагч хэрэгслийн албан татвар, төлбөрийг хурааж эхэлсэнтэй холбогдуулан нийслэлийн Татварын албаныхан өнөөдөр Баянгол Техникийн хяналтын үзлэгийн төвийн ажлын явцтай танилцлаа. Нийслэлийн хэмжээнд тээврийн хэрэгслийн албан татварын ажил эхэлсэнтэй холбогдуулан Баянгол, Баянзүрх, Сонгинохайрхан Техникийн хяналтын үзлэгийн төвүүдэд долоо хоногийн турш амралтын өдөргүй ажиллаж байгаа юм. Улаанбаатар хотод 440 мянга гаруй тээврийн хэрэгсэл бүртгэлтэй байдгаас өнөөдрийн байдлаар 47 мянган нь хамрагдсан байдалтай байгаа юм.

Нийслэлийн Татварын газрын байцаагч Я.Өнөрбаяр “Авто тээврийн албан татварыг тухайн тээврийн хэрэгслийн улсын дугаарын сүүлийн орноос хамааран ирэх тавдугаар сарыг дуустал хурааж байна. 1, 6, 2, 7-оор төгссөн улсын дугаартай тээврийн хэрэгсэл эзэмшигчид энэ хоёрдугаар сардаа амжиж татвар, төлбөрөө төлөх шаардлагатай. Нэгдүгээр сард татвараа төлөх ёстой ч хугацаанаасаа хоцорсон буюу 1,6-аар төгссөн тээврийн хэрэгсэл эзэмшигчдэд хандаж хэлэхэд энэ сард Татварын газрын зүгээс ямар нэгэн торгууль байхгүй. Харин төлөөгүй тохиолдолд Замын цагдаагийн албанаас Захиргааны хариуцлагын тухай хуулийн дагуу арга хэмжээг авч байгаа” гэдгийг хэлж байлаа. Техникийн хэрэгслийн үзлэг, оношлогооны төвүүдийн ажиллах цагийн хуваарийн талаар Авто тээврийн үндэсний төвийн ахлах мэргэжилтэн Д.Эрдэнэмөнх “2017 он гарсаар улсын хэмжээнд 39 мянга гаруй тээврийн хэрэгсэл техникийн хяналтын үзлэгт хамрагдаад байна.

Нийслэлд Баянгол, Сонгинохайрхан, Баянзүрх гэсэн гурван техникийн хяналт, үзлэгийн төв ажиллаж байна.манай үзлэгийн төвүүд нь долоо хоногийн бүх өдрүүдэд амралтгүй ажиллаж байгаа. Ажлын өдрүүдэд 08:30-20:30 цагийн хооронд, амралтын өдрүүдэд 09:00-17:00 цагийн хооронд ажиллаж байна. Албан татвар, төлбөрийн ажил эхэлсэнтэй холбогдуулаад гурван салбар төвүүд дээр маань татвар хураах ажил явагдаж байгаа” хэмээлээ. Улсын бүртгэлд бүртгэлтэй ч жил дарааллан үзлэг, оношлогоонд ороогүй, Татвар, төлбөрөө төлөөгүй тээврийн хэрэгслийг эзэмшигчийнх нь хүсэлт гаргасны дагуу ямар нэгэн торгууль төлбөргүйгээр улсын бүртгэлээс хасч байгаа аж.

Энэ талаар Авто тээврийн үндэсний төвийн Бүртгэлийн газрын дарга Б.Гүрсоронзон “ЗЦА, Техникийн хяналтын үзлэгийн төвүүд болон нийслэлийн Татварын алба хамтарсан судалгаа гаргаад сүүлийн таван жилээс дээш техникийн хяналтын үзлэг, оношлогоонд ороогүй, татвар, төлбөрөө төлөөгүй тээврийн хэрэгслийг улсын бүртгэлээс хасч эхэлсэн. Ингэхдээ шууд хасахгүй эзэмшигчээр хүсэлт гаргуулж хүсэлтийн дагуу хасалтаа хийсээр байна. 2017 он гарсаар улсын хэмжээнд бид 4813 тээврийхэрэгсэл шинээр бүртгэж гэрчилгээ, дугаар олгосон. Мөн 24036 тээврийн хэрэгслийн шилжилт хөдөлгөөн бүртгэсэн байгаа” гэдгийг хэллээ.

Завхан аймгийн Тэс суманд өнгөрсөн жил улсын төсвийн хөрөнгө оруулалтаар Гал түймэр унтраах, аврах 57 дугаар ангийг байгуулсан билээ. Тус анги нь Завхан аймгийн Тэс, Баянтэс, Баянхайрхан, Асгат зэрэг суманд гамшгаас хамгаалах төрийн үйлчилгээг шуурхай хүргэх, обьектын гал, ой хээрийн түймэр, байгаль цаг агаарын аюулт үзэгдэл, ослын үед иргэдийн аюулгүй байдлыг ханган ажилладаг юм.

Тэгвэл албан хаагчдын нийгмийн баталгааг хангах дунд хугацаан зорилтын хүрээнд Тэс сумын Засаг даргын захирамжаар тус ангийн 20 албан хаагч өөрийн гэсэн хашааны газартай боллоо.

УИХ-ын Төсвийн байнгын хороо 2016 оны намрын чуулганы хугацаанд 20 удаа хуралдаж, бие даасан хоёр хууль, нэмэлт өөрчлөлт оруулах тухай 33 хууль, тогтоолыг хэлэлцсэн байна.

Байнгын хороогоор хэлэлцсэн онцлох хуулийн төслүүдийн нэг нь 2017 оны улсын төсөв байв. Өнгөрсөн хугацаанд Засгийн газраас өргөн мэдүүлсэн төсвийн төслүүдийн орлого болон зарлагыг УИХ ихэвчлэн нэмэгдүүлж баталдаг байсан. Энэ нь төсвийн алдагдал нэмэх гол шалтгаан байсан хэмээн байнгын хороон дарга Ч.Хүрэлбаатар онцлов.

Тэрбээр, “Бид 2017 оны төсвийг Засгийн газрын өргөн мэдүүлснээс 600 тэрбум төгрөгөөр бууруулж баталсан. Мөн Концессын гэрээ байгуулахад тавих хяналт, шаардлагыг сайжруулж, орлогоо бодитоор тооцож, зөв зарцуулах чиглэлд анхаарч ажилалаа. Ингэснээр төсвийн сахилга бат, хариуцлагыг сайжруулж, цаашид улсын өр нэмэх асуудлыг хумьсан” хэмээв.

Мөн тэрбээр УИХ-ын чуулганаар Аж ахуйн нэгжийн орлогын албан татварын тухай болон Гаалийн албан татвараас чөлөөлөх тухай хуулийг баталсныг онцлов.

Аж ахуйн нэгжийн орлогын албан татварын тухай хуулиар жилд 1.5 тэрбум төгрөгөөс доош орлоготой байгууллагын төлөх Аж ахуйн нэгжийн орлогын албан татварыг нэг хувиар тооцно гэдгийг УИХ-ын гишүүн Д.Тогтохсүрэн тайлбарласан. Орлого багатай аж ахуйн нэгжид татварын хөнгөлөлт үзүүлснээр байгууллагууд дотоод ажлын байраа хамгаалах, хэмнэсэн татварын хөрөнгөөрөө тоног төхөөрөмжөө сайжруулах боломж бүрдэнэ хэмээн үзэж байгаа аж. Харин Гаалийн албан татвараас чөлөөлөх тухай хууль нь жижиг дунд үйлдвэрлэлийг хөгжүүлэх зорилготой юм. Энэ хуулиар жижиг дунд үйлдвэрлэлд ашиглах тоног төхөөрөмжийг гаалийн албан татвараас чөлөөлөх юм.

Мэдээллийн дараа сэтгүүлчдийн сонирхсон асуултад хариулав.

-Олон улсын валютын сан (ОУВС)-тай хийж буй хэлэлцээр ямар шатандаа байна вэ?

-Засгийн газар, ОУВС-гийн хооронд хийж буй хэлэлцээр энэ долоо хоногт дуусна. Дэлгэрэнгүй мэдээллийг Засгийн газар өгнө.

-Хөгжлийн банкны тухай хуульд ОУВС-гаас өгсөн чиглэл бүрэн тусч чадсан уу?

-Би Хөгжлийн банкны хуульд ОУВС болон олон улсын өндөр түвшний экспертүүдийн саналыг хуульд тусгах ёстой гэсэн зарчмыг хатуу баримталж ирсэн. Тиймээс ОУВС-гаас ирүүлсэн 13 саналыг хуульд бүрэн тусгаж чадсан. Хөгжлийн банк нь Засгийн газрын баталгаагүйгээр өөрсдөө мөнгө босгох чадвартай, төрийн оролцоогүй бие даан шийдвэр гаргадаг ил тод үйл ажиллагаатай байх ёстой.

-Төсөвт тодотгол хийх үү?

-Засгийн газар, ОУВС хоорондын хэлэлцээрт ямар шаардлага тусгахаас шалтгаалж тодотгол хийх эсэх нь тодорхой болно. ОУВС-гаас 2017 оны төсөвт өөрчлөлт оруулах шаардлага тавьсан бол УИХ ээлжит бус чуулган зарлаад хэлэлцэх байх.

-“Эрдэнэт”-ийн 49 хувийг төр буцааж авахад та эсрэг байр суурьтай байсан. Энэ талаар?

-Үүнд гурван шалтгаан бий. Нэгдүгээрт, Хууль зүйн байнгын хорооны ажлын хэсгийн дүгнэлтэд “Эрдэнэт үйлдвэр”-ийн 49 хувийг хууль зөрчиж, хувийн хэвшилд өгсөн албан тушаалтнуудад хариуцлага тооцох асуудлыг тусгаагүй байсан. Хоёрдугаарт, Монгол Улс ирэх сард 580 сая ам.долларын өр төлнө. Ийм нөхцөлд 49 хувийг авахад зориулж, ихээхэн хэмжээний хөрөнгө зарцуулах боломж хомс. Гуравдугаарт, Эрдэнэт-ийн асуудалд сэтгэлийн хөөрлөөр хандаж болохгүй. 2009 онд Аюулгүй байдал, гадаад бодлогын байнгын хорооны шийдвэрээр ураны лицензүүдийг цуцлах шийдвэр гаргасан. Зөвшөөрлөө цуцлуулсан аж ахуйн нэгжүүд Арбитрын шүүхэд хандаж, улмаар Монгол Улс 116 сая ам.долларын өрөнд унасан түүх бий.

-“Тавантолгой”, Гацууртын ордоос эхлээд томоохон төслүүдийг хөдөлгөх асуудлыг ярьж байгаа. Төслийг хөдөлгөснөөр улсын төсөвт хэдэн төгрөгийн орлого орох вэ?

-Засгийн газар 2017 оны улсын төсвийг боловсруулахдаа эдийн засгийг 3.5 хувиар өснө гэж тооцсон. “Тавантолгой” төсөл эхэлж, Гачууртын ордыг ашиглан, “Оюутолгой”-г өргөжүүлснээр энэхүү өсөлтийг хангаж чадна гэж үзэж байгаа. Хэрвээ төслүүдээ хөдөлгөж чадахгүй бол эдийн засгийн өсөлт гарахгүй.

Өнөөдөр Гадаад харилцааны яам (ГХЯ)-наас мэдээлэл хийх үеэрээ Чех улсын визийг богино хугацаанд авах боломжтой болсон талаар мэдэгдлээ. Иргэдийн эрх ашгийг хамгаалах чиглэлээр хүсэлт болгосны дагуу Чехийн тал Улаанбаатар дахь ЭСЯ-ндаа визний нэмэлт ажилтан томилон ирүүлсэн байна. Улмаар ЭСЯ-нд визний ярилцлагад орох цагийг цахимаар товлох системийг сайжруулахаар болсон нь виз мэдүүлж буй монгол иргэдийн хүлээлгийн хугацаа богиносох таатай нөхцөлийг бүрдүүлж байгаа юм байна.

Гадаад харилцааны яамнаас иргэд зорчих нөхцөлийг хөнгөвчлөх чиглэлээр АНУ-д богино хугацаагаар ажиллах хүч гаргах буюу АНУ-ын Н2 ангиллын визийн хөтөлбөрт Монгол Улсыг хамруулах хүсэлтийг Америкийн талд албан ёсоор хүргүүлсэн байна

Өвлийн аялал жуулчлалыг хөгжүүлэх зорилгоор хоёр жилийн өмнөөс Хэнтий аймгийн Батноров суманд “Талын түмэн адуу” адууны баярыг зохион байгуулж ирсэн билээ. Тэгвэл энэ жилийн баяр энэ сарын 18, 19-ны өдөр Төв аймгийн Алтанбулаг суманд болох гэж байна.

Одоогоор Солонгос, Франц, Швед зэрэг 10 гаруй орны 30 орчим жуулчин ирэхээ мэдэгджээ. Өвлийн морьдын сүр жавхланг харуулж, уураг, булгианы тэмцээнийг адуучдын дунд зохион байгуулах юм байна. Мөн “Шургуу-2017” уран уургач, бугуйлч, “Эрэмгий адуучин” уурга шүүрэх, эмнэг бугуйлдах, “Адууны тухай дууг хэн сайн дуулах вэ” дууны тэмцээн, “Тар” богино зайны морьдын бооцоотой уралдаан, “Хөтөлгөө” ижил зүсмийн морьдын үзүүлбэр, Азарга гүйлгэх үзүүлбэр, “Талын Тайга” нохойн уралдаан зэрэг тэмцээнүүд болно.

Наадамд сонирхсон хүн бүр очих боломжтой бөгөөд “Сүхбаатарын талбай”-н баруун талаас нийтийн автобус 18, 19-ны өглөө 08.00 цагаас иргэдэд үйлчлэх юм байна.

О.ӨНӨР

Цагдаагийн ерөнхий газрын Хэвлэл, мэдээллийн төвд олон нийтийн сүлжээгээр дамжуулан “Сэлэнгэ аймагт Ерөө гол дээр алт угааж байна” гэсэн мэдээлэл иргэдээс иржээ. Энэ дагуу шалгахад Сэлэнгэ аймгийн нутаг дэвсгэрт байрлах Ерөө голын мөсийг техник ашиглан хуулж, цөмлөн ашигт малтмал олборлож байсан нь тогтоогдсон байна.

Тодруулбал, Бугант тосгоны харьяат иргэн Ш.Б, Б.Ө нар эксковатор ашиглан Ерөө голын мөсийг хуулан ухаж, гар аргаар үйлдвэрлэсэн алтны баяжмалтай шороо угаах төхөөрөмж ашиглан ашигт малтмал олборлолт явуулж байжээ. Уг хэрэгт Сэлэнгэ аймгийн Цагдаагийн газрын даргын тушаалаар ажлын хэсэг гарган шалгаж байгаа аж.

Мөн Бугант тосгоны байгаль орчны хяналтын улсын байцаагчийг оролцуулан хэргийн газрын үзлэг хийж, байгаль экологид учруулсан хохирлын үнэлгээг гаргуулахаар аймгийн мэргэжлийн хяналтын улсын байцаагчид хандан, мөрдөн байцаалтын ажиллагаа явуулж эхэлжээ.