Month: February 2017

Улсын баяр наадмыг зохион байгуулах комиссоос өргөн мэдүүлсэн саналыг
үндэслэн Монгол Улсын Ерөнхийлөгч Ц.Элбэгдорж ХYII жарны улаагчин гал
тахиа жилийн босгон дээр зарлиг гаргаж олон жил хурдан морины уяа
сойлго тааруулж улсын хэмжээний наадмуудаас түрүү, айраг авсан нэр бүхий
уяачдад улсын цол хүртээлээ. Уяачдын цолыг Монгол Улсын Ерөнхийлөгч
Ц.Элбэгдорж өнөөдөр Төрийн ордонд гардуулан өгөв.

Монгол Улсын Тод манлай уяач цолоор Дорнод аймгийн
Баянтүмэн сумын уугуул О.Батбилэг, Ховд аймгийн Дарви сумын уугуул
Т.Батцоож, Говь-Алтай аймгийн Есөнбулаг сумын уугуул Т.Гантөмөр, Төв
аймгийн Батсүмбэр сумын уугуул С.Лувсанбалдан, Өвөрхангай аймгийн
Хайрхандулаан сумын уугуул Б.Отгоннасан нарыг,

Монгол Улсын Манлай уяач цолоор Өмнөговь аймгийн
Даланзадгад сумын уугуул Б.Бадраа, Говь-Алтай аймгийн Бигэр сумын уугуул
Л.Батмөнх, Хөвсгөл аймгийн Мөрөн сумын уугуул Т.Болдбаатар, Завхан
аймгийн Тосонцэнгэл сумын уугуул Т.Галбадрах, Говь-Алтай аймгийн Алтай
сумын уугуул Ц.Гантөмөр, Төв аймгийн Сэргэлэн сумын уугуул Т.Ихбаяр,
Архангай аймгийн Төвшрүүлэх сумын уугуул Ө.Пүрэвбаатар нарыг,

Монгол Улсын Алдарт уяач цолоор Улаанбаатар хотын
Баянгол дүүргийн уугуул Б.Баасанбазар, Төв аймгийн Сэргэлэн сумын уугуул
О.Батболд, Орхон аймгийн Баян-Өндөр сумын уугуул Г.Баярцогт,
Улаанбаатар хотын Багахангай дүүргийн уугуул Г.Буянтогтох, Говь-Алтай
аймгийн Шарга сумын уугуул Н.Зоригт, Дундговь аймгийн Хулд сумын уугуул
Б.Лхагва-Очир, Дундговь аймгийн Хулд сумын уугуул С.Мөнхбат, Төв аймгийн
Сэргэлэн сумын уугуул Б.Сүхбаатар, Өвөрхангай аймгийн Есөнзүйл сумын
уугуул П.Сэргэлэн, Увс аймгийн Тэс сумын уугуул Ю.Төгсжаргал, Төв
аймгийн Сэргэлэн сумын уугуул С.Хэрлэн нарыг тус тус шагнав.

Монгол Улсын Ерөнхийлөгч Ц.Элбэгдорж уяачдад цол гардуулсны дараа хэлсэн үгэндээ
“Та бүхний энэ өдрийн түмэн амар амгаланг айлтгая. Дээд ивээлээ
хайрласан бичин жил улирч, буян хишгээ дэлгэх улаагчин тахиа жил айлчлан
ирж байгаа энэ өлзийт сайн цаг дор нүүдлийн соёл иргэшлийн амин чухал
дархлаа-адууны соёлыг өвлөн уламжилж, хадгалан хамгаалж, баяжуулан
хөгжүүлж яваа хүндэт уяачид та бүхэндээ чин сэтгэлийн мэндчилгээ
дэвшүүлж, хамгийн сайн бүхнийг хүсэн ерөөе.

Монголчуудын сүлд хийморь, бэлгэдэл молор эрдэнэ цагийн цаг, үеийн
үед монгол хүнтэй хамт явж ирсэн. Тиймээс ч бид монгол хүнийг морин
эрдэнэтэй нь цуг төрийн сүлдэндээ мөнхөлсөн. Монголчуудын баатарлаг
түүх, бахархам амжилт адуутай холбоотой байдаг. Мориндоо мордсон монгол
хүн түүхийг бүтээж, алдар суугаа мандуулдаг жамтай.

Гурван цагийн хэлхээнд үл алдрах их түүхийн алтан цулбуурыг морь уях
эрдмээрээ өвлөж, монгол бахархлаа дархлан яваа хүмүүс бол манай уяачид,
малчин түмэн юм.Түмний наадамд өргөсөн хүлгийн тань шандас, зон олноо
цэнгүүлсэн золбоо хийморь, хүч хөдөлмөрийг тань үнэлж улсын цол
хүртээлээ. Ажнай хүлгийг тань унаж хурдлуулсан хүүхдүүд, гэр бүлийнхэнд
тань баяр хүргэе. Адууны соёлыг алдаршуулан дэлгэрүүлж Монгол түмнээ
олон жил баярлуулж явахыг чин сэтгэлээсээ хүсч байна.

Хүүхдийн гийнгоо цээл, хүлгийн давхил төгөлдөр, уяачдын эрдэм төгс байг ээ. Сар шинэдээ сайхан шинэлээрэй” гэлээ.

Өнөөдөр Замын цагдаагийн алба,
Нийслэлийн онцгой байдлын газар, Нийслэлийн түргэн тусламжийн төв болон
Гэмтэл согог судлалын үндэсний төв хамтран монгол түмний уламжлалт Сар
шинийн баяр болох гэж байгаатай холбоотойгоор иргэдэд мэдээ мэдээлэл,
сэрэмжлүүлэг хүргэлээ.

Энэ үеэр Замын цагдаагийн албаны
Урьдчилан сэргийлэх, олон нийттэй харилцах хэлтсийн дарга, цагдаагийн
хурандаа Э.Бөхбат хэлэхдээ “Сар шинийн баяр бол олон онцлогтой баяр юм.
Баярын бэлтгэл ажлыг ихээхэн шаарддаг учраас өмнөх өдрүүдэд болон
Битүүний өдөр томоохон зах худалдааны төвийн ачаалал эрс нэмэгддэг тул
иргэд, жолооч нар аль болох хувийн тээврийн хэрэгслээс татгалзаж,
нийтийн тээврийн хэрэгслийг сонгох, дор бүртээ хувийн зохион байгуулалт
хийхийг зөвлөж байна. Мөн Цагдаагийн байгууллагын алба хаагчид баярын
өдрүүдээр гарч болзошгүй зам тээврийн ослоос урьдчилан сэргийлэх,
иргэдийг аюулгүй зорчуулах зорилгоор өндөржүүлсэн бэлэн байдалд бүрэн
бүрэлдэхүүнээр болон ХСИС-ын сонсогчидтой хамтран ажиллана” хэмээн
мэдээллэсэн бол ГССҮТ-ийн эмч Г.Буян-Арвижих “2016 онд улсын хэмжээнд
бүртгэгдсэн 100,000 гаруй осол, гэмтлийн 16 хувь нь зам тээврийн ослын
улмаас үүссэн байна. Өөрөөр хэлбэл жилд 17,000 хүн зам тээврийн осолд
өртөж, өдөрт 50 орчим хүн зам тээврийн ослын улмаас гэмтэж бэртэж байна.
мөн осол хэрэг болсоны дараа хүний эрүүл мэнд, сэтгэл зүй, эдийн засагт
ихээр нөлөөлдөг бөгөөд эмчилгээнд багаар бодоход 400,000 цаашлаад 5
сая, 10 саяаар үнэлэгдэх хагалгаатай холбоотой зардлууд гардаг. Хайртай
дотны хүмүүсээ хажуудаа суулгачихаад хурд хэтрүүлдэг, согтуугаар
тээврийн хэрэгсэл жолоодоно гэдэг бол амь нас, эрүүл мэндээ эрсдэлд
оруулж байна гэсэн үг юм” гэлээ.

Мөн НОБГ-ын дэд дарга, хурандаа
Д.Эрдэнэбаатараас “Баярын өдрүүдээр иргэд ердийн галлагаатай пийшин
зуухны аюулгүй байдлыг хангах, эвдрэл гэмтэлгүй, зориулалтын цахилгааны
утас хэрэглэхийг зөвлөж байна. Мөн баяр, амралтын өдрүүдээр байгууллага,
аж ахуй нэгжүүд амрах учраас хариуцлагатай жижүүрийг томилон
ажиллуулах, дохиололын системийн бүрэн бүтэн байдлыг хангах шаардлагатай
байна”НТТТ-ийн их эмч Л.Бямбацогт мэдээллэхдээ “Баярын өдрүүдээр
яаралтай түргэн тусламжийн төвийн дуудлага нэмэгдэх хандлагатай байдаг.
Үүнд голчлон архины болон хүнсний бүтээгдэхүүнээс авсан хордлогоны
дуудлага мэдээлэл, мөн хоорондоо зодоон хийсний улмаас гэмтэж бэртсэн
хүмүүсийн дуудлага ихээр ирдэг. Иймд иргэд хэрэглэж буй хүнсний
бүтээгдэхүүний хугацаа, хадгалалтанд анхаарч, мөн түргэн муудах хүнсний
бүтээгдэхүүнийг аль болохыг хэрэглэхгүй байх, архи, согтууруулах ундааны
зүйлээс татгалзахыг зөвлөж байна” хэмээн ярилаа гэж Замын цагдаагийн албанаас мэдээллээ.

Цагдаагийн ерөнхий газрын дарга, Тэргүүн
комиссар Ө.Энхтөр, Монголбанкны Ерөнхийлөгч Н.Баяртсайхан, “Хамтын
ажиллагааны санамж бичиг”-т гарын үсэг зурлаа.

Сүүлийн жилүүдэд Монгол Улсын банк,
санхүүгийн салбарт технологийн шинэчлэл бүрэн хийгдэж, банкнаас иргэд аж
ахуй нэгжүүдэд үзүүлж буй төлбөр, тооцооны үйлчилгээ нь цахим хэлбэрт
шилжиж олон улсын жишигт хүрээд байна. Үүнийг дагаад банк, санхүүгийн
салбарын хэвийн үйл ажиллагааг алдагдуулах, харилцагчдын дансны
мэдээлэлд нэвтрэх, мэдээллийг хулгайлах, төлбөрийн цахим картыг
хуурамчаар үйлдэх, ашиглах зэргээр арилжааны банк болон иргэд, аж ахуй
нэгжүүдэд онц их хэмжээний хохирол учруулсан гэмт хэрэг удаа дараа
бүртгэгдэн шалгагдаж, жил ирэх тусам нэмэгдэх хандлагатай байна.

Цагдаагийн байгууллагаас дээрх төрлийн
гэмт хэргүүдэд сүүлийн гурван жилийн байдлаар дүн шинжилгээ хийхэд гэмт
этгээдүүд олон улсад ашиглагддаг төлбөрийн цахим картыг хуурамчаар
үйлдэн, Монгол улсад богино хугацаагаар зорчих үедээ банкны цахим
гүйлгээ болон бэлэн бус төлбөр тооцоонд ашиглаж, онц их хэмжээний
хохирол учруулах байдлаар үйлдэгдэж байгаа нь тогтоогдсон юм. Монгол
Улсад олон улсын төлбөрийн карт ашиглан үйлдэж болзошгүй хууль бус
гүйлгээнээс урьдчилан сэргийлэх, илрүүлэх, сэжигтэй гүйлгээний талаар
мэдээлэл солилцох санг үүсгэж хамтран ажиллах зорилгоор энэхүү санамж
бичгийг байгуулж байгаа юм.

Санамж бичиг байгуулснаар гэмт хэргээс
урьдчилан сэргийлэх тухай хууль, бусад хууль тогтоомжийг хэрэгжүүлэх,
гэмт хэрэг, зөрчлөөс урьдчилан сэргийлэх, шалтгаан нөхцөлийг тогтоох,
арилгах талаар сургалт, сурталчилгаа зохион байгуулж, хууль бус гүйлгээг
Эрүүгийн цагдаагийн газар болон банкуудтай хамтран таслан зогсоох,
илрүүлэх чиглэлээр мэдээлэл солилцож ажиллах юм.

Монгол банк, Цагдаагийн Ерөнхий газар нь
Монгол Улсын эдийн засаг, банк санхүүгийн тогтвортой хэвийн үйл
ажиллагааны эсрэг үйлдэгдсэн олон төрлийн гэмт хэрэгтэй тэмцэх ажлыг үр
дүнтэй зохион байгуулсаар ирсэн. Тухайлбал үндэсний болон гадаадын
мөнгөн тэмдэгтийг хуурамчаар үйлдэх гэмт хэрэгтэй тэмцэх чиглэлээр 2013
онд байгуулсан “Гүйлгээнээс илэрсэн хуурамч мөнгөн тэмдэгтийг илрүүлэх,
бүртгэх, хадгалах, устгах” журам, Терроризмыг санхүүжүүлэх, мөнгө угаах
гэмт хэрэгтэй тэмцэх чиглэлээр мөн онд байгуулсан “Хамтран ажиллах
санамж бичиг” зэрэг хамтын ажиллагааны хүрээнд тодорхой төрлийн гэмт
хэргүүдээс урьдчилан сэргийлэх, тэмцэх ажилд хамтран ажиллаж байна.

“Хурд” хамтлаг маргааш алслагдсан сумдын эмнэлэгт тоног төхөөрөмж хандивлана. Тус тоног төхөөрөмжүүдийг маргааш хэвлэлийн хурлын үеэр эмнэлгийн удирдлагуудад нь гардуулах аж.

Эдгээр тоног төхөөрөмжийг баруун аймгийн алслагдсан сумдын эмнэлгүүдийн нярайн тасагт тоног төхөөрөмж хандивлаж байгаа юм байна.

Саяхан валентины баяраар хосууддаа зориулан хайрын тоглолтоо хийгээд удаагүй байгаа “Хурд” хамтлаг 20 жилийн ойгоор гаргасан алтан пянзаа Европ, АНУ,ӨМӨЗО болон Монголд тоглосон тоглолтынхоо үеэр дуудлага худалдаанд оруулсан юм. Энэхүү орлогоороо эдгээр тоног төхөөрөмжүүдийг худалдан авч хүүхдийн эмнэлэгт хандивлахаар болжээ.

Эмнэлгийн тоног төхөөрөмжийг маргааш 11.00 цагт Зууны мэдээ сонины “Үндэсний мэдээллийн төв”-д гардуулах юм байна.

О.ӨНӨР

XVII Тахиа жилийн сар шинийн баяр билгийн тооллын шинийн 1, 2, 3-ны
өдөр буюу 2017 оны 2 дугаар сарын 27, 28 болон 3 дугаар сарын 1-ний
өдрүүдэд хотын захын алслагдсан гэр
хороолол, хүн амын нягтаршил ихтэй суурьшлын цэгүүд рүү үйлчлэх нийтийн
тээврийн хэрэгслийн тоог нэмэхээр болжээ. Тухайлбал Шархад, Тахилт, Чингэлтэй, Зунжин, Баянхошуу, Орбит, Зүүн
салаа, Улаан-Хуаран, Санзай зэрэг чиглэлийн тээврийн хэрэгслийн тоог
10 орчим хувиар нэмэгдүүлэхээр төлөвлөөд байна.

Шинийн 1, 2, 3-ны өдөр буюу хоёрдугаар сарын 27, 28 болон гуравдугаар сарын 1-ний өдрүүдэд амралтын өдрийн
хуваарийн дагуу үндсэн болон хот орчмын 86 чиглэлд 660 их, дунд
багтаамжийн автобус, троллейбус хотын захын алслагдсан чиглэлүүдэд 4 аж
ахуйн нэгж, байгууллагын 15 микроавтобусны захиалгат үйлчилгээ, Нийслэл
хот дотор таксийн үйлчилгээнд 12 аж ахуйн нэгжийн 529 такси нийт 1,204
тээврийн хэрэгслээр иргэдэд үйлчилгээ хүргэнэ гэж Нийтийн тээврийн газраас мэдээллээ.