Амралт зугаалгын улирал ирсэнтэй холбогдуулан иргэдийн байр, орон сууцанд орж, эд зүйлийг хулгайлах гэмт хэрэг ихсэх болжээ. Цагдаагийн ерөнхий газраас зуслангийн айлуудыг нүдэлж хулгай хийдэг бүлэг этгээдүүдийг илрүүлсэн байна.
Энэ талаар албаны эх сурвалжаас тодруулахад, “Бид өнгөрөгч долоо хоногт зуслангийн байр, байшинд халдаж хулгай хийдэг бүлэг этгээдүүдийг илрүүлээд шалгаж байна. Одоогийн байдлаар цагдаагийн байгууллагад хулгай хийдэг 670 гаруй хүний судалгаа мэдээлэл бий. Тэдний хулгайлсан эд зүйлс нь хөдөлмөрийн хөлсний доод хэмжээнд хүрээгүй тохиолдолд 5-20 мянган төгрөгөөр торгоод явуулдаг хуультай. Үүнээс болж цагдаагийнхан хулгайч нарыг давраагаад байна гэсэн яриа гардаг. Хамгийн гол нь иргэд хулгайд эд зүйлсээ алдсан даруйдаа цагдаад хандахгүй байснаар хулгайч нарыг ял завших боломжтой болгодог” гэлээ.
Б.НАРАНЧИМЭГ
“Найрсаг Улаанбаатар 2016” хөтөлбөрийн
Залуусын хүсэн хүлээсэн “Play time” наадам өнгөрөгч амралтын өдрүүдэд “Монгол шилтгээн”-д болсон. Тус наадмын үеэр мансууруулах бодис хэрэглэж байгаад баригдсан хэрэг гарсан байна. Наадмын сүүлийн өдөр шөнийн 01:40 цагийн үед хэсэг залуус мансууруулах үйлчилгээтэй байж болзошгүй ургамал цүнхэлж явсныг илрүүлжээ. Хэрэгт холбогдсон 3 залуугийн нэг нь 20 настай эмэгтэй, хоёр нь 19, 20 насны эрэгтэй байсан аж. Тэдний цүнхнээс нэг боодол тамхи ороодог цаас, соруул 46 ширхэг, ногоон өнгийн ургамал нэг боодол, гар аргаар ороосон найман ширхэг тамхи илэрчээ. 
Өнгөрсөн шөнө үзэгчдийн дунд хүлээлт болоод байсан Итали-Испани хоёр багийн тоглолт үзүүштэй боллоо. Тоглолтын эхний хагасын 33 дахь минутад Кьеллини эхний гоолыг хийж салхийг хагалав. Эхний хагаст италичууд тэргүүлж өндөрлөсөн боловч хоёрдугаар үеэс испаничуудын тоглолт сэргэсэн. Гэвч үндсэн цаг дууссаж шүүгчийн мэдлийн нэмэлт минутанд Пелле гоолдож Испанийг буулган авлаа. Испаничууд 1988 оны Еврогоос хойш анх удаа нэг тоглолтонд 1-ээс дээш гоол алдсан нь энэ байлаа. Италичууд шөвгийн наймын эрхээ авч Германтай хүч үзэх болж байна. 
Хөлбөмбөгийн эх орон болсон Гурван Арслангууд Лестер хотоос жижигхэн Исландын шигшээд хожигдож энэ удаагийн Еврогийн гол шуугианыг тарьсан юм. Английн шигшээ багийн ахлагч Уэйн Рүни дөрөв дэх минутад торгуулийн цохилтоос гоолдож тооны харьцааг нээсэн боловч түүний гоолыг Исландын төвийн хамгаалагч Рагнар Сигурдссон ердөө 2 хүрэхгүй минутын дараа хүчингүй болгосон юм. Улмаар тоглолтын 18 дахь минутад Колбейнн Сигторссоны цохьсон сулхан бөмбөгийг Жо Харт хааж чадсангүй. Ийнхүү Английн эсрэг Исландчууд түүхэн ялалт байгуулж чадлаа. Ингэснээр тэд шөвгийн наймд шалгарч Францын шигшээтэй хүч үзэхээр боллоо. 
УИХ-ын сонгуулийн санал хураалт улс орон даяар маргааш 07.00 цагаас эхэлж, 22.00 цагт дуусгавар болно. Монгол Улсын Ерөнхийлөгч Ц.Элбэгдорж маргааш 11.30 цагт Орос гуравдугаар сургуульд байрлах санал авах хэсгийн хороонд очиж саналаа өгөх юм байна. Харин Ерөнхий сайд Ч.Сайханбилэг 12.30 цагаас Удирдлагын академын Б корпуст байрлах УИХ-ын сонгуулийн 56 дугаар тойргийн гуравдугаар хэсгийн хороонд саналаа өгөх юм байна.
Засгийн газрын өнөөдрийн хуралдаанаар Үндэсний чанарын хөтөлбөр, хөтөлбөрийг хэрэгжүүлэх үйл ажиллагааны төлөвлөгөө, Чанарын үндэсний зөвлөлийн бүрэлдэхүүнийг баталлаа. Төлөвлөгөөнд тусгагдсан ажлууд, шаардагдах хөрөнгийг жил бүрийн төсөвт тусган гадаадын зээл, тусламж, төсөл, хөтөлбөртэй уялдуулан санхүүжүүлэх арга хэмжээ авч хэрэгжилтийг ханган ажиллахыг Шадар сайд Ц.Оюунбаатар, Сангийн сайд Б.Болор, Засгийн газрын гишүүд, аймаг, нийслэлийн Засаг дарга нарт үүрэг болголоо. Мөн Үндэсний хөтөлбөрийг улсын хэмжээнд хэрэгжүүлэх үйл ажиллагааг нэгдсэн удирдлагаар хангаж, хяналт тавьж ажиллахыг Шадар сайд Ц.Оюунбаатарт даалгав.
Засгийн газрын ээлжит хуралдаанаар Улаанбаатар-Өндөрхаан чиглэлийн авто замд их хэмжээний эвдрэл гарч, тээврийн хэрэгсэл осол аюулгүй зорчих нөхцөл алдагдсантай холбогдуулан Жаргалтхаан-Чингис хот чиглэлийн 100 км авто замын их засварын ажлыг хоёр багц болгон шууд гэрээ байгуулан төлөвлөсөн хугацаанд технологийн дагуу чанартай гүйцэтгэх арга хэмжээ авч хэрэгжүүлэхийг Зам, тээврийн сайд М.Зоригтод даалгалаа. 
Монгол Улсын Сонгуулийн тухай хуулийн 16 дугаар зүйлийн 16.5 дахь заалтыг үндэслэн зургадугаар сарын 29-ний өдөр Монголын талын хилийн боомтууд амарч, зургадугаар сарын 30-ны өдөр цагийн хуваарийн дагуу хэвийн ажиллах юм байна.
Хүн төрөлхтний цэнгэлийн манлай “Рио-2016” олимп болоход сар гаруйхан хоногийн хугацаа үлдээд байна. Олимпийн наадамд Монгол Улсын Чөлөөт бөхийн шигшээ баг одоогийн байдлаар зургаан эрх аваад байгаа. Тэгвэл манай тамирчид олимпоос өмнө олон улсын нэг тэмцээнд оролцох бөгөөд энэ нь долдугаар сарын 9-10-нд Испанийн Мадрид хотод зохион байгуулагдах гран при тэмцээн юм. Энэ тэмцээнд 57 кг-ын жинд Э.Бэхбаяр, 65 кг-д Г.Мандахнаран, 74 кг-д П.Өнөрбат, 86 кг-д О.Үйтүмэн, 96 кг-д Д.Хүдэрбулга нар оролцох бол дасгалжуулагчаар Ц.Цогтбаяр, Б.Баяраа, Ц.Баярсайхан нар ажиллаж байна. Тэмцээний дараа таван өдрийн олон улсын хамтарсан бэлтгэл хийх юм.