Монголын хүндийн өргөлтийн холбооноос алтан түнш “Hunnu air” компанийн нэрэмжит өсвөр үеийн улсын аварга шалгаруулах тэмцээнийг энэ сарын 1-3-ны өдрүүдэд Улаанбаатар хотноо Спортын төв ордонд зохион байгуулж байна. Хүндийн өргөлтийн үндэсний шигшээ багийн зааланд болж буй тус тэмцээнд Баян-Өлгий, Хөвсгөл, Сүхбаатар, Дархан-Уул, Орхон болон “Алдар”, “Хүч”, Биеийн тамирын төрөлжсөн тусгай дунд сургууль, Багануур дүүргийн нийт арав байгууллагын 100 гаруй өсвөрийн тамирчид иржээ. Тэмцээнд ОУХМ нэг, спортын мастер, спортын дэд мастерын цолтой тус бүр дөрвөн тамирчин өрсөлдөж байна.
Тэмцээний эхний өдөр эрэгтэй 36, 40, 44, 50, 56, 62 кг, эмэгтэй 36, 40, 44, 48, 53 кг-ын жингийн өрсөлдөөн болжээ. Охидын 48 кг-ын жинд ТСБТДС-ийн тамирчин, спортын мастер Б.Тунгалаг огцом өргөлтөөр 60, түлхэлттэй өргөлтөөр 75, нийлбэрээр 135 кг-ыг өргөж, ОУХМ цолны болзлыг биелүүлжээ. Түүний хувьд өсвөрийн дөрвөн рекордыг шинэчлэн тогтоосон байна. Энэ жил 16 настай Б.Тунгалагийн хувьд өнгөрөгч сард Сүхбаатар аймагт болсон Бүх ард түмний спортын XIV наадмаас мөнгөн медаль хүртсэн юм.
Мөн хөвгүүдийн 44 кг-ын жиндл “Хүч” спорт хорооны тамирчин Төртогтох түлхэлттэй өргөлтөөр 68 кг-ын өргөж, улсын рекордыг шинэчлэн тогтоожээ.
Улсын хэмжээнд гуравдугаар сарын 31-ний өдрийн байдлаар Булган аймгийн Бугат сум, Дорнод аймаг Баянтүмэн, Баян-Уул, Матад сум, Сүхбаатар аймгийн Эрдэнэцагаан, Сүхбаатар, Наран, Дарьганга сум, Хэнтий аймгийн Биндэр сум гээд дөрвөн аймгийн есөн суманд 10 удаа, Нийслэлийн Хан-Уул дүүргийн 11-р хороо Богины аманд нэг түймэр, нийтдээ 11 удаагийн ой, хээрийн гал түймэр гарч /урьдчилсан байдлаар/ 2 га ой, 39.350 га хээр, нийт 39,352 га талбай түймэрт өртсөн байна. Ой, хээрийн гал түймрийн улмаас хоёр гэр, нэг саравч шатаж, 40 толгой мал өртөж хорогдсон.
Нийслэлийн нийтийн тээвэрт цахим төлбөрийн системийг өнгөрсөн оны долоодугаар сараас эхлэн нэвтрүүлж, ахмад настан хөгжлийн бэрхшээлтэй иргэд журмын дагуу цахим төлбөрийн картаар зорчих болсон билээ. Нийслэлийн төвийн зургаан дүүрэгт энэхүү журам хэрэгжиж байгаа ч алслагдсан дүүргүүдэд хэд хэдэн тодорхой шалтгааны улмаас журам бүрэн хэрэгжээгүй байна. Тиймээс нийслэлийн Засаг дарга журмын хэрэгжилтийг хангах талаар авах зарим арга хэмжээний тухай А/240 дүгээр захирамж гаргаж, нийтийн тээврийн цахим төлбөрийн систем нэвтрүүлэх ажил бүрэн хийгдэж дуусах хугацаанд дор дурдсан арга хэмжээг авч хэрэгжүүлэхийг холбогдох албаныханд үүрэг болгожээ. 
Элэгний В вирусийн эсрэг үйлчилгээтэй Тенофобир эмний үнэ энэ сарын нэгнээс эхлэн 1200 төгрөг болж хямдарчээ. Тус эмийг өмнө 220 мянган төгрөгөөр худалдаалж байсан юм.
ХХАА-н сайд Р.Бурмаа тэргүүтэй төлөөлөгчид Бүгд Найрамдах Унгар улсад ажлын айлчлал хийж байна. Айлчлалын хүрээнд “Биокомбинат” ТӨҮГ-ын иж бүрэн шинэчлэлийн асуудлаар хоёр талын албан ёсны уулзалт болжээ. Энэ үеэр БНУУ-ын Хөдөө аж ахуйн сайд Шандор Фазекаш “Биокомбинат”-ын шинэчлэлд Унгар Улсын засгийн газраас 25 сая ам.долларын буцалтгүй тусламж олгох талаар мэдэгдэл хийж хэлсэн үгэндээ “Монгол Улсын малын эмийн үйлдвэр нь 1960 онд баригдсан бөгөөд шинэчлэлийн асуудал нэн шаардлагатай байна. Уг шинэчлэлийн төслийг хэрэгжүүлснээр Монгол Улсын хүнсний аюулгүй байдал, мал эрүүлжүүлэх, малын хөдөлгөөнийг мөшгөн судлах боломжуудыг нээх юм. 
Монголын сагсан бөмбөгийн холбооны “Үндэсний супер лиг”-ийн 2015-2016 оны улиралд “Харцага”, “Дархан гарьд”, “Их өргөө аравтууд”, “Хасын хүлгүүд”, “Мон-Алтиус Смарт”, “Архангай лидер”, “Төв ургац” гэсэн нийт найман баг дөрвөн сарын турш өрсөлдлөө. Багууд нийт гурван тойрог өрсөлдөж, плей-оффт зургаан багийн нэр тодорсон. Энэ жил залуучуудын шигшээ багийн тоглогчдоор багийнхаа “цөм”-ийг бүрдүүлсэн “Архангай Лидер”, өнгөрсөн улирлын MVP Д.Мөнхтүвшин, шилдэг төвийн тоглогч С.Өрнүүнбилэг нараар удирдуулсан “Их Өргөө Аравтууд” плей-оффт шалгарч чадаагүй юм.
Энэ онд улсын хэмжээгээр 322.9 мянган га-д үр тариа, үүнээс 301.5 мянган га-д буудай, 20.8 мянган га-д төмс, хүнсний ногоо, 16.3 мянган га-д тэжээлийн таримал, 25.3 мянган га-д тосны болон сэлгээний бусад таримал тариалахаар Хүнс, хөдөө аж ахуйн яам төлөвлөжээ. Өмнө нь тус яам 2015 оны тариалалтад зориулан 197 аж ахуйн нэгж, иргэнд 3.7 мянган тонн үрийн буудай, 619 аж ахуйн нэгж, иргэнд 481.2 тонн ургамал хамгааллын бодис, 41 аж ахуйн нэгж, иргэнд 998.9 тонн бордоог 0-30 хувийн, 618 аж ахуйн нэгж, иргэнд 2.1 мянган тонн дизель түлшийг 50 хувийн урьдчилгаатай тус тус зээлээр олгож тариалалтыг хэвийн явуулах нөхцөлийг бүрдүүлж ажилласан билээ. 
Ази болон Далайн орнуудын боксчдод олимпийн эрх олгох сонгон шалгаруулалтын тэмцээн үргэлжилж байна. Эрэгтэйчүүдийн 60кг-д олимпийн эрх аваад байгаа, ОУХМ Д.Отгондалай аваргын төлөө өнөөдөр тоглож алтан медаль хүртлээ. Тэрбээр шигшээд Филиппиний Чарли Суарезийг 2:1-ээр хожиж түрүүлсэн юм.
Монголын загварын ертөнцийн сайхан бүсгүйчүүдийн нэг мисс, топ модель Х.Бадамгэрэл нэлээд хэдэн сарын өмнө Арабын нэгдсэн Эмират улсын Дубай хотноо зохион байгуулагдсан загварын долоо хоногт амжилттай оролцоод ирсэн. Дэлхийн шилдэг загвар зохион бүтээгчид чуулсан энэхүү шоуны үеэр зохион байгуулагчид нь Х.Бадамгэрэлийн ур чадварыг ихээхэн онцолж байсан бөгөөд түүний ковер зургийг сурталчилгааныхаа нүүр царай болгосон гэдэг.
Японы эрдэмтэд лабораторын аргаар арьс төлжүүлэн гаргаж авсан нь амжилттай болсон гэнэ. Хулганын эсээс авч лабораторид төлжүүлсэн арьсанд олон давхарга бий болж, хөлсний булчирхай хүртэл үүсчээ.