Month: March 2016

Мэргэжлийн хяналтын ерөнхий газраас улсын хэмжээнд эмийн зохистой хэрэглээнд нэгдсэн хяналт шалгалт хийсэн тухайгаа өчигдөр мэдээлсэн юм. Эл хяналтаас үндэслэн өнөөдрөөс эхэлж оронд даяар эмийн зохистой хэрэглээний аянг зохион байгуулахаар болжээ.

Аяны хүрээнд иргэдийн эрүүл мэндийн хэрэгцээнд нийцсэн эмчилгээний өндөр идэвхт аюулгүй, чанарын баталгаатай эмээр хангах, иргэдийг эмчийн зааврын дагуу эм хэрэглэхэд сургах, эмийг жороор олголтыг сайжруулах зэрэг олон арга хэмжээ зохион байгуулах аж.

Мөн Эрүүл мэнд спортын яам, Шударга өрсөлдөөн хэрэглэгчийн төлөө газар, “Эм холбоо” ТББ, иргэд аж ахуйн нэгжийн төлөөлөлтэй хамтран сэдэвчилсэн нээлттэй хэлэлцүүлэг хийх юм байна. Мэргэжлийн хяналтын ерөнхий газраас дотоодын үйлдвэрийн антибиотик эмийг 100 хувь, импортын эмийг түүврийн аргаар сонгон авч лабораторийн шинжилгээнд хамруулахаар төлөвлөжээ.

Улсын хэмжээнд хийсэн шалгалтад нийт 32 эмийн үйлдвэрийн 83,3 хувь, эм ханган нийлүүлэх 252 байгууллагын 90,4 хувь, 1688 эмийн сангийн 25-30 хувийг тус тус хяналт шалгалтад хамруулахад дараахь зөрчил илэрчээ. Тухайлбал, 27 эмийн үйлдвэрийн зах зээлд нийлүүлсэн давхардсан тоогоор 1176 нэрийн эм биологийн идэвхт бүтээгдэхүүний 71,4 хувь Монгол Улсын эмийн бүртгэлд бүртгэгдээгүй, 52,2 хувь нь шаардлага хангасан эмийн лабораторигүй, 91 хувь нь үйлдвэрлэсэн эмийн гаж нөлөө, чанар аюулгүй байдлын судалгаа хийлгээгүй байсан аж.

Харин улсын хэмжээнд эм ханган нийлүүлэх байгууллагад хийсэн шалгалтын явцад 3584 нэр төрлийн импортын эмийн хэрэглэх зааварт дүн шинжилгээ хийхэд 27 хувь нь эмийн хадгалалтын горим зөрчсөн, 57,5 хувьд тээвэрлэлтийн хяналт хийгдээгүй, дөрвөн аймагт хүчинтэй хугацаа дууссан чанарын шаардлага хангаагүй эмээр үйлчилж байсан зэрэг дутагдлууд илэрчээ.

ОХУ-ын Ерөнхийлөгч Владимир Путин, автобензин дизелийн онцгой албан татвар, татварын хувь хэмжээг нэмэгдүүлэх тухай холбооны хуульд гарын үсэг зурсан талаар тус улсын Ерөнхийлөгчийн хэвлэлийн албанаас мэдээлжээ.

Уг хуулиар, ирэх дөрөвдүгээр сарын нэгнээс литр бензиний үнэ дунджаар зургаан хувь нэмэгдэх гэнэ. Холбооны хуулийн 193 дугаар зүйлд, ОХУ-ын татварын хуулийн хоёр дахь өөрчлөлтийн дагуу 2016 оны дөрөвдүгээр сарын 1-нээс бензин, дизель, дундын цэвэр бэлдмэл бүтээгдэхүүнүүдийн онцгой албан татварын хувь хэмжээг нэмэгдүүлнэ гэжээ.

Тодруулбал, автобензин, дизель түлшний үнэ литр тутамд хоёр рублиэр нэмэгдэх аж.

Он гарсаар Улаанбаатар хотын хэмжээнд булаах, дээрэмдэх гэмт хэрэг маш ихээр бүртгэгдэх болсон талаар цагдаагийн байгууллагаас анхааруулж байна. Ялангуяа шөнийн цагаар гэмт хэрэг гарах болжээ. Тэр тусмаа гэрэлтүүлэггүй, камерын хяналтгүй, харуул хамгаалалтгүй газрыг сонгон гэмт үйлдлээ гүйцэлдүүлэх нь ихэсчээ.

Тухайлбал, өнгөрсөн баасан гариг буюу энэ сарын 26-ны өглөө үүрээр 05:00 цагийн үед “Шөлөндөө” 24 цагийн цайны газрын нэгэн салбарыг дээрэмдэж, ажилчныг нь хүчирхийлсэн онц ноцтой хэрэг гарчээ. 2009 оноос үйл ажиллагаа явуулж эхэлсэн “Шөлөндөө” түргэн хоолны газар нь 24 цагаар ажилладаг бөгөөд шөлөөр төрөлжсөн, таван салбартайгаар үйл ажиллагаа явуулдаг.

Тухайн газар нь камерын хяналтгүй байсан бөгөөд хэрэг гарах үед “Шөлөндөө”-гийн тухайн салбарт Чингэлтэй дүүрэгт оршин суух, 42 настай тогооч, Сонгинохайрхан дүүргийн харъяат, 24 настай зөөгчийн хамт хоёулханаа ажиллаж байжээ. Шөнийн 03:00 цагийн үед цахилгаан нь тасарч, харанхуй болох үед гэмт этгээдүүд гаднаас орж ирэн халджээ.

Гэмт этгээдүүд тухайн үед хар бараан хувцастай, баг зүүсэн байсан бөгөөд нэг нь өндөр, нөгөө нь намхан, 20 орчим насны залуус байсан талаар хохирогчид мэдүүлсэн байна. Тэд хохирогчдыг айлган сүрдүүлж, гар хөл, амыг нь скочдож, тэр өдрийн орлого болох 200 мянган төгрөгийг нь дээрэмдээд зогсохгүй зөөгч болох 24 настай бүсгүйг хүчирхийлээд зугтжээ. Энэхүү хэргийг Сүхбаатар дүүргийн цагдаагийн хоёрдугаар хэлтэст эрүүгийн хэрэг үүсгэн шалгаж байна.

Хууль зүйн яамны балансад бүртгэлтэй хуучин нэрээр Төрийн тусгай албан хаагчдын нэгдсэн эмнэлгийн дуусаагүй барилгыг Эрүүл мэнд, спортын яаманд балансаас балансад шилжүүлэхийг Сангийн сайд Б.Болорт даалгалаа.

Засгийн газрын 2015 оны зургадугаар сарын 22-ны 260 дугаар тогтоолоор концессийн “шинэчлэн сайжруулах-ашиглах-шилжүүлэх” төрлөөр хэрэгжүүлэх “Дуусаагүй барилгыг эмнэлгийн зориулалтаар шинэчлэн сайжруулж, 260 ор бүхий нэгдсэн эмнэлгийг ажиллуулах төсөл”-ийн концессийн гэрээг “Юниверсити хоспиталь” ХХК-тай байгуулах эрх олгосон юм. Иймд Засгийн газрын дээрх тогтоолыг хэрэгжүүлэх ажлын хүрээнд Хууль зүйн яамны балансад бүртгэлтэй хуучин нэрээр Төрийн тусгай албан хаагчдын нэгдсэн эмнэлгийн дуусаагүй барилгыг Эрүүл мэнд, спортын яаманд шилжүүлэх нь зүйтэй гэж үзжээ.

Монголд улс төрийн нам байгуулагдсаны 95 жилийн ой, “Эх орончдын өдөр”-ийг тохиолдуулан МАН, МАХН-ын удирдлагууд их жанжин Д.Сүхбаатарын хөшөөнд цэцэг өргөж, хүндэтгэл үзүүллээ. Уг үйл ажиллагаанд МАН-ын дарга М.Энхболд, МАХН-ын дарга Н.Энхбаяр болон МАН, МАХН-ын удирдлагууд, гишүүд дэмжигчид оролцсон юм.

Цэцэг өргөх үеэр МАН-ын Ерөнхий нарийн бичгийн дарга Ж.Мөнхбат “Өнөөдөр Монголын улс төрийн ууган хүчин үүсэн байгуулагдсаны баярын өдөр, Монголын үе үеийн хатан зоригт эх орончдын түүхэн алдар гавъяаг магтан дуулах эх орончдын баярын өдөр. Одоогоос 95 жилийн өмнө Монгол Улсад анхны улс төрийн хүчин үүсэн байгуулагдаж, Монгол Ардын нам гэсэн модон тамгаа сийлж, эх орныхоо төлөө, харийн дайснаас эх орноо чөлөөлөхийн төлөө тусламж гуйхаар мордож, үйл хэргээ хэрэгжүүлж байсан.Өнөөдөр “Эх орончдын баяр”-ын өдөр угшил нэгт МАН, МАХН хамтран тэмдэглэж байгаа. Улс орны язгуур эрх ашиг, сайн сайхны төлөө улс төрийн намууд улстөрчид хувийн эрх ашгийг хойш нь тавьж хамтарч нэгдэж, ойлголцон зөвшилцөж ажиллах нь чухал. Үүний илэрхийлэл хоёр нам хамтарч баяраа тэмдэглэж байгаа явдал юм. Нийгэмд хоёр нам эвсэж сонгуульд орох уу гэдэг хүлээлт нэлээдгүй байх шиг байна. Энэ талаар хоёр намын ахмадуудын зүгээс өргөх бичиг явуулсан. Өнөөдөр “Эх орончдын баярын өдөр” хамтдаа тэмдэглэж байна. Цаашдын асуудлыг хоёр нам баярын дараа хамтдаа хэлэлцээд явах боломж байгаа” гэлээ.

Соёлын төв өргөөнд “Монголд улс төрийн ууган нам байгуулагдсны 95 жилийн ой-Эх орончдын өдөр”-ийн арга хэмжээ, баярын хурлаар үргэлжилж байна.

Төв аймгийн Баянчандмань сумын малын эмч Б-г хүчирхийлсэн хэргийн яллагдагч Б.Ханбаатарт холбогдох хэргийг прокурорын байгууллагад хянаж дуусаад, Баянгол, Хан-Уул, Сонгинохайрхан дүүргийн эрүүгийн хэргийн анхан шатны шүүхэд шилжүүлсэн байна.

Прокуророос Эрүүгийн хуулийн тусгай ангийн 126.2-т заасан зүйл ангиар Б.Ханбаатарт яллах дүгнэлт үйлдүүлэхээр шүүхэд шилжүүлжээ.