Month: March 2016

Дуучин Б.Амархүү Эх орончдын өдрөөр МАН-ын гишүүн болж, намын батлахаа гардан авлаа. Түүнд МАН-ын дарга М.Энхболд намын батлахыг нь өнөөдөр гардуулан өгөв.

Мөн түүний аав Борхүү хүүтэйгээ хамт МАН-ын гишүүн болсон юм. Б.Амархүүгийн өвөө нь ч МАН-ын гишүүн аж.

Улаанбурхан өвчин өнгөрсөн оноос эхлэн манай улсад дахин бүртгэгдэх болсон билээ. Өвчний тархалт нэг хэсэг намжсан ч арваннэгдүгээр сараас хойш дахин ихсэх болсон.

Халдварт өвчин судлалын үндэсний төвөөс мэдээлснээр өнгөрсөн долоо хоногийн байдлаар улсын хэмжээнд мэдээлэгдсэн 1025 халууралт, тууралтат хам шинжийн 908 нь улаанбурхан өвчний сэжигтэй гэж оношилогдож, 235 нь лабораторийн шинжилгээгээр батлагджээ.

Өвчний тархалтын муруйнаас харахад сүүлийн долоо хоногт өвчлөл эрс нэмэгдсэн байна. Улаанбурхан өвчнөөр өвчлөгсдийг насны хувьд авч үзвэл 0-8 сартай хүүхэд 12 хувь байна. Энэ өмнөх долоо хоногийн байдлаас бага насны хүүхдэд туссан байдал нь таван хувиар буурсан үзүүлэлт аж. Харин 10-19 насны хүүхэд, залуусын өвчлөл өмнөх долоо хоногоос 13 хувиар өсчээ. Өвчлөгсдийн дийлэнх нь автобус унаа, сургууль зэрэг олон хүний газар их явдаг оюутан залуус, дундаж насны иргэд байгаа аж.

Хоёрдугаар сарын 26-29-ний хооронд Хордлогын яаралтай тусламжийн төвд зургаан хүн хандсан байна. Тодруулбал, эмийн хордлогоор тав, угаарын хийн хордлогоор нэг хүн хандаж, тусламж үйлчилгээ авчээ. Тиймээс иргэдийг сонор сэрэмжтэй байж, эмчийн зааврын дагуу эмээ ууж хэрэглэхийг зөвлөж байна.

Мөн тухайн эмнийхээ найрлага, хугацаа зэргийг сайтар хянахыг мэргэжлийн байгууллагаас санууллаа. Түүнчлэн бага насны хүүхдээс эмийн төрлийн бүтээгдэхүүнийг хол хадгалахыг зөвлөж байна.

Орон сууцанд орох хүсэлтэй ч бэлнээр худалдаад авах орлогогүй, ипотекийн найман хувийн зээлд хамрагдъя гэсэн ч урьдчилгаа төлбөрийн мөнгө нь хүрдэггүй залуу гэр бүл, төрийн албан хаагч, өрх толгойлсон эцэг эсвэл эх, өндөр настан, хөгжлийн бэрхшээлтэй болоод байгалийн гамшигт орох оронгүй болсон иргэдэд зориулж, Засгийн газраас түрээсийн орон сууц хөтөлбөрийг хэрэгжүүлэхээр болсон. Эхний ээлжид Улаанбаатар хотод “Буян-Ухаа II” хороололд 350 айлын Архангай, Увс, Дархан-Уул, Хэнтий, Ховд аймгийн төвүүд, Сэлэнгэ аймгийн Зүүн хараа, Хэнтий аймгийн Бор-Өндөрт баригдсан 579 айлын 30-50 хүртэлх метр квадраттай орон сууцыг таван жил хүртэлх хугацаатай түрээслэх юм. Эдгээр түрээсийн орон сууцыг сарын 200-280 мянган төгрөгний үнэтэйгээр түрээслэхээр болж байгаа. Барилга, хот байгуулалтын яамнаас өмнө өгсөн мэдээгээр гуравдугаар сарын 1-нээс буюу өнөөдрөөс Төрийн орон сууцын корпораци /ТОСК/ дээр хямд өртөгтэй орон сууц түрээслэх хүсэлтэй иргэдийг бүртгэж эхэлнэ гэсэн ч, бүртгэл энэ сарын 15-ныг хүртэл хойшилжээ. ТОСК байр түрээслэх хүсэлтэй иргэдийг бүртгэх тусгай ажилтнуудыг бэлтгэж, ийнхүү 15-ны өдрөөс хойш ажлын тав хоногийн хугацаанд шаардагдах бичиг баримтаа бүрдүүлсэн иргэдийг бүртгэхээр болжээ. Дараа нь сугалааны тохирол явуулан 350 иргэнээ сонгох юм. Иймээс иргэд бүртгэл эхлээгүй байхад ТОСК-ийн үүдэнд олноор дугаарлах шаардлагагүй. Бүртгүүлэх хангалттай хугацаа олгоно гэж ТОСК-аас мэдээллээ.

Нийслэл дэх түрээсийн байрны үнэ метр квадрат нь 5500 буюу 200-280 мянга орчим төгрөг, орон нутагт метр квадрат нь 4000 буюу 140-230 мянга байна. Орон нутгийн иргэд тухайн аймаг сумынхаа захиргаанд хандаж бүртгүүлнэ.