Month: December 2015

Японы Кагошима мужийн Киришима хотноо мэргэжлийн сүмогийн тойргийн барилдааны үеэр нэгэн онцлог үйл явдал болжээ. Тус хотын найман настай Цүрүзоэ Хината хүү арванхоёрдугаар сарын 8-ны өдөр өөрт нь амьдрал бэлэглэсэн Ёкозүна Хакухо Даваажаргалтай уулзсан байна.

Хүү
хоёр жилийн өмнө 500 мянган хүнд нэг тохиолддог зүрхний өвчнөөр өвдсөн нь
тогтоогджээ. Түүний амийг аврах ганцхан арга бол АНУ-д зүрх шилжүүлэн суулгах
мэс засалд орох байж. Хүүгийн амийг аврах мэс заслын төлбөр 145 сая иень (2,2
тэрбум орчим төгрөг) байжээ. Хакухо аварга хүүгийн тухай олж мэдснийхээ дараа
олон нийтийг хүүд туслахыг уриалж, хандивын аян зохион байгуулсан байна.
Хандиваар мэс заслын төлбөрийг олж чадсан бөгөөд хүү өнгөрсөн долоодугаар сард
зүрх шилжүүлэн суулгах мэс засалд оржээ.

Хүү
аваргад бичсэн захидлаа сумогийн дэвжээн дээр уншиж “Уулзахыг ихэд хүссэн” гэж
хэлээд цэцгийн баглааг Хакуход бэлэглэсэн байна. Захиа болон цэцэг хүлээн авсан
аварга хүүг үнсэж, талархалаа илэрхийлжээ.

Хакүхо
хүүгийн духан дээр үнсээд “Анх уулзахад би уйлах шахсан. Эрүүл болсонд чинь
баяртай байна. Олон улсад хүлээн зөвшөөрөгдсөн нэгэн болоорой. Мөн сумод дуртай
бол бүр сайн” гэж хэлжээ.

Хакуха
Кагошима мужийн иргэдээр дамжуулан хүүтэй танилцсан юм. Хүүтэй уулзсаныхаа
дараа аварга өөрийн блогоороо дамжуулан олон нийтийг хүүд туслахыг уриалж,
хандивын хайрцаг ажиллуулж эхэлсэн билээ.

Нийтийн тээврийн үйлчилгээнд явдаг микро автобуснуудаас 2003 онд үйлдвэрлэгдсэн 115-ыг нь хасахаар болжээ. Учир нь үйлдвэрлэгдсэнээсээ хойш 12 жил нийтийн тээврийн үйлчилгээнд явах стандартын дагуу ирэх оны нэгдүгээр сарын 1-ний өдөр тээвэрт гарах эрх нь дуусч байгаа аж.

Одоогоор нийтийн тээврийн үйлчилгээнд явж буй автобусны ихэнх нь буюу 223 нь 2005 оных бол 2013-2015 онд үйлдвэрлэгдсэн нийт 95 автобус байгаа юм байна.

Бусад орнуудад нийтийн тээврийн үйлчилгээнд явах хугацаа 5-6 жил байдаг ч манай улсын хувьд 12 жил байдаг аж. Энэ нь өөрсдөө автобус үйлдвэрлэдэггүй, ард иргэд, байгууллагуудын санхүүгийн боломж муу гэдгээс шалтгаалдаг байна.

Үндэсний статистикийн хорооноос өнөөдөр 2015 оны эхний 11 сарын улс орны эдийн засгийн тоон үзүүлэлтийн талаар мэдээлэл хийлээ. Монгол Улсын мөнгөний нийлүүлэлт энэ оны арваннэгдүгээр сарын эцэст 9.8 их наяд төгрөг болж өмнөх сарынхаас 91.2 тэрбум төгрөгөөр, өнгөрсөн оны мөн үеийнхээс 119 тэрбум төгрөг буюу 1.2 хувиар буурчээ. Гүйлгээнд гарсан бэлэн мөнгө 710.5 тэрбум төгрөг болж, өмнөх сарынхаас 29.2 тэрбум төгрөгөөр, арваннэгдүгээр сарын эцэстэй харьцуулахад 58.4 тэрбум төгрөгөөр буурсан байна. Харин аж ахуйн нэгж, байгууллага, иргэдэд олгосон нийт зээлийн өрийн үлдэгдэл 11.9 их наяд төгрөгт хүрчээ. Хугацаа хэтэрсэн зээлийн өрийн үлдэгдэл 899.5 тэрбум төгрөг болж, өмнөх оны мөн үеийнхээс 454.9 тэрбум төгрөг буюу хоёр дахин өссөн байна. Банкны системийн хэмжээгээр чанаргүй зээл 849.8 тэрбум төгрөг болж, өнгөрсөн оноос 229.8 тэрбум төгрөг буюу 37.1 хувиар өсжээ. Улсын зарлага, эргэж төлөгдөх цэвэр зээлийн нийт хэмжээ зургаан их наяд 132.4 тэрбум төгрөг болж, улсын нэгдсэн төсвийн тэнцвэржүүлсэн нийт тэнцэл нэг их наяд 102.2 тэрбум төгрөгийн алдагдалтай байна.

Нэг өрхийн сарын дундаж мөнгөн орлого энэ оны эхний есдүгээр сарын байдлаар 937 мянга, зарлага 936.6 мянган төгрөг болж, өнгөрсөн оныхоос 24 мянган төгрөгөөр буурчээ. Ингэж нэг өрхийн орлого багассан нь хөдөө аж ахуйн үйлдвэрлэл, үйлчилгээний орлого буурсантай холбоотой гэж шинжээч тайлбарлалаа. Өнгөрсөн сард хэрэглээний бараа, үйлчилгээний үнэ өмнөх сарынхаас 0.2 хувь, оны эхнээс 2.1 хувиар, өмнөх оны мөн үеийнхээс 2.9 хувиар өсчээ.

Бүртгэлтэй ажилгүй иргэд 31.3 мянга болж, өнгөрсөн оны энэ үеэс 4600 хүн буюу 12.8 хувиар нэмэгджээ. Ажил хайсан иргэдийн 56 хувь буюу 17.5 мянган нь эмэгтэйчүүд байна. Уул уурхайн салбар дахь гадаад шууд хөрөнгө оруулалт зогссон нь ажилгүй иргэдийн тоог нэмэх нэг шалтгаан болсныг шинжээчид тодотголоо. Мөн улсын эдийн засаг саармагжиж, аж ахуйн нэгжүүд орон тооны цомхотгол явуулсан нь ажилгүй иргэдийн тоог нэмжээ. Уул уурхай, олборлох аж үйлдвэрийн салбарт нүүрс, цайрын баяжмал, хайлуур жонш, төмрийн хүдэр, бутармал чулуу зэрэг бүтээгдэхүүний олборлолт 2-46 хувиар буурчээ. Харин боловсруулах аж үйлдвэрийн салбарт цемент, хивс, төмөр бетон эдлэл, вакуум цонх, хаалга, тамхи, металл бэлдэц, ган төмөр хийц зэрэг гол нэрийн бүтээгдэхүүний үйлдвэрлэл 0.9-64 хувиар буурсан байна.

Энэ сарын 15-ны өдөр Монгол Улс дахь Япон улсын Элчин сайдын яаманд Монгол-Японы соёл утга зохиолын төвийн дарга, судлаач Дэлэгийн Төмөрбаатарт Японы Цог жавхлант Эзэн хааны одон хүртээх юм байна.

Эх сурвалжийн мэдээлснээр, судлаач Д.Төмөрбаатарт Япон Улсын Эзэн хааны “Мандах нар” одонгийн “Сарнай цэцэг бүхий алтан туяа” зэрэглэлийн одон гардуулах аж. “Япон судлаач” нэрээрээ илүү олонд танигдсан Д.Төмөрбаатар Японы утга зохиолын шилдгүүдээс монгол уншигчдадаа толилуулсан манай нэртэй орчуулагчдын нэг.

Д.Төмөрбаатар Кавабата Ясүнаригийн “Изүгээр яваа бүжигч бүсгүй” (1991), Ито Сачиогийн “Хээрийн удвал цэцэгсийн дундах шарил” (2001), Шиба Рёотарогийн “Сүүлчийн шёогүн” (1996), “Мэйжи хэмээх төр улс” (2000) түүхэн романууд, Насүдо Минорүгийн “Огторгуйд дүүлэн одох моторт дугуй”(2000), Нитобэ Иназогийн “Бүшидэ” гүн ухаан, ёс зүйн тууж (2007) зэрэг олон гайхалтай зохиол бүтээл орчуулж олны хүртээл болгосон билээ.

Нийтийн тээврийн автобусны жолооч хүн мөргөж гэмтээжээ. Сонгинохайрхан дүүргийн нутаг дэвсгэр Тээвэрчдийн гудамж, Сутайн буянт захын урд замд Нийслэлийн зорчигч тээврийн нэгтгэл ОНӨААТҮГ-ын Daewoo BS-106 маркийн автобусны жолооч Э нь явган зорчигч 37 настай эрэгтэй М-г мөргөж гэмтээсэн осол өчигдөр гарчээ. Уг хэргийг цагдаагийн байгууллагад шалгаж байгаа аж.

Нийслэлийн ойролцоо зээр сүргээрээ орж ирж байгаа талаар “Өдрийн сонин” сурвалжлан хүргэсэн. Тэгвэл Синьхуа агентлагт энэ сарын 09-ний өдөр ӨМӨЗО-ны Эрээн хотын хилийн зурвасаар Монголын талаас их хэмжээний буюу 600 орчим зээрийн сүрэг нэвтэрсэн талаар мэдээлжээ.

Зээрийн сүрэг ийн нүүдэллэх болсон шалтгааныг Монголд цаг агаар хүйтэрч цас үргэлжлэн орж байгаатай холбон тайлбарлажээ. ӨМӨЗО-ны Эрээн хотын хилийн албаныхан эдгээр зээрийн сүргийг хамгаалах зорилгоор бэлчээрлэх чиглэлийг анхааран, хулгайн анчдын эсрэг хяналт тавих аж.

Шударга өрсөлдөөн хэрэглэгчийн төлөө газраас Сууц өмчлөгчдийн холбооны үйл ажиллагааг шилэн болгож эхэлжээ.

Тодруулбал, СӨХ-ны үйл ажиллагааг нь ил тод байлган иргэддээ хүрч ажиллах мөн ус, дулаан, цахилгаан гэх мэт төлбөр тооцоо зэрэг бүхий асуудлыг ойлгомжтой байлгахаар “Манай СӨХ” фэйсбүүк хуудастай болгож эхэлсэн байна.

Байрны цэвэрлэгээ муу, дээврээс ус байнга гоождог, хаалга цоож эвдэрхий, гадаах тохижилт, лифт засахгүй байна гэх мэт СӨХ-тэй холбоотой гомдол ШӨХТГ-т байнга ирдэг байна.

Мөн орчин цагийн хүмүүсийн амьдралын хэв маяг, завгүй байдлаас иргэд СӨХ-ийнхөө үйл ажиллагаанд тогтмол оролцож амжихгүй, төлбөр мөнгөний асуудал тодорхой бус байгаагаас оршин суугчид болон СӨХ хоёрын дунд үл ойлголцох асуудал гарсаар байна.

Тиймээс Шилэн СӨХ хөтөлбөрийг хэрэгжүүлэн ил тод байдлыг бий болгох юм. Нийслэлийн бүх дүүргийн СӨХ-дод үүнийг хэрэгжүүлэх бөгөөд та фэйсбүүк хаягтай бол өөрийн СӨХ-ны нэрийг латинаар бичин группт нэгдэж, мэдээлэл солилцох боломжтой болох юм.