Month: October 2015

ГЕГ-ын байцаагч С.Норжинсүрэнгийн хүү Б.Бадралыг өнөөдөр Баянгол, Хан-Уул, Сонгинохайрхан дүүргийн шүүхэд 08.30 цагаас шүүх тодорхойгүй хугацаагаар хойшилжээ. Учир нь шүүгдэгч Б.Бадралын өмгөөлөгч өвчтэй байгаа тул хурлыг хойшлуулж өгнө үү гэх хүсэлтийг шүүх бүрэлдэхүүнд гаргасан байна. Бүрэлдэхүүн хүсэлтийг хүлээн авснаар ийнхүү хойшлуулаад байгаа аж. Түүнийг Эрүүгийн хуулийн тусгай ангийн 192.1, 188.2-т зааснаар буруутгаж байгаа. Тус зүйл ангиудад мансууруулах буюу сэтгэцэд нөлөөлөх эм, бэлдмэл, бодисыг борлуулах зорилгогүйгээр хууль бусаар бэлтгэсэн, олж авсан, хадгалсан бол хөдөлмөрийн хөлсний доод хэмжээг нэг зуугаас нэг зуун тавь дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл хоёр жил хүртэл хугацаагаар хорих ял шийтгэнэ /192.1/, хар тамхи, мансууруулах буюу хордуулах, цацраг идэвхт, тэсэрч дэлбэрэх бодисыг хууль бусаар Монгол Улсын хил нэвтрүүлсэн бол таваас дээш арван жил хүртэл хугацаагаар хорих ял шийтгэнэ /188.2/ гэж заажээ.

Болсон хэрэг явдлыг сануулбал, Б.Бадрал нь 2013 оны аравдугаар сарын 30-нд Дорноговь айм­гийн Замын-Үүд дэх авто замын шалган нэвтрүүлэх боом­тоор “Marlboro” тамхины хайрцагт 0.917 грамм “ICE” буюу мөс гэх боди­сыг хилээр оруулахыг завдсан аж. Түүнийг байнга хилээр нэвтэрдэг ба Замын-Үүдийн байцаагч нар ч авч яваа эд зүйлсийг нь шалгалгүй шууд нэвтрүүлдэг байсан гэх. Тодруулбал, тэрээр өмнө нь хэд хэдэн удаа ийнхүү гаалиар хар тамхи зөөвөрлөсөн бөгөөд Гаалийн Ерөнхий газарт томоохон албан тушаал эрхэлдэг ээжийнхээ нэрээр ийнхүү шалгуулалгүй өнгөрдөг байсан гэдэг. Түүний ээж Гаалийн ерөнхий газрын Хяналт шинжилгээ мониторингийн газрын Гаалийн улсын ахлах байцаагч С.Норжинсүрэн аж.

Орон нутгийн эмнэлгийн үйлчилгээг сайжруулах, хавдар өвчнөөр өвдсөн эмчлүүлэгсдэд химийн эмчилгээг ойртуулах зорилготой хавдрын хими эмчилгээний тасгийг анх удаа Сүхбаатар аймгийн нэгдсэн эмнэлэгт шинээр байгуулжээ.

Хавдрын хими эмчилгээ нь хавдрыг төгс эмчлэх, хавдар үсэрхийлэхээс сэргийлэх, хавдрын эсийг үхүүлэх, ургалтыг багасгах зэрэг олон талын ач холбогдолтой. Хавдартай өвчтөнд хамгийн их хэрэгцээ шаардлагатай эмчилгээ бол хими физик эмчилгээ байдаг. Гэвч манай улсад Хавдар Судлалын Үндэсний Төв /ХСҮТ/–өөс өөр хавдрын мэргэшсэн эмнэлэг байдаггүй учир орон нутгаас хавдрын хими эмчилгээнд эмчлүүлэх өвчтөний цуваа тасардаггүй байна.

Хавдрын хими эмчилгээний тасгийг байгуулах уг ажлыг “Жаргалсайхан ирээдүй” сангаас санаачлан Сүхбаатар аймгийн ард иргэд байгууллагуудын чин сэтгэлийн хандив тусламжтайгаар 1 жилийн хугацаанд хийж гүйцэтгэсэн бол ерөнхий санхүүжүүлэгчээр ХААН Банк Сан ажилласан байна.

“Жаргалсайхан ирээдүй” санг Сүхбаатар аймгийн ХААН Банкны салбарын захирал асан Жаргалсайханы дурсгалд зориулан түүний үр хүүхдүүд эхлүүлсэн үйл хэргийг нь үргэлжлүүлэхээр үүсгэн байгуулсан бөгөөд иргэдийн эрүүл мэнд боловсролыг дэмжих, нийгмийн эмзэг хэсэгт үнэ төлбөргүй үзлэг оношилгоо хүргэх зэрэг олон ажлыг өрнүүлэхээр зорилго тавин ажиллаж байна.

Сүхбаатар аймгийн хувьд өнгөрөгч онд 161 иргэн хавдрын өвчинтэй нь оношлогдож, 127 хүн хавдар өвчний улмаас амиа алдсан харамсалтай тоо баримт байгаа юм. Шинээр байгуулсан тус Хавдрын хими эмчилгээний тасаг нь зөвхөн Сүхбаатар аймгийн иргэдээр зогсохгүй Зүүн 3 аймгийн зангилаа бүс нутаг учир Хэнтий, Дорнод аймгуудаас ч мөн адил зорин ирж эрүүл мэндийн үйлчилгээ авах иргэдийг хүлээн авч, хавдарын эмчилгээнд хамруулна гэдгээрээ ач холбогдолтой.

Тус үйл ажиллагаанд Жаргалсайхан ирээдүй сангийн тэргүүн Ж.Зоригтбаатар, Сүхбаатар аймгийн ХААН Банкны захирал Ц.Адьяабаатар, ХСҮТ-ийн ЭШСМАлбаны дарга Ц.Бадамсүрэн болон бусад албаны хүмүүс оролцлоо. “Жаргалсайхан ирээдүй” Сангийн Тэргүүн Ж.Зоригтбаатар “Сүхбаатар аймагт нээгдэж буй Хавдрын хими эмчилгээний тасаг нь 2 дахь шатлалын эмнэлгийн түвшинд хийж буй томоохон хөрөнгө оруулалт болоод зогсохгүй бусад аймагт байгуулах хэрэгцээ шаардлагатай жишиг тасаг болж байна” хэмээн онцоллоо.

Нийгмийн сайн сайханд бодитой хув нэмэр оруулна уриатай ХААН Банкны ХААН Банк Сан нь Монгол орон даяар “Хавдрын эсрэг үндэсний аян”-г 5 дахь жилдээ зохион байгуулж, олон мянган иргэдэд хавдрын үнэ төлбөргүй иж бүрэн үзлэг оношилгоог хүргэсэн билээ. Тэгвэл энэ удаад ХААН Банк Сан хавдартай өвчтөнүүдэд хүргэх эмчилгээний чанар хүртээмж, эмнэлгийн орчин нөхцөлийг сайжруулах зорилгоор тус төслийг санхүүжүүлэн ерөнхий ивээн тэтгэгчээр хамтран ажилласан байна.

Сонирхогчдын боксын Дэлхийн аварга шалгаруулах тэмцээн өнөөдөр Катарын Доха хотноо эхэлж байна. Аравдугаар сарын 5-18-нд үргэлжлэх тэмцээнд Монголын дөрвөн боксчин өрсөлдөж байна.

Тивийнхээ аваргад амжилт гаргаж, Дэлхийн аваргад өрсөлдөх эрх авсан74 орны 260 боксчин энэ удаагийн тэмцээнд хүч үзэх бөгөөд ДАШТ-ээс РИО-2016 олимпийн наадмын 23 эрх олгох юм.

49кг-д хүч үзэх ОУХМ Г.Ган-Эрдэнэ эхний тойрогт гоц мөргөлөө. Тэрбээр дараагийн тойрогт Индонезийн Корнелис Квангу Лангу, Японы Томояа Цүбой нарын аль ялсантай нь аравдугаар сарын 8-ны өдөр тулалдана.

56 кг-д өрсөлдөж буй ОУХМ Э.Идэрхүү Венесуэлийн боксчин Диас Азокар Хосетай өнөөдөр тулалдахаар сугалаа татлаа.

60 кг-ын хүчтэй өрсөлдөгчдийн нэгээр нэрлэгдэж буй ОУХМ Д.Отгондалай эхний тойрогт гоц мөргөлөө. Манай тамирчин дараагийн тойрогт ДАШТ-ий алт, мөнгө, гурван хүрэл медальт, Италийн Доменико Валентино, Европын аваргын мөнгөн медальт, Голландын Лакруз Энрико нарын хэн ялсантай нь хүч үзнэ. Тулаан аравдугаар сарын 9-нд болно.

69 кг-ын жинд тулалдах ОУХМ Б.Түвшинбат эхний тойрогт Чехийн Зденек Чладектай хүч үзнэ. Энэ тулаан маргааш буюу аравдугаар сарын 7-нд болно. Түүний өрсөлдөгч ДАШТ-ий хүрэл медальтай тамирчин юм.

AIBA буюу Олон улсын сонирхогчдын боксын холбооны шинэчлэгдсэн дүрмийн дагуу энэ жилийн ДАШТ-д өрсөлдөж буй тамирчид эхлээд тивийн аварга шалгаруулах тэмцээнд эхний долоод бичигдэн, эрх авч байж ирсэн байгаа билээ.

Богдхан уулын тэнгэрийг тайх тахилгын ёслол маргааш болно. Ерөнхийлөгчийн зарлигаар Богд хан уул, Их тахилгат хайрхан, Алтан хөхий, Алтайханы Таванбогд, Суварга хайрхан, Бурханхалдун уулын тэнгэрийг тайх ёслолыг таван жил тутамд хийдэг уламжлалтай. Энэ ч үүднээс маргааш буюу XVII жарны модон хонь жилийн намрын дунд хөхөгчин тахиа сарын 25-ны билэгт сайн өдөр үйлдэхээр төлөвлөжээ. Тэгвэл тахилгын ёслолын бэлтгэл бүрэн хангагдсан гэдгийг Богдхан уулын дархан цаазат газрын хамгаалалтын захиргааны дарга Ц.Ширэндэв мэдээллээ.

Энэ жилийн хувьд Богдхан уулын тэнгэрийг тайх ёслолыг угтаж “Дархан цаазат Богдхан уул” номыг гаргажээ. Номын ерөнхий редактороор Соёлын гавьяат зүтгэлтэн Л.Одончимэд ажилласан байна. Номын нэгдүгээр бүлэгт Богдхан уулыг дархан цаазат болгосон түүх, тайлга тахих ёслолын талаар дурьджээ. Тухайлбал, 1696 онд анхдугаар Богд Жавзандамбын насан хутаг бат орших бэлгээр даншиг мандал өргөн эрийн гурван наадам хийсэн нь Богдхан уулын шашин төрийн анхны тайлга наадам болсон гэж үздэг аж. Энэ үеэс монголчууд Богдхан уулын тэнгэрийг тайх ёслолыг үйлдэж иржээ.

Ер нь “Тахилга” гэх өвөрмөц сонин ёслол, үйлийг монголчуудаас өөр хаана ч хийдэггүй гэдгийг “Дархан цаазат Богдхан уул” номонд онцолсон байна. Монгол туургатан эрт цагаас л “Тахилга” үйлдэж байгаль эх, газар шороо, нутаг усаа өвөрмөц сонин тогтоцтойгоор нь дээдлэн хамгаалж иржээ. Энэ нь ч байгаль эхээ дээдэлж, өвөг дээдсээ шүтдэг монгол хүний мараалыг илтгэсэн онцлог хэмээн Байгаль орчин ногоон хөгжил, аялал жуулчлалын сайд Н.Батцэрэг онцолж байсан юм.

Ер нь Богдхан уул бол сая гаруй хүн амтай Улаанбаатар хотын хүчил төрөгчөөс эхлээд олон ачааг нуруун дээрээ үүрч яваа юм. Тиймээс төрийн тахилгат энэ уулыг хэрхэн хамгаалж, хайрлаж буйгаас монгол төрийн бодлого харагдана гэдгийг тэрээр хэлсэн юм. Улаанбаатар хотын хүн ам нэмэгдэж, тэр хэрээр барилга байшин, суурьшлын бүс хаяагаа тэлж буй учраас Богдхан уулыг хамгаалах шинэ бодлого үгүйлэгдэж эхэлжээ. Тиймээс Богдхан уулыг хамгаалах шинэ бодлогыг салбарын яамнаас нь боловсруулсан гэдгээ хэлэв. Ялангуяа ирэх хавраас Богдхан уулыг хамгаалахад чиглэсэн олон ажил эхэлнэ гэж мэдээлсэн юм.

Тахилгын ёслолыг нийслэлийн Засаг даргын тамгын газар, Богдхан уулын Дархан цаазат газрын хамгаалалтын захиргаа, зүүн хүрээ Дашчойлон хийдээс зохион байгуулж байгаа юм. Ийнхүү маргааш монголчууд Богдхан уулын тэнгэрийг тайх тахилгын ёслолыг үйлдэх гэж байна. Гол нь тахилгын ёслолыг үйлдэхдээ иргэд Богдхан ууланд хог хаяхгүй, идээ будаагаа зориулалтын газарт өргөхийг албаныхан сануулсаар байгаа юм.

Цахилгаан дамжуулах үндэсний сүлжээ” ТӨХК -аас өвлийн их ачааллын өмнөх бэлтгэл ажлыг хангах зорилгоор 110 кВ-ын арван дэд станцад тохируулгын ажил хийх тул 10 дугаар сарын 5-14-ний өдрийн хооронд дараахь байршлуудад цахилгаан эрчим хүч богино хугацаанд түр тасрах болсныг мэдээлж байна. Хэрэглэгчид та бүхэн хэрэглээгээ түр зохицуулна уу.

10 сарын 6-ны өдөр

Сүхбаатар дүүрэг 10,11,16-р хороо 7-р хороолол, 100 айл, Сэлбэ орчим

Баянзүрх дүүрэг 1,2,4,5,7,14,21,22-р хороо Дарь-Эх, Монель, Алтан-Өлгий, Маахуур толгой, Цэргийн хотхон, Сансар, Кино үйлдвэр орчим

10 сарын 8-ны өдөр

Баянзүрх дүүрэг 5, 8, 13, 14, 15, 16-р хороо 16-р хороолол, Оффицеруудын ордон, ХӨСҮТ, Нарантуул зах, 13-р хороолол, Замын цагдаагийн газар орчим

10 сарын 9-ний өдөр

Хан-Уул дүүрэг 5, 6, 7, 8-р хороо Яармаг, Нүхт орчим

Баянгол дүүрэг 20-р хороо Хөсөг трейд орчим

Сонгинохайрхан дүүрэг 13, 14, 15, 16, 17-р хороо 1-р хороолол

10 сарын 12-ны өдөр

Сонгинохайрхан дүүрэг 1, 2, 3, 4, 5, 19, 20, 21, 22, 26-р хороо 21-р хороолол, Орчлон хороолол,Толгойт, Орбит, Цэвэрлэх орчим

10 сарын 13-ны өдөр

Налайх дүүрэг

Баянгол, Хан-Уул, Сонгинохайрхан дүүргийн шүүхэд өнөөдөр 08.30 цагаас ГЕГ-ын байцаагч С.Норжинсүрэнгийн хүү Б.Бадралд холбогдох хэргийг хэлэлцэж эхэллээ. Түүнийг 2013 оны аравдугаар сарын 30-нд Дорноговь аймгийн Замын-Үүд дэх авто замын шалган нэвтрүүлэх боомтоор “Marlboro” тамхины хайрцагт 0.917 грамм “Ice” буюу мөс гэх сэтгэцэд нөлөөлөх бодисыг хилээр оруулахыг завдсан хэрэгт буруутган, Эрүүгийн хуулийн тусгай ангийн 192.1, 188.2-т зааснаар прокуророос яллах дүгнэлт үйлдээд байгаа юм.

Нийслэлийн иргэдэд цахим системээр газар өмчлүүлэх дөрөвдүгээр ээлжийн бүртгэл 2015 оны 08 дугаар сарын 25-ны өдөр эхэлж, энэ сарын 09-нд дууссан бөгөөд Баянзүрх, Сонгинохайрхан, Хан-Уул дүүргийн нийт 22 байршлын 8727 га газарт 28963 иргэнд газар өмчлүүлсэн. Сонгинохайрхан дүүргийн зарлагдсан байршлуудад сонгогдсон иргэд дүүргийн 27 дугаар хорооны байранд, Баянзүрх дүүрэгт сонгогдсон иргэд тус дүүргийн Өмч, газрын харилцааны албанд, Хан-Уул дүүрэгт сонгогдсон иргэд дүүргийн Өмч, газрын харилцааны албанд өргөдөл гаргаж баталгажуулж байгаа юм. Өргөдлийг 09 сарын 23 хүртэл хүлээн авч дуусах байсан ч хугацааг ажлын 10 хоногоор сунгаж, 10 сарын 7-ны өдрийг хүртэл хүлээн авч байна. Тиймээс нийслэлийн иргэд Та бүхэн газар өмчлөх өргөдлөө хугацаандаа багтаж баталгаажуулна уу гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Зарлагдсан байршлуудын нэгж талбар бүхий эргэлтийн цэг тэмдэг газарт бэхлэх, акт үйлдэн баталгаажуулах ажлыг хийж гүйцэтгэх компаниуд

Хан-Уул дүүргийн нутаг Шувуун фабрикийн зам, Шувуун фабрикийн 4 дүгээр хэсгийн урд замд Т.Приус маркийн авто машины жолооч Б нь хүүхдийн тэргэнд сууж явсан 4 сартай эмэгтэй Г-г мөргөж гэмтээсэн байна.

Жолооч Б нь согтууруулах ундааны зүйл хэрэглэсэн үедээ тээврийн хэрэгсэл жолоодож, зам тээрвийн осол гаргажээ. Уг хэргийг цагдаагийн байгууллагад шалгаж байгаа аж. Өнгөрөгч хоногт Улаанбаатар хотын Замын цагдаагийн газрын МШУЗХ-д нийт 396 дуудлага мэдээ мэдээлэл хүлээн авснаас зам тээврийн ослын 310 дуудлага бүртгэгдсэн байна. Үүнээс ХАБАЖЭГХэрэг 16 бүртгэгдэж 18 хүн хүнд хөнгөн гэмтжээ.

Мөн цагдаагийн алба хаагчид согтууруулах ундааны зүйл хэрэглэсэн үедээ замын хөдөлгөөнд оролцсон жолооч 2, явган зорчигч 3. Согтуугаар тээврийн хэрэгсэл жолоодсон 82 жолоочийг журамлан гарч болзошгүй осол хэргээс урьдчилан сэргийлж, ажилласан хэмээн мэдээллээ.