Month: October 2015

Хан Хэнтий нутгийн хүү Эрдэнэтийн уулын баяжуулах үйлдвэр “Хангарьд” спорт хороо, Хэнтий аймгийн Цагдаагийн хэлтсийн бөх Э.Оюунболд энэ жилийн улсын их баяр наадамд ес даван түрүүлж, Монгол Улсын арслан цолд хүрсэн.

Тэрбээр арслан цолны хүндэтгэлийн хүлээн авалтаа өнөөдөр “Скай резорт” цогцолборт хийхээр болжээ.

Шинэ арслан маань намрын барилдаануудад барилдаж нээлт болон Баянзүрх дүүргийн 50 жилийн ойн барилдаануудад түрүүлээд байна.

Хамгийн сүүлийн начин цолны хүндэтгэлийн барилдаанд залуу арслан гэмтлийн улмаас зодоглоогүй билээ.

Монгол Улсад
авто замын салбар үүсч хөгжсөний 86 жилийн ой өнөөдөр тохиож буй. Замчид
энэ өдрийг өөрсдийн баярын өдөр болгон тэмдэглэдэг уламжлалтай.

Зам,тээврийн
яам, Монголын авто замчдын холбоо, Нийслэлийн авто замын газар болон
авто замын компанийнхан, ахмад залуу замчдын төлөөлөл өнөөдөр Монгол
Улсын авто замын сүлжээний эхлэл цэгт хүндэтгэл үзүүллээ. Уг арга
хэмжээнд Зам, тээврийн сайд М.Зоригт, дэд сайд Х.Ержан, Нийслэлийн Засаг
даргын орлогч Н.Гантөмөр, Нийслэлийн авто замын газрын дарга
Ш.Нанзаддорж болон албаны бусад хүмүүс, замчдын төлөөлөл, нийслэлийн
иргэдийн төлөөлөл оролцсон юм.

Зам, тээврийн
сайд М.Зоригт “Энэ салбарын сайдаар томилогдож ирээд анх удаа улсынхаа
авто замын сүлжээний төв цэг дээр зогсож байна. Авто замын салбарт
ажиллаж байгаа нийт замчиддаа баярын мэнд хүргэе. Монгол Улсын нийслэл
аймгуудтайгаа хатуу хучилттай авто замаар холбогдож дуусах гэж байна.
Энэ хатуу хэцүү ажлыг нуруундаа үүрч, нугалж яваа замчдаараа бахархаж
байна” гэсэн юм.

Мэргэжлийн хяналтын ерөнхий газраас мэдээлэл хийлээ. Тус мэдээллээр гурван аж ахуй нэгж, нэг иргэн хууль бусаар асбест болон асбест агуулсан бүтээгдэхүүн худалдаалж худалдаж байсныг ирүүлсэн болохыг хэллээ. Тодруулбал, шилэн хөвөн худалдаалж байжээ. Тус бүтээгдэхүүн нь хүний биед маш хор нөлөөтэй бөгөөд уушгиний хорт хавдар үүсгэдэг гэнэ. Учир нь асбест нь байгаль дээр тархсан гидросиликат магни, төмөр, кальци, натриас тогтсон маш нарийхан утсархаг бүтэцтэй, бутрамтгай чулуулаг эрдсүүд юм. Дулаан, галд тэсвэртэй, усанд уусдаггүй, хайлдаггүй байна. Асбест агуулсан бүтээгдэхүүнийг барилгын материал, эрчим хүч, автомашины сэлбэг, дулаан тусгаарлагчийн үйлдвэрлэлд хэрэглэдэг.Асбестын тоос амьсгалын замаар хүний биед нэвтрэн орж, уушгинд удаан хугацаагаар тунаж үлддэг. Үүнээс шалтгаалан уушгины хорт хавдар, хэвлий болон цээжний гялтан хальсны хорт хавдар зэрэг өвчнийг үүсгэх гол шалтгаан болдог байна. Мөн асбест нь ходоод, гэдэс, бүдүүн, шулуун гэдэсний хавдар үүсгэх, бөөр улаан хоолой, цагаан мөгөөрсөн хоолой, давсагны хавдар тусах эрсдэлийг нэмэгдүүлдэг болохыг МХЕГ-аас анхааруулав.

Нийслэлийн иргэдийн төлөөлөгчдийн хурлын ээлжит хурал өнөөдөр болж өндөрлөлөө. Хуралдаанаар ирэх онд иргэдэд гэр бүлийн хэрэгцээгээр 68 байршилд газар өмчлүүлэх асуудлыг хэлэлцэн баталлаа.

Тодруулбал, Сонгинохайрхан дүүргийн 12 байршилд 2000 гаруй га, Хан Уул дүүрэгт гурван байршилд 421.6 га, Налайх дүүргийн дөрвөн байршилд 3600 гаруй га, Багахангай дүүргийн 17 байршилд 3800 гаруй га, Багануур дүүргийн 32 байршилд 11 мянга гаруй га газрыг ирэх онд иргэдэд өмчлүүлэхээр боллоо.

Эдгээр 68 байршлын дэд бүтэц, газарзүйн байрлал зэрэгт судалгаа, шинжилгээ явуулсны дүнд сонгожээ. Ингээд ирэх оны тавдугаар сараас иргэдэд гэр бүлийн хэрэгцээгээр өмчлүүлэхээр болж байна.

Иргэдэд гэр бүлийн хэрэгцээгээр өмчлүүлж буй газартай холбоотой дэлгэрэнгүй мэдээлийг эргэн хүргэнэ.

Жил бүр Ерөнхийлөгчийн зарлигаар “Чингис хаан” төрийн дээд одонг гардуулдаг билээ. Өнөө жил зохиолч, орчуулагч, яруу найрагч, Соёлын гавьяат зүтгэлтэн, Дэлхийн урлаг соёлын академийн хүндэт доктор Гомбожавын Мэнд-Ооёод энэхүү төрийн дээд одонг хүртээхээр болжээ.

Анх 2002 онд Монгол Улсын хоёр дахь Ерөнхийлөгч Н.Багабандийн гаргасан санаачилгыг УИХ сайшаан дэмжиж, УИХ-ын 21 дүгээр тогтоолыг баталж байжээ. Энэхүү одонг Монгол Улсын тусгаар тогтнол, бүрэн эрхт байдал, үндэсний эв нэгдлийг бататган бэхжүүлэх, төрт ёсны түүх, соёлынхоо уламжлалыг гүнзгий судалж, хойч үедээ өвлүүлэх, дэлхийн бусад оронд сурталчлан таниулах үйлсэд хувь нэмрээ оруулсан, онцгой гавьяа байгуулсан иргэнд Үндэсний их баяр наадмаар буюу жил бүрийн долдугаар сарын 11-ний өдөр хүртээж байхаар тогтоосон байна. Үүнээс хойш тус одонгоор нийт зургаан хүн шагнагджээ. Харин дараагаар нь тогтоолын төсөлд өөрчлөлт орж “Чингис хаан” одонг Их Монгол Улсыг үүсгэн байгуулсан их хааны төрсөн өдрөөр буюу “Монгол бахархлын өдөр” өдрөөр ёслол хүндэтгэлтэйгээр хүртээж байхаар тусгажээ. Энэ жилийн хувьд 11 дүгээр сарын 12-ны өдөр Чингис хааны одонг гардуулахаар болсон байна.

Соёлын гавьят зүтгэлтэн, яруу найрагч Гомбожавын Мэнд-Ооёо нь 1952 онд Сүхбаатар аймгийн Онгон суманд төржээ. 1978 онд Улсын багшийн дээд сургуулийг төгссөн байна. Монголын Соёл Яруу найргийн академийн тэргүүн Г.Мэнд-Ооёо нь яруу найраг, хүүрнэл зохиол, бодрол бясалгал, нийтлэл судлалын 30 гаруй ном хэвлүүлсний зэрэгцээ түүний уран бүтээл англи, япон, хятад, бенгаал, македони хэлнээ хөрвүүлэгдэн гарч байсан дэлхийд Монголыг төлөөлж байгаа цөөхөн яруу найрагчдын нэг. 1996 онд Соёлын гавьяат зүтгэлтэн цол ,1998 онд “Алтан овоо” “Утгын болор сүм” номоороо МЗЭ-ийн шагнал, 2001 онд олон улсын яруу найргийн ПЕН клубын шагнал, 2002 оны шилдэг зохиолч шагналыг хүртэж байсан билээ.

Э.ЭНХ

Улсын их хурлын Тамгын газрын төрийн жинхэнэ албан тушаалын сул орон тоог анх орох иргэдээс өрсөлдүүлэн шалгаруулж нөхөхөд төрийн албаны мэргэшлийн шалгалт авдаг. Энэ удаа ажлын байранд тавигдсан шаардлага хангаж, бүртгэгдсэн иргэдийн нэрс болон шалгалт авах газар, хуваарийг 2015 оны 11 дүгээр сарын 13-ны өдрийн 14.00 цагт Төрийн албаны зөвлөлийн www.csc.gov.mn гэсэн цахим хуудсаар мэдээлэх бол 2015 оны 11 дүгээр сарын 16-ны өдөр шалгалт авна. Зарлагдаж буй сул орон тоонд тухайн албан тушаалд тавигдах боловсрол, мэргэжил, мэргэшил, туршлага, ур чадвар болон тусгай шаардлагыг хангасан, энэ албан тушаалд ажиллахыг хүссэн иргэнийг бүртгэх юм. Мэргэшлийн шалгалтад орох иргэн шалгалттай холбогдох зардлыг өөрөө хариуцах журамтай бөгөөд шалгалтын үйлчилгээний зардал 10 000 /арван мянган/ төгрөг болно.

Бүртгүүлэх иргэн дараахь бичиг баримтыг бүрдүүлнэ

• Төрийн албан хаагчийн анкет (Төрийн албан хаагчийн анкетыг маягт N1-ийн дагуу бүрэн бөглөсөн байх);

• Боловсролын түвшинг тодорхойлсон баримт бичиг /диплом/-ийн эхийг нотариатаар гэрчлүүлсэн хуулбарын хамт;

• Мэргэшүүлэх сургалтанд хамрагдсан бол гэрчлэх баримт бичгийн эх хувийг хуулбарын хамт;

• Иргэний үнэмлэхний эх, хуулбарын хамт;

• “4 х 6”-гийн хэмжээний цээж зураг 2 хувь

• Ажилласан хугацаа болон ажил эрхлэлтийг гэрчлэх баримт /Нийгмийн даатгал, хөдөлмөрийн дэвтэр/-ийн эх хувийг хуулбарын хамт;

• Шалгалтын үйлчилгээний төлбөр