Month: August 2015

БНСУ-д хөдөлмөрийн гэрээгээр ажиллах хүсэлтэй иргэдийн бүртгэл энэ сарын 5-наас эхлэн Хөдөлмөр эрхлэлтийн үйлчилгээ, судалгаа, мэдээллийн үндэсний төвд гурав хоног үргэлжилнэ.

Бүртгэлд хамрагдах иргэд 18-39 насны буюу 1975 оны наймдугаар сарын 6-ноос 1997 оны наймдугаар сарын 5-ний хооронд төрсөн, хорих ял эдэлж байгаагүй байх ёстой аж.

Мөн Солонгосоос албадан гараагүй буюу албадан гаргах арга хэмжээ авахуулж байгаагүй, БНСУ-д ажиллаж байгаад оршин суух хугацаандаа багтаж сайн дураараа нутаг буцаж ирсэн байх /2010.01.01-нээс хойш ирсэн иргэд/, Монгол Улсаас гарах эрхээ хязгаарлуулаагүй зэрэг шалгуур хангах ёстой юм байна.

БНСУ-д хөдөлмөрийн гэрээгээр ажиллаж байгаад хугацаандаа нутаг буцсан, дахин гэрээгээр ажиллах хүсэлтэй иргэдийг бүртгэлд хамруулан, солонгос хэлний түвшин тогтоох шалгалтыг компьютерт суурилсан тестийн аргаар авах бөгөөд БНСУ-ын гадаадын иргэдийн хөдөлмөр эрхлэх зөвшөөрлийн тогтолцооны дагуу тус улсад ажиллах хүсэлтэй иргэд Солонгос хэлний түвшин тогтоох шалгалтад тэнцсэн байх ёстой аж.

Сонгинохайрхан дүүргийн 24 дүгээр хороо, Баруун салааны авто замд өчигдөр зам тээврийн осол гарчээ.

“Hyundai Grace” загварын автомашин, “Hyundai porter” загварын ачааны автомашины араас нь мөргөж, “Hyundai Grace” загварын автомашины зорчигчид гэмтсэн байна.

Ослын газарт Онцгой байдлын Аврах ангийн долоон албан хаагч ажиллаж “Hyundai Grace” загварын автомашины зорчигч иргэн Д /37 настай, эрэгтэй/ автомашины төмөр хийцэд хавчуулагдсан байсныг гарган, жолооч Х /40 настай, эрэгтэй/, зорчигч Г /39 настай, эрэгтэй/ нарт эмнэлгийн анхан шатны тусламж үзүүлэн ЯТТТ-ийн эмчид хүлээлгэн өгчээ. Уг хэргийг харьяа дүүргийн цагдаагийн хэлтэст шалгаж байна.

Нийгмийн Даатгалын Ерөнхий Газрын албан ёсны лавлах утас болох “Мэдээллийн лавлах 19001199”-өөс бэлтгэн ирүүлсэн Нийгмийн даатгалын ээлжит зөвлөгөөг та бүхэнд хүргэж байна.

Нийгмийн даатгалын тухай хуульд заасны дагуу 2015 оны долдугаар сарын 01-ний өдрөөс эхлэн нийгмийн даатгалын шимтгэл төлөх хөдөлмөрийн хөлсний дээд хэмжээ ажил олгогч, даатгуулагчийн хувьд адил байхаар мөрдөж эхэллээ.

Мөн нийгмийн даатгалын сангаас олгох бүх тэтгэвэр, тэтгэмж тогтооход баримтлах хөдөлмөрийн хөлсний дээд хэмжээ нь нийгмийн даатгалын шимтгэл төлөх хөдөлмөрийн хөлсний дээд хэмжээтэй адил байна

Өөрөөр хэлбэл Нийгмийн даатгалын шимтгэл төлөх тэтгэвэр тэтгэмж тогтооход баримтлах хөдөлмөрийн хөлсний дээд хэмжээг Засгийн газраас шинэчлэн тогтоох хүртэл хугацаанд “Нийгмийн даатгалын шимтгэл төлөх сарын хөдөлмөрийн хөлс, түүнтэй адилтгах орлогын дээд хэмжээг шинэчлэн тогтоох тухай” Засгийн газрын 1998 оны 92-р тогтоолыг баримтлан ажиллана.

Даатгуулагч та:

2015 оны долдугаар сард 3000000 төгрөгийн цалин авсан бол даатгуулагч 1920000 төгрөгөөс 10% тооцож 192000 төгрөг, ажил олгогч 1920000 төгрөгөөс 11%, – 13,%-аар тус тус тооцож /211200төг, 230400төг, 249600төг/-ийг нийгмийн даатгалын санд төлнө гэсэн үг юм.

Энэ сарын 1-нд Москва орчмын Алабино хээрийн сургуулилтын газарт “Танкийн биатлон 2015” дэлхийн аварга шалгаруулах тэмцээн эхэллээ.

Тус тэмцээнд ОХУ, Ангол, Армени, Венесуэл, Энэтхэг, Казахстан, Киргиз, БНХАУ, Кувейт, Монгол, Серби, Азербайжан, Никарагуа, Тажикистан гэсэн орнууд оролцож байна бөгөөд тэмцээн энэ сарын 16-ныг хүртэл үргэлжлэх юм.

Тэмцээний үеэр танкчид зөвхөн Т-72 танк төдийгүй явган цэргийн БМП-2 машинаар бартаат болон шулуун замаар уралдаж, зогсоо байдлаас болон явдал дундаа бай буудан өрсөлдөнө.

Түүнчлэн танкийн биатлон нь байлдааны байдалд дээд зэргээр ойртсон нөхцөлд, хуягт техник болон экипажуудын чадварыг сорьсон нөхцөлд явагддаг бөгөөд танкууд хэр хурдтайгаар, хэдэн тойрог явах, явдлаас пулемёт болон их буугаар буудах, хүнд саадтай замын хэсгийг туулах зэргээр танкчдын чадварыг нь сорьж, байгаа оноогүй, эсвэл жолоодлогонд алдаа гарсан нөхцөлд хугацааны торгууль ноогдуулах, оноо хасах зэрэг журмаар явагддаг.

Танкийн экипажуудын дунд жолоодох урлаг, буудлагын төрлөөр явуулдаг энэ тэмцээнийг хамгийн анх 1963 онд НАТО-гийн гишүүн орнуудын зэвсэгт хүчний дунд Канадад зохион байгуулж байсан юм байна. ЗХУ-д 1970-аад оны сүүлчээр анх зохион байгуулжээ.

Өнгөрсөн жилийн “Танкийн биатлон”-ы ДАШТ-д багийн нийлбэр дүнгээр ОХУ тэргүүлж, Армен удаалж, өөрсдөө танкаа тээвэрлэн очсон БНХАУ гуравдугаар байр эзэлсэн байна.

Харин Монгол Улсын хувьд багийн нийлбэр дүнгээр IX байранд жагсчээ.

Сонирхуулахад өмнө нь тус тэмцээн хаалттай горимоор явж ирсэн, харин энэ жилээс үзэгчдэд нээлттэй болгох шийдвэрийг гаргажээ. Тасалбарыг зургадугаар сарын 17-ноос эхлэн худалдаанд гаргасан аж.

Нийслэлийн хэмжээнд 08 дугаар сард цахилгаан шугам тоноглолд засвар үйлчилгээ хийх хуваарийг танилцуулж байна. Цаг агаарын болон болзошгүй аваар саатлаас шалтгаалан хуваарьт өөрчлөлт орох магадлалтай бөгөөд өөрчлөгдсөн тохиолдолд УБЦТС ХК-д бүртгэгдсэн утсаар холбогдож аж ахуйн нэгж, байгууллагуудад мэдээлэх юм.

Ерөнхий сайд асан Н.Алтанхуягийн ахлах зөвлөх Л.Гансүхэд холбогдох хэргийн шүүх хурал өнөөдөр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд болох байсан ч хойшлогдлоо.

Л.Гансүхийн өмгөөлөгч ОХУ руу ажлаар явсан учир шүүх хурлыг энэ сарын 17-ныг хүртэл хойшлуулсан юм.

Түүний хэргийг Эрүүгийн хэргийн анхан шатны шүүгч Х.Идэрт хуваарилаад байгаа юм.

Сануулахад, Л.Гансүхийг “Нүүрс” хөтөлбөрийг хэрэгжүүлэх явцдаа 3.6 тэрбум төгрөгийг завшсан хэрэгт буруутгаж, АТГ-аас өнгөрөгч оны долоодугаар сарын 29-ний өдөр баривчилсан ч мөн оныхоо аравдугаар сард шүүхийн шийдвэрээр батлан даалтад гаргаад байгаа.

Л.Гансүхэд Эрүүгийн хуулийн тусгай ангийн 150.3, 263.2-т зааснаар хэрэг үүсгэн шалгаж байгаа юм.

Нийслэлийн харьяа 20 гаруй зуслан энэ сарын 15-нд хаалтаа хийхээр болжээ. Энэ долоо хоногт “Жавхлант”, “Хайрын бэлэг”, “Нарс”, “Нарлаг”, “Маргаашийн хөгжил” зэрэг зуслангууд бүртгэлээ хийж хүүхдүүдээ хүлээж авах юм байна. Бүртгэлийг нийслэлийн “Хүүхэд гэр бүл хөгжлийн газар”-т хийхээр болжээ. “Хүүхэд гэр бүл хөгжлийн газар” нь Улаанбаатар чуулгын байранд байрладаг. Энэ жилийн хувьд зуслангийн хаалтын үйл ажиллагааны үеэр “Хүүхдэд ээлтэй зуслан”-г шалгаруулж шагнахаар болжээ.

Амьд зөгийн шидээр биеийн өвчин зовиур нь илааршсан олон хүн манай сонинд хандан зөгийн эмчилгээний талаар олон нийтэд сурталчлан таниулж өгөхийг хүссэн билээ. Ингээд уншигчдын хүсэлтээр “Шидэт зөгий” сувиллын газрыг зорилоо. Тэднийх БЗД-ийн II хороо Сансарын Колонкын замын хойно байрладаг аж. Биднийг очиход “Шидэт зөгий” сувиллын эмч су­вилагчид найрсгаар угтан авч зөгийн эмчил­гээнийхээ талаар танилцуулав.

Хүн үүсэхээс өмнө зөгий байсан гэж дэлхийн эрдэмтэд судалгааныхаа үр дүнгээр баталжээ. Өөрөөр хэлбэр зөгий нь богино настай боловч үржих, амьдрах чадвар сайтай амьтан. Сая сая жилийн шалгуурыг давж чадаагүй олон амьтан устаж үгүй болсон ч харин зөгий үүссэн цагаасаа өдийг хүртэл байгалийн шалгуурыг давсаар ирж. Ул­маар хүн энэхүү өвөр­мөц амьтны үүрнээс “амтат бал”-ыг нээж, басхүү санамсаргүй байдлаар хатгуулснаар өвчин нь зүгээр болж байгааг анзаарч эхэлсэн цагаас зөгийг сонирхон судалжээ. XIX зууны гуравдугаар хагасаас эхлэн дэлхий нийтээр зөгийг шинжлэх ухаанчаар судалж эхэлсэн нь өнөөгийн амьд зөгийн эмчилгээ, сувилгаа үүсэх үндэс суурийг нь тавьсан юм байна. Энэ тухай анагаах ухааны докторант Ц.Хулан ярилаа. Тэрээр анх 2008 оноос амьд зөгийн эмчилгээг эх орондоо нэвтрүүлж, өвчтөнүүдийг эмчилж эхэлсэн аж.

Зөгийн хатгуур буюу хор нь эх зөгий болон ажилчин зөгийд байдаг булчирхайнаас ялгардаг даавар бөгөөд зөгий биеэ хамгаалах зорилгоор ялгаруулдаг юм байна. Тэрхүү бодисын 98 хувь нь өнөөгийн шинжлэх ухаанаар судлагджээ. Судлагдахууны 80 хувь нь уураг буюу хүний биед шаардлагатай амин хүчлүүд гэнэ. Жил ирэх бүр дэлхийн зөгийн судалгаа улам гүнзгийрч шинэ шинэ нээлтүүдийг хийсээр байгаа бөгөөд Хятадад хорт хавдрыг зөгийн хатгуураар эмчилдэг томоохон су­виллын газар бий болсныг тэрээр сонирхууллаа. Харин “Шидэт зөгий”-н хамт олон одоогийн байдлаар 10 гаруй нэр төрлийн өвчнийг зөгийн хатгуураар эмчилж байгаа юм байна. Тодруулбал, Үе мөчний өвчнүүд буюу остеохондроз, радикулит, шохойжих, яс ургах, нурууны суулт зэрэг өвчнийг эмчилж байгаа юм байна. Мөн зөгийн хатгуур нь зүрх судасны өвчний эсрэг гоц гойд нөлөө үзүүлдэг байна. Ялангуяа, даралт ихсэх, буурах, цус хар­валтын дараа нөхөн сэргээх эмчилгээ, гэмтлийн улмаас үүссэн өөрчлөлт, Мэдрэлийн гаралтай өвчлөл, саажилт, арьсны өвчлөл зэргийг гойд эмчилдэг гэнэ.

“Шидэт зөгий” сувилалд одоогийн байдлаар 6000 гурай өвчтөн хэвтэн эмч­лүүлжээ. Өвчтөнүүд ч зө­гийн эмчилгээ сувилгаанд сэтгэл хангалуун байдаг аж. Тухайлбал, Н.Тунгалаг-Эрдэнэ хэмээх бүсгүй хөл дээрээ хөлдүү мах унагаснаас үүдэн хөл нь мэдээгүй болж суга таяганд ороод байхдаа “Шидэт зөгий”-н шидээр эдгэжээ. Хөл дээрээ мах унагах үедээ бүсгүй жирэмсэн байсан бөгөөд хүүхдээ төрүүлэх хүртлээ олон эмнэлгээр явсан ч тусыг эс олж эмчилгээгүй гэсэн хариу сонсч байсан гэнэ. Түүний хөлийн булчин 10-ын бидон шиг болтлоо хавдаж, үхжээд ус шүүрч эхлэх хүртэл нь явсаар 2012 онд “Шидэт зөгий”-н сувилалд 15 хоног хэвтэн эмчлүүлээд хөл дээрээ боссон тухайгаа сэтгэл догдлон хүүрнэлээ. Харин энэ удаа тэрээр нөхрийнхөө зүрх судасны өвчлөлийг эмчлүүлж буй бөгөөд эргэлтээр ирж таарсан юм.

Мөн Төв аймгийн Дэлгэр­хаан сумаас ирж хоёр дахь удаагаа хэвтэн эмчлүүлж буй Д.Уртнасан гуайгаас эмчилгээний талаар асуухад “Шидэт зөгийн эмчилгээ надад маш их мэдрэмж өгч байгаа. Ёстой нэрэндээ таарсан шидтэй газар. Өмнө нь би мөлхөөгөөрөө ирсэн юм. Уг нь би өөрөө бариач хүн. Хүний өвчин зовиурыг өөртөө авчихдаг юм байлгүй, дөрвөн мөч янгинаж өвдөөд хөл дээрээ тогтож чадахаа болиод байсан юм. Харин энэ жил дахин сувилуулж байна. Хүн гэдэг өвчин зовиургүй болоод ирэхээр залуужсан мэт сэтгэгдэл төрдөг юм байна. Улам залуужих гээд ирсэн. Эмч, сувилагчдынх нь харилцаа их сайхан, дандаа хүний сэтгэл санааг өөд нь өргөж, залуужуулж байдаг газар байна даа” гэв.

“Шидэт зөгий” су­виллын захирал, ерөнхий эмч Ц.Хулангаас зөгийн эмчилгээний талаар зарим зүйлийг тодрууллаа.

-Эмчилгээнийхээ зөгийг тусгайлан тэ­жээдэг үү. Зөгий­нөөс сонголт хийдэг үү?

-19 мянган төрлийн зө­гийнөөс сонголт хийж авдаг. Азийн балт зөгийг ихэвчлэн эмчилгээндээ ашигладаг. Төв аймгийн Батсүмбэр сум, Сэлэнгэ аймгийн Шаамар сумын зөгийчдөөс зөгийгөө авдаг.

-Нэг курс эмчилгээ нь хэдий хэр хугацаатай байдаг юм бол?

-Насны зааг, эмчлэх зөгийн балны хэмжээ, өвчтөний биеийн онцлог зэргээс хамаарч эмчлэх хугацаа янз бүр. Энэ эмчилгээнд тогтсон, ягштал баримтлах зүйл гэж байхгүй. Тухайн өвчтөнийг судалж байж тааруулж хийдэг юм. Ерөнхийдөө нэг курс эмчилгээ10-15 хоног. Энэ хугацаанд үр дүн гарна.

-Зөгийг өөр ямар төр­лийн өвчний эмчилгээнд ашиглах боломжтой вэ?

-Үргүйдлийг эмчлэхэд ашигладаг. Манайхаар 20 гаруй хүн эмчлүүлээд жирэмсэлсэн. ОХУ-ын нэг эрдэмтэн дан үргүйдлийг судалдаг. Түүний судалгааг харахад богино хугацаанд буюу 4-7 сарын дараа жирэмслэх боломжтой гэж байсан. Ер нь анагаах ухааны бүх салбарт зөгийн эмчилгээг нэвтрүүлэх боломжтой.

-Энэ эмчилгээг хийх явцад эм, тариа зэргийг хавсарч хэрэглэж болох уу. Мөн гам барьдаг уу. Ямар нэг ардын эмчилгээ хийхэд эм, тариа хэрэглэхгүй гэдэг?

-Эмийг хавсарч хэрэг­лэж болдог. Ингэсэн то­хиолдолд үр дүн сайн гарна. Эмийн эм­чилгээгээ нөхөн сэр­гээхтэйгээ хавсарна гэ­сэн үг. Ингэхдээ нарийн мэргэжлийн эмчийн хяналтын дагуу хэрэглэхийг зөвшөөрдөг. Мэдрэлийн эмч нь энэ эмийг уугаарай гэсэн байхад манайд ирсэн тохиолдолд тухайн эмчийн бичсэн эмийг уулгахгүй гэж хорихгүй. Харин B-гийн төрлийн витаминууд, цус шингэлэх бэлдмэл хэ­рэглэхгүй. Түүнчлэн сүрьеэ, элэгний хатуурал, бөөр нь өвдөөд цусаар шээж байгаа үед энэ эмчилгээг хориглодог. Дэлхийн эр­дэмтдийн анхаарлыг татаж байгаа эмчилгээ бол энэ.

-Эмчилгээний яв­цад сөрөг үр дага­вар ажиглагдаж байсан уу?

-Тухайн хүнд эм­чил­гээ хийхийн тулд эхлээд сорил тавьж энэ эмчилгээ зохих эсэхийг шалгадаг. Тохирохгүй хүнд хийхгүй. Гэхдээ миний эмчилсэн хүмүүст одоогоор тохи­рохгүй гэсэн онош гараагүй. Би харшлыг ч гэсэн эмчилж болдгийг баталж чадсан. Хамгийн гол нь тун юм. Мөн хэдэн хатгалтыг хаана нь хийх вэ гээд эмчилгээний ур чадвар их шаарддаг. Түүнчлэн өвчтөнөө сайн ажиглах хэрэгтэй.

-Амьд зөгийгөөр хат­гуулж байгаа болохоор зөгийндөө яаж нөлөөлдөг вэ?

-Зөгий нэг хатгаад 6-12 цагийн дараа үхдэг. Хатгахдаа 40 гаруй төрлийн байгалийн гаралтай эрдэс бодисыг хүний биед шахаж өгдөг. Өөрөөр хэлбэл, ямар ч бодисоор орлогдохгүй амин хүчил, уураг гэсэн үг. Зөгий өөрөө богино настай, 45 хоног л амьдардаг.

-Шинжлэх ухаанд хү­чин мөхөсдөөд эмчлэх боломжгүй гэх өвчнийг анагаасан тохиодол бий юу?

-Манайд дүлий хүүхэд ирсэн. Хоёр ч газар шин­жилгээгээ явуулаад сонсгол орохгүй гэсэн оноштой байсан. Зөгийн эмчилгээ хийлгээд сонсдог болсон. Одоо сургуульд явж бай­гаа.

“Шидэт зөгий” су­виллын газрын утас: 99993420, 99053420

Г.ЛХАГВАДОРЖ