Монгол Улсын Шадар сайд У.Хүрэлсүхийн ажлын өрөөнд өнөөдөр Улсын онцгой зомиссынхон хуралдахаар тов тараажээ. Хурал 10.00 цагаас эхэлэх бөгөөд чухам ямар асуудал хэлэлцэх нь тодорхойгүй байна. Саяхан засгийн газрын хуралдаанаар Шадар сайдаар ахлуулсан Өвөлжилтөд бэлтгэх онцгой комиссыг байгуулсан. Тэрхүү комиссын анхны хуралдаан өнөөдөр болж байх магадлалтайг албан эх сурвалж тодотгож байлаа. Ирэх өвлийг өнтэй давах, бичин жилийн хаварт бэлтгэх гээд тус онцгой комисст хийх ажил мундахгүй их. Тиймээс ажлын төлөвлөгөөгөө боловсруулан, хийх ажлаа тодотгож байж мэдэх юм.
Саяхан нэг
“Өдрийн сонин”-ы лхагва гаригийн дугаар 16 нүүрээр хэвлэгдэн гарлаа. Өдрийн сурвалжлагаараа арван хувийн урьдчилгаа төлөөд орон сууцанд орох боломжийн талаар сурвалжиллаа. Ийн иргэд байрныхаа урьдчилгаа төлбөрийн 10 хувийг төлөх бол 20 хувьд нь Хөгжлийн банкнаас баталгаа гаргах бөгөөд зарим нэг асуудлыг шийдчихвэл энэ зээлийг өгч эхлэхэд арилжааны банк бэлэн аж. Гуравдугаар нүүрний “Баабар ингэж өгүүлэв“ буланд “Умард Солонгосын дэглэм хэнд хэрэгтэй вэ?” нийтлэл орсон бол нийгмийн анхаарал татсан, дуулиант гэмт хэргийн халуун мөрөөр үнэнийг илчлэн хүргэдэг долдугаар нүүрт “Сэлэнгэ ноёд” компанийн захирал Г.Буяндоржийн өмгөөлөгч Н.Ичинхорлоогийн ярилцлага багтлаа. Тэрээр өөрийн үйлчлүүлэгчийг С.Билэгтэд хөрөнгөө үрэн таран хийлгэсэн учраас Г.Буяндоржид хамаарах хэрэг нь иргэний хэрэг гэж үзэж, өөрийн байр сууриа илэрхийлсэн юм. УИХ-ын гишүүн, Төрийн байгуулалтын байнгын хорооны дарга А.Бакейтай ярилцаж, ээлжит бус чуулганыг зургаан сайдыг өөрчлөх гэж зарласан эсэхэд түүнээс хариулт авлаа. Тэрээр ээлжит бус чуулганыг Засгийн газрын бүрэлдэхүүнд өөрлөлт оруулах, МАН-ын зургаан сайдыг огцруулах гэж бус Эдийн засгийн ил тод байдлыг дэмжих, Эрүүгийн болон Зөрчлийн тухай хууль зэргийг батлахаар зарласан гэдгийг онцлов. Энэ талаарх дэлгэрэнгүйг ярилцлагаас уншаарай. 
Үндэсний цэцэрлэгт хүрээлэнгийн өнгө үзэмжийг сайжруулах, зам талбайн орчин тойрон, гадуурхи явган хүний замыг тохижуулах, автомашины зогсоол нэмж гаргах, бичил цэцэрлэгт хүрээлэнгийн иж бүрэн гэрэлтүүлэг хийх ажлыг Үндэсний цэцэрлэгт хүрээлэнгийн 46 га талбайд “Сарангэрэл сан” өөрийн хөрөнгөөр хийж гүйцэтгэхээр болжээ. Энэхүү сан нь Хуульзүйн сайд Д.Дорлигжав охины нэрээр нэрлэгдсэн сан аж.
“Дижитал” хамтлагийн ахлагч Ш.Батбаяр буюу Баавар нарт холбогдох давж заалдах шатны шүүх хурал өнөөдөр боллоо. Хуралд Баавар хорих ангиас онлайнаар оролцсон юм. Шүүх бүрэлдэхүүн Бааварын гаргасан гомдлыг хэлэлцэж, анхан шатны шүүхийн шийдвэрийг хэвээр үлдээлээ.
Өнөөдөр “Иргэний барилгын төлөвлөлтөд хөгжлийн бэрхшээлтэй хүний шаардлагыг тооцсон орон зай, орчин MNS 6055:2009 стандарт”-ын дагуу Баянгол дүүргийн Эрүүл мэндийн төвд ариун цэврийн өрөөг тохижуулан хүлээлгэн өглөө. Италийн Засгийн газрын бус АИФО байгууллага 5 сая төгрөгөөр санхүүжүүлэн гүйцэтгэгчээр Хөгжлийн бэрхшээлтэй иргэдийн “Түгээмэл хөгжил-бие даан амьдрах төв” ажилласан юм байна. Энэхүү ариун цэврийн өрөөнд ямар ч тэргэнцэртэй хүн өөрөө бие даан чөлөөтэй хөдлөх, бие засах боломжтойгоос гадна яаралтай тусламж дуудах хонхыг суурилуулан өгснөөрөө давуу талтай юм. Шалны гадаргуу нь чийгтэй байсан ч хальтарч гулгахгүй аюулгүй байдлыг стандартын дагуу бүрэн хангасан плитагаар хийснээс гадна угаалтуурыг энгийн угаалтуураас доор байрлуулсан нь тэргэнцэртэй хүн хэрэглэхэд саадгүй болсон байна. Уг ариун цэврийн өрөөг зөвхөн хөгжлийн бэрхшээлтэй иргэнээс гадна өндөр настан хэрэглэхэд боломжтой аж.
БНСУ-ын хэвлэлүүд өчигдөр Их Хурлын гишүүн Шим Ханг Бук хүчингийн хэрэгт холбогдон шалгагдаж байгаа талаар мэдээллэжээ. Шим Ханг Бук нь өнгөрсөн долоо хоногт нэгэн бүсгүйг зочид буудалд дуудан хүч хэрэглэсэн хэмээн хохирогч бүсгүй цагдаагийн газар мэдээллэснээр уг хэрэг шалгагдаж эхэлсэн талаар “Ёнхап” мэдээллэсэн байна. 
Монголын Бурхан шашны сүм хийдүүд нийслэлийн Засаг даргын Тамгын газартай хамтран энэ сарын 8, 9 – ний өдрүүдэд Хүй долоон худагт “Даншиг наадам – Хүрээ цам – 2015” наадмыг зохион байгуулах гэж байна. Наадмын өдрүүдэд үндэсний бөхийн барилдаан, хурдан морины уралдаан, үндэсний сурын харваа болох юм.
Монголын талбайн теннисний холбооноос зохион байгуулж байгаа насанд хүрэгчдийн улсын аварга шалгаруулах тэмцээн энэ сарын 7-9-ний өдрүүдэд Үндэсний цэцэрлэгт хүрээлэнд болох аж.