Нийслэлийн Хэрэглэгчийн байгууллагаас нийтийн тээврийг шинэ системд шилжүүлсэн “Цахим карт” үйлчилгээтэй холбоотойгоор үйлчилгээ, хэрэглэгчдээс ирүүлсэн санал хүсэлтийн талаар мэдээлэл хийлээ.
Улаанбаатар хотын хэмжээнд 700 мянган иргэн смарт картаар зорчих ёстойгоос 350 мянга орчим нь авчээ. Гэвч цаашид анхаарах асуудал олон аж. Тухайлбал, смарт картаа аваагүй бол есдүгээр сарын 1-нээс эхлэн 1000 төгрөгөөр зорчуулна гэсэн шийдвэр уян хатан биш. Нийтэд нь энэ системд шилжүүлэх нь зөв боловч одоогийн үйлчилгээний үнийг хоёр дахин нэмж 1000 төгрөг болгох нь иргэдэд хүндрэлтэй тусна. Өмнө явж байсан автобусны чиглэлийг өөрчлиж 16 чиглэлд богиносгосон ирээс явуулах болсон. Ингэснээр нэг ирээсээр хүссэн газартаа очдог байсан бол одоо гурван удаа дамжиж байж нэг газарт хүрдэг. Смарт картгүй бол ирэх сарын нэгнээс гурав дамждаг иргэн зөвхөн нэг талдаа 3000 төгрөг төлнө. Үүнээс болж, зорчигчид үнэгүй зорчих байдал руу шилжих зэрэг сөрөг үр дагавар гарч мэдэх тул чиглэлийг оновчтой болгох.
Ажилгүй болсон автобусны кондукторуудыг хянагчаар ажиллуулах. Мөн оюутнуудын смарт картыг яаралтай шийдэх. Хөдөөнөөс хотод ирсэн иргэд 1000 төгрөгөөр зорчих уу гээд асуудал их байгааг сануулж, энэ саналуудаа Нийслэлийн Тээврийн газарт хүргүүлэхээ мэдэгдсэн юм.
Урд шөнө нийслэлд зам тээврийн хэд хэдэн осол гарсан байна. БЗД-ийн нутаг Гачууртын зам, Баяндөхөмийн 20 дугаар гудамжны урд замд Х.Аксент маркийн автомашин онхолдож жолооч 28 настай эрэгтэй Г нас барж 2 хүн гэмтжээ.
Өнөө өглөө Сүхбаатар дүүргийн нутаг дэвсгэр, Чингисийн талбайн урд төв замд Pruis маркийн автомашин осолдож, хажуугаараа тогтжээ. Замын Цагдаагийн газар ослын шалтгааныг тодруулж байгаа учраас дэлгэрэнгүй мэдээлэл өгөх боломжгүй гэв. Харин ослыг харсан ойр орчмын эх сурвалжуудын ярьж байгаагаар машин ачигчдын балаг бололтой. Тэд хар өглөөгүүр хүний машиныг сэмхэн аччихаад зугтаж яваад ийн унагаасан ажээ. Машин ачигчид хариуцлагагүй олон удаагийн үйлдэл гаргаж, хүний эрхийг зөрчдөг гэх зэрэг гомдол иргэдээс байнга нийслэлийн Засаг дарга Э.Бат-Үүлд хаягладаг. Урьд нь нярай хүүхэд унтаж байсан машиныг ачиж, нэлээд асуудал үүсч байсан удаатай. Энэ мэт тэдний хариуцлагагүй үйлдлүүдийн талаар хотын удирдлага анхааралдаа авах цаг нь болжээ. 
Өнөө жил ургацынхаа 30 орчим хувийг алдах урьдчилсан мэдээ байгааг салбарын яам мэдээлж буй. Үүнээс болж, гурил, гурилан бүтээгдэхүүний үнэ өсч болзошгүй тариаланчид болоод гурил үйлдвэрлэгчид хэлж, нөөцөө базааж байгаа сурагтай. Харин Хүнс, хөдөө, аж ахуйн сайд Р.Бурмаа “Өнөө жил гурилын үнийг өсгөхгүй байх бодлого баримтална” гэсэн. Нөгөөтэйгүүр Монгол Улс дотоодод буудайн хомсдол үүсгэж, гурил болон гурилан бүтээгдэхүүний үнийг өсгөхгүйн тулд ОХУ-аас улаан буудай экспортлохоор төлөвлөөд байна. Тиймээ улаан буудайн дотоодын хэрэгцээнийхээ 30 орчим хувь буюу 100 мянган тонныг Оросоос импортлох ажээ.
Архангай аймгийн Засаг даргын урилгаар БНХАУ-ын ӨМӨЗО-ны Улаанхад хотын орлогч дарга Жин Хо Ши тэргүүтэй зочид төлөөлөгчид 8 дугаар сарын 24-28-ны хооронд ажлын айлчлал хийж байна.
УИХ-ын ээлжит бус чуулганыг ирэх есдүгээр сарын 7-нд зарлан хуралдуулахаар болсон гэх мэдээлэл бИй. Энэ талаар УИХ-ын Тамгын газрын ерөнхий нарийн бичгийн дарга Б.Болдбаатараас тодруулахад “Сайд нарын нэрийг өргөн мэдүүлэхийг хүлээж байна. Томилгоог хуулийн хугацаанд багтаан есдүгээр сарын 6-ны дотор шийдэх шаардлага байгааг УИХ-ын дарга албан бичгээр Ерөнхий сайдад хүргүүлсэн. Хэрвээ сайд нарын нэрийг өнөөдөр өргөн мэдүүлчихвэл УИХ-ын даргын дэргэдэх зөвлөл хуралдаад ээлжит бус чуулганы товыг тогтоочих боломжтой байгаа. Гэвч сайд нарын нэрийг мэдүүлэхгүй байна” гэсэн тайлбар өглөө.
Ерөнхийлөгч 2015 оны нэгдүгээр зарлигаараа 1945 оны Чөлөөлөх дайны ялалтын түүхт 70 жилийн ойг улс орон даяар тэмдэглэн өнгөрүүлэхийг Засгийн газарт чиглэл болгосон билээ. Уг зарлигийн дагуу Засгийн газрын тогтоол гарч ойд бэлтгэх, тэмдэглэн өнгөрүүлэх ажлын хэсгийг Батлан хамгаалахын сайд Ц.Цолмон ахлан ажиллаж байна. Ойг угтан түүхэн ялалтын үнэ цэнэ, цэрэг эрсийнхээ байгуулсан гавьяаг сурталчлах, мөнхжүүлэх, дайнд оролцогсод, ахмад дайчдадаа хүндэтгэл үзүүлэх, тэдний эх оронч сэтгэл, зүтгэлийг залуу хойч үедээ өвлүүлэх, улс түмний найрамдалт харилцаа, Зэвсэгт хүчний хамтын ажиллагааг баяжуулан хөгжүүлэхэд түлхэц өгөхүйц цогц арга хэмжээг авч хэрэгжүүлж байна. Ажлын хэсэг Чөлөөлөх дайны ялалтын түүхт 70 жилийн ойг улс орон даяар тэмдэглэн өнгөрүүлэх төлөвлөгөө гаргаж, олон ажлыг зохион байгуулж буй бөгөөд тэдгээрийн нэг хэсэг нь нийслэл болон Дорноговь, Сүхбаатар аймгуудад зохион байгуулж байгаа юм.