Month: June 2015

Замын хөдөлгөөний түгжрэл их байдгаас жолооч нар гүйцэж түрүүлэх, эсвэл
эгнээ байр руу дайрч орох, урсгал сөрөх тохиолдол их. Үүнээс үүдэн зам
тээврийн осол буурахгүй байгааг мэргэжлийн байгууллагынхан хэлдэг. Зам
тээврийн ослын шалтгааны 84, замын түгжрэлийн 70 хувь жолоочийн
буруугаас бий болдог гэсэн судалгааны дүн гарчээ.

Иймд жолооч бүрт найрсаг харилцааг бий болгох, бие биенээ хүндэтгэх
үзлийг төлөвшүүлэх зорилгоор Монгол, Японы аз жаргал нийгэмлэг төрийн
бус байгууллагаас санаачлан 21 хоногийн хугацаатай “Хөөрхөн жолооч” аян
эхлүүлсэн байна.

Аяны дүрэм маш энгийн аж. Хэрэв танд өөр нэг жолооч зам тавьж өгсөн бол
талархлаа дохионы хэлээр илэрхийлнэ. Тодруулбал, баярласнаа илэрхийлэх
бол ослын зогсолтын дохиогоо гурав анивчуулах бол уучлал илэрхийлэхдээ
ослын зогсолтын дохиогоо хоёр анивчуулах юм байна.

Мөн аяны хүрээнд Замын цагдаагийн газартай хамтран жолооч нарын дунд
сургалт зохион байгуулж, ёс зүйн хичээлийг жолооны дамжаа, Авто замын
удирдлагын төвөөр дамжуулан хийхээр болжээ. Аян зургадугаар сарын 24-н
хүртэл үргэлжлэх аж.

Энэ хугацаанд олон нийтийн санаа бодлыг “www.facebook.com/HuurhunJolooch” цахим хаягаар хүлээн авах юм байна.

Дашрамд, зам тээврийн ослын улмаас өнгөрсөн онд 150 гаруй иргэн амиа
алдаж, 5281 иргэн гэмтэл бэртэл авчээ. Амь насаа алдсан иргэдийн тоог
өмнөх 2013 онтой харьцуулахад 9.9 хувиар өссөн аж.

Монгол Улсын Их Хурлын дарга Зандаахүүгийн
Энхболд орон нутагт томилолтоор ажиллах үеэрээ /2015.06.07/ “Дарханы
төмөрлөгийн үйлдвэр” ХК-д ажиллав.

“Дарханы төмөрлөгийн үйлдвэр” ХК нь
Дархан-Сэлэнгийн бүсийн төмрийн хүдрийн орд газруудыг түшиглэн хэтдээ
ган бүтээгдэхүүнй үйлдвэрлэх зорилгоор байгуулагджээ. Одоо тус үйлдвэр
нь гангийн үйлдвэрлэл, уул уурхай гэсэн хоёр чиглэлээр үйл ажиллагаа
явуулж байгаа талаараа тус компанийн үйлдвэр хариуцсан дэд захирал
М.Баттөгс УИХ-ын даргад танилцуулав.

УИХ-ын даргаа эхлээд Баяжуулах үйлдвэртэй
танилцлаа. Тус үйлдвэр нь АНУ-ын TRIO, Герман-Хятадын хамтарсан SANME,
БНХАУ-ын ZENITH, АНУ-БНХАУ-ын хамтарсан ERIEZ MAGNETICS зэрэг дэлхийд
тэргүүлэгч компаниудын тоног төхөөрөмжүүдээр тоноглогдсон. Одоогоор
баяжуулах үйлдвэрүүдийн нийт суурилагдсан хүчин чадал жилийн 5 000 000
тоннд хүрчээ. Хуурай соронзон баяжуулалтаар 56 хувиас дээш төмрийн
агуулга бүхий бүхэл болон нунтаг баяжмалыг үйлдвэрлэж байгаа талаар
танилцуулсан юм.

Үүний дараа Төмөрлөгийн үйлдвэрлэлтэй
танилцав. Хаягдал төмөр боловсруулалт, Ган бэлдэц үйлдвэрлэлт, Цувимал
бүтээгдэхүүн үйлдвэрлэл үйл ажиллагаа явуулдаг байна. Хаягдал төмрийг
стандартын дагуу зүсч жижиглэн боловсруулж цахилгаан нуман зуухны түүхий
эд болгон ашиглаад, стандартын дагуу бэлтгэгдсэн хаягдал төмрийг
цахилгаан нуман зууханд хайлуулж 115х115мм хөндлөн огтлолтой ган бэлдэц
үйлдвэрлэдэг.

Цувимал үйлдвэрлэл нь стандартын шаардлага
хангасан ган бэлдэцийг дахин халаах зууханд халааж цувих суурь машинаар
дамжуулан цувиж барилгын төмөр бетон бүтээцийн иржгэр ган туйван,
гөлгөр ган туйван, булан төмөр зэрэг бүтээгдэхүүн үйлдвэрлэдэг талаар
тус компанийн Эдийн засаг хариуцсан захирал Ж.Эрдэнэбилэг танилцууллаа.

Үйлдвэрүүдийн үйл ажиллагаатай танилцах
үеэр УИХ дарга З.Энхболд “Засгийн газрын хөнгөлөлттэй зээлүүдээр
санхүүжиж байгаа бүтээн байгуулалтын ажлуудтай танилцаж байна. Дарханы
энэ үйлдвэр хаягдал төмөр дээр ажилладаг байсныг жинхэнэ эх орныхоо
түүхийн эдийг боловсруулдаг болгосон. Дарханы төмөрлөгийн үйлдвэрлэл
дээр хэрэгжиж буй энэ төсөл дуусах юм бол гаднаас төмөр импортлох
шаардлагагүй болох чухал ач холбогдолтой. Юуны өмнө импортыг орлох,
үүний дараа дэлхийн жишигт нийцсэн төмрийн хүдэр экспортлох зорилготой
юм” гэв. Эдгээр томоохон бүтээн байгуулалтын үр дүнд улс орны эдийн
засагт эерэг нөлөө үзүүлж, валютын урсгал зөв зохистой болно гэлээ.

УИХ-ын даргыг Дарханы төмөрлөгийн үйлдвэрт
ажиллах үеэр УИХ-ын Тамгын газрын Ерөнхий нарийн бичгийн дарга
Б.Болдбаатар, УИХ-ын даргын эдийн засгийн бодлогын зөвлөх Д.Лхагвасүрэн
болон албаны бусад хүмүүс ажиллаж байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Нийслэлд өчигдөр гал
түймрийн хоёр, орон нутагт гал түймрийн хоёр дуудлагатай байлаа. Үүнд:

Нийслэлийн Сүхбаатар дүүргийн 13 дугаар хорооны “Рашаан”-ы 10 дугаар
гудамжийн 627 тоотод баригдаж байсан эзэн нь тодорхойгүй байшин шатаж
байна гэсэн дуудлагыг 2015.06.06-ны өдрийн 14:34 цагт хүлээн авч Гал
унтраах, аврах 10 дугаар ангийн 6 албан хаагч;

Чингэлтэй дүүргийн 19 дүгээр хорооны “Майхан толгой”-н задгайд иргэн Д-н
байшин, 4 ханатай гэр шатаж байна гэсэн дуудлагыг 2015.06.07-ны өдрийн
01:42 цагт Сүхбаатар дүүргийн Онцгой байдлын хэлтсийн Гал унтраах, аврах
34 дүгээр ангийн 7 албан хаагч ажиллаж унтраасан. Уг гал түймэрт иргэн Д
/78 настай, эрэгтэй/ өртөж нас барсан.

Дорноговь аймгийн Замын-Үүд сумын 3 дугаар багийн “Нар”-ны 3 дугаар
гудамжийн 4 тоотод иргэн Э-н 4 ханатай гэр шатаж байна гэсэн дуудлагыг
2015.06.06-ны өдрийн 16:42 цагт хүлээн авч Гал унтраах, аврах 17 дугаар
ангийн 7 албан хаагч;

Баянхонгор аймгийн Баянхонгор сумын Номгон багийн нутагт иргэн Э-н 28-49
БНА улсын дугаартай “УАЗ” загварын суудлын автомашин шатаж байна гэсэн
дуудлагыг 2015.06.06-ны өдрийн 16:44 цагт хүлээн авч Гал унтраах, аврах
16 дугаар ангийн 5 албан хаагч тус тус ажиллаж унтраасан байна.

Нийслэлд 2015 онд 14 байршилд 96 тэрбум төгрөгийн зам барилгын ажил хийнэ.

Ингэхдээ
44.62 км авто зам, 453 метр урт гүүрийг шинээр барьж, 37.65 км авто зам,
134 метр гүүрийг өргөтгөж шинэчлэхээр төлөвлөсөн байна.

Авто замын
бүтээн байгуулалтын ажил энэ сарын 15-наас эхлэхээр бэлтгэл ажил
хангагдсан болохыг Авто замын газрын дарга Д.Нанзаддорж хэллээ.

Энэ жил
автозамын салбарт томоохон бүтээн байгуулалтын ажлууд өрнөх бөгөөд цар
хүрээ, ачаалал ихтэй замуудыг шинэчлэн засахаар төлөвлөсөн болохыг
албаныхан хэлсэн юм.

Тодруулбал,

Дамбадаржаагийн уулзвар-Шаргаморьтын төмөрбетон гүүр-Хандгайт чиглэлийн 16.35 км автозамын өргөтгөл, шинэчлэлт,
7 буудлын уулзвараас Чингэлтэйн эцэс хүртэл 3.3 км автозамын өргөтгөл, шинэчлэлт,
Улиастай-Гачууртын чиглэлийн 11 км автозамын засвар,
Гүнтийн даваа чиглэлийн замаас Ар гүнтийн зуслан хүртэл 7.36 км авто зам,
Өлзийт хороолол-Био комбинат-Шувуун фабрик чиглэлийн 9.06 км авто замын ажлууд энэ онд хийнэ.

Энэ жилийн
хувьд гол ачаалалтай замууд ачааллаа багасгахын тулд өргөтгөл
шинэчлэлийн ажил хийх бөгөөд хэсэгчилж хөдөлгөөн зохицуулалт хийх аж.
Тиймээс энэ талаарх мэдээллийг тухай бүрт нь хэвлэл мэдээллээр дамжуулан
өгөх болно гэдгийг Улаанбаатар хотын Цагдаагийн газрын Замын цагдаагийн
газрын дарга, хурандаа Ч.Жаргалсайхан хэлсэн юм.

Алтан хальс олон улсын андерграунд кино
наадам зургаадугаар сарын 6, 7-ны өдрүүдэд Монголын үндэсний их
сургуулийн кино театрт болж байгаа. Энэ жилийн хувьд Алтан хальс наадамд
нийт 43 орны 218 бүтээл бүртгүүлснээс Монголоос 25 бүтээл бүртгүүлсэн
байна. Харин уралдаант хэсэгт шалгарсан бүтээлүүдээс өнөөдөр шилдгийн
шилдгүүдийг тодруулах юм.

Түрүүлсэн бүтээлүүдэд Алтан хальс шагнал
– Цом ба 1,000,000 төгрөг ба Мельбурнийн андерграунд кино наадмын
(MUFF) сонголтын хороонд Австрали дахь Монголын элчин сайдын яам
илгээнэ. Мөн шүүгчдийн нэрэмжит тусгай шагнал, шилдэг хүүрнэлт кино,
шилдэг хүүрнэлт бус кино, шилдэг хүүхэлдэйн кино тус бүр 500,000
төгрөгөөр шагнана. Шагнал авсан таван бүтээлийг Австрийн хамгийн том
кино наадам Венийн кино наадмын (Viennale) сонголтын хороонд толилуулах
юм байна.

Сингапур улсад энэ оны тавдугаар сарын
30-нд нээлтээ хийсэн Азийн сурагчдын шатрын аварга шалгаруулах 11 дэх
удаагийн тэмцээн энэ өдрүүдэд үргэлжилж байна. Өчигдөр өндөрлөсөн блиц
тэмцээнд Монголын тамирчдаас 7 хүртлэх насны нээлттэй ангилалд
А.Очир-Эрдэнэ Алтан медаль хүртсэн бол Э.Азжаргал 4-р байрт шалгарав. 9
хүртлэх насны нээлттэй ангилалд Х.Тэмүүжин мөн 4-р байр эзэллээ. 11
хүртлэх насны нээлттэй ангилалд Ц.Тэнгис Алтан медаль хүртсэн бол охидын
ангилалд Г.Маралгуа мөнгөн медаль, Э.Удвал хүрэл медаль хүртэж,
Н.Цогзолмаа 5-р байрт шалгарлаа. 13 хүртлэх насны охидын ангилалд
О.Өлзийхишигжаргал 4-р байрт шалгарлаа. 15 хүртлэх насны нээлттэй
ангилалд Б.Гарьдмагнай Алтан медаль хүртсэн бол 17 хүртлэх насны
нээлттэй ангилалд Э.Болдоо хүрэл медаль, охидын ангилалд О.Жаргалмаа
хүрэл медаль тус тус хүртлээ.

Өнөөдөр стандарт төрлийн 7 дахь өрөг үргэлжилж байна.

Тулгар төрийн 2224, Их Монгол Улсын 809, Ардын хувьсгалын 94 жилийн ой, Үндэсний их баяр наадмыг зохион байгуулах Үндэсний хорооны дарга, Монгол Улсын Шадар сайд У.Хүрэлсүх Төв цэнгэлдэх хүрээлэн болон сур, шагайн харвааны талбайд ажиллан баяр наадмын бэлтгэлтэй танилцаад тулгамдсан ямар асуудал байгаа талаар салбар хорооны дарга нартай ярилцжээ.

Энэ жил 1,2 тэрбум төгрөгийн
санхүүжилтээр Төв цэнгэлдэх хүрээлэнд хиймэл зүлэг тавьж байгаа бөгөөд
Бөхийн холбооныхон энэ зүлгэн дээр туршилтын барилдаан хийлгэж,
халтиргаа, гулгааны асуудалгүй, бэртэл гэмтэл авах нь гайгүй гэж хэлжээ.

Одоогоор цэнгэлдэхийн талбайг бүрэн
бетондож дууссан бөгөөд зөөлөвч болон зүлэг дэвсэх ажил дутуу байгаа юм
байна.Наадмаар л бөх барилддаг биш жилийн дөрвөн улирлын туршид Төв
цэнгэлдэхийг ашиглалттай болгохоор зорьж байгаа гэж Шадар сайд хэлээд
энэ сарын 25-наас наадмын нээлтийн арга хэмжээний бэлтгэл эхэлнэ.
Тиймээс зургадугаар сарын 20 гэхэд хиймэл зүлгийг дэвсч дуусгах учиртай
гэж үүрэг болголоо.

Монгол-Хятадын бизнес уулзалт энэ сарын 8-9-ний өдрүүдэд Улаанбаатар хотноо болно.

Монголын үндэсний худалдаа аж үйлдвэрийн танхим, Гадаадын хөрөнгө оруулалтын газар ӨМӨЗО-ны Худалдааны газар, Худалдааг дэмжих хороотой хамтран зохион байгуулах юм байна.

Энэ удаагийн уулзалтаар хоёр талын холбогдох байгууллагын удирдлагууд ирж оролцон худалдаа эдийн засгийн мэдээлэл танилцуулга хийхээс гадна 15 салбарын 300 гаруй төлөөлөгч ирж оролцох аж.