Month: May 2015

Categories
мэдээ спорт

”Дэлхийн цом”-ын цуврал тэмцээн эхэллээ

2016 оны олимпийн эрх олгох буудлагын “Дэлхийн цом”-ын гурав дахь цуврал тэмцээн Герман улсын Мюнхен хотод өчигдөр эхэллээ. Уг тэмцээнд м анай улсаас О.Гүндэгмаа тэргүүтэй үндэсний шигшээ багийн 11 тамирчин оролцож байна.

Дэлхийн 87 орны 901 буудагчид олимпийн 10 дасгалд цэц мэргээ сорьж, “РИО-2016” олимпийн 24 эрх авна.

10 метрийн хийн урт бууны эмэгтэй, эрэгтэй дасгал эхний өдөр явагдлаа.

Хийн урт бууны эмэгтэй дасгалд нийт 143 буудагчаас ОУХМ Г.Нандинзаяа 11 дүгээр байрт, ОУХМ Ч.Нарантуяа 24 дүгээр байрт тус, тус орлоо.

Categories
мэдээ спорт

FIFA-гийн ерөнхийлөгчийн сонгууль өнөөдөр болно

FIFA-гийн ерөнхийлөгчийн сонгууль өнөөдөр болно Авлигын хэл ам, шалгалт мөрдлөгт автаад буй Олон улсын хөлбөмбөгийн холбоо (FIFA) өнөөдөр ерөнхийлөгчөө сонгоно. Ажиглагчид одоогийн тэргүүн Зепп Блаттерыг дахин сонгогдох эсэх дээр нэлээд эргэлзээтэй байр суурьтай байгаа ч зарим хэвлэлд бичсэнээр Блаттер тав дахь удаа энэ албан тушаалд саадгүй хүрнэ гэв. АНУ-ын мөрдөн байцаах алба FIFA-гийн эрх бүхий 11 удирдах албан тушаалтныг баривчлан саатуулж, авлига авсан байж болзошгүй хэрэгт буруутган шалгаж байгаа. Тэд 2018, 2022 оны ДАШТ-гийн сонгон шалгаруулалтад бусдын нөлөөнд автаж, авлига авсан байж болзошгүй юм. FIFA-гийн одоогийн ерөнхийлөгч Зепп Блаттер үүсээд буй асуудлын тухай “Нөхцөл байдлыг маш сайн ажиглаж байгаа. Гэхдээ хүн бүрийг нарийн хянаад байх боломжгүй” гэсэн юм. Энэ нь түүнийг өөрийн удирдлагад буй хүмүүсийг өмөөрч, тэдний талд байр суурьтай буйг илтгэж байна гэж зарим эх сурвалжид тэмдэглэжээ.

Categories
гадаад мэдээ

Кардашианы гэр бүл осолд оржээ

Реалити шоуны од Ким Кардашиан, Кхоли Кардашиан, Кули Женнер болон Норт Уэст нар зураг авалтад орохоор Монтана муж руу явах үедээ осолд орсон тухай “www.hollywoodlife.com” мэдээллээ. Жолоог Кхоли барьж явсан аж. Монтана мужид цаг агаар огцом хүйтэрч, цас бороо холилдон орж, үзэгдэх орчин тун муу байжээ.

Машин хурдны замаар явж байхдаа гэнэт гулгаж замын хашлага мөргөсөн байна. Азаар хэн ч гэмтэж бэртээгүй ч Ким сэтгэлээр их унаж, нөхөр Кейни Уэсттэй ярих үедээ уйлсан байна.

“Кардашианы гэр бүл ослоос амьд үлдлээ” гэх гарчигтай реалити шоу өчигдөр “HBO” телевизээр цацагдсан аж. Ким болон Норид санаа зовсон хүмүүст твиттер, фэйсбүүкээр сэтгэгдлээ илэрхийлж, тэдэнд урам хайрласан байна. Ким “Үнэхээр аймаар байсан. Ингээд л үхлээ гэж бодсон. Машин замын хашлага мөргөх үед Нори их айж, чангаар уйлсан. Охиндоо их санаа зовсон учир Кейнитэй ярих үедээ нулимсаа барьж дийлээгүй” гэж ярьжээ.

Categories
мэдээ улс-төр

Гадаад хэргийн сайд нар албан ёсны хэлэлцээ хийв

Монгол Улсын Гадаад хэргийн сайд Л.Пүрэвсүрэн, Унгар Улсын Гадаад хэрэг, худалдааны сайд Петер Сияяарто нар ганцаарчилсан уулзалт, албан ёсны хэлэлцээ хийлээ.

Хэлэлцээний үеэр Гадаад хэргийн сайд Л.Пүрэвсүрэн Монгол, Унгарын хооронд дээд, өндөр хэмжээний харилцан айлчлалууд тогтмолжиж, унгарын тал Улаанбаатар дахь Элчин сайдын яамаа сэргээн нээж байгаа нь хоёр талын харилцаа, хамтын ажиллагаа улам бүр өргөжин гүнзгийрч буйн илрэл болохыг тэмдэглэв. Энэхүү уламжлалт, найрсаг харилцаа, хамтын ажиллагааг боловсрол, байгаль орчин, хөдөө аж ахуй болон барилгын салбарт түлхүү хөгжүүлэхэд талууд санал нэгдэв.

“Дипломат болон албан паспорт эзэмшигчдийг визний шаардлагаас чөлөөлөх тухай Монгол Улсын Засгийн газар, Унгар Улсын Засгийн газар хоорондын хэлэлцээр”-ийг шинэчэн байгуулснаар хоёр улсын дипломат болон албан паспорт эзэмшигч иргэд 90 хүртэл хоног харилцан визгүй зорчихоор болов. Мөн Гадаад хэргийн сайд нар “Зөвлөлдөх уулзалтын механизмыг байгуулах тухай Монгол Улсын Гадаад хэргийн яам, Унгар Улсын Гадаад хэрэг, худалдааны яам хоорондын харилцан ойлголцлын санамж бичиг”-т гарын үсэг зурлаа.

Categories
мэдээ нийгэм

Элсэлтийн ерөнхий шалгалт ирэх сарын 18-нд эхэлнэ

Боловсролын үнэлгээний төвийн хэвлэл мэдээлэл хариуцсан мэргэжилтэн Ө.Төгөлдөрөөс Элсэлтийн ерөнхий шалгалт тойрсон асуудлаар тодруулга авлаа.

-Элсэлтийн ерөнхий шалгалт хэзээ эхлэх вэ. Ямар хичээл хэднээс хэдний хооронд үргэлжлэх вэ?

-Хэдэн хүн ЭЕШ өгөхөөр бүртгүүлэв. Бүртгэл дээр ямар асуудал гарав?

-20450 шалгуулагч орохоор бүртгүүлээд байна. Ямар нэгэн ноцтой алдаа гарсангүй. Яахав жил болгон нийтлэг гардаг буруу зураг оруулах, бүртгүүлэхдээ хувийн мэдээлэл дутуу оруулах зэрэг алдаа гарч цаг тухайд нь засуулсан байгаа.

-Энэ жилийн ЭЕШ-ын онцлог юу байна, Журамд ямар нэг өөрчлөлт оров уу?

ЭЕШ-ын журам дээр монгол хэл бичгийн шалгалттай холбоотой хэд хэдэн өөрчлөлт орсон. Үүнд:

-Монгол хэл бичгийн шалгалтад орох өмнөх онд төгссөн шалгуулагчдынбүртгэл Улаанбаатар хотын цагаар 2015 оны хоёрдугаар сарын 9-ний 09:00 цагт эхэлж, 2015 оны гуравдугаар сарын 09-ний 18:00 цагт дуусна. Хугацаа цагийг сунгахгүй ба нэмэлт бүртгэл хийхгүй болно.

-Энэ онд 12 дугаар анги төгсөж буй шалгуулагчид Монгол хэл бичгийн шалгалтад тусгайлан бүртгүүлэхгүй бөгөөд БҮТ-өөс бүх сурагчдын мэдээллийг баталгаажуулж бүртгэлийг хийнэ.

-Өмнөх оны шалгуулагчид заавал онлайнаар Монгол хэл бичгийн шалгалтын бүртгэлд хамрагдана.

-Монгол хэл бичгийн шалгалтыг хоёр удаа авна.

-Монгол хэл бичгийн шалгалтад хамрагдаж 400-гаас доош оноо авсан шалгуулагчид дахин Монгол хэл бичгийн шалгалтад хамрагдаж болно. (Дахин шалгалтанд 400-гаас дээш оноо авсанбуюу эхнийшалгалтад хамрагдаагүй шалгуулагчид орох боломжгүй)

-Монгол хэл бичгийн шалгалтын босго оноо 400 болсон.

-ЭЕШалгалтанд орохдоо авчирдаг байсан материал дээр МХБ-н шалгалтад тэнцэж ЭЕШ өгөх эрхтэй боллоо гэсэн эрхийн бичиг нэмэгдсэн.

Мөн орос хэл, англи хэлний хичээлүүдэд туршилтын шугамаар сурагчдын сонсоод ойлгох чадварыг шалгасан даалгавруудыг оруулж өгөх юм. Гэхдээ энэ нь шалгуулагчдын үндсэн дүн оноонд энэ жилийн хувьд нөлөөлөхгүй.

Бүртгүүлэгчид манай цахим хуудас болох www.eec.mn д нэвтэрч журмыг дэлгэрэнгүй байдлаар үзэж болно.

-Монгол хэл бичгийн хичээлээр дахин шалгалт болсон уу. Дахин шалгалтанд хэр олон хүн амжилт үзүүлэв?

Дөрөвдүгээр сарын 25-ны МХБ-н дахин шалгалтын бүртгэлд өмнөх шалгалтад тэнцээгүй 3293, шинээр нэмж бүртгүүлсэн болон шалгалтад ороогүй хэрнээ бүртгэлээ баталгаажуулсан 2170 шалгуулагч бүртгүүлснээс 570 орчим шалгуулагч шалгалтад тэнцээгүй.

-ЭЕШ-тад орохдоо юу анхаарах вэ, шалгуулагчид нийтлэг ямар алдаа гаргадаг вэ?

-Цаг барихгүй байх, бичиг баримт дутуу авчрах гэх зэрэг нийтлэг алдааг гаргадаг.

-Суудлын хуваарь яаж авах вэ?

-Суудлийн хуваарийг бүртгэлийн дугаар, нууц үгээ ашиглан www.eec.mn хаягаар нэвтэрч ороод өөрсдөө хэвлэж авна.

-Шалгалтын дүн хэзээ гарах вэ?

Энэ жилийн ЭЕШалгалтын журамд зааснаар бол:

4.1 ЭЕШ-ын дүн, оноо, жагсаалтыг 2015 оны долдугаар сарын 01-ний өдрийн 09:00 цагаас өмнө www.eec.mn веб сайтад байршуулан нийтэд зарласан байна.

4.22015 оны долдугаар сарын 05-наас өмнө шалгуулагчдын батламж хуудсыг тарааж дуусгасан байна.

-ЭЕШ-аар хэдэн оноо авч байж их, дээд сургуульд орох эрхтэй болох вэ?

-БСШУЯ-наас тавьж байгаабосго оноо 400 байгаа. Түүнээс дээш оноо авч байж л их, дээд сургуульд орно.

Б.Эгшиглэн

Categories
мэдээ эдийн-засаг

Ам.доллар 1917 төгрөг болжээ

Ам.долларын төгрөгтэй харьцах ханш сүүлийн нэг сарын турш суларсаар байна. Энэ долоо хоногийн эхэнд нэг ам.доллар 1935 төгрөгтэй тэнцэж байсан бол өнөөдрийн байдлаар 1917 төгрөгтэй тэнцэж байна. Ийнхүү ам.долларын ханш сулрах болсон шалтгаан нь Оюутолгойн далд уурхайн бүтээн байгуулалтын хөрөнгийн асуудал шийдэгдсэнтэй холбоотой. Албаныхны хэлж буйгаар ам.долларын ханш 1700 төгрөг хүртэл буурах боломжтой аж.

Categories
мэдээ нийгэм

Хүүхдийн баярын соёл, урлагийн арга хэмжээний нэгдсэн хөтөлбөр

Хүүхдийн баярын соёл, урлагийн арга хэмжээний нэгдсэн хөтөлбөр

Нийслэлийн Засаг даргын Тамгын газар
06 дугаар сарын 01-нд 11:00-14:00 цагийн хооронд “ХҮҮХДИЙН БАЯР” арга хэмжээг Чингис хааны нэрэмжит талбайд зохион байгуулна.

Үндэсний дуу бүжгийн эрдмийн чуулга
06 дугаар сарын 01-ний өдрийн 14:00, 16:00 цагуудаас Д.Ганболдын найруулга “Эрх цагаан унага” жүжгийг өөрийн тайзнаа тоглоно.

Улсын драмын эрдмийн театр
06 дугаар сарын 01-ний өдрийн 11:00, 13:00 цагуудаас К.Драгунская “Онц сурлагатнууд орохыг хориглоно” хүүхдийн жүжиг

Хүүхэлдэй театр
06 дугаар сарын 01-ний өдрийн 10:00 цагаас “Үлгэрийн баатрууд” парад
06 дугаар сарын 01-ний өдрийн 12:00, 14:00 цагаас Хүүхэлдэйн театрын тайзнаа Х.Андерсаны “Нугасны муухай дэгдээхэй” жүжиг
06 дугаар сарын 01-ний өдрийн 16:00 цагаас VIVA CITY хороололд Х.Андерсаны “Нугасны муухай дэгдээхэй” жүжиг тавигдана.

Үндэсний Цирк /АСА ЦИРК/
05 дугаар сарын 29-ний өдрийн 17:00 цагаас,
05 дугаар сарын 30-ний өдрийн 11:00, 14:00, 17:00,
05 дугаар сарын 31-ний өдрийн 11:00, 14:00, 17:00,
06 дугаар сарын 01-ний өдрийн 11:00, 14:00, 17:00 цагуудаас “Циркийн шилдэг үзүүлбэрүүд” тоглолт

Нийслэлийн Улаанбаатар чуулга
05 дугаар сарын 30, 31, 06 дугаар сарын 01-нд 11:00, 14:00, 17:00 цагуудаас “Бонгын аялал” тоглолт

Хүүхдийн номын ордон
05 дугаар сарын 29-нд 11:00 цагаас “Шидэт номын найзууд” уран уншлагын уралдаан
06 дугаар сарын 01-нд Нээлттэй хаалганы өдөр

Монголын хүүхдийн ордон
05 дугаар сарын 25-ны өдөр Зорилтот бүлгийн хүүхдүүдэд зориулсан урлагийн тоглолт, бэлэг гардуулах үйл ажиллагаа болно.
06 дугаар сарын 01-ний 14:00 цагаас Баярын тоглолт

Баянзүрх дүүргийн Засаг даргын Тамгын газар
06 дугаар сарын 01-ний өдөр 09:30 цагаас “Өргөө-2” кино театрт Дүүргийн “Хүүхдийнбаяр”-ын нэгдсэн арга хэмжээний нээлтийн үйл ажиллаагаа зохион байгуулна. Хүүхдүүдэд кино үзүүлнэ. Хороодод Хүүхдийн баярын арга хэмжээг зохион байгуулна.

Сүхбаатар дүүргийн Засаг даргын Тамгын газар
Чингисийн талбайд нэгдсэн арга хэмжээтэй хамтрах ба хороодоор хүүхдийн баярын арга хэмжээг зохион байгуулна.Хагас болон бүтэн өнчин хүүхдүүдэд гарын бэлэг гардуулна.

Баянгол дүүргийн Засаг даргын Тамгын газар
06 дугаар сарын 01-нд 11:00 цагаас УБ Паласт Хүүхдийн баярын арга хэмжээ болно.
06 дугаар сарын 01-нд 12:30 цагаас Баянгол дүүргийн ЗДТГ-аас УБ Палас хүртэл парад алхана.

Багануур дүүргийн Засаг даргын Тамгын газар
06 дугаар сарын 01-нд 11:00 цагаас төв талбайд Хүүхдийн баярын арга хэмжээ болно.

Багахангай дүүргийн Засаг даргын Тамгын газар
06 дугаар сарын 01-нд 11:00 цагаас төв талбайд Хүүхдийн баярын арга хэмжээ болно

Налайх дүүргийн Засаг даргын Тамгын газар
06 дугаар сарын 01-нд 10:00 цагаас төв талбайд Хүүхдийн баярын арга хэмжээ болно.

Хан-Уул дүүргийн Засаг даргын Тамгын газар
05 дугаар сарын 28-31-ний өдрүүдэд хороодод Хүүхдийн баярын арга хэмжээ зохион байгуулагдана.
06 дугаар сарын 01-нд 11:00 цагаас “Их Зайсан” цогцолборт “Оюуны Ундраа” групптэй хамтарсан Хүүхдийн баярын үйл ажиллагаа болно.

Чингэлтэй дүүргийн Засаг даргын Тамгын газар
06 дугаар сарын 01-нд 11:00 цагаас Тусгаар тогтнолын талбайд Хүүхдийн баярын арга хэмжээ зохион байгуулна.

Сонгинохайрхан дүүргийн Засаг даргын Тамгын газар
06 дугаар сарын 01-нд 11:00-15:00 цагийн хооронд хороодод Хүүхдийн баярын арга хэмжээг зохион байгуулна.

Үндэсний Соёл амралтын хүрээлэн
2015 оны 05 дугаар сарын 28-аас 2015 оны 06 дугаар сарын 04-ний хугацаанд “Гайхамшигт долоо хоног” арга хэмжээг Ихтайз, багатайз болон цэгийн хөтөлбөрөөр дамжуулан зохион байгуулна. Уг үйл ажиллагааг насны ангиллаар цирк, хүүхэлдэйн жүжиг, хүүхдийн урлагийн тоглолт, АХА, спортын тэмцээн, уралдаан зэрэг төрлүүдээр тус тус зохион явуулна.

Үндэсний цэцэрлэгт хүрээлэн
06 дугаар сарын 01-нд 11:00 цагт “Витафит” ХХК, ТВ-5 телевизтэй хамтран “Ундааны баяр” өдөрлөг ба бусад ивээн тэтгэгч байгууллагуудын нэрэмжит уралдаан, тэмцээнийг зохион байгуулна. Мөн номын худалдаа явагдана

Categories
мэдээ соёл-урлаг

С.Эрдэнэцэцэг, Далантай нар Солонгост тоглолтоо хийнэ

ҮДБЭЧ-ын нүүр царай болсон гавьяат жүжигчин С.Эрдэнэцэцэг, У.Далантай нар ирэх зургаадугаар сарын 5-7-ний хооронд Солонгост амьдарч байгаа монголчуудад тоглохоор болжээ.

Тэд өнгөрөгч дөрөвдүгээр сарын 15-нд “Монгол бөхийн өргөө”-нд тоглолтоо хийсэн юм. Тус тоглолтод МУГЖ С.Вандан, Д.Дуламсүрэн, МУГЖ С.Жавхлан, дуучин Г.Эрдэнэчимэг, МУСТА Д.Хишигбаяр, Р.Дэлгэрмаа, дуучин Д.Болд, Э.Чулуунчимэг гэсэн нийтийн дууны төлөөлөл болсон гэр бүлийн хос дуучид оролцож үе, үеийн хит болсон уран бүтээлээсээ толилуулсан билээ.

Categories
мэдээ спорт

Түр хорооныхон шүүхэд ханджээ

Монголын чөлөөт бөхийн холбоо /МЧБХ/-г шинэчлэн зохион байгуулах Түр хороо шүүхэд албан ёсоор ханджээ.

Хугацаандаа хуралдалгүй хэдэн жил өнгөрч байгаа Их хурлаа хуралдуулж, холбооны бүтэц зохион байгуулалт, үйл ажиллагаатай холбоотой тодорхой маргаантай асуудлуудыг цэгцэлж, албан ёсоор удирдлагаа сонгох зорилго агуулан байгуулагдсан Түр хорооныхон МЧБХ-нд Их хурал хуралдуулах тухай шаардах бичиг хүргүүлсэн ч одоо болтол энэ санаачилга ямар нэгэн үр дүнд хүрээгүй байна.

Тиймээс Түр хороо МЧБХ-той асуудлаар шүүхэд хандаж, асуудалд хуулийн дагуу хариу хүлээхээр болсон байна.

Шүүхэд хандсан үндэслэлийн гол агуулга нь Их хурал хугацаандаа хуралдаагүй тухай болон одоогийн холбооны бүтэц, удирдлага албан ёсных мөн эсэх, 2013 онд Монголын чөлөөт бөхийн холбооны үүсгэн байгуулагчдын хурал хуралдаж, холбооны дүрмийг өөрчилсөн нь хууль зөрчсөн эсэх зэрэг асуудал болон санхүүгийн зарим тоо баримттай холбоотой аж.

Тухайлбал, 2013 онд Монголд зохион байгуулсан Ази тивийн аварга шалгаруулах тэмцээний зардалтай холбоотой асуудал бий аж.

Засгийн газрын тогтоолоор эл тэмцээнийг зохион байгуулах зардлыг улсаас гаргасан бөгөөд тухайн үед нь олгоогүй ч тогтоолын дагуу заавал нөхөж олгох ёстой. Улсаас өгсөн мөнгө, гадаадаас ирсэн тамирчдын хураамж, ивээн тэтгэгчдийн мөнгө гээд энэ тэмцээний санхүүгийн тайлан болон 2013, 2014 оны тайланд тусгагдаагүй зарим асуудал, зөрүүтэй тоо баримтыг Түр хорооныхон шаардаж байгаа юм байна.

МЧБХ-ны эргэн тойронд өрнөж буй шинэ мэдээлэл гэвэл энэ амралтын өдрүүдэд чөлөөт бөхийн өсвөр үеийн “Asashoryu Cup-2015” анхдугаар тэмцээн Улаанбаатар хотноо болох гэж байна.

Харин холбоог шинэчлэн зохион байгуулах Түр хороог дэмжин, үзэл бодлоо илэрхийлж, гарын үсэг цуглуулж эхлээд буй шигшээ багийн багш, дасгалжуулагчид Орхон аймгийн “Олимп” бааз руу бэлтгэлд гарчээ.

Categories
мэдээ нийгэм

Динза, Цондоолой хоёрын адал явдалт шоу маргаашнаас эхэлнэ

Хүүхдүүдийн үзэх дуртай Динза, Цондоолой хоёрын адал явдалт театрчилсан шоу тавдугаар сарын 30, 31, зургадугаар сарын 1-ний өдрүүдэд “Crocus event hall”-д болох гэж байна. Энэ жилийн “Динза, Цондоолой үлгэрүүдийг аварсан нь” театрчилсан синтез шоу тоглолтын баатруудын дүрд Монголын хамгийн отгон продакшн “Эмоци хамтлаг” мөн Хөгжим бүжгийн коллежийн шилдэг сурагчид оролцон тоглохоор бэлтгэлдээ хэдийнэ оржээ.

Хар сүнснүүдэд хорлогдсон үлгэрч өвгөн үлгэрийн ертөнцийг өөрийн болгохыг хүсэж, санаагаа гүйцэлдүүлэхийн тулд үлгэрийн баатруудыг хорложээ. Яг энэ үед Динза, Цондоолой нар үлгэрийн ертөнцөд сэрлээ. Үлгэрийн үйл явдлыг нэг, нэгэнгүй мэддэг бяцхан баатрууд үлгэрүүдийг хэрхэн аврахыг хүүхдэдээ үзүүлэхийг хүсвэл “Динза, Цондоолой үлгэрүүдийг аварсан нь” шоу тоглолтыг зориорой.

Жил бүр “Ирмүүн” агентлагаас зохион байгуулдаг уг шоуны тасалбар 26 мянган төгрөгийн үнэтэй. Бас хүрэлцэн ирсэн хүүхэд бүрт ууттай бэлэг өгнө гэсэн. Бэлгэнд нь “Динза”, “Цондоолой, Цүндээлэй” комик номууд, төрөл бүрийн амттан багтаж байгаа ажээ. Тасалбар захиалах бол 99770707, 1900-1950, 1900-1188 лавлах дугааруудаар холбогдож, www.easyticket.mn веб сайтаар захиалга өгөх юм байна. Хэрвээ “Юнител”-ийн хэрэглэгч бол GG-гээ ашиглан 50 хувь хөнгөлөлт эдлэн тасалбараа авах боломжтой юм байна.