Month: April 2015

Сүхбаатар, Хэнтий, Дорнод аймгийн нутаг дэвсгэрийг хамарсан ойн түймэр гамшгийн хэмжээнд хүрээд байгаатай холбогдуулан түймрийн голомт дээр дайчлагдан ажиллаж байгаа цэргийн албан хаагчид, онцгой байдлын албаныхан, сумдаа хамгаалж буй ард иргэдэд хоол хүнс, эд материалын тусламж үзүүлэх хандивын аян салбарт бүрд өрнөж байгаа.

Энэ хүрээнд Хан-Уул дүүргийн Залуучуудын холбооноос “Боорцог” аяныг зохион байгуулж байгаа юм байна. Тэдний аянд тус дүүргийн ерөнхий боловсролын сургуулиудын сурагчид, залуу багш нарын зөвлөл, Хүнсний технологийн дээд сургуулийн багш оюутнууд нэгджээ.Мөн Хан-Уул дүүргийн ЗДТГ түүний дэргэдэх хэлтэс албадуудын ажилтнууд 3000-5000 төгрөг хандивлан боорцог хайрах тос бусад орцыг бэлтгэн өгсөн байна.

Аянд нэгдсэн залуус дүүргийн ерөнхий боловсролын сургуулийн сурагчдаас ирүүлсэн 2 тонн гурилаар боорцог хайрч байгаа аж. Одоогоор 60 шуудай боорцог хийсэн бөгөөд өнөө өглөө зүүн гурван аймгууд руу илгээсэн байна.

“Орон нутгийн хэвлэл мэдээллийн холбоо”-ноос зохион байгуулсан “Иргэний мэдэх эрх” сэдэвт орон нутгийн 100 сэтгүүлчийн уулзалт Төрийн ордны Иргэний танхимд боллоо.

21 аймгийн радио, телевиз, сонины сэтгүүлч, МСНЭ-ийн салбар зөвлөлийн дарга нар, аймгийн Засаг даргын Тамгын газрын хэвлэл мэдээлэл, олон нийттэй харилцах албаны ажилтнууд оролцсон энэхүү арга хэмжээнд Монгол Улсын Ерөнхий сайд Ч.Сайханбилэг оролцлоо.

Энэ үеэраймгийн радио, телевизийн нэвтрүүлгийг тухайн аймгийн сумдад хүргэх техникийн боломжийг бүрдүүлэх, аймгийн телевизүүдийн нэвтрүүлгийн тодорхой хэсгийг Улаанбаатарт цацах, орон нутгийн шуурхай мэдээллийг орон даяар дамжуулах эрхзүйн болон техникийн боломжийг бүрдүүлэх, сумын шуудангийн үйл ажиллагааг сумын захиргаа болон иргэдийн хяналтад оруулж, үйл ажиллагааг нь идэвхжүүлэхэд хамтарч ажиллахыг уриалсан юм. Мөн

төрийн мэдээллийн нээлттэй, ил тод байдлыг хангах чиглэлд орон нутгийн хэвлэл мэдээллийн байгууллага, ажилтнуудын үйл ажиллагааг дэмжинэ гэдгээ Ерөнхий сайд уулзалтад оролцохдоо илэрхийллээ.

ХУД-ийн Ахмадын хорооны ахмадын хөгжлийн төвөөс “Эрүүл насжилт” өдөрлөг арга хэмжээг зохион байгууллаа

ХУД-ийн Ахмадын хорооны ахмадын хөгжлийн төвийн 2 дугаар бүсээс “Эрүүл насжилт” өдөрлөг арга хэмжээг ахмад настнуудын дунд зохион байгууллаа. Тус өдөрлөг нь МУ-ын Засгийн газрын тогтоолоор батлагдсан Хүн амын насжилтын үйл явцад бэлтгэх, ахмад настаны аж байдлыг сайжруулах талаар баримтлах үндэсний стратеги бодлогын хэрэгжүүлэх хүрээнд “Эрүүл насжилт, насны эрүүл мэнд” үндэсний хөтөлбөрийн дагуу ахмадуудад тавих нийгмийн анхаарлыг дээшлүүлж, тэдний эрүүл мэндийг сайжруулах, хөдөлгөөний ач холбогдлыг сурталчилж, байгаль орчиноо танин мэдэх, хамгаалахад зорилготой юм. “Эрүүл насжилт” өдөрлөг өнөөдөр 34-р сургуулийн урлагийн зааланд болж өдөрлөгт дүүргийн Ахмадын хорооны дарга Л.Хадбаатар болон бусад албаны хүмүүс оролцлоо. Тус өдөрлөгт Яармагийн бүсийн ахмадууд баг болон “Биеийн хэлбэрийн шүлэглэл” хийн дасгалын үзүүлбэрээр тэмцээн зохиож оролцлоо.

Иргэд, аж ахуйн нэгжүүд эзэмшил газартаа дур мэдэн гүний худаг гаргахгүй байхыг анхааруулж байна

Сүүлийн жилүүдэд иргэд болон аж ахуйн нэгжүүд дур мэдэн эзэмшил газартаа гүний худаг гаргаж, төр болон хувийн хэвшлийн хөрөнгөнд хохирол учруулах зөрчил гарсаар байна. энэ сарын 23-ны өдөр БЗД-ийн иргэн Мөнхболд дур мэдэн хашаандаа гүний худаг гаргахаар өрөмдлөг хийснээс ф800 мм-ийн ус дамжуулах шугамыг гэмтээсэн. Ингэснээр нийслэлийн зүүн талын хэрэглэгчдийг усан хангамжийг тасрах нөхцөл үүссэн юм. Энэхүү гэмтлийг Баянзүрх дүүргийн Замын цагдаагийн ахмад Н.Отгонбаатар “Баянзүрх дүүргийн товчооны баруун талд маш их хэмжээний ус оргилж байна” гэж Нийслэлийн онцгой байдлын газар, Ус сувгийг удирдах газарт утсаар мэдэгдсэн. Мэдээллийн дагуу УСУГ-аас аваарийн бригад очиж шалгахад ф800 мм-ийн дамжуулах шугамыг иргэн Мөнхболд гүний худаг гаргах зорилгоор Ф125 голчтой өрөмөөр цоолж гэмтээсэн байжээ.

Гэмтлийн улмаас тухайн хэсэг усанд автаж, Баянзүрх дүүргийн Онцгой байдлын хэлтсийн Аврах ангийн нийт 12 албан хаагч ажиллав. Мөн УСУГ-аас Ус хангамж ашиглалтын албаны дарга Амарсанаа, Техник хяналтын хэлтсийн дарга Батхишиг, Шуурхай зохицуулалтын албаны дарга Давгасүрэн нараар ахлуулсан аваарийн бригад 3 техник, 33 хүний бүрэлдэхүүнтэйгээр ажиллаж засварласан. Засварыг 4 дүгээр сарын 24-ны өглөө 05 цаг 10 минутанд хийж дуусган, горим тохиргооны ажлыг хийсэн байна. Тухайн нөхцөл байдлаас үүдэж иргэдийн амь нас, эд хөрөнгөнд хохирол учраагүй ч 7 айлын хашаа усанд автсан байсныг соруулж хэвийн болгосон.

Тиймээс цаашид иргэд болон аж ахуйн нэгжүүд дур мэдэн эзэмшил газраа гүний худаг гаргаж нийслэлийн иргэдийн эрх ашгийг зөрчихгүй байхыг анхааруулж байна гэж Улаанбаатар хотын Шуурхай удирдлага зохицуулалтын төвөөс мэдээллээ.

“Алтанбулаг –Улаанбаатар-Замын Үүд” чиглэлд баригдах 1000 км хурдны авто замын трасс энэ сарын 2-ны өдөр батлагдсан юм. Уг замын трасс нь зургаан аймгийн 24 сум, Улаанбаатарын хоёр дүүргийн нутаг дэвсгэрээр дайран өнгөрөхөөр тогтоогдсон билээ.

Тэгвэл өчигдөр буюу энэ сарын 24-ны өдөр Зам тээврийн яамны төрийн нарийн бичгийн дарга Ж.Бат-Эрдэнэ хурдны авто замын трасс дайран өнгөрч буй зургаан аймгийн засаг даргад албан бичиг илгээжээ. Тодруулбал, Засгийн газрын 399 дүгээр тогтоолын гуравдугаар заалтын биелэлтийг хангах ажлын хүрээнд “Хурдны авто замын зурвас газрыг концесс эзэмшигчид олгох тухай” албан тоотыг хүргүүлсэн байна.

Уг хурдны авто замын трасс батлагдахдаа 97 км хэсэгт дутуу батлагдсан бөгөөд Засгийн Газар тун удахгүй шийдэж өгөх аж. Ингэснээр тус хурдны автозамыг барих хөрөнгө оруулалт бүрэн шийдэгдэж, ажил нь жигдрэх юм байна. Өнгөрсөн жилээс эхлэн өдий хүртэл яригдсан “Алтанбулаг-Улаанбаатар-Замын Үүд” чиглэлийн хурдны авто зам баригдах нь тодорхой болж байна.

Дашрамд дуулгахад, “Чингис лэнд девелопмент групп–Шинэ хөгжлийн зам” ХХК нь өмнөх Засгийн газрын үеийн Эдийн засгийн хөгжлийн яамтай “Алтанбулаг–Улаанбаатар–Замын-Үүд” чиглэлийн хурдны авто зам барих төсөл дээр концессийн Барих-ашиглах-шилжүүлэх нөхцлөөр 2014 оны гуравдугаар сарын 9-ний өдөр гэрээ байгуулсан билээ.

Өнгөрсөн хугацаанд техник эдийн засгийн үндэслэлээ боловсруулж, геотехникийн /геологи, геодези, гидрогеологи/ суурь судалгааны ажил хийж байсан аж. Энэхүү хурдны авто зам нь хоёр урсгал, зургаан эгнээтэй, нийтдээ 10-12 тэрбум ам.долларын хөрөнгө оруулалт шаардагдах урьдчилсан тооцоо гаргасан аж.

Төслийг хэрэгжүүлэгч компанийн хувьд хөрөнгө оруулалтыг олон улсын хөрөнгө оруулалтын сангууд, банк санхүүгийн байгууллагуудаас босгосон байна. Замын трасс батлагдаж, зам барилгын ажил удахгүй эхлэх тул ирэх сарын эхээр хөрөнгө оруулалтын эхний ээлжийн санхүүжилт орж ирэх гэнэ. Хөрөнгө оруулалтын 60-70 хувь нь замын барилгын ажилд, үлдсэн хэсэг нь зам дагуух бүтээн байгуулалтад зориулагдах аж.

Уг хурдны замыг дагаад худалдаа үйлчилгээний олон цэг мөн, амралт, аялал жуулчлал бизнесийн цогцолборууд, улмаар хэд хэдэн газарт шинэ суурьшлийн бүс, орчин үеийн эко хотууд босно. Өөрөөр хэлбэл Алтанбулаг, Замын-Үүд, Хөшигийн хөндийд худалдаа ложистикийн том төвүүд байгуулагдах юм.

Түүнчлэн Алтанбулаг–Улаанбаатар–Замын-Үүд чиглэлийн 1000 км хурдны авто замын хучилтын хийцийн төлөвлөлт, барих-арчлах-засварлах технологийг боловсруулах зөвлөх үйлчилгээний тендерт 6 орны 10 гаруй компани оролцох хүсэлтээ илэрхийлж материалаа ирүүлжээ.

Тухайлбал, Франц, Турк, БНХАУ, Энэтхэг, Польш, Монгол гэсэн орнуудад үйл ажиллагаа явуулдаг зам барилгын болон зураг төслийн зөвлөх компаниуд уг хурдны авто замд хучилтын хийцийн “бага зардлаар хамгийн чанартай барих технологийг” санал болгож эхлээд байгааг албаны хүмүүс хэлж байв.

Төслийг хэрэгжүүлэгч компанийн зүгээс замын хучилтын хийцэд бага зардлаар барьж, урт хугацаанд эвдрэл багатай, ашиглалтын үеийн засвар арчилгаа бага байх материал болон шинэ дэвшилтэт технологийг нэвтрүүлэх, ашиглахад анхаарах аж.

Хурдны замыг чанартай барьснаар өдөрт транзит тээврийн ачааны том оврын хэдэн мянган машин явахад эвдрэл гэмтэл гарахгүй гэсэн алсын хараа бий. Иймээс зөвлөх үйлчилгээний тендерт оролцох хүсэлтээ ирүүлсэн 10 гаруй компаниас сонгон шалгаруулалт хийж, ирэх сарын 15-аас өмнө жагсаалт гаргахаар болсон байна.

Нийслэлийн Иргэдийн Төлөөлөгчдийн хурлаар баталсан “Найрсаг Улаанбаатар” хөтөлбөрийн хүрээнд Монголын нэрт соён гэгээрүүлэгч, анхдугаар богд, өндөр гэгээн Занабазарын мэндэлсний 380 жилийн ойд зориулан түүний уран бүтээлээ туурвиж байсан Сарьдагийн хийдийн туурийн малтлагаас гарсан олдворуудаар тусгай үзэсгэлэн гаргах гэж байна. Сарьдагийн хийдэд хийсэн малтлага судалгааны явцад илрүүлсэн 1300 гаруй олдворуудаас дээжлэн 100 гаруй үзмэрийг 2015 оны 04 дүгээр сарын 27-ноос 05 дугаар сарын 28-ны хооронд Занабазарын нэрэмжит Дүрслэх урлагийн музейд дэлгэн үзүүлэх юм.

Төв аймгийн Эрдэнэ сумын нутаг Хийдийн Сарьдаг ууланд орших сүм сууринг Өндөр гэгээн Занабазар 1654 оноос эхлэн бариулж, 1680-аад онд дуусгасан нь Халхын шарын шашны төв “Төгс баясгалант Номын Их хүрээ” мөн хэмээн түүхчид үздэг.Өндөр гэгээн Занабазар бурханы шашныг дэлгэрүүлэхээр Монгол нутагт Баруун Хүрээ, Төвхөн, Номын Их Хүрээ, Зүүн Хүрээ зэрэг сүм хийдийг байгуулсан юм. Анхдугаар Богд Өндөр гэгээн Занабазар 1635 онд одоогийн Өвөрхангай аймгийн Зүйл сумын нутагт Түшээт хан Гомбодоржийн хоёрдугаар хөвүүн болон мэндэлжээ. 1639 онд Түшээт хан Гомбодорж, Сэцэн хан Шолой тэргүүтэй Халхын ноёд Ширээт цагаан нуурт чуулж, түүнийг 5 настай байхад нь Халхын бурхны шашны тэргүүнээр өргөмжилж, өөрсдийн харьяатаас 108 бандийг шавь болгож байв. Өндөр гэгээн нь Чингис хааны алтан ургийн язгууртан бөгөөд XVII зууны үеийн улс төр, шашны нөлөө бүхий зүтгэлтэн юм. Тэрээр ном эрдэмд гэгээрсэн хуврага төдийгүй уран баримал, зураг, уран барилга, яруу найраг зэрэг урлагийн төрлөөр мэргэшсэн уран бүтээлч юм. Занабазарын урласан “Хорин нэгэн дара эх”, “Цагаан, ногоон дара эх”, “Язгуурын таван бурхан” зэрэг бурхны баримлууд нь Монголд төдийгүй дэлхийд “Занабазарын хийц” гэдгээр алдаршжээ гэж Нийслэлийн Соёлын газраас мэдээллээ.

Ой хээрийн түймрийн нөхцөд байдлын талаар ХХАА-н сайд Р.Бурмаа мэдээлэл хийлээ.

Энэ сарын 18-нд Дорнод аймгийн Дашбалбар хилийн застав, Баян-Уул сумын хилийн 0275-р ангийн Ульхан заставаар ОХУ-аас хээрийн түймэр орж ирсэн.

Энэ түймэр өнөөдрийг хүртэл том бүсийг хамарч, Царам, Цагаан тэмээ, Зүрхний давааны ой модонд ассаар байна. Дээрх газруудаар салхины хурд 25 м/с байгаа тул түймрийн хурд ч нэмэгдэж, Баян-Уул суманд гамшгийн нөхцөл байдал үүсээд байгаа юм.

Түймрийг унтраахаар Онцгой байдлын болон цэргийн ангийн албан хаагчид, нутгийн иргэд шуурхай ажилласаар байна.

Мөн энэ суманд түймэрт өртөж хорогдсон малын тоо 2500-д хүрчээ. ХХАА-н сайд түймрийн голомтод ажиллаад өнөө өглөө ирсэн. Тэрбээр “Түймэртэй сумдад нөхцөл байдал улам хүндэрсээр байна. Энэ нөхцөлд Ус цаг уур, орчны шинжилгээний хүрээлэн, Батлан хамгаалах яам, ОБЕГ зэрэг байгууллагуудтай цаашид хэрхэн яаж хамтран ажиллах тухай саналаа хүргүүлэхээр болжээ. Мөн нутгийн иргэдэд тусламжийн цувааг илгээх шаардлагатай байна” гэж онцоллоо.

Засгийн газрын зүгээс түймэрт эд хөрөнгөө алдсан нутгийн иргэдэд нөхөн олговор олгох, малаа алдсан малчдыг малжуулах төсөлд хамруулах зэрэг арга хэмжээг авна гэсэн урьдчилсан мэдээллийг ХХАА-н сайд Р.Бурмаа нэмж хэллээ.

Тамхины хяналтын тухай хуульд нэмэлт, өөрчлөлт оруулсны дагуу ирэх долдугаар сараас тамхи татах цэгүүдийг нээхээр болоод байгаа аж. Энэ дагуу дүүргүүд хаана, ямар байршилд тамхи татах цэг нээхээ судалж эхлээд байгаа юм байна. Зарим дүүргийн хувьд эхнээсээ тамхи татах цэгүүдээ нээгээд эхэлчихсэн ажээ. Тэгвэл Чингэлтэй буюу хотын төвийн дүүрэг хаана тамхи татах цэг нээхээ хороодынхоо хурлаар шийдвэрлэхээр ажиллаж байна. амгийн гол нь хүн их явдаг газарт тамхины цэг нээх ёстой гэж үзнэ судалж байгаа ажээ.