Сүүлийн үед ой хээрийн түймэр олширч байгаа юм байна. Өмнө нь тал хээр нутгаар голчлон түймэр гарч байсан бол Архангай, Булган, Увс аймагт ч ой хээрийн түймрийн дуудлагатай өнжжээ. Сүхбаатар аймгийн Эрдэнэцагаан сумын долдугаар баг Арын хоолой гэдэг /сумаасаа зүүн хойшоо 45 км/ газарт хээрийн түймэр гарсан тухай мэдээллийг тус сумын Засаг даргын Тамгын газрын дарга Б гуравдугаар сарын 29-ний өдрийн 14:50 цагт хүлээн авчээ. Дуудлагын дагуу тус аймгийн Онцгой байдлын хэлтсээс 12 албан хаагч, АТА-иас 12 албан хаагч, сумаас 36 хүн, нийт-60 хүн, зургаан автомашинтай ажиллаж, өнөө өглөөний 6:45 цагт цурамд оруулсан байна. Түймэр унтраах ажиллагаа одоо ч үргэлжилж байна.
Мөн Архангай аймгийн Эрдэнэбулган сум нэгдүгээр баг Хавтгай /аймгийн баруун зүгт төвөөс 1.5 км/ модны энгэрт 2-3 хэсэг газар хээрийн түймэр гарч байна гэсэн мэдээллийг иргэн Н гуравдугаар сарын 29-ний өдрийн 18:20 цагт онцгой байдлын газарт өгчээ. Аймгийн Онцгой байдлын хэлтсээс 11 албан хаагч, сум орон нутгаас 12 хүн, нийт-23 хүн, гурван автомашинтай ажиллаж 18:50 цагт цурамд оруулж 20:00 цагт бүрэн унтраасан байна. Түймэр нэг га газрыг хамарсан бөгөөд гал алдаж түймэр гаргасан этгээдийг илрүүлсэн байна. 25 настай З гэгч нутгийн иргэн гал алдсан байжээ.
Харин Хэнтий аймгийн Дадал сумын Балж багийн “Шувуут” гэдэг /сумаас баруун хойд зүгт 30 км-т/ газарт гарсан хээрийн түймрийг унтраах гэж 114 хүн, 13 автомашинтай ажиллаж 18:50 цагт бүрэн унтрааж сумын Засаг даргын орлогч Б-д хүлээлгэн өгсөн байна. Булган аймгийн Баяннуур сумын хоёрдугаар багийн нутаг “Бор булан” гэдэг газар /сумын төвөөс зүүн хойд зүгт 22 км-т/ хээрийн түймэр гарсан байна. Түймрийг унтраахын тулд нийт 64 хүн, 8 техник хэрэгсэлтэйгээр ажиллажээ.
Увс аймгийн Тэс сумын наймдугаар багийн нутаг “Ногоон морин” гэдэг газар /сумаас зүүн өмнө зүгт 20 км-т/ хээрийн түймэр гарсан бөгөөд эл түймрийг сум орон нутгаас 25 хүн, нэг автомашинтайгаар шөнөжин ажиллажээ.
Засгийн газрын ээлжит хуралдаан өнөөдөр 16.00 цагт товлогджээ. Түүгээр нийт 17 асуудал хэлэлцэн шийдвэрлэх бол есөн асуудалтай танилцах юм байна.
Канадын “Air Canada” компанийн 138 хүнтэй “Airbus A320” онгоц Торонто хотноо газардах үедээ буух зурвасыг хэтэрч, осолджээ. Үүний дараа 23 хүнийг эмнэлэгт хүргэсэн бөгөөд хоёр хүнд яаралтай тусламж үзүүлжээ. Торонто хотоос ирсэн “AC624” нислэг орон Халифакс олон улсын нисэх буудалд газардахдаа буух зурвасыг хэтэрч, цахилгааны шон мөргөсөн аж. Ослын улмаас Халифакс олон улсын нисэх буудлын гэрэл, цахилгаан тасарсныг Нова Скоша мужийн цахилгааг шугам сүлжээний төвөөс сэргээн засварлажээ. Онгоц газардах үед шуургатай, буух зурвасын орчим цастай байсан аж.
Дэлхийн эмч нарын өдөр тохиож байгаатай холбоотой өнөөдөр 14:00 цагт МҮЭСТО-д “Алтан чагнуур” шилдэг эмч шалгаруулах ёслол болох гэж байна. 
Монгол Улсын Засгийн газрын XVIII ээлжит хуралдаан өнөөдөр 16.00 цагт Засгийн газрын хуралдааны танхимд болно.
Нийслэлийн Засаг дарга “Ноос боловсруулах үйлдвэрүүдийн талаар авах зарим арга хэмжээний тухай” А/230 дугаар захирамж гаргалаа. Захирамжаар Монгол Улсын Засгийн газрын болон Нийслэлийн Засаг дарга бөгөөд Улаанбаатар хотын Захирагчийн үйл ажиллагааны хөтөлбөрүүдийг хэрэгжүүлэх зорилгоор мэргэжлийн байгууллагуудын санал, дүгнэлтийн дагуу малын гаралтай анхан шатны боловсруулалт хийгээгүй ноосон түүхий эдийг Улаанбаатар хотод 2015 оны 04 дүгээр сарын 01-ний өдрөөс эхлэн оруулахгүй байх шаардлагатай арга хэмжээг авч, хэрэгжүүлж ажиллахыг нийслэлийн Мэргэжлийн хяналтын газар, Үйлдвэр, хөдөө аж ахуйн газар, Улаанбаатар хотын Цагдаагийн газар, Улаанбаатар хотын Цагдаагийн газрын Замын Цагдаагийн газарт тус тус үүрэг болголоо.
Тээврийн хэрэгслийн жолооч бэлтгэх сургалт, шалгалт авах, үнэмлэх олгох үйл ажиллагааг Замын цагдаагийн алба эрхлэн хариуцдаг. Гэвч жолооны курсын үйл ажиллагаа тус албаны үндсэн чиг үүрэгт нийцэхгүй байгаа юм байна. Замын хөдөлгөөний аюулгүй байдлын тухай шинэ хуулийн төсөлд уг асуудлыг мэргэжлийн боловсрол, сургалтын асуудал эрхэлсэн төрийн захиргааны төв байгууллага буюу Хөдөлмөрийн яам мэргэжлийн сургалтыг удирдлага зохицуулалтаар хангах зорилго бүхий төрийн бус байгууллагаар гүйцэтгүүлэхээр заажээ. Үүнээс гадна онолын мэдлэгийг иргэн бие дааж сурч болох, аюулгүй байдлын үүднээс дадлагыг заавал танхим, талбайд гүйцэтгэж сурдаг байх, шалгалтын мэдлэг, дадал чадварыг эзэмшсэнийхээ дараа боломжтой үедээ өгдөг байхаар төсөлд тусгажээ. Цаашлаад эрх сэргээхэд давтан шалгалт өгдөг байдлыг болиулж байгаа гэнэ.
Гаалийн ерөнхий газрын харьяа Замын-Үүд дэх гаалийн газар гаалийн байгууллагын үйл ажиллагааг сурталчилах, үйлчилгээний хүртээмжийг нэмэгдүүлэх, ил тод байдлыг хангах, гаалийн харилцаанд оролцогчдод хууль тогтоомжтой холбоотой мэдээлэл, зөвлөгөө өгөх, хууль сахилтын түвшинг дээшлүүлэх зорилгоор “НЭЭЛТТЭЙ ХААЛГАНЫ ӨДӨРЛӨГ”-ийг зохион байгууллаа. Энэ үйл ажиллагаанд тухайн өдөр гаалийн байгууллагаар үйлчлүүлж байсан иргэд ААНБ оролцсон юм. “НЭЭЛТТЭЙ ХААЛГАНЫ ӨДӨРЛӨГ”-ийн арга хэмжээний хүрээнд гаалийн хууль тогтоомжтой холбоотой ном, товхимол, гарын авлага, үзүүлэн таниулах материал, БТКУС-ын холбогдолтой бараа материал, Гаалийн зөрчлөөр илэрсэн зэрлэг амьтадын арьс, баавгайн савар, байгалийн үнэт чулуу, хар тамхи мансууруулах бодисын сургалтын хэрэгсэл, тоног төхөөрөмж, өнгөт тараах материал зэргээр үзэсгэлэн гарган, хилээр нэвтрэх зорчигчдод гаалийн хууль тогтоомж, өөрсдийн явуулж буй үйл ажиллагааны талаар чөлөөтэй мэдээлэл өгч байлаа.
Гуравдугаар сарын 30-ны өдрийг дэлхий нийтийн хэмжээнд эмч нарын эрхээ хамгаалах өдөр болгон тэмдэглэдэг. 1933 оны энэ өдөр Eudora Brown гэгч Америк эмч мэдээгүйжүүлэх тариа хэрэглэн өвчтөнд юу ч мэдрүүлэлгүйгээр хоолойн хавдрыг авсан аж. Энэ арга түүхэнд шинэ нээлтийг хийж мэс заслын шинжлэх ухаан хөгжсөн түүхтэй. 1991 онд АНУ-ын ерөнхийлөгчийн дэмжлэгтэйгээр гуравдугаар сарын 30-ны энэ өдрийг эмч нарын өдөр болгон тэмдэглэдэг болжээ. Олон улсын хэмжээний тэмдэглэлт энэ өдөр эмч мэргэжлээрээ бахархах, олон нийтэд таниулан сурталчлах, эдгэрсэн хүмүүс эмчдээ чин сэтгэлийн үгээ хэлдэг өдөр болгон өргөжүүлэн тэмдэглэсээр иржээ. Энэ өдрийг манай эрүүл мэндийн байгууллагууд өргөнөөр тэмдэглэж, эмч нартаа талархал илэрхийдэг байна.
Нийслэлийн хэмжээнд их хэмжээний цас орсноос инженер хангамжийн болон нийтийн үйлчилгээний байгууллагууд ачаалал өндөртэй ажиллаж байна. Цаг агаарын байдлаас шалтгаалж 24-н байршилд цахилгааны гэмтэл гарсныг “Улаанбаатар цахилгаан түгээх сүлжээ”ХК засварлаж байна. СХД 29-р хороо “Драгон” авто вокзал төвд цэвэр усны Ф 200мм-н шугамын цоорсныг Ус сувгийг удирдах газраас гагнуур хийж хэвийн ажиллагаанд оруулсан байна.